Chíndeétáʼanndi̱ xíʼin na̱ xóʼvi̱ tá kúú iin tu̱ndóʼo

Tá ku̱i̱ya̱ 2020 ku̱a̱ʼání tu̱ndóʼo ku̱u ta saátu ki̱xáʼa pandemia ña̱ COVID-19. ¿Ndáaña ke̱ʼé na̱ testigo Jehová ña̱ va̱ʼa chi̱ndeétáʼanna xíʼin na̱ ni̱ya̱ʼa nu̱ú tu̱ndóʼo?

Ku̱i̱ya̱ ña̱ servicio 2020,a na̱ Comité ña̱ Coordinadores na̱ Cuerpo Gobernante ni̱ka̱ʼa̱nna ña̱ kuniñúʼuna 28 millón ña̱ dólarb ña̱ va̱ʼa chindeétáʼanna xíʼin na̱ yáʼa nu̱ú tu̱ndóʼo. Ta xu̱ʼún yóʼo kúú ña̱ xi̱niñúʼuna ña̱ chi̱ndeétáʼanna xíʼin na̱ ni̱ya̱ʼa nu̱ú tu̱ndóʼo, ta ki̱ʼva 200 tu̱ndóʼo ku̱u iníísaá ñuyǐví, tá kúú ña̱ pandemia ña̱ COVID-19, ña̱ ndeéní ku̱un sa̱ví, ña̱ nda̱kutú ti̱kui̱í chí África, ña̱ kǒo ña̱ kuxuna chí Venezuela ta saátu ña̱ kǒo ti̱kui̱í chí Zimbabue. Xu̱ʼún ña̱ ta̱xina xi̱niñúʼunaña ña̱ va̱ʼa sa̱tána ña̱ kuxu na̱ hermano na̱ ni̱ya̱ʼa nu̱ú tu̱ndóʼo, ti̱kui̱í, nu̱ú koona, ti̱ko̱to̱na xíʼin ña̱ ku̱ʼu̱nna nu̱ú médico. Ta saátu xi̱niñúʼuna xu̱ʼún yóʼo ña̱ va̱ʼa sa̱tána inkaka ña̱ʼa ña̱ xi̱niñúʼu na̱ hermano yóʼo, ña̱ sa̱ndáʼana veʼena á ña̱ nda̱saxa̱ána sava edificio. Ná ka̱ʼa̱nyó xa̱ʼa̱ sava nu̱ú chi̱ndeétáʼanna xíʼin na̱ hermano tá ku̱u tu̱ndóʼo.

COVID-19. Iníísaá ñuyǐví, ña̱ pandemia yóʼo sáxo̱ʼvi̱ña na̱ hermano saáchi va̱ása kívi keena, ndákava-inina ta ni kǒo xu̱ʼún. Xa̱ʼa̱ ña̱kán xa̱a̱ ke̱ʼéna yáʼaka 800 na̱ Comité ña̱ Socorro ña̱ chindeétáʼanna xíʼinna. Na̱ comité yóʼo kíʼinna kuenta xíʼin ña̱ xíniñúʼu na̱ hermano ta káʼa̱nna xíʼin na̱ Comité ña̱ Coordinadores ña̱ ná chindaʼána ña̱ xíniñúʼu na̱ hermano.

Tá ku̱i̱ya̱ kán, na̱ Comité ña̱ Socorro chi̱ndeétáʼanna xíʼin ku̱a̱ʼánína ña̱ kuumiína ña̱ kuxuna, ti̱kui̱í, ta̱tán ta saátu inkaka ña̱ xíniñúʼuna. Ta sava ñuu chíndeétáʼanna xíʼin na̱ anciano ña̱ va̱ʼa ndakiʼinna ña̱ táxi na̱ Gobierno.

Chiñu ña̱ kéʼé na̱ ñuu Ndióxi̱ ña̱ chíndeétáʼanna xíʼin na̱ hermano, nda̱a̱ na̱ yiví na̱ va̱ása kúú testigo kíʼin kuenta xíʼin ña̱yóʼo. Tá kúú, ta̱ Field Simwinga ta̱ xáʼnda chíñu nu̱ú na̱ policía chí ñuu Nakonde (Zambia), ni̱ka̱ʼa̱nra ña̱yóʼo xíʼin na̱ hermano: “Nda̱a̱ táki̱ʼva íyo na̱ níká nu̱úndó saá íyondi̱ xa̱ʼa̱ ña̱ kamaní chi̱ndeétáʼanndó xíʼin sava na̱ familia na̱ yáʼa nu̱ú tu̱ndóʼo yóʼo”.

