Ndáa ki̱ʼva chindeétáʼanyó xíʼinna nu̱ú kúu iin tu̱ndóʼo

Tiempo vitin ndeéní kúu tu̱ndóʼo. Tá kúú, ndeéní táan, ndeéní kúun sa̱vi̱ á kúu inka tu̱ndóʼo. Ta tá kúu iin tu̱ndóʼo táʼa̱n ña̱yóʼo xa̱a̱ íyo tu̱ʼva sava na̱ hermano ña̱ chindeétáʼanna xíʼinyó. Ña̱kán na̱ Cuerpo Gobernante ni̱ka̱ʼa̱nna xíʼin na̱ hermano na̱ íyo Betel ña̱ íyo iníísaá nu̱ú ñuʼú yóʼo ña̱ ná koo iin Departamento na̱ chindeétáʼan xíʼin na̱ yáʼa nu̱ú tu̱ndóʼo.

Tá kúnda̱a̱-ini na̱ hermano na̱ káchíñu ti̱xin departamento yóʼo ña̱ ku̱u iin tu̱ndóʼo, ndi̱ku̱n kama káʼa̱nna xíʼin na̱ anciano na̱ íyo ñuu nu̱ú kúu ña̱yóʼo ña̱ va̱ʼa kunda̱a̱-inina ndáaña xíniñúʼu ndiʼi na̱ hermano. Tá ndeéní ku̱u tu̱ndóʼo ñuu yóʼo ta na̱ hermano na̱ íyo ñuu yóʼo va̱ása kuchiñuna kitana nu̱úña, na̱ hermano na̱ íyo Betel ndi̱ku̱n kama káʼa̱nna xíʼin na̱ hermano na̱ xa̱a̱ íyo tu̱ʼva ña̱ ná ku̱ʼu̱nna chindeétáʼanna xíʼinna. Ta na̱ hermano na̱ chíndaʼá na̱ Betel yóʼo sana kuniñúʼuna ña̱ʼa ña̱ va̱ʼa chindeétáʼanna xíʼin na̱ hermano á sanatu xíniñúʼu satána ña̱ʼa ta xaxánaña nda̱ʼa na̱ hermano.

Va̱ʼaníka kána chiñu tá xíniso̱ʼoyó na̱ hermano na̱ chi̱ndaʼá na̱ Betel. Tá kúú, sana loʼoka na̱ yiví kuniñúʼuna, sana va̱ása koo ku̱a̱chi, loʼo xu̱ʼún kuniñúʼuna á saátu loʼo ña̱ʼa kuniñúʼuna, chi tá ná keʼéyó ña̱ kúni̱ miíyó sana va̱ása vií kana chiñu.

Na̱ hermano na̱ chíndaʼá na̱ Betel kivi ka̱ʼa̱nna nda̱saa xu̱ʼún kuniñúʼuna, ta saátu kivi ka̱ʼa̱nna nda̱saa na̱ hermano kivi chindeétáʼan xíʼinna. Ta saátu kivi ka̱ʼa̱nna xíʼin iin na̱ chíñu na̱ íyo ñuu nu̱ú ku̱u tu̱ndóʼo, ta na̱kán kivitu chindeétáʼanna xíʼinyó. Ña̱kán, tá kǒo káʼa̱nna xíʼún ña̱ ndakayaún xu̱ʼún, ña̱ chindaʼún ña̱ʼa nu̱ú ku̱u tu̱ndóʼo á ku̱ʼún nu̱ú ku̱u ña̱yóʼo, va̱ása keʼúnña.

Kúʼvi̱ní-iniyó xíniyó na̱ hermanoyó, xa̱ʼa̱ ña̱kán tá kúu iin tu̱ndóʼo ndi̱ku̱n kama kúni̱yó chindeétáʼanyó xíʼinna. Tá saá, ¿ndáa ki̱ʼva keʼéyó ña̱yóʼo? Kivi ka̱ʼa̱nyó xíʼin Jehová xa̱ʼa̱ na̱ hermanoyó na̱ yáʼa nu̱ú tu̱ndóʼo, saátu kivi ka̱ʼa̱nyó xa̱ʼa̱ na̱ chíndeétáʼan xíʼinna, saátu kivi taxiyó loʼo xu̱ʼún ndaʼa̱ na̱ ñuu Ndióxi̱ ña̱ kuvi kuniñúʼuna nu̱ú kúu iin tu̱ndóʼo. Na̱ Cuerpo Gobernante táxina chiñu nda̱ʼa na̱ hermano na̱ íyo Betel ña̱ viíní ná kuniñúʼuna xu̱ʼún, ta tá kúni̱yó chindeétáʼanyó xíʼin na̱ hermano nu̱ú kúu tu̱ndóʼo ná sandákutúyó Solicitud de voluntario local de diseño y construcción (DC-50).

TÁ NDI̱ʼI XI̱TONDÓ VIDEO ÑA̱ NANÍ, NDEÉNÍ KU̱UN SA̱VÍ KINI CHÍ BRASIL, NDAKUINDÓ PREGUNTA YÓʼO:

Tá ku̱u iin tu̱ndóʼo chí Brasil, ¿ndáaña ndákanda̱ka-iniún xíʼin ña̱ ke̱ʼé na̱ hermano?