¿Ndachun xíniñúʼu inkáchi kachíñu na̱ ndásakáʼnu Ndióxi̱?

1. ¿Ndachun inkáchi xi̱kachíñu na̱ ñuu Israel na̱ xi̱ndoo tíempo xi̱naʼá nu̱ú Ndióxi̱?

Na̱ se̱ʼe ta̱ Abrahán ni̱xa̱a̱na ku̱una na̱ ñuu Ndióxi̱ ta ku̱a̱ʼá ley ta̱xira ndaʼa̱na. Ta na̱yóʼo ni̱xa̱a̱na xi̱nanína ñuu Israel ta xi̱ndasakáʼnuna Ndióxi̱ ta xi̱xi̱niso̱ʼona tu̱ʼunra (Salmo 147:19, 20). Ta xa̱ʼa ña̱yóʼo ku̱a̱ʼá na̱ yiví ndakiʼin bendición. Kaʼvi Génesis 22:18.

Ndióxi̱ na̱kaxínra na̱ ñuu Israel ña̱ koona testigora. Ndiʼi ña̱ ni̱ya̱ʼa na̱ ñuu Israel nu̱ú náʼa̱ña nu̱úyó ndiʼi na̱ xíniso̱ʼo ña̱ káʼa̱n Ndióxi̱ ndákiʼinna ña̱ va̱ʼa (Deuteronomio 4:6). Ta xa̱ʼa na̱ ñuu Israel xáa̱ka inkana sakuaʼana xa̱ʼa Ndióxi̱ ta̱ nda̱a̱. Kaʼvi Isaías 43:10, 12.

2. ¿Ndachun xíniñúʼu inkáchi kachíñu ndiʼi na̱ ndásakáʼnu Ndióxi̱?

Tá ki̱vi̱ kǒo níxíniso̱ʼoka na̱ ñuu Israel ña̱ xi̱ka̱ʼa̱n Ndióxi̱ xíʼinna va̱ása níxíkukana na̱ ñuura chi inkavana na̱kaxínra, na̱yóʼo xi̱kúú na̱ xi̱ndiku̱n Jesús (Mateo 21:43; 23:37, 38). Ña̱kán, su̱víka na̱ Israel kúú ñuura vitin, chi na̱ ndíku̱n Jesús na̱yóʼo kúú na̱ ndásakáʼnu Jehová ta kúúna testigora. Kaʼvi Hechos 15:14, 17.

Jesús ni̱ka̱ʼa̱nra xíʼin na̱ xi̱ndiku̱n sa̱tára ña̱ ná ku̱ʼu̱nna natúʼunna xíʼin na̱ yiví xa̱ʼa Ndióxi̱ iníísaá ñuyǐví (Mateo 10:7, 11; 24:14; 28:19, 20). Ta ña̱ tíempo ndooyó vitin, ndéeníka xíkana nátúʼunna xíʼin na̱ yiví xa̱ʼa Jehová. Ta millón na̱ yiví ndákaya Jehová ña̱ iníísaá ñuyǐví ña̱ ná ndakutáʼanna xíʼin na̱ ndásakáʼnu ñaʼá (Revelación [Apocalipsis] 7:9, 10). Na̱yóʼo viíní ítáʼanna ta va̱ʼaní chíndeé táʼanna, ta ña̱ sákuáʼana xa̱ʼa Jehová iinkúú ña̱ sákuaʼa ndiʼina iníísaá ñuyǐví. Kaʼvi Hebreos 10:24, 25.

3. ¿Ama ki̱xaʼá xa̱ʼa na̱ testigo Jehová?

