Na̱ chíñu kúni̱na ña̱ viíní kundooyó, ¿á kuchiñuna saxínuna ña̱yóʼo?

Iníí lugar íyo guerra ta kánitáʼanna, saá káa iníí satá ñuyǐví. Xa̱ʼa̱ ña̱yóʼo na̱ Naciones Unidas xíʼin inkaka organización ku̱a̱ʼa̱nna lugar nu̱ú íyo ku̱a̱chi ña̱ va̱ʼa chindeétáʼanna xíʼin na̱ yiví ña̱ va̱ʼa kǒo ku̱a̱chi koo. Ta̱ António Guterres ta̱ kúú secretario general ña̱ Naciones Unidas, ni̱ka̱ʼa̱nra ña̱yóʼo: “Iin tiʼvi loʼo na̱ yiví na̱ chíndeétáʼan xíʼin ña̱ Naciones Unidas kúú na̱ chindeétáʼan xíʼinyó ña̱ va̱ʼa kǒoka ku̱a̱chi koo nu̱ú ñuʼú yóʼo”.

Xa̱a̱ ku̱a̱ʼá ku̱i̱ya̱, sava ña̱ kéʼé na̱yóʼo chíndeétáʼanña xíʼin na̱ yiví ña̱ va̱ʼa táxi̱n kundoona. Tá kúú ndáana na̱ yiví, chíndeétáʼanna xíʼin inkana ña̱ ndikóna ñuuna, táxina ña̱ xíniñúʼu na̱ yiví ta ndásaviína ñuu nu̱ú íyo guerra. Soo ni kúni̱nína ña̱ vií kundoo na̱ yiví, íyo sava ña̱ʼa ña̱ kǒo kívi keʼéna. ¿Á kixaa̱ iin ki̱vi̱ ña̱ va̱ʼaní kundooyó? ¿Ndáaña káʼa̱n Biblia xa̱ʼa̱ ña̱yóʼo?

Ña̱ sási nu̱úna ña̱ va̱ʼa chindeétáʼanna xíʼin na̱ yiví xíʼin ña̱ káʼa̱n Biblia

Ña̱ sási nu̱úna: kǒo chíndeétáʼan xíʼin táʼanna. Na̱ chíñu xíʼin na̱ yiví xa̱ʼa̱ ña̱ xa̱a̱ síín síín ñuu ke̱ena kǒo xíínna chindeétáʼan xíʼin táʼanna, ta íxayo̱ʼvi̱ña xíʼinna ña̱ inkáchi kachíñuna chi iin tá iin na̱yóʼo síín íyo ña̱ ndíʼi̱-inina xa̱ʼa̱.

Ña̱ káʼa̱n Biblia: “Ndióxi̱ ta̱ íyo chí ndiví ndaka̱xinra iin ta̱ kaʼndachíñu [...]. Tá ná kaʼndachíñura, sandíʼi-xa̱ʼa̱ra ndiʼi na̱ chíñu yóʼo [...], ta iinlá ña̱ kaʼndachíñura kúú ña̱ koo ndiʼi tiempo” (Daniel 2:44).

Ña̱ sási nu̱úna: kúma̱níní ña̱ʼa nu̱úna ta kǒo ña̱ ndíchi kúúmiína. Ni kúni̱nína chindeétáʼanna xíʼin na̱ yiví ña̱ kǒo ku̱a̱chi koo, soo sava yichi̱ ku̱a̱ʼání na̱ yiví kǒo kúni̱na chindeétáʼanna xíʼinna, kúma̱ní xu̱ʼún ndaʼa̱na á inkaka ña̱ʼa ta xa̱ʼa̱ ña̱yóʼo kúú ña̱ íxayo̱ʼvi̱ña xíʼinna keʼéna ña̱ kúni̱na. Ta sava yichi̱ íxayo̱ʼvi̱ña xíʼinna chi i̱yoní lugar nu̱ú xáʼa̱nna chíndeéna na̱ yiví.

Ña̱ káʼa̱n Biblia: “Ndióxi̱ ta̱ kúú yivá tátayó Jesucristo [...] ta̱xira ña̱ koora chí ndaʼa̱ kúaʼara, ta ta̱yóʼo káʼnukara nu̱ú na̱ chíñu á nu̱ú na̱ kúúmií iin chiñu káʼnu á nda̱a̱ ndáaka na̱ xáʼndachíñu” (Efesios 1:17, 20, 21).

Jehová,a Ndióxi̱ ta̱ kúúmií ndiʼi ndee̱, ta̱xira ndiʼi ña̱ xíniñúʼu ta̱ Jesús chi ta̱yóʼo kúú ta̱ Rey ta̱ nda̱kaxinra kaʼndachíñu ti̱xin Reinora (Daniel 7:13, 14).b Ndióxi̱ ta̱xira ku̱a̱ʼání ndee̱ ndaʼa̱ ta̱ Jesús ta ta̱xira ku̱a̱ʼání ña̱ ndíchi ndaʼa̱ra, ta ni iin na̱ chíñu kǒo kúúmií ña̱yóʼo (Isaías 11:2). Ta̱ Jesús kúúmiíra ku̱a̱ʼání na̱ ángel na̱ kivi chindeétáʼan xíʼinra (Apocalipsis 19:14). Nda̱a̱ ndáaka ña̱ kúni̱ra keʼéra, keʼévaraña.

