Na̱ kúúmií chiñu ti̱xin ñuu Ndióxi̱: kundiku̱nndó yichi̱ ta̱ Timoteo

INÍÍSAÁ ñuyǐví, ku̱a̱ʼání na̱ ñaniyó na̱ kúú testigo Jehová ni̱xa̱a̱na ku̱una anciano á siervo ministerial ku̱i̱ya̱ ni̱ya̱ʼa. Tá yóʼó kúú iin ta̱ nda̱kiʼin chiñu yóʼo, sana kúsi̱íní-iniún xa̱ʼa ña̱yóʼo.

Soo sana yíʼvi loʼo iniún, ndiʼivana ndóʼo saá. Iin ta̱ loʼo kúa̱an ta̱ kúú anciano ta̱ naní Jason káchira: “Tá ta̱xina chiñu ndaʼíi̱ ña̱ ku̱i̱ anciano, nda̱kanixi̱níi̱ ña̱ kǒo kuchiñui̱ xíʼinña chi ku̱a̱ʼání chiñu kúúña”. Saátu ndo̱ʼo ta̱ Moisés xíʼin ta̱ Jeremías nda̱kanixi̱nína ña̱ kǒo kuchiñuna xíʼin chiñu ña̱ ta̱xi Jehová ndaʼa̱na (Éx. 4:10; Jer. 1:6). ¿Á xa̱a̱ ndóʼún saá? ¿Ndáaña keʼún ña̱ va̱ʼa kǒo ndakanikaxi̱níún saá ta kuaʼnukaún xíʼin chiñu Ndióxi̱? Ná sakuaʼayó xa̱ʼa ta̱ Timoteo (Hech. 16:1-3).

KUNDIKU̱N YICHI̱ TA̱ TIMOTEO

Sana 20 ku̱i̱ya̱ ndíka̱a̱ ta̱ Timoteo tá ni̱ka̱ʼa̱n ta̱ Pablo xíʼinra ña̱ ná ku̱ʼu̱nra xíʼinra natúʼunna xa̱ʼa Ndióxi̱ inka ñuu. Sana tá xa̱ʼa, i̱xayo̱ʼvi̱ña xíʼinra ña̱ ke̱ʼéra chiñu ña̱ ta̱xina ndaʼa̱ra ti̱xin congregación chi va̱ása xíni̱ va̱ʼara (1 Tim. 4:11, 12; 2 Tim. 1:1, 2, 7). Soo tá ni̱ya̱ʼa u̱xu̱ ku̱i̱ya̱, ta̱ Pablo ni̱ka̱ʼa̱nra xíʼin na̱ congregación ña̱ Filipos: “Tá mií tátayó Jesús ná ka̱ʼa̱n, ndátui̱ chindaʼíi̱ ta̱ Timoteo ña̱ kamaní xa̱a̱ra nu̱úndó [...]. Chi kǒo inkana íyo táki̱ʼva íyo ta̱yóʼo” (Filip. 2:19, 20).

¿Nda̱chun va̱ʼaní anciano ni̱xa̱a̱ra ku̱ura? Ná ka̱ʼa̱nyó xa̱ʼa i̱ñu̱ ña̱ʼa ña̱ kivi sakuaʼún xa̱ʼara.

1. Xi̱ndi̱ʼi̱ní-inira xa̱ʼa inkana. Ta̱ Pablo ni̱ka̱ʼa̱nra xíʼin na̱ hermano ñuu Filipos ña̱ ndixa kúú ña̱ ndíʼi̱-ini ta̱ Timoteo xa̱ʼana (Filip. 2:20). Ta̱ Timoteo xi̱ndi̱ʼi̱ní-inira xa̱ʼa inkana. Xi̱kuni̱ra taxira ndée ndaʼa̱na xíʼin tu̱ʼun Ndióxi̱ ta nda̱a̱ chi̱ka̱a̱-inira ña̱ ndoʼora xa̱ʼana.