Kǒo ña̱ kuxuna chí Angola. Xa̱ʼa̱ ña̱ ndíka̱a̱ pandemia ña̱ COVID-19 kǒo va̱ʼa ña̱ʼa ña̱ kuxuna chí Angola, ta xa̱ʼa̱ ña̱yóʼo ya̱ʼviní ña̱ʼa. Xa̱ʼa̱ ña̱kán íxayo̱ʼvi̱ña xíʼin na̱ hermano ña̱ satána ña̱ kuxuna.

Ña̱kán ni̱ka̱ʼa̱nna xíʼin na̱ sucursal ña̱ íyo chí Brasil ña̱ ná chindeétáʼanna xíʼin na̱ hermano na̱ íyo chí Angola ña̱ ná chindaʼána ña̱ kuxu na̱yóʼo. Ña̱ va̱ʼa vií kuniñúʼuna donación ña̱ táxi na̱ hermano na̱ndukú va̱ʼana ndáa ki̱ʼva satána ña̱yóʼo, ta saátu ña̱ chindaʼánaña xa̱ʼa̱ ña̱kán nda̱kaxinna ña̱ ku̱a̱ʼání ña̱yóʼo sa̱tána. Ta iin iin ña̱ chi̱ndaʼána ndaʼa̱ na̱ hermano ve̱eña ki̱ʼva 20 kilo (44 libras) ta ña̱yóʼo xi̱kuumiíña arroz, nduchú, xíʼin aceite. Ta iin tá iin ña̱yóʼo cha̱ʼvina xa̱ʼa̱ña ki̱ʼva 22 dólar, ta nda̱a̱ tiempo vitin xa̱a̱ yáʼaka 33,544 ña̱yóʼo chíndaʼána, ta ki̱ʼva 654 tonelada kúúña (721 tonelada americana). Ndiʼi ña̱yóʼo xíʼin inkaka ña̱ íyo ñuu kán chi̱ndeétáʼanña xíʼin yáʼaka 50,000 na̱ yiví ña̱ kuumiína ña̱ kuxuna.

¿Ndáaña káʼa̱n na̱ hermano xa̱ʼa̱ ña̱yóʼo? Ta̱ Alexandre, ta íyo chí Angola káchira: “Xítoi̱ ña̱ kúʼvi̱ní-ini Jehová xínira yi̱ʼi̱ ta va̱ása íyo mitúʼi̱n ta saátu ndáyáʼviníi̱ nu̱ú na̱ ñuu Jehová”. Ñá Mariza ñá sákuaʼnu mitúʼun se̱ʼéñá káchiñá: “Jehová xi̱niso̱ʼora oración ña̱ ni̱ka̱ʼi̱n xíʼinra. Táxiní tíxa̱ʼvi ndaʼa̱ra ta saátu na̱ ñuura”.

Ña̱ kǒo ti̱kui̱í chí Zimbabue. Ku̱i̱ya̱ ña̱ servicio 2020 ndeéní yi̱chí ni̱xi̱yo chí Zimbabue ta ku̱a̱ʼání na̱ yiví nda̱a̱ si̱lóʼo kuvina xa̱ʼa̱ ña̱ kǒo ña̱ kuxuna. Ku̱a̱ʼá na̱ hermano va̱ása ku̱a̱ʼá ña̱ʼa kuxuna níxi̱yo.

Ke̱ʼéna 5 na̱ Comité ña̱ Socorro ña̱ va̱ʼa chindaʼána ña̱ kuxu na̱ hermano. Ku̱a̱ʼání na̱ publicador ka̱chíñuna ña̱ ta̱án viína ña̱ ku̱ʼu̱n kuxu na̱ hermano kán, ña̱ sandánaña satá carro ta savana nda̱a̱ ta̱xina carrona ña̱ va̱ʼa ku̱ʼu̱n ña̱yóʼo.c Servicio ña̱ ku̱i̱ya̱ 2020 xi̱niñúʼuna 691,561 dólar ña̱ va̱ʼa satána ña̱ kuxu ki̱ʼva 22,700 na̱ yiví.

