Tu̱ndóʼo ña̱ íyo nu̱ú ñuʼú | ¿Ndáaña keʼé Reino Ndióxi̱?

“Xa̱ʼa̱ ña̱ cambio climático, ku̱a̱ʼání tu̱ndóʼo íyo nu̱ú ñuʼú yóʼo. Ndíʼi-xa̱ʼa̱ ñuu, yuku̱ á inkaka ña̱ʼa ta ña̱yóʼo sándi̱ʼiníña-ini na̱ yiví. Tá kúú ña̱ ndeéní kúun sa̱vi̱, yáʼa tiempo ta ndeéka sándiʼi-xa̱ʼa̱rá veʼe na̱ yiví xíʼin ña̱ʼa ña̱ kúúmiína. Saátu tá mar, xa̱ʼa̱ ña̱ ndeéní niʼní, ku̱a̱ʼání nu̱ú kití tí ñúʼu ini mar nda̱a̱ kivi ndiʼi-xa̱ʼa̱rí” (ñá Inger Andersen, ñá kúú secretaria general adjunta de las Naciones Unidas ta saátu directora ejecutiva ña̱ Programa de las Naciones Unidas para el Medio Ambiente, 25 tí julio ku̱i̱ya̱ 2023).

¿Á ka̱ʼa̱n táʼan na̱ chíñu xa̱ʼa̱ ndiʼi tu̱ndóʼo ña̱ kúu nu̱ú ñuʼú yóʼo? Tá saá, ¿á kuchiñuna sandíʼi-xa̱ʼa̱na ndiʼi ña̱yóʼo?

Biblia káʼa̱nña xa̱ʼa̱ iin gobierno ña̱ kivi ndasavií ndiʼi tu̱ndóʼo ña̱ kúu nu̱ú ñuʼú yóʼo, káʼa̱nña xa̱ʼa̱ Ndióxi̱ ña̱ taxira iin reino á iin gobierno ña̱ kiʼin kuenta xíʼin ndiʼi ña̱ íyo nu̱ú ñuʼú yóʼo (Daniel 2:44). Tá xa̱a̱ ná kaʼndachíñu reino Ndióxi̱, va̱ása kooka na̱ yiví na̱ ixandi̱va̱ʼa xíʼin inkana ni na̱ sandíʼi-xa̱ʼa̱ ña̱ʼa ña̱ íyo nu̱ú ñuʼú yóʼo (Isaías 11:9).