Natúʼunndó xa̱ʼa ku̱a̱chi ña̱ ndóʼondó

Tá xa̱tindaʼa̱ndó ku̱a̱ʼání tu̱ndóʼo kixi nu̱úndó. Chi xa̱síín ndákanixi̱ní iin iinndó, xa̱síín ña̱ kúni̱ iin iinndó ta xa̱síín sa̱kuaʼanuna iin iinndó. Sava tu̱ndóʼo ña̱ ndoʼondó su̱ví ku̱a̱chi miíndó kuuña ku̱a̱chi inkavana kuuña.

Ña̱ Biblia káʼa̱nña va̱ʼaka natúʼunndó xa̱ʼaña, va̱ása sandákoo miíndóña (Mateo 5:23, 24). Tá ná keʼéndó ña̱ káʼa̱n Biblia va̱ʼaka kundoondó.

1 NATÚʼUNNDÓ XA̱ʼA ÑA̱ NDÓʼONDÓ

ÑA̱ KÁʼA̱N BIBLIA: “Íyo iin tiempo [...] ña̱ ka̱ʼa̱nyó” (Eclesiastés 3:1, 7). Tavándó tiempo ña̱ natúʼun xíʼin táʼanndó xa̱ʼa ña̱ ndóʼondó, á ndáaña ndákanixi̱níndó soo ña̱ nda̱a̱ ka̱ʼa̱n xíʼin táʼanndó (Efesios 4:25). Ni sáa̱nívandó, ndakú koo inindó ña̱ ná kǒo nda̱ʼyi̱ nu̱ú táʼanndó. Tá vií káʼa̱n xíʼin táʼanndó ña̱yóʼo chindeé ndóʼó ña̱ va̱ása kuaʼnuka ku̱a̱chi (Proverbios 15:4; 26:20).

Ni kǒo kútóún ña̱ káʼa̱n á ña̱ kéʼé yiíún á ñá síʼún ni saáví va̱ása sandákoún ña̱ ka̱ʼa̱n viíún xíʼinñá á xíʼinra; kuʼvi̱-inindó kunitáʼanndó ta to̱ʼó koo xíʼin táʼanndó (Colosenses 4:6). Kama ndasaviíndó ku̱a̱chi ña̱ íyo nu̱úndó ta kǒo sándákoondó ña̱ ka̱ʼa̱n xíʼin táʼanndó (Efesios 4:26).

ÑA̱ VA̱ʼA KEʼÉNDÓ:

• Ndukúndó iin tiempo ña̱ va̱ʼa natúʼunndó xa̱ʼa tu̱ndóʼo ña̱ ndóʼondó

• Tá káʼa̱n xíʼin táʼanndó va̱ása ka̱ʼnu̱ndó tu̱ʼun táʼanndó. Íyova tiempo ña̱ ka̱ʼa̱n iin iinndó

2 KUNISO̱ʼO ÑA̱ KÁʼA̱NÑÁ Á ÑA̱ KÁʼA̱NRA

ÑA̱ KÁʼA̱N BIBLIA: “Kundáʼviní-inindó kunitáʼanndó. To̱ʼó koondó xíʼin táʼanndó chinúundó yichi̱ nu̱ú táʼanndó xíʼin ña̱yóʼo” (Romanos 12:10). Xíniñúʼu kuniso̱ʼún ña̱ káʼa̱n ñá síʼún á yiíún tasaá va̱ʼa kunda̱a̱-iniún ndachun káʼa̱nñá á káʼa̱nra saá (1 Pedro 3:8; Santiago 1:19). Tá káʼa̱nñá á káʼa̱nra su̱ví ña̱ kuu kuitíún kúúña ña̱ xíniso̱ʼún. Sandákoo ña̱ kéʼún ta kuniso̱ʼo ña̱ káʼa̱nñá á ña̱ káʼa̱nra xíʼún, va̱ʼatu nda̱ka̱tu̱ʼun táʼanndó á kivi natúʼunndó xa̱ʼaña inka yichi̱va. Ndakaʼún chi su̱ví contra kúúndó xíʼin táʼanndó, chi ñá síʼívaún kúúñá á yiívaún kúúra tá ná ndakanixi̱níún ña̱yóʼo kǒo sa̱a̱ kamaún (Eclesiastés 7:9).

ÑA̱ VA̱ʼA KEʼÉNDÓ:

• Ni kǒo kútóún ña̱ káʼa̱n yiíún á ñá síʼún xíʼún kuniso̱ʼo ña̱ káʼa̱nna

• Xíʼin tu̱ʼun ña̱ káʼa̱nna kunda̱a̱-iniún ndáaña kúni̱na ka̱ʼa̱nna. Koto nu̱úna tá káʼa̱nna ta kuniso̱ʼo tu̱ʼunna á na̱ ndúkue̱ʼe̱ kúúna

3 CHIKA̱A̱KANDÓ NDÉE

ÑA̱ KÁʼA̱N BIBLIA: “Tá ná chika̱ún ndée xíʼin chiñu kéʼún ku̱a̱ʼá ña̱ va̱ʼa ndakiʼún, soo tá tu̱ʼun kuití kúú ña̱ káʼún kǒo ña̱ʼa ndakiʼún” (Proverbios 14:23). Su̱ví ña̱ ka̱ʼa̱n kuitíndó siʼa kooña ta xa̱va̱ʼaví. Xíniñúʼu keʼéndó ña̱ káʼa̱nndó. Xíniñúʼu chika̱a̱ndó ndée chi ña̱ va̱ʼa miívandó kúúña (Proverbios 10:4). Tá u̱vi̱ saándó chíka̱a̱ ndée, ku̱a̱ʼání ña̱ va̱ʼa ndakiʼinndó (Eclesiastés 4:9).

ÑA̱ VA̱ʼA KEʼÉNDÓ:

• Kotondó ndáaña va̱ʼa keʼé iin iinndó ña̱ va̱ʼa ná ya̱ʼa ku̱a̱chi ña̱ ndóʼondó

• Tá xa̱niya̱ʼa loʼo tiempo kotondó á xa̱va̱ʼa loʼo ndóondó