Ña̱ 2023 xi̱kuuña iin ku̱i̱ya̱ ña̱ xi̱ndiʼiní-ini na̱ yiví | ¿Ndáaña káʼa̱n Biblia xa̱ʼa̱ ña̱yóʼo?

Ndiʼi ña̱ ku̱u tá ku̱i̱ya̱ 2023 nu̱ú iníísaá ñuyǐví náʼa̱ña nu̱úyó ña̱ ndixa kúú ña̱ xínu ña̱ káʼa̱n Biblia xa̱ʼa̱ tiempo ña̱ ndóoyó, ña̱ kúúña “ki̱vi̱ nu̱ú ndíʼi” (2 Timoteo 3:1). Koto ndáa ki̱ʼva kítáʼan ña̱ kúu tiempo vitin xíʼin ña̱ káʼa̱n Biblia xa̱ʼa̱ tiempo ña̱ ndóoyó.

Ña̱ káʼa̱n Biblia xíʼin ña̱ kúu iníísaá ñuyǐví

“Ta kuniso̱ʼondó ka̱ʼa̱nna xa̱ʼa̱ guerra” (Mateo 24:6).

•  “Ndeéníka ki̱xáʼa kanitáʼan na̱ yiví nu̱ú iníísaá ñuyǐví”.a

“Ndeéní ta̱an” (Marcos 13:8).

•  “Nani tá ki̱xáʼa ku̱i̱ya̱ 2023 ki̱ʼva 13 yichi̱ ndeéní ni̱ta̱an ta nda̱a̱ 7 grado ni̱xa̱a̱ña, ña̱yóʼo kúú ña̱ ndeéníka táan nani tá ki̱xáʼana kíʼinna kuenta xíʼin ña̱yóʼo”.b

“Kunina ña̱ʼa ña̱ ndeéní yi̱ʼvína xíʼin” (Lucas 21:11).

•  “Xa̱a̱ ya̱chi̱ví kíxáʼa niʼníní nu̱ú ñuʼú, soo vitin kúú ña̱ niʼníníka”. António Guterres, Secretario general ña̱ ONU.c

“Koo so̱ko” (Mateo 24:7).

•  “2023: Ña̱yóʼo xi̱kuu inka ku̱i̱ya̱ ña̱ i̱xayo̱ʼvi̱níña xíʼin na̱ yiví ña̱ taxina ña̱ kuxu na̱ veʼena”.d

“Koo tiempo ña̱ yo̱ʼvi̱ní ta kǒo kundeé-inina xíʼinña” (2 Timoteo 3:1).

•  “Nu̱ú u̱na̱ na̱ yiví iin na̱yóʼo kúúmií kue̱ʼe̱ ña̱ nda̱kava-inina”.e

¿Ndáaña ndátuyó koo ña̱ ku̱i̱ya̱ 2024?

Va̱ása xíni̱yó ndáaña kuu ña̱ ku̱i̱ya̱ 2024. Soo ña̱ xítoyó kúú náʼa̱ña nu̱úyó ña̱ si̱lóʼoní kúma̱ní ta Reino Ndióxi̱ ña̱ íyo chí ndiví kúú ña̱ kaʼndachíñu nu̱ú ñuʼúyó. Ta sandíʼi-xa̱ʼa̱ña ndíʼi ña̱ sáxo̱ʼvi̱ miíyó (Daniel 2:44; Apocalipsis 21:4).

Soo nani ndátuyó ña̱ kixaa̱ reino Ndióxi̱, chindeétáʼanvara xíʼinyó vitin ña̱ va̱ása ndi̱ʼiní-iniyó. Biblia káchiña:

“Tá yíʼvii̱, saá kúú ña̱ ndáaní-inii̱ yóʼó” (Salmo 56:3).

¿Ndáaña xíniñúʼu keʼéyó ña̱ na̱ʼa̱yó ña̱ ndáa-iniyó Ndióxi̱? Káʼa̱nndi̱ xíʼún ña̱ sákuaʼakaún ña̱ ka̱ʼa̱n Biblia xa̱ʼa̱ ña̱ koo chí nu̱únínu xa̱ʼa̱ iin ñuyǐví xa̱á nu̱ú va̱ása xo̱ʼvi̱kayó. Koto ndáaña sánáʼa̱ Biblia ña̱ va̱ʼa kunda̱a̱-iniún ndáaña xíniñúʼu keʼún ña̱ va̱ʼa ndakiʼún ña̱ káʼa̱n Biblia xa̱ʼa̱.