Ñuyǐví xa̱á

KOTO ndiʼi ña̱ va̱xi nu̱ú na̱ʼná yóʼo, livikavíña. Koto tí yusu xíxáʼanrí nu̱ú ndaʼa̱ ta̱ loʼo. Kototu nu̱ú ndóo tí león xíʼin tí kuáyi̱. ¿Á kǒo kútóún koún nu̱ú iin ñuʼú livi táʼan ña̱yóʼo?

Ndióxi̱ kúni̱ra koún nu̱ú ñuʼú livi ndiʼi tiempo, ta kǒo ndoʼokaún tu̱ndóʼo táʼan ña̱ ndóʼo na̱ yiví na̱ ndóo tiempo vitin. Saá koo ñuyǐví xa̱á káchi Biblia. ‘Ta mií Ndióxi̱ koo xíʼin na̱yóʼo. Ta kǒo kuvikana, ni va̱ása kooka ña̱ kusuchí-inina ni va̱ása kuakukana, ni va̱ása kooka ña̱ xóʼvi̱na. Ndiʼi ña̱yóʼo xa̱ni̱ya̱ʼañaʼ.

Ta̱ Jesús kúú ta̱ ndasalivi ñuyǐví yóʼo. ¿Á xíni̱ún ama ndasaliviraña? Ndasaliviraña tá ná sandiʼi-xa̱ʼara na̱ kéʼé na̱ kini xíʼin ndiʼi tu̱ndóʼo ña̱ íyo ñuyǐví yóʼo. Á ndákaʼún xa̱ʼa ta̱ Jesús tá ni̱xi̱yora nu̱ú Ñuʼú yóʼo, sa̱ndáʼara ndiʼi na̱ xi̱kuumií kue̱ʼe̱, ta nda̱a̱ sava na̱ ni̱xi̱ʼi̱ sa̱ndátakura. Xíʼin ña̱yóʼo ni̱na̱ʼa̱ra ña̱ keʼéra tá ná kaʼndachíñura nu̱ú Ñuʼú.

Si̱íkaví kundooyó nu̱ú ñuyǐví xa̱á. Ta̱ Jesús xíʼin sava na̱ nda̱ka̱xinra kúú na̱ kaʼndachíñu xíʼinra chí ndiví. Na̱yóʼo chindeé táʼanna xíʼin ndiʼi na̱ kundoo nu̱ú ñuyǐví xa̱á ña̱ si̱í kundoona. Ná kuniyó ndáaña xíniñúʼu keʼéyó ña̱ va̱ʼa taxi Ndióxi̱ kooyó ndiʼi tiempo nu̱ú ñuyǐví xa̱á.