Ndáa ki̱ʼva nandukúyó ña̱ chindeétáʼan xíʼinyó tá xa̱a̱ káʼviyó Biblia

Ña̱ va̱ʼa ndani̱ʼíyó ña̱ kivi chindeétáʼan xíʼinyó tá xa̱a̱ káʼviyó Biblia xíniñúʼu nandukúyó xa̱ʼa̱ña. Soo, ¿ndáaña kivi keʼéyó ña̱ va̱ʼa kunda̱a̱-iniyó xíʼin ña̱ nándukúyó?

Ná nandukú va̱ʼayó xa̱ʼa̱ ña̱ káʼviyó. Tá kúú, ¿ndáana ka̱ʼyí ña̱ káʼviyó? ¿Ama ka̱ʼyínaña? Ta, ¿ndáana káʼa̱nña xa̱ʼa̱? ¿Ndáaña ndóʼona tá ni̱ka̱ʼyi̱ña? ¿Ndáaña ku̱u xíʼinna?

Ná ndakanixi̱níyó xa̱ʼa̱ ña̱ sákuaʼayó. Ná nandukúyó ña̱ káʼa̱n xa̱ʼa̱ pregunta yóʼo. ¿Ndáa ki̱ʼva xi̱kuni na̱ yiví na̱ káʼa̱n ña̱ texto yóʼo xa̱ʼa̱? ¿Ndáaña va̱ʼa xi̱kuumiína ta nda̱chun xíniñúʼu keʼíi̱ táki̱ʼva ke̱ʼé na̱kán? ¿Ndáaña va̱ása va̱ʼa ke̱ʼéna ta nda̱chun kǒo xíniñúʼu keʼíi̱ nda̱a̱ táki̱ʼva ke̱ʼéna?

Ná keʼéyó ña̱ xa̱a̱ sa̱kúaʼayó. Tá kúú, tá ku̱a̱ʼa̱nyó natúʼunyó xíʼin na̱ yiví á tá kéʼéyó inka ña̱ʼa saá kéʼéyó ña̱ káʼa̱n Salmo 107:43: “Na̱ ndíchi ndákaʼánna xa̱ʼa̱ ña̱yóʼo”.

• Ña̱ kivi keʼún: Táʼví ña̱ káʼviyó reunión ña̱ xíyo ma̱ʼñú semana ña̱ naní “Ña̱ ndáyáʼviní káʼa̱n tu̱ʼun Ndióxi̱”, káʼa̱nña xa̱ʼa̱ ña̱ kivi chindeétáʼan xíʼinyó ña̱ va̱xi nu̱ú Biblia. Iin tá iin semana va̱xi pregunta ña̱ kivi chindeétáʼan xíʼinyó á ña̱ kivi ndakanixi̱níyó xa̱ʼa̱ ta saátu kúúmiíña na̱ʼná ña̱ kivi kotoyó.