¿Ndáaña ndána̱ʼa̱ kití yukú tí kúúmií u̱xa̱ xi̱ní tí káʼa̱n Apocalipsis capítulo 13 xa̱ʼa̱?

Ña̱ káʼa̱n Biblia xa̱ʼa̱ ña̱yóʼo

Kití yukú tí u̱xa̱ xi̱ní tí káʼa̱n Apocalipsis 13:1 xa̱ʼa̱, ndána̱ʼa̱rí ndiʼi na̱ chíñu na̱ íyo iníísaá ñuyǐví.

• Ndána̱ʼa̱rí na̱ chíñu chi kúúmiína ndee̱ ta saátu nda̱yí ña̱ kaʼndachíñuna (Apocalipsis 13:2).

• Su̱ví iin kuití na̱ chíñu ndána̱ʼa̱rí saáchi “nda̱kiʼinrí nda̱yí ña̱ kaʼndachíñurí nu̱ú na̱ yiví ni nda̱a̱ ndáaka tribu kúúna, nda̱a̱ ndáaka tu̱ʼun káʼa̱nna ni kúúna na̱ ñuu válí á kúúna na̱ ñuu náʼnu” (Apocalipsis 13:7).

• Náʼa̱rí nda̱a̱ táki̱ʼva náʼa̱ ku̱mí saá kití yukú tí káʼa̱n Daniel 7:2-8 xa̱ʼa̱. Nda̱a̱ táki̱ʼva káa tí leopardo saá káarí, ta xa̱ʼa̱rí nda̱a̱ táki̱ʼva káa xa̱ʼa̱ tí oso saá káaña, ta yuʼúrí nda̱a̱ táki̱ʼva káa yuʼú tí ndikaʼa saá káaña ta íyo u̱xu̱ ndiki̱rí. Kití yukú tí ni̱ka̱ʼa̱n ta̱ Daniel xa̱ʼa̱, ndána̱ʼa̱rí na̱ xáʼndachíñu ñuu náʼnu (Daniel 7:17, 23). Ña̱kán kití yukú tí u̱xa̱ xi̱ní tí káʼa̱n Apocalipsis capítulo 13 xa̱ʼa̱, ndána̱ʼa̱rí ku̱a̱ʼá na̱ chíñu.

• Kítarí ini mar, ña̱yóʼo kúni kachiña ña̱ na̱ yiví kúú na̱ ndáka̱xin na̱ kaʼndachíñu (Apocalipsis 13:1; Isaías 17:12, 13).

• Tu̱ʼun Ndióxi̱ káʼa̱nña ña̱ kúúmiírí número 666 ta ña̱yóʼo kúú número ña̱ xíniñúʼu na̱ yiví (Apocalipsis 13:17, 18). Ña̱yóʼo kúni̱ kachiña ña̱ na̱ chíñu na̱ íyo nu̱ú ñuʼú yóʼova kúú na̱ ndána̱ʼa̱rí, va̱ása ndána̱ʼa̱rí na̱ íyo chí ndiví ta ni kǒo ndána̱ʼa̱rí na̱ ta̱chí ndi̱va̱ʼa.

Na̱ chíñu ñuyǐví yóʼo kǒo xíínna vií kitáʼanna, soo ndiʼina kúni̱na kaʼndachíñuna nu̱úka ña̱ taxina ña̱ kaʼndachíñu Reino Ndióxi̱ (Salmo 2:2). Tá ná koo ña̱ Armagedón, ndiʼi na̱ chíñu ndakutáʼanna ta kanitáʼanna xíʼin ta̱ Jesús ta saátu na̱ ángel na̱ kítáʼan xíʼinra, soo ndiʼi-xa̱ʼa̱va na̱ chíñu yóʼo (Apocalipsis 16:14, 16; 19:19, 20).

“10 xi̱kuu ndiki̱rí ta 7 xi̱kuu xi̱nírí”

¿Ndáaña chindeétáʼan xíʼinyó kunda̱a̱-iniyó ndáaña ndána̱ʼa̱ u̱xa̱ xi̱nírí xíʼin u̱xa̱ ndiki̱rí? Nu̱ú Apocalipsis capítulo 13 káʼa̱nña xa̱ʼa̱ “na̱ʼná tí kití yukú”. Ta tí kití yóʼo kúúrí tí color kúáʼa ña̱ yéʼe̱ní ta saátu kúúmiírí u̱xa̱ xi̱nírí ta saátu kúúmiírí u̱xu̱ ndiki̱ (Apocalipsis 13:1, 14, 15; 17:3). Ta nu̱ú libro yóʼo káʼa̱nña xa̱ʼa̱ xi̱nírí xíʼin ndiki̱rí ña̱ ndána̱ʼa̱ña na̱ chíñu (Apocalipsis 17:9, 10, 12).

Saátu u̱xa̱ xi̱ní tí kití yukú tí káʼa̱n Apocalipsis 13:1, ndána̱ʼa̱ña u̱xa̱ na̱ chíñu náʼnu na̱ xi̱xaʼndachíñu ta i̱xandi̱va̱ʼana xíʼin na̱ ñuu Ndióxi̱. Na̱yóʼo kúú na̱ ñuu Egipto, Asiria, Babilonia, Medopersia, Grecia, Roma, Gran Bretaña xíʼin Estados Unidos. ¿Nda̱chun kúúmií tí kití yukú yóʼo u̱xu̱ ndiki̱rí? Tá káʼa̱n Biblia xa̱ʼa̱ número, ndána̱ʼa̱ña iin ña̱ʼa. Tá kúú número u̱xu̱ ndána̱ʼa̱ña ña̱ʼa ña̱ íyo níí. Ña̱kán u̱xu̱ saá ndiki̱ kití yukú yóʼo ndána̱ʼa̱ña ndiʼi na̱ chiñu na̱ íyo ñuyǐví yóʼo, ni kúúmiína chiñu náʼnu á chiñu válí, xa̱ʼa̱ ña̱ kúúmií iin tá iin ndiki̱rí corona, náʼa̱ña ña̱ inkáchi xáʼndachíñuna xíʼin ña̱ potencia mundial.