ARTÍCULO ÑA̱ KAʼVIYÓ 31
YAA 12 Jehová, Ndióxi̱yó ta̱ káʼnu
Ña̱ ke̱ʼé Jehová ña̱ va̱ʼa sakǎkura miíyó ndaʼa̱ ku̱a̱chi ta va̱ása kuviyó
“Ndióxi̱ ni̱kuʼvi̱ní-inira xi̱nira na̱ ñuyǐví ta nda̱taxira se̱ʼera ta̱ mitúʼun xa̱ʼa̱na” (JUAN 3:16).
TEMA
Yóʼo sakúaʼayó ndáaña kéʼé Jehová ña̱ va̱ʼa chindeétáʼanra xíʼinyó ña̱ kǒo ki̱ʼviyó ku̱a̱chi, ta ndáaña keʼéra ña̱ va̱ʼa chindeétáʼanra xíʼinyó ña̱ va̱ása kookayó na̱ yiví ku̱a̱chi ta kutakuyó ndiʼi tiempo.
1, 2. a) ¿Ndáaña kúú ku̱a̱chi, ta ndáa ki̱ʼva kúú ña̱ va̱ása kuumiíkayóña? (Koto ña̱ naní “Ña̱ kúni̱ kachiña”). b) ¿Ndáaña sakúaʼayó nu̱ú artículo yóʼo ta saátu nu̱ú inkaka artículo ña̱ kixi nu̱ú tutu yóʼo? (Koto página 32 nu̱ú káʼa̱nña “Na̱ káʼvi tutu yóʼo”).
¿Á KÚNI̱ÚN kunda̱a̱-iniún ndáa ki̱ʼva ni̱na̱ʼa̱ Jehová ña̱ ndixaní kúʼvi̱-inira xínira yóʼó? Ña̱ va̱ʼa kunda̱a̱-iniún xa̱ʼa̱ ña̱yóʼo kivi kaʼviún xa̱ʼa̱ ña̱ ke̱ʼéra ña̱ va̱ʼa sakǎkura yóʼó ndaʼa̱ ku̱a̱chi ta va̱ása kuviún. Ku̱a̱chia ña̱ kúúmiíyó táki̱ʼva íyo ña̱ kánitáʼanyó xíʼin saá íyoña ta va̱ása kuchiñu iinlá miíyó kanitáʼanyó xíʼinña. Ndiʼi ki̱vi̱ kíʼviyó ku̱a̱chi ta xa̱ʼa̱ ña̱ kúúyó na̱ yiví ku̱a̱chi xíʼi̱yó (Rom. 5:12). Soo Jehová káʼa̱nra xíʼinyó ña̱ chindeétáʼanra xíʼinyó ña̱ kǒoka ku̱a̱chi kuumiíyó ta va̱ása kuviyó.
2 Xa̱a̱ 6,000 mil ku̱i̱ya̱ kúú ña̱ chíndeétáʼan Jehová xíʼin na̱ yiví ña̱ kachíñuna nu̱úra ni kúúna na̱ yiví ku̱a̱chi. Ta kéʼéra ña̱yóʼo chi kúʼvi̱ní-inira xínira miíyó. Tá i̱xava̱ʼara miíyó saáví kúú ña̱ ki̱xáʼara kúʼvi̱ní-inira xínira miíyó, xa̱ʼa̱ ña̱yóʼo kúú ña̱ xa̱a̱ kéʼéra ku̱a̱ʼání ña̱ʼa ña̱ va̱ʼa chindeétáʼanra xíʼinyó tá kíʼviyó ku̱a̱chi. Jehová kúnda̱a̱-inira ña̱ tá ná ki̱ʼviyó ku̱a̱chi, kuviyó. Ta kǒo kuni̱ra ña̱ ná kuvi nda̱a̱ ni iinyó chi kúni̱ra ná kutakuyó ndiʼi tiempo (Rom. 6:23). Ña̱kán kivi kandíxaún ña̱ kúni̱ra ná kutakún ndiʼi tiempo. Nu̱ú artículo yóʼo ndakuiinyó u̱ni̱ pregunta yóʼo: 1) ¿ndáaña ke̱ʼé Jehová ña̱ va̱ʼa kǒo kuumiíkayó ku̱a̱chi ta kivi kutakuyó?, 2) ¿ndáaña ke̱ʼé na̱ xi̱ndoo xi̱naʼá ña̱ va̱ʼa sakúsi̱ína-ini Jehová ni xi̱kuuna na̱ yiví ku̱a̱chi? ta, 3) ¿ndáaña ke̱ʼé ta̱ Jesús ña̱ va̱ʼa ndatavára na̱ yiví ndaʼa̱ ku̱a̱chi ta va̱ása kuvina?
