“Ta̱xi ta̱ Pablo tíxa̱ʼvi ndaʼa̱ Ndióxi̱ ta ndu̱ndakú-inira”

Tá ku̱ndáa-ini na̱ hermano na̱ ñuu Roma ña̱ va̱xi ta̱ Pablo, ndi̱kun ni̱xa̱ʼa̱nna ña̱ ndakutáʼanna xíʼinra ta ki̱ʼva 64 kilómetro ni̱xa̱ʼa̱nna ña̱ va̱ʼa kuninara. Ña̱ ni̱kuʼvi̱-inina xi̱nina ta̱ Pablo ¿nda̱saa chi̱ndeétáʼan ña̱yóʼo xíʼinra? Tá xi̱ni ta̱ Pablo na̱ hermano yóʼo, ta̱xira tíxa̱ʼvi ndaʼa̱ Ndióxi̱ ta ndu̱ndakú-inira (Hch 28:15). Ta̱ Pablo kúú ta̱ xi̱chika̱a̱ ndee̱ xíʼin na̱ hermano, soo vitin xa̱ʼa̱ ña̱ ndíka̱a̱ra veʼeka̱a xi̱niñúʼuníra ña̱ chika̱a̱na ndee̱ xíʼinra (2Co 13:10).

Tiempo vitin, na̱ superintendente ña̱ circuito kéʼéna táki̱ʼva xi̱keʼé ta̱ Pablo xíkana xítona na̱ hermano iin tá iin congregación ña̱ va̱ʼa chíka̱a̱na ndee̱ xíʼin na̱yóʼo. Sava yichi̱ kúnaana, ndákava-inina á ndíʼi-inina, nda̱a̱ táki̱ʼva ndóʼo ndiʼiyó na̱ káchiñu nu̱ú Jehová. ¿Ndáaña xíniñúʼun keʼéyó ña̱ va̱ʼa chika̱a̱yó ndee̱ xíʼin ta̱ superintendente xíʼin ñá síʼíra ña̱ va̱ʼa kusi̱íka-inina kachíñuna nu̱ú Jehová tá va̱xina xítona miíyó? (Ro 1:11, 12).

• 

  Ña̱ ya̱chi̱ xa̱a̱yó reunión tá kúma̱níka keena natúʼunna. Chíka̱a̱níña ndee̱ xíʼin ta̱ superintendente ña̱ circuito ña̱ va̱ʼaní kéeyó predicación semana ña̱ kíxira xítora miíyó (1Te 1:2, 3; 2:20). Chika̱a̱ ndee̱ ña̱ kooún precursor auxiliar ña̱ yo̱o̱ kíxira. ¿Á kuchiñu kitaún predicación xíʼin ta̱ superintendente, á xíʼin ñá síʼíra tá ku̱a̱ʼún káʼviún xíʼin na̱ yiví? Kǒo nda̱kanixi̱niún xa̱ʼa̱ ña̱ sa̱kán loʼoní tiempo kúún publicador á va̱ása xíni̱ún nda̱saa natúʼun, chi na̱ hermano yóʼo kúsi̱níva-inina ña̱ kitana predicación xíʼin ndiʼi na̱ hermano ti̱xin congregación.

• 

  Ña̱ va̱ʼa koo-iniyó xíʼinna. ¿Á va̱ʼa ndakiʼinyóna ña̱ kindo̱ona veʼeyó á ña̱ taxiyó kuxuna? Tá kéʼéyó ña̱yóʼo saá náʼanyó ña̱ kúʼvi̱-iniyó xíniyóna. Chi na̱ hermano yóʼo kǒo ndátuna ña̱ taxiyó iin ña̱ va̱ʼaní ndaʼa̱na (Lu 10:38-42).

• 

  Ña̱ kuniso̱ʼoyó consejo táxina ndaʼa̱yó ta keʼéyóña. Xa̱ʼa̱ ña̱ kúʼvi̱ní-ini ta̱ superintendente ña̱ circuito xínira miíyó chíndeétáʼanra xíʼinyó ña̱ kachíñuyó nu̱ú Jehová. Sava yichi̱ xa̱ʼa̱ ña̱ kúni̱ra va̱ʼaní ná keʼéyó, táxira consejo ndaʼa̱yó (1Co 5:1-5). Tá xíniso̱ʼoyó ña̱ káʼa̱nra xíʼinyó ta keʼéyóña, saá si̱íní kachíñura nu̱ú Jehová (Heb 13:17).

• 

  Ña̱ taxiyó tíxa̱ʼvi ndaʼa̱na. Ka̱ʼa̱n xíʼin ta̱ superintendente ña̱ circuito xíʼin ñá síʼíra xa̱ʼa̱ ña̱ va̱ʼaní chi̱ndeétáʼan na̱yóʼo xíʼún. Á kuchiñutu kaʼyíún iin tutu nu̱ú táxiún tíxa̱ʼvi ndaʼa̱na. (Col 3:15).