Ña̱ sási nu̱úna: sási na̱ chíñu nu̱úna. Na̱ kúni̱ chindeétáʼan xíʼin na̱ yiví ña̱ va̱ʼa kǒoka ku̱a̱chi koo, sava yichi̱ kǒo káʼa̱n káxína xíʼinna ndáaña xíniñúʼu keʼéna ta sava yichi̱ na̱ chíñu kǒo táxina permiso ndaʼa̱na. Xa̱ʼa̱ ña̱kán kǒo kíví chindeétáʼanna xíʼin ndiʼi na̱ yiví, ta kǒo xínu ndiʼi ña̱ kúni̱na.

Ña̱ káʼa̱n Biblia: “Ta ku̱yatin ta̱ Jesús nu̱úna ta ni̱ka̱ʼa̱nra xíʼinna: ‘Ndióxi̱ ta̱xi chiñu ndaʼíi̱ ña̱ kiʼi̱n kuenta xíʼin ndiʼi ña̱ʼa ña̱ íyo chí ndiví xíʼin ña̱ íyo nu̱ú ñuʼú yóʼo’” (Mateo 28:18).

Káxíníva káʼa̱n Jehová xíʼin ta̱ Jesús xa̱ʼa̱ ña̱ xíniñúʼu keʼéra ña̱ va̱ʼa sandíʼi-xa̱ʼa̱ra ndiʼi ku̱a̱chi (Juan 5:22). Ta̱ Jesús kǒo keʼéra nda̱a̱ táki̱ʼva kéʼé ña̱ chíñu na̱ íyo tiempo vitin, chi nina ña̱ nda̱kú keʼéra (Isaías 11:3-5). Xa̱ʼa̱ ña̱kán káʼa̱n ña̱ Biblia xa̱ʼa̱ ta̱ Jesús ña̱ kúúra “Ta̱ chíñu ta̱ táxi ku̱a̱ʼání ña̱ va̱ʼa”, ña̱kán viíní kaʼndachíñura (Isaías 9:6, 7).

Reino Ndióxi̱ kúú ña̱ taxi ña̱ va̱ʼa kundooyó

Na̱ kúni̱ chindeétáʼan xíʼin na̱ yiví ña̱ va̱ʼa kǒoka ku̱a̱chi koo, sana kiviva chindeétáʼanna xíʼin sava ñuu ña̱ ndiʼi-xa̱ʼa̱ ku̱a̱chi. Soo kǒo kuchiñuna sandíʼi-xa̱ʼa̱na ña̱ sákaku ku̱a̱chi yóʼo, ta ña̱yóʼo kúú ña̱ sáa̱-ini na̱ yiví xínitáʼanna.

“Tá ya̱chi̱ví xa̱a̱ íyo tu̱ndóʼo, ña̱kán kǒo kíví chindeétáʼanndi̱ xíʼin na̱ yiví ña̱ táxi̱n kundoona” (Ta̱ Dennis Jett, ta̱ xi̱kuu embajador ñuu Estados Unidos).

Síínníva íyo Reino Ndióxi̱, saáchi chindeétáʼanña xíʼin na̱ yiví ña̱ kǒo sa̱a̱ka-inina kunitáʼanna ta va̱ʼaní kundoona. Tá ni̱xi̱yo ta̱ Jesús nu̱ú ñuʼú yóʼo va̱ʼaní yichi̱ chi̱núura nu̱ú na̱ discípulora saáchi xíʼin tu̱ʼun ña̱ xi̱kaʼa̱nra ta saátu xíʼin ña̱ xi̱keʼéra ni̱na̱ʼa̱ra nu̱úna ña̱ xíniñúʼu va̱ʼa koo-inina xíʼin ndiʼi na̱ yiví ta saátu ña̱ kuʼvi̱-inina kuninana. Ná kotoyó sava ejemplo:

Ta saátu ni̱ka̱ʼa̱n ta̱ Jesús ña̱ ndiʼi na̱ koo ti̱xin Reino Ndióxi̱ kuʼvi̱ní-inina kunitáʼanna. Ta kǒo taxira koo na̱ sáa̱-ini xínitáʼan ti̱xin Reino Ndióxi̱. Káxiníva káʼa̱n Biblia xa̱ʼa̱ ña̱yóʼo:

Jehová i̱xava̱ʼa na̱ yiví, xa̱ʼa̱ ña̱kán xíni̱ra ndáaña keʼéra ña̱ va̱ʼa vií koona iníí ñuyǐví. Reino Ndióxi̱ keʼéña ña̱ kǒo kíví keʼé ndiʼi na̱ kúni̱ chindeétáʼan xíʼin na̱ yiví ña̱ va̱ʼa kǒoka ku̱a̱chi koo.