Ta̱ Josías kúni̱níra xíni̱ra Ley Ndióxi̱

U̱na̱ ku̱i̱ya̱ kúúmií ta̱ Josías tá ki̱xaʼára kúúra rey nu̱ú na̱ ñuu Judá. Na̱ yiví na̱ ni̱xi̱yo tiempo saá nina magia xi̱xiniñúʼuna ta xi̱ndasakáʼnuna ndióxi̱ vatá. Soo tá kúúmií ta̱ Josías 16 ku̱i̱ya̱ ki̱xaʼára va̱ʼaní ndásakáʼnura Jehová. Tá xa̱a̱ kúúmiíra 20 ku̱i̱ya̱ sa̱ndiʼi-xa̱ʼara ndiʼi na̱ ndióxi̱ vatá. Ta tá kúúmiíra 26 ku̱i̱ya̱ sa̱ndáʼara templo Jehová.

Ta̱ su̱tu̱ káʼnu Hilquías, nda̱ni̱ʼíra ini ña̱ templo iin rollo nu̱ú va̱xi Ley Ndióxi̱. Sana ta̱ Moisés ka̱ʼyíña. Ta̱ Safán secretario ta̱ rey, níʼira rollo ni̱xa̱a̱ra nu̱ú ta̱ Josías ta káʼviraña. Ta̱ Josías xi̱niso̱ʼora ña̱ ka̱ʼvi ta̱ Safán ta na̱kunda̱a̱-inira ña̱ ndiʼi na̱ ñuu xa̱a̱ ku̱a̱ʼání ku̱i̱ya̱ va̱ása kéʼéna ña̱ kúni̱ Jehová. Xa̱ʼa ña̱yóʼo ta̱ rey Josías ni̱ka̱ʼa̱nra xíʼin ta̱ Hilquías: “Jehová sáa̱níra xíʼinyó vitin. Ka̱ʼa̱n xíʼinra ta ná ka̱ʼa̱nra ndáaña kúni̱ra keʼéyó”. Jehová ni̱ka̱ʼa̱nra xíʼin ñá profeta Huldá: “Na̱ ñuu Judá sa̱ndákoona yi̱ʼi̱. Ta vitin taxii̱ castigo ndaʼa̱na, soo nda̱a̱ ná kuvi ta̱ rey Josías, chi vitá-inira”.

Tá na̱kunda̱a̱-ini ta̱ Josías ña̱yóʼo, ni̱xa̱a̱ra chí nu̱ú íyo templo ta ka̱nara ndiʼi na̱ ñuu Judá. Tasaá ka̱ʼvira Ley Jehová ndeé va̱ʼa nu̱ú ndiʼi na̱ ñuu. Ta̱ Josías xíʼin ndiʼi na̱ ñuu ni̱ka̱ʼa̱nna ña̱ kuniso̱ʼona ndiʼi ña̱ káʼa̱n Ndióxi̱.

Xa̱a̱ ku̱a̱ʼání ku̱i̱ya̱ na̱ ñuu Judá va̱ása kéʼékana ña̱ pascua. Soo tá ka̱ʼvi ta Josías ña̱ ley Ndióxi̱ na̱kunda̱a̱-inira ña̱ ndiʼi saá ku̱i̱ya̱ xíniñúʼu keʼéna ña̱ pascua, tasaá ni̱ka̱ʼa̱nra xíʼin na̱ ñuu: “Vitin keʼéyó ña̱ pascua ña̱ va̱ʼa ndasakáʼnuyó Jehová”. Saátu ni̱ka̱ʼa̱n ta̱ Josías ña̱ taxina ku̱a̱ʼání ña̱ʼa ndaʼa̱ Ndióxi̱ ta koo na̱ kata yaa ini templo. Tasaá ke̱ʼéna ña̱ pascua xíʼin ña̱ vikó ña̱ si̱táva̱ʼa ña̱ kǒo níxiyá ta u̱na̱ ki̱vi̱ ke̱ʼénaña. Nda̱a̱ tá ni̱xi̱ʼi̱ ta̱ Samuel saá kǒoka pascua kéʼéna. Ta̱ Josías kúni̱níra xíni̱ra Ley Ndióxi̱. ¿Ta yóʼó á kútóún sákuaʼún xa̱ʼa Jehová?