Liviní Ñuʼú yóʼo

KOTO nu̱ú Ñuʼú yóʼo, liviníña. Kotondeʼé ku̱ʼu̱ xíʼin yitu̱n, xíʼin yita, xíʼin ndiʼi kití yóʼo. ¿Míí ndíka̱a̱ elefante? Ta, ¿míí ñúʼu ndikachi?

¿Yukú i̱xava̱ʼa ñuʼú liviní yóʼo? Ndióxi̱ i̱xava̱ʼaña. Yóʼo sakuaʼayó ndáa ki̱ʼva ke̱ʼéraña ña̱ va̱ʼa kundooyó nu̱úña.

Siʼna i̱xava̱ʼara ku̱ʼu̱ kúii̱ ña̱ va̱ʼa ndukúii̱ nu̱ú ñuʼú yóʼo. Ta i̱xava̱ʼara ndiʼi nu̱ú yitu̱n tú válí xíʼin tú náʼnu. Tá xáʼnu tú yóʼo liviní ndúu nu̱úña. Ta sava yitu̱n yóʼo táxi ku̱a̱ʼá ña̱ʼa xáxíyó.

Tándi̱ʼi, Ndióxi̱ i̱xava̱ʼara ti̱a̱ká ña̱ kuñuʼurí ti̱kui̱í ta i̱xava̱ʼatura kití ndáchí. I̱xava̱ʼatura ti̱na, mícho xíʼin kuáyi̱. I̱xava̱ʼara kití náʼnu xíʼin kití válí. ¿Á íyo kití yatin nu̱ú íyoún? Va̱ʼaní ini Ndióxi̱ chi ku̱a̱ʼání ña̱ʼa ta̱xira ndaʼa̱yó.

Tá sa̱ndíʼira ke̱ʼéra ndiʼi ña̱ʼa, iin táʼvi ñuʼú liviní nda̱saraña. Ta chi̱núura ki̱vi̱ña ña̱ kunaníña Edén. Nina ña̱ va̱ʼa ni̱xi̱yo nu̱úña. Liviní ni̱xi̱yoña. Ndióxi̱ xi̱kuni̱ra saá koo iníísaá nu̱ú Ñuʼú yóʼo.

Koto na̱ʼná yóʼo. ¿Á xíni̱ún ndáaña kúú ña̱ xi̱ni Ndióxi̱ ña̱ kúma̱ní nu̱ú ñuʼú livi yóʼo? Ná kotoyó.