¿Nda̱chun ña̱ ni̱xi̱ʼi̱ ta̱ Jesús cha̱ʼviña xa̱ʼa̱ ku̱a̱ʼánína?
Ña̱ káʼa̱n Biblia xa̱ʼa̱ ña̱yóʼo
Ña̱ ni̱xi̱ʼi̱ ta̱ Jesús kúú ña̱ xi̱niñúʼu Jehová ña̱ va̱ʼa ndatavára á sáka̱kura na̱ yiví ndaʼa̱ ku̱a̱chi xíʼin ña̱ xíʼi̱na. Biblia káchiña ni̱i̱ ta̱ Jesús kúú ña̱ xi̱niñúʼura ña̱ va̱ʼa cha̱ʼvira ña̱ sa̱kǎkura miíyó (Efesios 1:7; 1 Pedro 1:18, 19). Xa̱ʼa̱ ña̱yóʼo ta̱ Jesús ni̱ka̱ʼa̱nra ña̱ ki̱xira “kuvira xa̱ʼa̱ na̱ yiví ña̱ ndacháʼvira xa̱ʼa̱na” (Mateo 20:28).
Nda̱chun xi̱niñúʼu kuvira xa̱ʼa̱ ku̱a̱ʼánína
Ta̱a ta̱ nu̱ú i̱xava̱ʼa Ndióxi̱, ta̱ Adán kǒo ku̱a̱chi níxikuumiíra. Saátu kivi koora ndiʼi tiempo, soo va̱ása níkivika saáchi kǒo níkandíxara ña̱ ni̱ka̱ʼa̱n Ndióxi̱ (Génesis 3:17-19). Ndiʼi na̱ se̱ʼe ta̱ Adán nda̱kiʼinna ku̱a̱chi (Romanos 5:12). Xa̱ʼa̱ ña̱yóʼo Biblia káʼa̱nña ta̱ Adán nda̱a̱ táki̱ʼva íyo ta̱ ni̱xi̱kó mií saá íyora ta ni̱xi̱kóra ndiʼi na̱ se̱ʼera ndaʼa̱ ku̱a̱chi ta̱ saátu ña̱ xíʼi̱ (Romanos 7:14). Nda̱a̱ ni iinna va̱ása kivi ndakiʼin ña̱ sa̱ndíʼi-xa̱ʼa̱ ta̱kán saáchi miíyó na̱ yiví ku̱a̱chi kúúyó (Salmo 49:7, 8).
Ndióxi̱ ku̱ndáʼvi-inira xi̱nira na̱ se̱ʼe ta̱ Adán saáchi ndeéní tu̱ndóʼo íyo nu̱úna (Juan 3:16). Xa̱ʼa̱ ña̱ nina ña̱ va̱ʼa kéʼéra va̱ása kivi ixakáʼnu kuití inira xa̱ʼa̱na á koo káʼnu kuití inira xa̱ʼa̱na (Salmo 89:14; Romanos 3:23-26). Xa̱ʼa̱ ña̱ kúʼvi̱-inira xínira na̱ yiví ta̱xira se̱ʼera ña̱ va̱ʼa koo káʼnu-inira xa̱ʼa̱ ku̱a̱china ta saátu ña̱ ndiʼi va̱ʼa xa̱ʼa̱ña (Romanos 5:6-8). Ta xa̱ʼa̱ ña̱yóʼo kivi ka̱kuyó.
Ndáa ki̱ʼva íyo ña̱ sakǎkura miíyó
Nu̱ú Biblia tá káʼa̱nña xa̱ʼa̱ ña̱ sakǎkuna iin na̱ yiví káʼa̱nña xa̱ʼa̱ u̱ni̱ ña̱yóʼo:
Ña̱ cháʼvina (Números 3:46, 47).
Xa̱ʼa̱ ña̱yóʼo sáñá iin na̱ yiví á ndákiʼinna iin ña̱ʼa (Éxodo 21:30).
Ya̱ʼviña iin kítáʼanña xíʼin ña̱ cháʼvina xa̱ʼa̱.a
Ná kotoyó ndáa ki̱ʼva kítáʼan ña̱yóʼo xíʼin ña̱ cha̱ʼvi ta̱ Jesús xa̱ʼa̱yó.