Na̱yóʼo ki̱xaʼána ku̱i̱ya̱ 1870. Iin grupo loʼo kúúna ki̱xaʼá káʼvi Biblia, tasaá ni̱xa̱a̱na ni̱kunda̱a̱-inina ña̱ sánáʼa̱ña, chi ku̱a̱ʼání tíempo ni̱ya̱ʼa ta ni iinna kǒo níkunda̱a̱-inina xíʼinña chi tá íyo ña̱ ni̱xi̱yo se̱ʼé saá ni̱xi̱yoña nu̱úna. Soo vitin ku̱nda̱a̱-inina chi Jesús kúú ta ni̱ka̱ʼa̱n xíʼin na̱ xi̱ndiku̱n sa̱tára ña̱ ná natúʼunna xa̱ʼa Tu̱ʼun Ndióxi̱, ña̱kán kúú ña̱ ki̱xaʼána nátúʼunna ña̱ xi̱kuyatin kaʼndachíñu Ndióxi̱. Ta ku̱i̱ya̱ 1931 saá kúú ña̱ nda̱kunanína testigo Jehová. Kaʼvi Hechos 1:8; 2:1, 4, 11, xíʼin 5:42.

4. ¿Ndáa ki̱ʼva íyo chiñu kéʼé na̱ testigo Jehová?

Na̱ xi̱ndiku̱n Jesús ña̱ tíempo nu̱ú, ku̱a̱ʼání ña̱ va̱ʼa na̱kunda̱a̱-inina chi ni̱xi̱yo iin grupo loʼo ta̱a na̱ xi̱niʼi yichi̱ nu̱ú ndiʼi na̱ ñuu Ndióxi̱. Ndiʼi na̱yóʼo xi̱ndiku̱nna yichi̱ ta̱ Jesús (Hechos 16:4, 5). Saátu vitin íyo na̱ níʼi yichi̱ nu̱ú na̱ testigo Jehová ta na̱yóʼo nanína Cuerpo Gobernante ta kúúna iin grupo loʼo ta̱a na̱ xíniva̱ʼa xa̱ʼa Tu̱ʼun Ndióxi̱. Ta na̱yóʼo kúú na̱ kíʼin kuenta xíʼin ndiʼi veʼe nu̱ú íxava̱ʼana tutu xíʼin Biblia ña̱ iníísaá ñuyǐví. Chi veʼe yóʼo kúú nu̱ú káʼyínaña inka tu̱ʼun. Ta xa̱yáʼa i̱ñu̱ ciento tu̱ʼun ku̱a̱ʼa̱n xáxa̱ tutu ña̱ káʼyí na̱yóʼo. Na̱ Cuerpo Gobernante yóʼo nina Biblia xíniñúʼuna ña̱ va̱ʼa táxina yichi̱ ndaʼa̱ ndiʼi na̱ testigo Jehová ta xa̱ku̱a̱ʼa̱n cien mil veʼe nu̱ú ndátakana ña̱ iníísaá ñuyǐví. Ta íyo na̱ xíniva̱ʼa xa̱ʼa Ndióxi̱ na̱yóʼo viíní kiʼinna kuenta xíʼin inkana chi nda̱a̱ tá íyo ndikachi válí sana Ndióxi̱ saá íyona. Kaʼvi 1 Pedro 5:2, 3.

Na̱ testigo Jehová xíkana nátúʼunna xíʼin na̱ yiví xa̱ʼa Ndióxi̱ ña̱ va̱xi nu̱ú Biblia veʼe tá veʼena, táki̱ʼva ni̱xi̱ka na̱ xi̱ndiku̱n Jesús tíempo xi̱naʼá (Hechos 20:20). Tá sánáʼa̱na na̱ yiví ta kǒo kíʼinna xu̱ʼún ndaʼa̱na. Su̱ví ña̱yóʼo kuití kéʼéna, va̱ʼaní ítáʼanna xíʼin táʼanna nda̱a̱ tá kúni̱na xínina ñanina á ku̱ʼvana saá kúni̱na xínitáʼanna. Ta kúsi̱í-inina chi xíni̱na Jehová ndáa miína (2 Tesalonicenses 1:3). Ña̱ kúúna na̱ ñuu Ndióxi̱ ña̱kán chíka̱a̱na ndée ña̱ kéʼéna ña̱ kúni̱ra ta chíndeéna inka na̱ yiví ña̱ sakuaʼana xa̱ʼara. Xa̱ʼa ña̱ kéʼéna ña̱yóʼo si̱íní ndóona nu̱ú ndiʼi na̱ yiví. Kaʼvi Salmo 33:12 xíʼin Hechos 20:35.