Sava na̱ hermano xa̱a̱ ndi̱ʼi ña̱ kuxuna tasaá ki̱xaa̱ka ña̱ chi̱ndaʼána ndaʼa̱na. Ta na̱ hermano yóʼo ta̱xina tíxa̱ʼvi ndaʼa̱ Jehová ta sava na̱yóʼo nda̱a̱ xi̱tana ya̱a̱ ña̱ xítayó tá xíyo reunión.

Iin ñuu u̱vi̱ ná hermana na̱ va̱ása kúúmií yií ni̱xa̱ʼa̱nna reunión ñuu nu̱ú íyona, nu̱ú ni̱ka̱ʼa̱nna ndáa ki̱ʼva taxina ña̱ kuxuna ta na̱ taxi ña̱yóʼo kúú iin organización ña̱ va̱ása kítáʼan xíʼin na̱ Gobierno (ONG). Ta ti̱xin reunión kán ki̱xáʼana káʼa̱nna xa̱ʼa̱ ña̱ política, ta ná hermana yóʼo nda̱kaxinná ña̱ va̱ása keʼéná ña̱ káʼa̱nna xíʼinná. Tá xa̱ku̱a̱ʼa̱nná ndiʼi na̱ yiví yóʼo ku̱sikindaana na̱yóʼo ta ni̱ka̱ʼa̱nna xíʼinná: “Va̱ása ndikóndó ña̱ ndukúndó ña̱ kuxundó nu̱úndi̱”. Tá ni̱ya̱ʼa u̱vi̱ semana ni̱xa̱a̱ na̱ hermano ña̱ taxina ña̱ kuxu ná hermana ta ya̱chi̱ka ni̱xa̱a̱na nu̱ú na̱ (ONG).

Ña̱ chi̱ndeétáʼanna xíʼin na̱ hermano na̱ Zimbabue va̱ʼaní ni̱ka̱ʼa̱nna xa̱ʼa̱ na̱ ñuu Ndióxi̱. Ná ka̱ʼa̱nyó xa̱ʼa̱ ña̱ ndo̱ʼo ñá Prisca ñá íyo iin ñuu loʼo. Ni va̱ása níxi̱yo ti̱kui̱í ñuu kán ñá Prisca xi̱keeñá xi̱natúʼunñá xíʼin na̱ yiví xa̱ʼa̱ tu̱ʼun Ndióxi̱ ki̱vi̱ miércoles xíʼin viernes, nda̱a̱ tiempo tá xi̱taʼvína ñuʼú ña̱ chiʼina. Na̱ yiví na̱ íyo ñuu kán xi̱kusikindaanañá ta xi̱ka̱ʼa̱nna xíʼinñá: “Á kaʼnívaún na̱ veʼún xa̱ʼa̱ ña̱ xíkaún nátúʼun xíʼin na̱ yiví”. Ta ñá Prisca ni̱ka̱ʼa̱nñá xíʼinna: “Jehová va̱ása sándákoo ndaʼa̱ra na̱ káchíñu nu̱úra”. Soo tá ni̱ya̱ʼa loʼo tiempo na̱ ñuu Ndióxi̱ chindaʼána ña̱ kuxuñá. Sava na̱ yiví na̱ íyo yatin xíʼinñá nda̱kanda̱ní-inina tá xi̱tona ña̱yóʼo ta ni̱ka̱ʼa̱nna xíʼinñá: “Ndióxi̱ nda̱a̱ ni iin yichi̱ ta̱ʼán sandákoo ndaʼa̱ra yóʼó, kúni̱ndi̱ kunda̱a̱-inindi̱ xa̱ʼa̱ra”. Ta vitin u̱xa̱ na̱ íyo yatin xíʼinñá xíniso̱ʼona reunión ti̱xin radio.

Xa̱ʼa̱ ña̱ xa̱kunu̱mí ndiʼi xa̱ʼa̱ ña̱ íyo ñuyǐví yóʼo ku̱a̱ʼáka tu̱ndóʼo koo (Mateo 24:3, 7). Táxiníndi̱ tíxa̱ʼvi ndaʼa̱ndó xa̱ʼa̱ ña̱ táxindó donación nu̱ú ku̱a̱ʼá ki̱ʼva ña̱ va̱xi nu̱ú donate.jw.org. Ta ña̱yóʼo va̱ʼa kuniñúʼunaña ña̱ taxina ña̱ xíniñúʼu na̱ hermano na̱ yáʼa nu̱ú tu̱ndóʼo.