Ta̱ William xa̱a̱ yáʼa o̱ko̱ ku̱i̱ya̱ kúúra anciano, tá iinna ndákiʼinna iin chiñu ti̱xin ñuu Ndióxi̱ táxira consejo yóʼo ndaʼa̱na: “Vií keʼún xíʼin na̱ hermano. Koto va̱ʼún ndáaña xíniñúʼuna ta su̱ví iinlá chiñu ña̱ íyo ti̱xin congregación kundi̱ʼi̱-iniún xa̱ʼa”. Va̱ása keʼún tá kéʼé iin ta̱ káva autobús chi ña̱ ndíʼi̱-ini ta̱yóʼo xa̱ʼa kúú ña̱ kama xa̱a̱ra nu̱ú ku̱a̱ʼa̱nra su̱ví ña̱ sándaara na̱ yiví ndíʼi̱-inira xa̱ʼa.

2. Xi̱ndi̱ʼi̱ní-inira xa̱ʼa chiñu Ndióxi̱. Tándi̱ʼi ni̱ka̱ʼa̱nra xa̱ʼa ta̱ Timoteo ta̱ Pablo káchikara: “Chi ndiʼikana xa̱ʼa chiñu miína ndíʼi̱ní-inina xa̱ʼa, su̱víka xa̱ʼa chiñu ta̱ Cristo Jesús” (Filip. 2:21). Ñuu Roma ndíka̱a̱ ta̱ Pablo tá ka̱ʼyíra tu̱ʼun yóʼo chi na̱kunda̱a̱-inira na̱ hermano ñuu Filipos nina xa̱ʼa chiñu miívana ndeéní ndíʼi̱-inina xa̱ʼa. Ni loʼo kǒo chíka̱a̱na ndée ña̱ keʼéna chiñu Ndióxi̱. Soo su̱ví saá níxikeʼé ta̱ Timoteo. Ta̱yóʼo tá xítora ña̱ íyoníka chiñu ña̱ natúʼunra xa̱ʼa Ndióxi̱, xi̱keʼéra táki̱ʼva xi̱keʼé ta̱ Isaías, chi ta̱yóʼo ni̱ka̱ʼa̱nra: “Yóʼo íyo yi̱ʼi̱, yi̱ʼi̱ chindaʼún ku̱ʼu̱n” (Is. 6:8).

¿Ndáaña keʼún ña̱ va̱ʼa keʼún chiñu miíún xíʼin chiñu Ndióxi̱? Ña̱ nu̱ú, koto ndáaña kúú ña̱ ndáyáʼvika. Ta̱ Pablo ni̱ka̱ʼa̱nra ña̱ xíniñúʼu kundi̱ʼi̱-iniyó “xa̱ʼa ña̱ʼa ña̱ ndáyáʼvika” (Filip. 1:10). Chika̱a̱ ndée ña̱ keʼún chiñu ña̱ káʼa̱n Ndióxi̱ ndáyáʼvika. Ña̱ u̱vi̱, loʼo chiñu keʼún. Kǒo keʼún chiñu ña̱ sándiʼi-xa̱ʼa tiempoún ta sákunaaña yóʼó. Ta̱ Pablo ta̱xira consejo yóʼo ndaʼa̱ ta̱ Timoteo: “Kunu nu̱ú ña̱ʼa ña̱ kútóo na̱ va̱lí kúa̱an keʼéna, va̱ʼaka keʼé ña̱ nda̱kú, kandíxa Ndióxi̱, kuʼvi̱-ini kuni inkana, vií keʼún xíʼin inkana” (2 Tim. 2:22).

