Ka̱’a̱n xíʼin inkana xa̱ʼa̱ ña̱ sákuaʼún

Tá káʼviyó Biblia chíkaa̱ña ndee̱ xíʼinyó, soo tá káʼa̱nyó xíʼin inkana xa̱ʼa̱ ña̱ sa̱kúaʼayó chíkaa̱kaña ndee̱ xíʼinyó saá. Proverbios 11:25 káchiña: “Na̱ chíndeétáʼan xíʼin inkana saátu miína ku̱a̱ʼání ña̱ʼa ndakiʼinna”.

Tá káʼa̱nyó xíʼin inkana xa̱ʼa̱ ña̱ sa̱kúaʼayó, va̱ʼaníka ndákaʼányó xa̱ʼa̱ña saá ta saátu va̱ʼaka kúnda̱a̱-iniyó xíʼinña. Ta saátu ku̱si̱í-iniyó saáchi ña̱ nátúʼunyó xíʼinna chindeétáʼankaña xíʼinna ña̱ kandíxakana Ndióxi̱ (Hech. 20:35).

Keʼé ña̱yóʼo: Semana ña̱ va̱xi ka̱ʼa̱n xíʼin iinna xa̱ʼa̱ ña̱ sa̱kúaʼún. Kivi koona na̱ veʼún, iin na̱ hermano na̱ ñúʼu ti̱xin congregación, iin na̱ káchíñu xíʼún, na̱ káʼvi xíʼún á xíʼin iin na̱ íyo yatin xíʼún. Vií ná koo ña̱ ka̱ʼún xíʼinna ta káxi ná kooña ta xíʼin tu̱ʼun miíún ná kooña.

Ndakaʼán: Tá nátúʼunyó xíʼin inkana xa̱ʼa̱ ña̱ sa̱kúaʼayó, kéʼéyóña ña̱ va̱ʼa chikaa̱yó ndee̱ xíʼinna ta su̱ví xa̱ʼa̱ ña̱ kúni̱yó kindo̱o va̱ʼayó kúúña (1 Cor. 8:1).