¿NDÁAÑA KE̱ʼÉ JEHOVÁ ÑA̱ VA̱ʼA KǑO KUUMIÍKAYÓ KU̱A̱CHI TA KIVI KUTAKUYÓ?
3. ¿Ndáa ki̱ʼva ni̱xa̱a̱ ta̱ Adán xíʼin ñá Eva ni̱ki̱ʼvina ku̱a̱chi?
3 Tá i̱xava̱ʼa Jehová ta̱ Adán xíʼin ña̱ Eva xi̱kuni̱ra ña̱ si̱íní ná kundoona. Xa̱ʼa̱ ña̱kán kúú ña̱ ta̱xira iin nu̱ú liviní kundoona, sa̱tíndaʼa̱rana ta ni̱ka̱ʼa̱nra xíʼinna ná koo ku̱a̱ʼání se̱ʼena ta ndasalivina iníísaá nu̱ú ñuʼú nda̱a̱ táki̱ʼva liviní ni̱xi̱yo jardín ña̱ Edén. Iin kuití kúú ña̱ ni̱ka̱ʼa̱nra xíʼinna va̱ása keʼéna, soo tá ná ixaso̱ʼona, kuvina. Ta kúnda̱a̱va-iniyó ndáaña ku̱u: iin ángel ta̱ ndi̱va̱ʼaní-ini ta̱ va̱ása níxi̱kuʼvi̱-ini kuni miína, ni va̱ása níxi̱kuʼvi̱-inira xi̱xinira Jehová, ni̱ka̱ʼa̱nra ña̱ vatá xíʼin ta̱ Adán ta saátu xíʼin ñá Eva ta ni̱ki̱ʼvina ku̱a̱chi nu̱ú Ndióxi̱. Nu̱úka ña̱ kandíxana ña̱ ni̱ka̱ʼa̱n Jehová, ka̱ndíxana ña̱ ni̱ka̱ʼa̱n ta̱ Ndi̱va̱ʼa. Ta nda̱a̱ táki̱ʼva ni̱ka̱ʼa̱n Jehová kuu, saá ndixa ku̱uva. Ta nani saá ki̱xáʼa íyo ku̱a̱ʼání tu̱ndóʼo nu̱úna, ku̱chéena, ta ni̱xi̱ʼi̱na (Gén. 1:28, 29; 2:8, 9, 16-18; 3:1-6, 17-19, 24; 5:5).
4. ¿Nda̱chun kúndasí Jehová xínira ku̱a̱chi, ta nda̱chun chíndeétáʼanra xíʼinyó ña̱ va̱ása ki̱ʼviyó ku̱a̱chi? (Romanos 8:20, 21).
4 Jehová ta̱xira ña̱ ná ka̱ʼyi̱ ña̱ ku̱u yóʼo nu̱ú Biblia tasaá kunda̱a̱-iniyó xa̱ʼa̱ iin ña̱ʼa ña̱ ndáyáʼviní: ña̱ kúndasíníra xínira ku̱a̱chi. Ku̱a̱chi yóʼo sákuxíkáña miíyó nu̱ú Jehová ta xíʼi̱yó xíʼinña (Is. 59:2). Xa̱ʼa̱ ña̱yóʼo kúú ña̱ kútóoní ta̱ Ndi̱va̱ʼa ná ki̱ʼviyó ku̱a̱chi. Ña̱kán kúú ña̱ sa̱ndáʼvira ta̱ Adán xíʼin ñá Eva ta saátu kéʼéra xíʼin miíyó. Sana nda̱kanixi̱ní ta̱ Ndi̱va̱ʼa ña̱ ku̱chiñura sa̱sira nu̱ú Ndióxi̱. Soo va̱ása níxi̱kunda̱a̱-inira ña̱ kúʼvi̱ní-ini Jehová xínira miíyó. Chi va̱ása nínasama Jehová ña̱ xi̱kuni̱ra keʼéra xa̱ʼa̱ na̱ se̱ʼe ta̱ Adán xíʼin ñá Eva. Jehová kúʼvi̱ní-inira xínira na̱ yiví, ña̱kán ndi̱ku̱n ndu̱kúra ki̱ʼva ña̱ chindeétáʼanra xíʼinna (kaʼvi Romanos 8:20, 21). Xi̱kunda̱a̱-inira ña̱ koo sava na̱ kuʼvi̱ní-ini kuni miíra ta ka̱ʼa̱nna xíʼinra ña̱ ná chindeétáʼanra xíʼinna ña̱ va̱ása ki̱ʼvina ku̱a̱chi. Ta xa̱ʼa̱ ña̱ va̱ʼaní-ini Jehová taxira ná kuyatinna nu̱úra tasaá ka̱kuna ta va̱ása kuumiíkana ku̱a̱chi. Soo, ¿ndáa ki̱ʼva keʼéra ña̱yóʼo?