3. Ndeéní ka̱chíñura nu̱ú Jehová. Ta̱ Pablo ni̱ka̱ʼa̱nra xíʼin na̱ filipenses: “Soo miíndó xíni̱ va̱ʼandó xa̱ʼa ta̱yóʼo, nda̱a̱ táki̱ʼva íyo se̱ʼi̱ saá íyora, ka̱chíñuníra xíʼi̱n ña̱ va̱ʼa ni̱xi̱kandi̱ na̱túʼunndi̱ xa̱ʼa Ndióxi̱” (Filip. 2:22). Va̱ása xúxan níxi̱yo ta̱ Timoteo. Miíra xíʼin ta̱ Pablo ndeéní ka̱chíñu u̱vi̱ saána ña̱kán va̱ʼaní xi̱táʼanna.

Íyoní chiñu ti̱xin ñuu Ndióxi̱, chiñu yóʼo sákusi̱íña-iniún ta chindeéña yóʼó ña̱ va̱ʼa kutáʼún xíʼin na̱ hermano. Ña̱kán, chika̱a̱ ndée ña̱ keʼún ku̱a̱ʼání chiñu ti̱xin ñuu Ndióxi̱ (1 Cor. 15:58).

4. Ke̱ʼéra ña̱ sa̱kuaʼara. Ta̱ Pablo ni̱ka̱ʼa̱nra xíʼin ta̱ Timoteo: “Miíún ndíku̱nníún ña̱ sa̱náʼi̱ yóʼó, ndíku̱ún yichíi̱, ndíku̱ún ña̱ kéʼíi̱, ña̱ kándíxai̱ Ndióxi̱, ña̱ kúee-inii̱, ña̱ kúʼvi̱-inii̱ xínii̱ inkana, ña̱ ndakú-inii̱” (2 Tim. 3:10). Xa̱ʼa ña̱ ke̱ʼé ta̱ Timoteo ña̱ sa̱kuaʼara, va̱ʼa ni̱xa̱a̱ra nda̱kiʼinra ku̱a̱ʼá chiñu ti̱xin ñuu Ndióxi̱ (1 Cor. 4:17).

¿Á íyo iin na̱ hermano na̱ xa̱a̱ xu̱xa xíʼin tu̱ʼun Ndióxi̱ ta kúni̱ún kundiku̱ún yichi̱na? Tá kǒona, ndukú iin na̱ kundiku̱ún yichi̱. Ta̱ Tom, xa̱a̱ ku̱a̱ʼání ku̱i̱ya̱ kúúra anciano, ta ndákaʼánra ña̱yóʼo: “Iin ta̱ xa̱a̱ ku̱a̱ʼá ku̱i̱ya̱ kúú anciano chi̱ndeé táʼanníra xíʼi̱n ta ni̱xa̱a̱ra ndu̱ura maestro nu̱úi̱. Xi̱ndukúníi̱ consejo nu̱úra ta nina xi̱keʼíi̱ ña̱ xi̱ka̱ʼa̱nra xíʼi̱n. Ña̱yóʼo chi̱ndeé táʼan xíʼi̱n ña̱ sa̱kuaʼi̱”.

5. Chi̱ka̱a̱ra ndée ña̱ sa̱kuaʼa mitúʼun miíkara xa̱ʼa Ndióxi̱. Ta̱ Pablo ni̱ka̱ʼa̱nra xíʼin ta̱ Timoteo ña̱ ná chika̱a̱ra ndée ña̱ kundi̱ʼi̱ka-inira xa̱ʼa chiñu Ndióxi̱ (1 Tim. 4:7). Iin ta̱ sákuaʼa kunu íyo iin na̱ sánáʼa̱-ñaʼá, soo xíniñúʼu kunu mitúʼun miíra ña̱ va̱ʼa sakuaʼakara. Ta̱ Pablo ni̱ka̱ʼa̱nra xíʼin ta̱ Timoteo: “Nani xái̱, ndakundeékaún kaʼviún nu̱ú ndiʼina, taxi ndée ndaʼa̱na, sanáʼa̱na [...]. Ndakanixi̱ní xa̱ʼa ña̱yóʼo; kundi̱ʼi̱ka-iniún xa̱ʼaña, ña̱ va̱ʼa ná kunda̱a̱-ini ndiʼina xa̱ʼa ña̱ xa̱a̱ ku̱a̱ʼa̱n kútuʼvakaún” (1 Tim. 4:13-15).

