¿Ndáaña kéʼéndi̱ ña̱ va̱ʼa chíndeé táʼandi̱ tá íyo tu̱ndóʼo?

Tá íyo tu̱ndóʼo, na̱ testigo Jehová kamaní xáʼa̱nndi̱ chíndeé táʼandi̱. Ta xíʼin ña̱yóʼo náʼa̱ndi̱ ña̱ kúʼvi̱-inindi̱ xíni táʼandi̱ (Juan 13:34, 35; 1 Juan 3:17, 18). ¿Ndáaña kéʼéndi̱ ña̱ chíndeé táʼandi̱?

Chíndeé táʼandi̱ xíʼin ña̱ʼa ña̱ kúúmiíndi̱. Na̱ xi̱ndiku̱n Jesús ña̱ tíempo xi̱naʼá na̱ ñuu Antioquía chi̱ndaʼána xu̱ʼún ku̱a̱ʼa̱n ña̱ va̱ʼa chi̱ndeéna na̱ xi̱ndiku̱n Jesús ña̱ ñuu Judea tá ni̱xi̱yo so̱ko̱ ñuu na̱yóʼo (Hechos 11:27-30). Tasaá vitin tá xínindi̱ ñúʼu na̱ ñanindi̱ na̱ inka ñuu tu̱ndóʼo, chíndaʼándi̱ xu̱ʼún ña̱ ndákaya ti̱xin congregación ku̱a̱ʼa̱nña ña̱ va̱ʼa chindeéndi̱na (2 Corintios 8:13-15).

Xáʼa̱ndi̱ nda̱a̱ nu̱ú ndóona. Na̱ xi̱ku̱aʼa na̱ kíʼin kuenta xíʼin congregación na̱ ndóo ñuu nu̱ú yáʼa tu̱ndóʼo yóʼo, ndíʼi̱-inina xa̱ʼa iin tá iin na̱ congregación ta ndi̱ku̱n ku̱a̱ʼa̱nna nándukúnana á ndóo va̱ʼa ndiʼina á kǒo tu̱ndóʼo níndóʼona. Sava nu̱ú yáʼa tu̱ndóʼo yóʼo, íyo na̱ ñanindi̱ na̱ kúúmií chiñu xa̱ʼa ña̱ʼa ña̱ ndákaya ta ña̱yóʼo ku̱a̱ʼa̱n ndaʼa̱ na̱ ñúʼu tu̱ndóʼo, tá kúú ti̱ko̱to̱, ti̱kui̱í, ña̱ kuxuna, ta̱ta̱n kútatanna xíʼin nu̱ú ku̱su̱nna. Ku̱a̱ʼá na̱ testigo Jehová na̱ kúni̱ ku̱ʼu̱n chindeé ta xínina keʼéna iin chiñu, xáʼa̱nna xíʼin xu̱ʼún miína nda̱a̱ nu̱ú íyo tu̱ndóʼo ña̱ va̱ʼa chindeénana, ta savana sándáʼana veʼe táʼanna á veʼe nu̱ú ndátakana sákuaʼana xa̱ʼa Ndióxi̱. Xa̱ʼa ña̱ vií ítáʼandi̱ xíʼin xa̱ʼa ña̱ xínindi̱ kachíñu xíʼin táʼandi̱ ña̱kán kama chíndeé táʼandi̱ tá xa̱a̱ íyo tu̱ndóʼo, soo su̱ví na̱ káʼvi kuití xíʼinndi̱ chíndeéndi̱, sava chíndeéndi̱ nda̱a̱ na̱ yiví na̱ kǒo káʼvi xíʼindi̱ (Gálatas 6:10).

Ná sandíkoyó-inina xíʼin tu̱ʼun Ndióxi̱. Ña̱ xíniñúʼu na̱ yiví na̱ yáʼa nu̱ú tu̱ndóʼo yóʼo kúúña ná natúʼunyó xa̱ʼa Ndióxi̱ xíʼinna. Chi tá ki̱vi̱ yáʼana nu̱ú ña̱yóʼo Jehová táxira ndée ndaʼa̱na (2 Corintios 1:3, 4). Ña̱kán ku̱a̱ʼa̱nndi̱ nátúʼunndi̱ xíʼin na̱ yiví na̱ ñúʼu tu̱ndóʼo xa̱ʼa ña̱ sánáʼa̱ Biblia, chi ña̱yóʼo káʼa̱nña Ndióxi̱ sandiʼi-xa̱ʼara ndiʼi tu̱ndóʼo tá ná kaʼndachíñura nu̱ú Ñuʼú yóʼo (Revelación 21:4).

• ¿Ndachun kamaní chíndeé táʼan ndi̱ʼi̱ na̱ Testigo tá íyo tu̱ndóʼo nu̱úndi̱?

• ¿Ndáaña kéʼéndi̱ ña̱ va̱ʼa sandíkondi̱-ini na̱ yiví na̱ yáʼa nu̱ú tu̱ndóʼo?