Nda̱saa va̱ʼa kuniñúʼuyó grabación
1. ¿Á iinlá kuití tutu ña̱ kána yuʼú maquina íyo kaʼviyó, á ndáaka inka ña̱ʼa íyo?
1 Ku̱a̱ʼání na̱ yiví kútóonína ki̱ʼvina nu̱ú jw.org ña̱ kaʼvina ña̱ va̱xi nu̱úña chi nina ña̱ va̱ʼa kúú ña̱yóʼo (Ecl. 12:10). Soo, ¿á xa̱xiniso̱ʼún grabación ña̱ va̱xi yóʼo? Ku̱a̱ʼání tutu ña̱ va̱xi nu̱ú Internet xa̱kúúmiíña grabación. ¿Nda̱chun kúú ña̱ va̱ʼaní kuniso̱ʼoyóña?
2. ¿Nda̱saa va̱ʼa kuniñúʼuyó grabación xíʼin na̱ veʼeyó á nda̱saa va̱ʼa kuniñúʼu miíyóña?
2 Va̱ʼa kuniñúʼu miíúnña ta va̱ʼa kuniñúʼutu na̱ veʼúnña. Ña̱ va̱ʼa kuniñúʼu viíyó tiempoyó tá ku̱a̱ʼa̱nyó yichi̱, á ndáaka chiñu kéʼéyó ná kuniso̱ʼoyó grabación ña̱ Biblia, ña̱ revista á nda̱a̱ ndáaka inka tutu (Efes. 5:15, 16). Inkatu ña̱ kivi keʼéyó tá káʼviyó xíʼin na̱ veʼeyó kúúña ná chika̱a̱yó iin grabación kuniso̱ʼoyó ta ná kundi̱kunyóña. Tá káʼvi mitúʼun miíyó, ña̱ grabación kivi chindeéña miíyó ña̱ va̱ʼa sakuaʼayó kaʼvi viíyó á ña̱ sakuaʼakayó inka tu̱ʼun.
3. ¿Ndáana kúú na̱ kivi chindeé táʼan grabación xíʼin?
3 Va̱ʼa kuniñúʼuyóña servicio. Ku̱a̱ʼání na̱ yiví na̱ ndáni̱ʼíyó tá ku̱a̱ʼa̱nyó veʼe tá veʼe ndákanixi̱nína ña̱ kǒo mií tiempona kaʼvina, soo sana kútóovana kuniso̱ʼona iin grabación. Á savatuna káʼa̱nna inka tu̱ʼun, soo tá ná kuniso̱ʼona iin grabación ña̱ tu̱ʼun miína sana kuni̱vana sakuaʼakana xa̱ʼa Ndióxi̱ (Hech. 2:6-8). Sava ñuu kútóonína kuniso̱ʼona historia. Tá kúú ñuu Hmong costumbre na̱yóʼo kúúña nátúʼunna iin historia xíʼin se̱ʼena ta yáʼa historia yóʼo ndaʼa̱ se̱ʼena saá ku̱a̱ʼa̱nña, ta va̱ʼaní ndákaʼánna xa̱ʼa ña̱ nátúʼunna xíʼinna. Tá kúú ñuu ña̱ ñúʼu chí África, ná ndóo kán kútóonína kuniso̱ʼona historia.
4. ¿Ndáa pregunta va̱ʼa keʼéyó xíʼin miíyó ña̱ va̱ʼa chindeéyó na̱ yiví na̱ ndáni̱ʼíyó veʼe tá veʼe?
4 Ná ndakanixi̱níyó xa̱ʼa ñuu nu̱ú ndóoyó, ¿á va̱ʼa chika̱a̱yó iin táʼvi loʼo grabación ña̱ va̱ʼa ná kuniso̱ʼonaña tu̱ʼun miína? ¿Á xíni̱ún ndáana kutóo kuniso̱ʼo iin grabación tá ná chindaʼáyóña ku̱ʼu̱nña ndaʼa̱na nu̱ú correo electrónico? Tá nda̱ni̱ʼíyó iin na̱ kúni̱ sakuaʼaka, ¿á va̱ʼa taváyó grabación nu̱ú Internet ta sáyáʼayóña nu̱ú iin disco ta taxiyóña ndaʼa̱na xíʼin tutu nu̱ú va̱xiña? Tá iin iin libro, folleto, revista á tratado, ña̱ sáyáʼayó ndaʼa̱na nu̱ú computadora á xíʼin nda̱a̱ ndáaka inka ña̱ʼa, va̱ʼava kaʼyíyóña nu̱ú informe ña̱ servicio. Ña̱ grabación su̱ví iinlá xa̱ʼa mií kuitíyó va̱xiña ña̱ kuniñúʼuyóña veʼeyó, chi va̱ʼatu kuniñúʼuyóña ña̱ natúʼunyó xa̱ʼa Ndióxi̱ xíʼin inkana (1 Cor. 3:6).