¿Ndáa míí kíʼin na̱ testigo Jehová xu̱ʼún ña̱ xíniñúʼuna?

Ña̱ va̱ʼa saxínundi̱ chiñu ña̱ kúúmiíndi̱, suvi miíndi̱ na̱ testigo Jehová kúú na̱ táxi xu̱ʼún ña̱ va̱ʼa kuniñúʼundi̱ña ta kǒo na̱ íxandúxa xíʼinndi̱ ña̱ keʼéndi̱ ña̱yóʼo.a Ta kivi taánna xu̱ʼún yóʼo ti̱xin caja válí ña̱ íyo ti̱xin salón nu̱ú xáʼa̱nndi̱ reunión, ta saátu xa̱a̱ síín síín ki̱ʼva kivi taxina xu̱ʼún nu̱ú sitio ña̱ jw.org ña̱ kúúmiíndi̱ nu̱ú Internet.

Nda̱a̱ ni iin na̱ kúú testigo Jehová kǒo káʼa̱nna xíʼinna nda̱saa xu̱ʼún xíniñúʼu taxina chi táxina nda̱saa ña̱ kúni̱ miívana. Ta ni kǒo ndúkúna xu̱ʼún nu̱úna ta saátu va̱ása kíʼinna iin táʼví xu̱ʼúnna ña̱ cháʼvina miína nu̱ú káchíñuna (2 Corintios 9:7). Nu̱ú kúúmiíndi̱ reunión kǒo kíʼinna xu̱ʼún ndaʼa̱ na̱ yiví ña̱ va̱ʼa ki̱ʼvina. Ta na̱ níʼi yichi̱ nu̱úndi̱ kǒo kíʼinna xu̱ʼún ña̱ va̱ʼa sandákuchina na̱ yiví, ni ña̱ ka̱ʼa̱nndosóna tá xíʼi̱ iin na̱ yiví, ni tá tíndaʼa̱ iinna á ni tá kéʼéndi̱ inkaka ña̱ʼa. Ta ni va̱ása íxi̱kóndi̱ comida á inkaka ña̱ʼa ña̱ va̱ʼa ndakayandi̱ xu̱ʼún. Saátu kǒo kéʼéndi̱ juego ña̱ naní bingo á ña̱ lotería, ni rifa, ni feria ni ña̱ xi̱kóndi̱ inkaka ña̱ʼa ña̱ kuxuna ña̱ va̱ʼa ndakayandi̱ xu̱ʼún, ta ni va̱ása káʼa̱nndi̱ xíʼin na̱ yiví ña̱ taxina xu̱ʼún ndaʼa̱ndi̱. Ta ni kǒo káʼa̱nndi̱ ki̱vi̱ na̱ táxi donación xíʼin inkakana (Mateo 6:2-4). Saátu nu̱ú sitio ña̱ kúúmiíndi̱ á nu̱ú tutu ña̱ távándi̱ va̱ása káʼa̱nña ña̱ íxi̱kóndi̱ ña̱ʼa.

Ndiʼi yo̱o̱, ti̱xin iin tá iin congregación ña̱ kúúmií na̱ testigo Jehová sáya̱ʼana iin anuncio xa̱ʼa̱ nda̱saa kúú xu̱ʼún ña̱ nda̱kaya̱na ta nda̱saa kúú ña̱ xi̱niñúʼuna ti̱xin iin yo̱o̱, ta ndiʼi na̱ ndátaka ti̱xin salón kúnda̱a̱-ini xa̱ʼa̱ ña̱yóʼo. Tá yáʼa loʼo tiempo íyo iin na̱ tává kuenta xíʼin xu̱ʼún ña̱ ndákayana ti̱xin congregación ta kíʼinna kuenta ña̱ vií ná kuniñúʼuna xu̱ʼún yóʼo (2 Corintios 8:20, 21).

Ki̱ʼva ña̱ kivi taxina donación

• Caja nu̱ú táanna xu̱ʼún: Kivi taún xu̱ʼún á cheque ini caja válí ña̱ íyo ti̱xin salón nu̱ú ndátakandi̱, saátu ti̱xin Salón ña̱ Asamblea á inkaka lugar nu̱ú ndákutáʼanndi̱.

• Kivi taxina donación nu̱ú Internet: Ku̱a̱ʼání país kivi taxina xu̱ʼún nu̱ú página yóʼo “Donar a los testigos de Jehová” ta kivi taxina xu̱ʼún xíʼin tarjeta ña̱ crédito á débito saátu kivi keʼéna iin transferencia á kivitu kuniñúʼuna inkaka ña̱ʼa.b Sava na̱ testigo Jehová ndáka̱xinna nda̱saa kúú xu̱ʼún ña̱ taxina yo̱o̱ tá yo̱o̱, ta íyo programa nu̱ú Internet ña̱ chíndaʼá mií xu̱ʼún ña̱ xa̱a̱ ki̱ndoona taxina yo̱o̱ tá yo̱o̱ (1 Corintios 16:2).

  

• Donaciones planificadas: Ña̱ va̱ʼa taxiún sava donación xíniñúʼu viíní keʼún ña̱yóʼo ta ná kooña nda̱a̱ táki̱ʼva káʼa̱n ña̱ ley. Ta ña̱yóʼo kivi chindeétáʼanña xíʼún ña̱ ndakiʼún ña̱ va̱ʼa ña̱ íyo país nu̱ú íyoún xa̱ʼa̱ ña̱ cháʼviún impuesto. Ku̱a̱ʼána nándukúna xa̱ʼa̱ ndáa ki̱ʼva taxina donación nani tákuna ta saátu ndáa na̱ kindo̱o xíʼin ña̱ʼa ña̱ kúúmiína tá ná kuvina. Kivi ka̱ʼún xíʼin iin na̱ testigo Jehová na̱ káchíñu Betel ña̱ íyo yatin nu̱ú íyoún, ña̱ va̱ʼa kunda̱a̱ka-iniún ndáa ki̱ʼva taxiún donación xíʼin ña̱ va̱xi yóʼo:

  • xu̱ʼún ña̱ kúúmiína banco

  • seguro ña̱ kúúmiína xíʼin xu̱ʼún ña̱ táxina ndaʼa̱na tá xa̱a̱ ni̱xi̱nu ku̱i̱ya̱ ña̱ ka̱chíñuna

  • bienes raíces

  • acciones xíʼin bonos

  • testamentos xíʼin fideicomisos

Tá kúni̱ún kunda̱a̱ka-iniún ndáa ki̱ʼva taxiún donación ñuu nu̱ú íyo, kivi ki̱ʼviún nu̱ú página yóʼo “Donar a los testigos de Jehová”.