Ña̱ káʼa̱n Biblia xa̱ʼa̱: ná ñaʼá ná xóʼvi̱

“Tá ni̱xi̱yo loʼi̱ ndiʼi ki̱vi̱ xi̱kani ta̱ loʼo ki̱ʼvai̱ yi̱ʼi̱ ta xi̱kaʼa̱n ndi̱va̱ʼara xíʼin. Tá xa̱a̱ ti̱ndaʼíi̱ na̱ si̱soi̱ xi̱ ixandi̱va̱ʼana xíʼi̱n ta nda̱a̱ táki̱ʼva kéʼéna xíʼin iin ñá káchíñundáʼvi nu̱úna saá xi̱keʼéna xíʼi̱n. Xa̱ʼa̱ ña̱kán nda̱a̱ xi̱kuni̱i̱ kaʼníi̱ miíi̱” (ñá Madhu,a ñá íyo chí India).

Na̱ Organización Mundial de la Salud káʼa̱nna ña̱ iníísaá nu̱ú ñuʼú íxandi̱va̱ʼanína xíʼin ná ñaʼá. Ku̱a̱ʼání ná ñaʼá ni kúúná ná válí á ná xa̱a̱ náʼnu xa̱a̱ káninaná á xa̱a̱ kéʼéna ña̱ kini xíʼinná.

Tá xa̱a̱ ndo̱ʼún ña̱yóʼo sana túviún ña̱ kivi kanina yóʼó, ixandi̱va̱ʼana xíʼún á keʼéna ña̱ kini xíʼún tá ku̱a̱ʼún nda̱a̱ ndáaka lugar. Ta xa̱ʼa̱ ña̱ íxandi̱va̱ʼana xíʼin ku̱a̱ʼání ná ñaʼá sana xáún ndákanixi̱níún ña̱ va̱ása ndáyáʼviví ná ñaʼá nu̱ú na̱ yiví. Soo, ¿á ndixa ndíʼi̱-ini Ndióxi̱ xa̱ʼa̱ ná ñaʼá?

¿Ndáaña ndákanixi̱ní Ndióxi̱ xa̱ʼa̱ ná ñaʼá?

Ña̱ káʼa̱n Biblia: Ndióxi̱ “i̱xava̱ʼara ta̱a xíʼin ñaʼá” (Génesis 1:27).

Ña̱ kúni̱ kachiña: Ndióxi̱ kúú ta̱ i̱xava̱ʼa ta̱a xíʼin ñaʼá ta u̱vi̱ saána ndáyáʼvina nu̱úra. Káʼa̱nra xíʼin ta̱ ta̱a ta̱ xa̱a̱ ti̱ndaʼa̱ ña̱ xíniñúʼu kuʼvi̱-inira kunira ñá síʼira nda̱a̱ táki̱ʼva kúʼvi̱-inira xínira miíra, ta su̱ví nina ña̱ kúni̱ miíra keʼéñá ni va̱ása ka̱ʼa̱n ndi̱va̱ʼara xíʼinñá á kanirañá (Efesios 5:33; Colosenses 3:19). Ña̱yóʼo káxi náʼa̱ña nu̱úyó ña̱ ndáyáʼviní ná ñaʼá nu̱ú Ndióxi̱ ta va̱ása kúni̱ra ixandi̱va̱ʼana xíʼinná.

“Tá ni̱xi̱yo loʼi̱ na̱ táʼi̱n ke̱ʼéna ña̱ kini xíʼi̱n. Tá xi̱kuumiíi̱ 17 ku̱i̱ya̱ ta̱ xi̱kachíñui̱ nu̱ú ni̱ka̱ʼa̱nra xíʼi̱n ña̱ va̱ása taxikara chiñu ndaʼíi̱ tá ná kǒo ku̱su̱i̱n xíʼinra. Ta tá xa̱a̱ ku̱chéi̱, yiíi̱, na̱ yivái̱ ta saátu na̱ ndóo yatin xíʼi̱n va̱ása ní íxato̱ʼóna yi̱ʼi̱. Soo tá ni̱ya̱ʼa tiempo sa̱kúaʼi̱ xa̱ʼa̱ Jehováb ta̱ i̱xava̱ʼa miíyó. Ta ku̱ndaa̱-inii̱ ña̱ íxato̱ʼóníra ná ñaʼá. Tasaá ni̱xa̱i̱ ku̱ndaa̱-inii̱ ña̱ kúʼvi̱-inira xínira yi̱ʼi̱ ta ndáyáʼvii̱ nu̱úra” (ñá María, ñá íyo chí Argentina).

