LECCIÓN 13
Ta̱ Timoteo xi̱kuni̱ra chindeéra na̱ yiví
Ta̱ loʼo Timoteo xi̱kusi̱íní-inira ña̱ chi̱ndeéra na̱ yiví. Ku̱a̱ʼání ñuu ni̱xi̱kara chi̱ndeérana. Si̱íní ni̱xi̱yo inira ni̱xi̱kara. ¿Á kúni̱ún natúʼunkai̱ xíʼún xa̱ʼa ta̱yóʼo?...
Siʼí ta̱ Timoteo xíʼin nána xi̱tánra sa̱náʼa̱nára xa̱ʼa Jehová
Ta̱ Timoteo ñuu naní Listra xa̱ʼnura. Eunice xi̱naní siʼíra ta nána xi̱tánra xi̱naní Loida. Tá loʼovíra sa̱náʼa̱nára xa̱ʼa Jehová. Xa̱saáví xi̱kuni̱ra chindeéra na̱ yiví ña̱ sakuaʼana xa̱ʼa Jehová.
Tá xa̱ʼnu loʼoka ta̱ Timoteo, ta̱ Pablo ni̱ka̱ʼa̱nra xíʼinra: “Ku̱ʼi̱n inka ñuu natúʼi̱n xíʼin na̱ yiví xa̱ʼa Ndióxi̱. ¿Á kúni̱ún ku̱ʼún xíʼi̱n?”. Ta̱ Timoteo ni̱kusi̱íní-inira, ta ni̱ka̱ʼa̱nra: “Kúni̱vai̱ ku̱ʼi̱n xíʼún”. Ta̱yóʼo xi̱kuni̱ra chindeéra na̱ yiví ña̱ sakuaʼana xa̱ʼa Jehová.
Ni̱xa̱ʼa̱nra xíʼin ta̱ Pablo ñuu Tesalónica. Ña̱ va̱ʼa xa̱a̱na ñuu yóʼo, káni̱kaví ni̱xika xáʼana saáví nda̱ana iin barco. Tá ni̱xa̱a̱na ku̱a̱ʼání na̱ yiví chi̱ndeéna ña̱ sa̱kuaʼana xa̱ʼa Jehová. Sava na̱ yiví ni̱sa̱a̱na xi̱ninana ta nda̱a̱ xi̱kuni̱na kaʼnínana. Xa̱ʼa ña̱yóʼo va̱ʼaka nda̱kiʼin ta̱ Pablo xíʼin ta̱ Timoteo ku̱a̱ʼa̱nna inka ñuu natúʼunna xa̱ʼa Ndióxi̱.
Ta̱ Timoteo si̱íní ni̱xi̱yo inira
Ni̱ya̱ʼa loʼo yo̱o̱ ta̱ Pablo ni̱ka̱ʼa̱nra xíʼin ta̱ Timoteo ná ndikóra chí ñuu Tesalónica. Chi kúni̱ ta̱ Pablo kunda̱a̱-inira á va̱ʼa ndóo na̱ káʼvi tu̱ʼun Ndióxi̱. Sava na̱ ñuu yóʼo i̱xandi̱va̱ʼanína xíʼin na̱ káʼvi tu̱ʼun Ndióxi̱. Ta̱ Timoteo xíniñúʼu ndakúní koo inira ña̱ ndikóra ñuu yóʼo. Ni̱xa̱ʼa̱nvara xa̱ʼa ña̱ kúni̱ra xínirana, tá ndi̱kóra nu̱ú ta̱ Pablo ni̱ka̱ʼa̱nra xíʼinra va̱ʼava ndóo na̱ ñuu Tesalónica chi ndásakáʼnu tá ndásakáʼnukavana Jehová.
Ku̱a̱ʼání ku̱i̱ya̱ ni̱xi̱ka ta̱ Timoteo xíʼin ta̱ Pablo ña̱ sa̱náʼa̱na na̱ yiví xa̱ʼa Ndióxi̱. Ña̱kán iin yichi̱ ni̱ka̱ʼa̱n ta̱ Pablo xa̱ʼa ta̱ Timoteo nu̱ú tutu ña̱ ka̱ʼyíra: “Chindaʼíi̱ ta̱ Timoteo ña̱ ku̱ʼu̱nra chindeé táʼanra xíʼin na̱ ndásakáʼnu Jehová. Ni iinna kǒo íyo táki̱ʼva íyo ta̱ Timoteo. Ta̱yóʼo kúni̱níra xínira Jehová ta saátu kúni̱níra xínira na̱ yiví”.
Ta miíún, ¿á kúni̱ún xíniún na̱ yiví? ¿Á kúni̱ún chindeúnna ña̱ sakuaʼana xa̱ʼa Jehová?... Tá ná chindeúnna si̱íní koún nda̱a̱ táki̱ʼva ni̱xi̱yo ta̱ Timoteo.