5. ¿Ndáaña ni̱ka̱ʼa̱n Jehová keʼéra xa̱ʼa̱ na̱ yiví? (Génesis 3:15).
5 (Kaʼvi Génesis 3:15). Ndi̱ku̱n ni̱ka̱ʼa̱n Jehová ña̱ sandíʼi-xa̱ʼa̱ra ta̱ Ndi̱va̱ʼa tasaá kivi kundatu na̱ yiví ndakiʼinna iin ña̱ va̱ʼa chí nu̱únínu. Ndióxi̱ ni̱ka̱ʼa̱nra xa̱ʼa̱ se̱ʼe iin ñá ñaʼá, ta̱ kundayáʼviní ta tá ná ya̱ʼa tiempo sandíʼi-xa̱ʼa̱ra ta̱ Ndi̱va̱ʼa ta ndasaviíra ndiʼi ku̱a̱chi ña̱ sa̱káku ta̱ Ndi̱va̱ʼa nu̱ú jardín ña̱ Edén (1 Juan 3:8). Xo̱ʼvi̱va se̱ʼe ñá ñaʼá yóʼo, saáchi ta̱ Ndi̱va̱ʼa kaʼnírara ta xo̱ʼvi̱ní-ini Jehová xíʼin ña̱yóʼo. Soo ni ni̱xo̱ʼvi̱ní-ini Jehová, ta̱xira ná kuvi se̱ʼera chi saá sakǎkura ku̱a̱ʼání na̱ yiví ta va̱ása kuumiíkana ku̱a̱chi.
¿NDÁAÑA XI̱KEʼÉ NA̱ XI̱NDOO TIEMPO XI̱NAʼÁ ÑA̱ VA̱ʼA SAKÚSI̱ÍNA-INI NDIÓXI̱ NI XI̱KUUNA NA̱ YIVÍ KU̱A̱CHI?
6. ¿Ndáaña ke̱ʼé ta̱ Abel ta saátu ta̱ Noé ña̱ va̱ʼa kuyatinna nu̱ú Jehová?
6 ¿Ndáaña kivi keʼé na̱ yiví ña̱ va̱ʼa kuyatinna nu̱ú Jehová ni kúúna na̱ yiví ku̱a̱chi? Loʼo tá loʼo ni̱ka̱ʼa̱n Jehová xa̱ʼa̱ ña̱yóʼo. Tá ni̱ki̱ʼvi ta̱ Adán xíʼin ñá Eva ku̱a̱chi, ta̱ siʼna ki̱xáʼa kándíxa Jehová xi̱kuu se̱ʼena ta̱ Abel. Ta̱yóʼo xi̱kuʼvi̱ní-inira xi̱xinira Jehová ta xi̱kuni̱ra sakúsi̱íra-inira ta kuyatinra nu̱úra. Ta xa̱ʼa̱ ña̱kán ni̱so̱kóra kití nu̱ú Jehová. Xa̱ʼa̱ ña̱ xi̱ndaara ndikachi, ki̱ʼinra sava tí nu̱ú va̱ʼa ka̱ku ta ni̱so̱kórarí nu̱ú Jehová. Ta, ¿ndáaña ke̱ʼé Jehová? “Ki̱ndoo-inira xíʼin ta̱ Abel ta saátu ña̱ ni̱so̱kóra nu̱úra” (Gén. 4:4). Tá ni̱ya̱ʼa tiempo, tá xi̱sokó na̱ yiví ña̱ʼa nu̱úra, xi̱kusi̱í-inira xíʼin ña̱yóʼo, saáchi xi̱keʼénaña xa̱ʼa̱ ña̱ kúʼvi̱-inina xíninara ta kándíxanara. Iin ta̱ ke̱ʼé ña̱yóʼo xi̱kuu ta̱ Noé (Gén. 8:20, 21). Ta ña̱yóʼo ni̱na̱ʼa̱ña ña̱ kiviva sakúsi̱í na̱ yiví ini Jehováb ta kuyatinna nu̱úra ní kúúna na̱ yiví ku̱a̱chi.
7. ¿Ndáaña sákuaʼayó xa̱ʼa̱ ña̱ chi̱kaa̱-ini ta̱ Abrahán so̱kóra se̱ʼera?