Ña̱ cháʼvina. Biblia káchiña na̱ ndásakáʼnu Ndióxi̱ cha̱ʼvira xa̱ʼa̱na (1 Corintios 6:20; 7:23). Ta ña̱ cha̱ʼvira kúú ni̱i̱ ta̱ Jesús tasaá nda̱satára na̱ yiví koona kuenta Ndióxi̱ “ni nda̱a̱ ndáaka tribu kúúna, nda̱a̱ ndáaka tu̱ʼun káʼa̱nna ni kúúna na̱ ñuu válí á kúúna na̱ ñuu náʼnu” (Apocalipsis 5:8, 9).
Ni̱sa̱ñána. Xa̱ʼa̱ ña̱ ni̱xi̱ʼi̱ ta̱ Jesús kivi sa̱ñáyó nu̱ú ku̱a̱chi (1 Corintios 1:30; Colosenses 1:14; Hebreos 9:15).
Inkáchi íyoña. Ña̱ xi̱taku ta̱ Jesús ña̱ nda̱taxira xa̱ʼa̱yó inkáchi ni̱xi̱yoña xíʼin ña̱ xi̱taku ta̱ Adán tá kúma̱níka ki̱ʼvira ku̱a̱chi (1 Corintios 15:21, 22, 45, 46). Biblia káchiña: “Nda̱a̱ táki̱ʼva ni̱xa̱a̱ ku̱a̱ʼánína ndu̱una na̱ yiví ku̱a̱chi xa̱ʼa̱ ña̱ kǒo níkandíxa iin ta̱a [ta̱ Adán], saátu ku̱a̱ʼánína xa̱a̱na koona na̱ nda̱kú-ini xa̱ʼa̱ ña̱ ka̱ndíxa iin kuití ta̱a [ta̱ Jesús]” (Romanos 5:19). Xíʼin ña̱yóʼo kúnda̱a̱-iniyó xa̱ʼa̱ ña̱ ni̱xi̱ʼi̱ iin ta̱a kivi ka̱ku ku̱a̱ʼání na̱ kúúmií ku̱a̱chi. Ta̱ Jesús “nda̱taxi mií ña̱ va̱ʼa chaʼvira xa̱ʼa̱ ndiʼiyó” na̱ chíka̱a̱ ndeé ña̱ va̱ʼa ndakiʼinna ña̱ va̱ʼa xa̱ʼa̱ ña̱ ke̱ʼéra (1 Timoteo 2:5, 6).
a Tu̱ʼun ña̱ xi̱niñúʼuna tá ni̱ka̱ʼyi̱ Biblia ña̱ sándaya̱ʼana “sáka̱ku” ña̱yóʼo kivi kunda̱a̱-iniyó xíʼinña ña̱ cháʼviña xa̱ʼa̱ iin ña̱ʼa á ña̱ táxina xa̱ʼa̱ iin ña̱ʼa ña̱ ndáyáʼvi. Tá kúú tu̱ʼun hebreo kafár kúni̱ káchiña ña̱ “kasina” (Génesis 6:14). Ta ña̱yóʼo xíniñúʼukanaña ña̱ ka̱ʼa̱nna ña̱ kasina iin ku̱a̱chi na̱ yiví (Salmo 65:3). Ki̱vi̱ ña̱ kítáʼan xíʼin ña̱yóʼo ña̱ tu̱ʼun kófer káʼa̱nkaña xa̱ʼa̱ ña̱ kéʼéna ña̱ va̱ʼa saxínuna ña̱yóʼo, á ña̱ sándikóna iin ña̱ʼa á ña̱ sáka̱kuna iin ña̱ʼa (Éxodo 21:30). Ta saátu tu̱ʼun griego lýtron, ña̱ sándaya̱ʼana ña̱ “sáka̱kuna” ta saátu kivi sándaya̱ʼanaña ña̱ “ndáchaʼvina ña̱ va̱ʼa ndikó iin ña̱ʼa” (Mateo 20:28). Na̱ ka̱ʼyi̱ tu̱ʼun griego xi̱niñúʼuna tu̱ʼun yóʼo ña̱ va̱ʼa ka̱ʼa̱nna xa̱ʼa̱ ña̱ cháʼvina ña̱ va̱ʼa sa̱ñá iin na̱ ndíka̱a̱ veʼeka̱a á ña̱ sa̱ñá iin na̱ esclavo.