Saátu miíún kiviva xa̱ún sakuaʼa va̱ʼakaún. Va̱ása sandákoún ña̱ kuaʼnún xíʼin tu̱ʼun Ndióxi̱. Kaʼviníún ña̱ va̱ʼa kunda̱a̱-iniún xíʼin ña̱ káʼa̱n na̱ ñuu Ndióxi̱. Kǒo ndakanixi̱níún ña̱ xa̱a̱ xíni̱níún. Ta xa̱ʼa ña̱yóʼo ndakanixi̱níún ña̱ kivi ka̱ʼún xa̱ʼa nda̱a̱ ndáaka ña̱ʼa ta ni kǒo nandukún xa̱ʼaña. Nda̱a̱ táki̱ʼva i̱xaa ta̱ Timoteo, chika̱a̱ní ndée ña̱ sakuaʼa va̱ʼakaún xa̱ʼa Ndióxi̱ tasaá va̱ʼa sanáʼún inkana (1 Tim. 4:16).

6. Ka̱ndíxaníra espíritu santo Jehová. Ta̱ Pablo ni̱ka̱ʼa̱nra xa̱ʼa chiñu ña̱ xi̱kuumií ta̱ Timoteo ta ta̱xira consejo ndaʼa̱ra ña̱ ná kundaaníraña xíʼin espíritu santo Ndióxi̱ (2 Tim. 1:14). Ña̱ va̱ʼa kundaara chiñu ña̱ xi̱kuumiíra, ta̱ Timoteo xíniñúʼu kandíxaníra yichi̱ ña̱ táxi espíritu santo Ndióxi̱.

Ta̱ Donald, xa̱a̱ ku̱a̱ʼání ku̱i̱ya̱ kúúra anciano, ta káchira: “Na̱ ñaniyó na̱ kúúmií iin chiñu ti̱xin ñuu Ndióxi̱ xíniñúʼu chindayáʼvinína ña̱ kutáʼan va̱ʼana xíʼin Ndióxi̱, ña̱kán va̱ʼa ndakúka koona xíʼinra. Tá ná ndukúna espíritu santo Ndióxi̱ ta chika̱a̱na ndée ña̱ keʼéna ña̱ káʼa̱nra, va̱ʼaní chindeé táʼanna xíʼin na̱ ñaniyó xíʼin ná ku̱ʼvayó” (Sal. 84:7; 1 Ped. 4:11).

CHINDAYÁʼVI CHIÑU ÑA̱ KÚÚMIÍÚN

Iin ña̱ va̱ʼaní kúú ña̱ xítoyó ña̱ ku̱a̱ʼání na̱ ñaniyó na̱ sa̱kán nda̱kiʼin chiñu ti̱xin ñuu Ndióxi̱, tá kúú táʼan miíún, xáʼnukana ku̱a̱ʼa̱nna xíʼin tu̱ʼun Ndióxi̱. Ta̱ Jason, ta̱ ni̱ka̱ʼa̱nyó xa̱ʼa tá ki̱xaʼáyó, káchira: “Ndiʼi tiempo ña̱ xa̱a̱ kúi̱ anciano ku̱a̱ʼání ña̱ʼa sa̱kuaʼi̱ ta vitin xa̱a̱ ku̱tuʼvakai̱. Kúsi̱íní-inii̱ xíʼin chiñu ña̱ kúúmiíi̱ ta iin chiñu káʼnuní kúúña nu̱úi̱”.

Ta miíún, ¿á ndakundéún kuaʼnún xíʼin tu̱ʼun Ndióxi̱? Chika̱a̱ ndée ña̱ kundiku̱ún yichi̱ ta̱ Timoteo. Tasaá va̱ʼaní chindeé táʼún xíʼin na̱ ñuu Jehová.