Sa̱tá ta̱yóʼo kǒo rey va̱ʼa níxi̱yo

TA̱ Josías u̱na̱ ku̱i̱ya̱ra tá ki̱xaʼára kúúra rey nu̱ú na̱ u̱vi̱ ñuu ña̱ ñuu Israel. Loʼoníra ña̱ kuura rey. Ña̱kán, tá ki̱xaʼára xáʼndachíñura ñuu Israel na̱ chée kúú na̱ chíndeé táʼan xíʼinra.

Tá xa̱ku̱a̱ʼa̱n u̱xa̱ ku̱i̱ya̱ ña̱ kúú ta̱ Josías rey, saá ki̱xaʼára nándukúra Jehová. Ndíku̱nra yichi̱ ta̱ David, ta̱ Jehosafat xíʼin ta̱ Ezequías chi rey va̱ʼa xi̱kuu na̱yóʼo. Tá kúma̱níka xa̱a̱ra kuura iin ta̱a chée kǒo níyi̱ʼvíra keʼéra iin chiñu káʼnu.

Ku̱a̱ʼání ku̱i̱ya̱, ku̱a̱ʼání na̱ ñuu Israel ke̱ʼé ña̱ kini. Xi̱ndasakáʼnuna ndióxi̱ vatá ta xi̱kuxítína nu̱úña. Ña̱kán ta̱ Josías xíʼin na̱ ítáʼan xíʼinra ki̱xaʼána sákútaʼa ndiʼina ndióxi̱ vatá ñuu Israel. Iin chiñu káʼnuní kúú ña̱ kéʼéna, saáchi ku̱a̱ʼání kúú na̱ ndásakáʼnu ndióxi̱ vatá. Koto ta̱ Josías xíʼin na̱ ítáʼan xíʼinra sándiʼi-xa̱ʼana ndióxi̱ vatá.

Tándi̱ʼi, ta̱ Josías ni̱ka̱ʼa̱nra xíʼin u̱ni̱ ta̱a ña̱ ná sandáʼana templo Jehová. Nda̱kayana xu̱ʼún ndaʼa̱ na̱ ñuu ta ta̱xinaña ndaʼa̱ na̱yóʼo ña̱ va̱ʼa kuniñúʼunaña nu̱ú káchíñuna. Tá ñúʼuna káchíñuna ini veʼe yóʼo, ta̱ su̱tu̱ káʼnu ta̱ naní Hilquías íyo iin tutu ña̱ ndáyáʼviní nda̱niʼíra. Ña̱yóʼo kúú tutu nu̱ú va̱xi ley ña̱ ni̱ka̱ʼa̱n Jehová xíʼin ta̱ Moisés kaʼyíra tá tiempo xi̱naʼá, ta ña̱ nda̱ñuʼú kúú ña̱yóʼo.

Tá ni̱xa̱a̱na xíʼin tutu yóʼo nu̱ú ta̱ Josías ni̱ka̱ʼa̱nra xíʼinna ná kaʼvinaña nu̱úra. Tá ka̱ʼvinaña nu̱úra na̱kunda̱a̱-inira na̱ ñuu yóʼo kǒo kéʼé miívína ña̱ káʼa̱n ley Ndióxi̱. Ta xa̱ʼa ña̱yóʼo ni̱kusuchíní-inira ta nda̱tára ti̱ko̱to̱ra, táki̱ʼva xítoún nu̱ú na̱ʼná yóʼo. Ta káchira: ʼJehová sáa̱níra xíʼinyó chi na̱ ni̱xi̱yo tá ya̱chi̱ va̱ása níkeʼéna ña̱ káʼa̱n ley ña̱ va̱xi nu̱ú tutu yóʼoʼ.

Ta̱ Josías ni̱ka̱ʼa̱nra xíʼin ta̱ su̱tu̱ káʼnu Hilquías ná nandukúra xa̱ʼaña ndáaña keʼé Jehová xíʼinna xa̱ʼa ña̱yóʼo. Ta̱ Hilquías ki̱tara ku̱a̱ʼa̱nra nu̱ú ñá profeta ñá naní Huldá ña̱ nda̱ka̱tu̱ʼunrañá xa̱ʼa ña̱yóʼo. Ñáyóʼo ni̱ka̱ʼa̱nñá tu̱ʼun Jehová xíʼinra, ña̱ ná natúʼunra ña̱yóʼo xíʼin ta̱ Josías: ʼNa̱ ñuu Jerusalén xíʼin ndiʼika na̱ ñuu, Jehová taxira castigo ndaʼa̱na xa̱ʼa ña̱ ndásakáʼnuna ndióxi̱ vatá, chi nu̱ú ñuʼú yóʼo nda̱kutú ña̱ kini. Soo yóʼó Josías xa̱ʼa ña̱ kúún iin ta̱a va̱ʼa kǒo kixi kama castigo yóʼo, chi nda̱a̱ tá ná kuviún saá kixiñaʼ.