¿Ndáaña chindeétáʼan xíʼún ña̱ va̱ʼa kuniún?

Ña̱ káʼa̱n Biblia: “Íyo na̱ migo na̱ va̱ʼaníka kítáʼan xíʼinyó nu̱úka na̱ veʼeyó” (Proverbios 18:24).

Ña̱ kúni̱ kachiña: Iin na̱ ndixa kúú migoún kúú na̱ kivi chindeétáʼan xíʼún. Tá túviún ña̱ kivi chindeétáʼanña xíʼún, natúʼún xíʼin iin na̱ va̱ʼa kítáʼan xíʼún xa̱ʼa̱ ña̱ ndóʼún.

“Ki̱ʼva 20 ku̱i̱ya̱ va̱ása nínatúʼi̱n xíʼin nda̱a̱ ni iinna ña̱ ke̱ʼéna ña̱ kini xíʼi̱n. Xa̱ʼa̱ ña̱yóʼo va̱ása si̱í níxi̱yoi̱, xi̱ndi̱ʼi̱ní-inii̱ ta xi̱ndakavaní-inii̱. Soo tá na̱túʼi̱n xíʼin iin na̱ va̱ʼaní xi̱niso̱ʼo yi̱ʼi̱, va̱ʼaní ku̱nii̱” (ñá Elif, ñá íyo chí Turquía).

Ña̱ káʼa̱n Biblia: “Sandákoondó ndiʼi ña̱ sándi̱ʼi̱-inindó ndaʼa̱ Ndióxi̱, chi ta̱yóʼo ndíʼi̱ní-inira xa̱ʼa̱ndó” (1 Pedro 5:7).

Ña̱ kúni̱ kachiña: Tá káʼún xíʼin Ndióxi̱, ndixa xíniso̱ʼora ña̱ káʼún (Salmo 55:22; 65:2). Xa̱ʼa̱ ña̱ ndíʼi̱-inira xa̱ʼún kivi chindeétáʼanra xíʼún ña̱ kunda̱a̱-iniún ña̱ ndáyáʼvinívaún.

“Tá ki̱xáʼi̱ sákuaʼi̱ xa̱ʼa̱ Jehová, chi̱ndeétáʼanña xíʼi̱n ña̱ va̱ása xo̱ʼvi̱kai̱ xíʼin ña̱ ndo̱ʼi̱. Ta vitin va̱ʼa káʼi̱n xíʼin Ndióxi̱ ta káʼi̱n xíʼinra xa̱ʼa̱ ndiʼi ña̱ sándiʼi-inii̱. Nda̱a̱ táki̱ʼva íyo iin migoi̱ saá íyora chi va̱ʼaní kúnda̱a̱-inira xíʼin ña̱ ndóʼi̱” (ñá Ana, ñá íyo chí Belice).

¿Á ki̱xaa̱ iin ki̱vi̱ ña̱ va̱ása taxika Ndióxi̱ xo̱ʼvi̱ ná ñaʼá?

Ña̱ káʼa̱n Biblia: “Jehová... Viíní ndatiinra ku̱a̱chi xa̱ʼa̱ na̱ ni̱xi̱ʼi̱ yivá ta saátu na̱ xóʼvi̱, ña̱ va̱ʼa ná kǒo ixandi̱va̱ʼaka na̱ yiví xíʼinna” (Salmo 10:​17, 18).

Ña̱ kúni̱ kachiña: Ndáa si̱lóʼo kúma̱ní ta va̱ása taxika Ndióxi̱ ixandi̱va̱ʼana xíʼin ná ñaʼá.

“Va̱ʼaní ku̱nii̱ ta kǒo níndi̱ʼika-inii̱ tá ku̱ndaa̱-inii̱ ña̱ si̱lóʼo kúma̱ní ta va̱ása taxika Jehová ixandi̱va̱ʼana xíʼin ná ñaʼá ni kúúná ná válí á ná náʼnu” (ñá Roberta, ñá íyo chí México).

Ña̱ va̱ʼa kunda̱a̱ka-iniún ndáa ki̱ʼva chindeétáʼan Biblia xíʼún ña̱ kundatún iin ña̱ va̱ʼaka, ña̱ kandíxaún ña̱ káʼa̱nña ta saátu ndáa ki̱ʼva chindeétáʼan na̱ testigo Jehová xíʼún tiempo vitin, ka̱ʼa̱n xíʼin iinna ña̱ ná ku̱ʼu̱nna kotona yóʼó.

Tavá tutu yóʼo ña̱ va̱ʼa kaʼviúnña.