¿Nda̱saa chíndeé na̱ xi̱ku̱aʼa na̱ xíka xítoniʼni congregación?

Iin táʼvi Biblia ña̱ naní Escrituras Griegas Cristianas káʼa̱nña xa̱ʼa ta̱ Bernabé xíʼin ta̱ Pablo ña̱ xi̱kuuna na̱ xi̱ku̱aʼa na̱ ni̱xika xi̱toniʼni congregación chi xi̱xa̱ʼa̱nna iin tá iin congregación ña̱ tíempo xi̱naʼá. ¿Ndachun xi̱keʼéna ña̱yóʼo? Xi̱keʼéna ña̱yóʼo chi xi̱ndi̱ʼi-inina xa̱ʼa ndiʼi na̱ xi̱kaʼvi tu̱ʼun Ndióxi̱ xíʼinna. Ta̱ Pablo ni̱ka̱ʼa̱nra ndikó tukura kunirana. Ni káni̱ví nu̱ú xi̱ndoona ni saáví xi̱xa̱ʼa̱nvara xa̱ʼa ña̱ xi̱kunira chindeérana (Hechos 15:36). Saátu na̱ xi̱ku̱aʼa na̱ xíka xítoniʼni congregación na̱ ndóo vitin xáʼa̱nna xítoniʼnina miíndi̱ xa̱ʼa ña̱ kúni̱na chindeéna ndi̱ʼi̱.

Va̱xina chindeéna ndi̱ʼi̱. Ta̱ xi̱ku̱aʼa ta̱ kíʼin kuenta xíʼin circuito xáʼa̱nra xítoniʼnira o̱ko̱ congregación, ta u̱vi̱ yichi̱ xáʼa̱nra nu̱ú ku̱i̱ya̱ ta iin semana xíyora xíʼin iin iinña. Ku̱a̱ʼá ña̱ sákuaʼayó íxaa na̱ xi̱ku̱aʼa yóʼo chi xínina, tá íyo ñá síʼína kivi sákuaʼatuyó nu̱úná yóʼova. Na̱yóʼo xíʼin ñá síʼína chíka̱a̱na ndée ña̱ xáa̱na xínina ndiʼiyó ni válíyó á chéeyó ta xa̱ndátun kueena ña̱ ku̱ʼu̱nna xíʼinyó sanáʼa̱na na̱ yiví xa̱ʼa Ndióxi̱, saátu ña̱ ku̱ʼu̱nna xíʼinyó sanáʼa̱na na̱ xa̱káʼvi xíʼinyó. Na̱ xi̱ku̱aʼa na̱ xíka xítoniʼni congregación xíʼin na̱ xi̱ku̱aʼa na̱ kíʼin kuenta xíʼinña xáʼa̱nna xítoniʼnina miíndi̱, ta yáʼana káʼa̱nndosóna ña̱ asamblea xíʼin nu̱ú ndátakandi̱ sákuaʼandi̱ xa̱ʼa Ndióxi̱ ta ndiʼi ña̱yóʼo chíndeéña ndi̱ʼi̱ (Hechos 15:35).

Ndíʼi̱-inina xa̱ʼa ndiʼindi̱. Na̱ xi̱ku̱aʼa na̱ xíka xítoniʼni congregación ndíʼi̱ní-inina xa̱ʼa na̱yóʼo ña̱ ná sakuaʼakana xa̱ʼa Ndióxi̱. Ña̱kán ndátakana xíʼin na̱ xi̱ku̱aʼa na̱ kíʼin kuenta xíʼin congregación, ta saátu xíʼin na̱ chíndeé congregación ña̱ nátúʼunna xa̱ʼa chiñu ña̱ kéʼéna, tasaá táxina konsejo ndaʼa̱na xa̱ʼa chiñu ña̱ keʼéna ti̱xin congregación. Ta chíndeéna na̱ precursor ña̱ va̱ʼaka ná natúʼunna xíʼin na̱ yiví xa̱ʼa Ndióxi̱. Ta kúsi̱í-inina tá xínina ku̱a̱ʼá na̱ yiví ndátaka xíʼinndi̱ ta xa̱a̱ ku̱a̱ʼa̱n kútu̱ʼva va̱ʼakana xa̱ʼa Ndióxi̱. Ta na̱yóʼo ndinuʼu-inina káchíñuna nu̱ú Ndióxi̱ xa̱ʼa ndiʼindi̱ (2 Corintios 8:23). Saá miíyó ná keʼéyó táʼan ña̱ kéʼé na̱yóʼo ña̱ ndasakáʼnuyó Ndióxi̱ ta kandíxakayóra (Hebreos 13:7).

• ¿Ndachun xáʼa̱n na̱ xi̱ku̱aʼa na̱ kíʼin kuenta xíʼin circuito xítoniʼnina congregación?

• ¿Ndáaña va̱ʼa sakuaʼún tá kíxi na̱ xi̱ku̱aʼa na̱ xítoniʼnina congregación?