7 Jehová ni̱ka̱ʼa̱nra xíʼin ta̱ Abrahán ta̱ xi̱kandíxaní miíra ña̱ ná keʼéra iin ña̱ʼa ña̱ yo̱ʼvi̱ní: ña̱ so̱kóra se̱ʼera ta̱ Isaac nu̱úra. Ni̱xo̱ʼvi̱níva-ini ta̱ Abrahán xíʼin ña̱yóʼo, soo ni saá ka̱ndíxavara Jehová. Tá xa̱a̱ ku̱nu̱mí kaʼníra se̱ʼera, Jehová ni̱ka̱ʼa̱nra xíʼinra ña̱ ná kǒo keʼéraña. Soo íyo iin ña̱ ndáyáʼviní sákuaʼayó xíʼin ña̱ ke̱ʼé ta̱ Abrahán: ki̱ʼva saá keʼé Jehová chi taxira se̱ʼera ña̱ kuvira xa̱ʼa̱ na̱ yiví saáchi kúʼvi̱ní-inira xínira na̱yóʼo (Gén. 22:1-18).
8. ¿Ndáaña ni̱na̱ʼa̱ ña̱ʼa ña̱ xi̱sokó na̱ ñuu Ndióxi̱ tá xi̱ndiku̱nna ley? (Levítico 4:27-29; 17:11).
8 Tá ni̱ya̱ʼa ku̱i̱ya̱, Jehová ta̱xira ley ndaʼa̱ na̱ israelita ta ni̱ka̱ʼa̱nra xíʼinna ña̱ ná so̱kóna kití nu̱úra ña̱ va̱ʼa ixakáʼnu-inira xa̱ʼa̱ ku̱a̱china (kaʼvi Levítico 4:27-29; 17:11). Ña̱ xi̱sokó na̱yóʼo ni̱na̱ʼa̱ña ña̱ so̱kó Jehová se̱ʼera ta kundayáʼviníka ña̱yóʼo, saáchi sakǎkuña na̱ yiví ta va̱ása kuumiíkana ku̱a̱chi. Ndióxi̱ ni̱ka̱ʼa̱nra xíʼin na̱ profeta ña̱ ná kaʼyina xa̱ʼa̱ se̱ʼe ñá ñaʼá ña̱ xo̱ʼvi̱ra ta kuvira (se̱ʼe ñá ñaʼá yóʼo xi̱kuu se̱ʼe Ndióxi̱). Táki̱ʼva koo iin ndikachi tí sóko̱na saá koo ta̱yóʼo (Is. 53:1-12). Ña̱kán ni̱ka̱ʼa̱n Jehová ña̱ taxira se̱ʼera ta kúʼvi̱ní-inira xínira ña̱ va̱ʼa sakǎkura na̱ yiví ta va̱ása kuumiíkana ku̱a̱chi. Ndáyáʼviní ña̱ ke̱ʼé Jehová xa̱ʼún.
¿NDÁAÑA KE̱ʼÉ TA̱ JESÚS ÑA̱ VA̱ʼA NDA̱TAVÁRA NA̱ YIVÍ NDAʼA̱ KU̱A̱CHI?
9. ¿Ndáaña ni̱ka̱ʼa̱n ta̱ Juan ta̱ xi̱sandákuchi na̱ yiví? (Hebreos 9:22; 10:1-4, 12).
9 Tá ku̱i̱ya̱ 29, ta̱ Juan ta̱ xi̱sandákuchi na̱ yiví, xi̱nira ta̱ Jesús ta ni̱ka̱ʼa̱nra ña̱yóʼo: “Kotondó, ndikachi sa̱na̱ Ndióxi̱, ta̱ sándiʼi-xa̱ʼa̱ ku̱a̱chi ñuyǐví yóʼo” (Juan 1:29). Xíʼin ña̱ ni̱ka̱ʼa̱nra ni̱na̱ʼa̱ra ña̱ ta̱ Jesús kúú se̱ʼe ñá ñaʼá, ta̱ ni̱ka̱ʼa̱n Ndióxi̱ kixi sakǎku na̱ yiví. Ta̱yóʼo kúú ta̱ kuvi xa̱ʼa̱na, tasaá kúú ña̱ kivi ka̱ku na̱ yiví ta va̱ása kuumiíkana ku̱a̱chi (kaʼvi Hebreos 9:22; 10:1-4, 12).
10. ¿Ndáa ki̱ʼva ni̱na̱ʼa̱ ta̱ Jesús ña̱ ki̱xira chi̱ndeétáʼanra xíʼin na̱ yiví ku̱a̱chi?
10 Ta̱ Jesús xi̱ndiʼi-inira xa̱ʼa̱ na̱ yiví na̱ xi̱ndakava-ini xa̱ʼa̱ ña̱ xi̱kiʼvina ku̱a̱chi ta xi̱kaʼa̱nra xíʼinna ná kundiku̱nnara. Xi̱kunda̱a̱-inira ña̱ xóʼvi̱ní na̱ yiví xa̱ʼa̱ ña̱ kúúna na̱ yiví ku̱a̱chi. Ña̱kán kúú ña̱ chi̱ndeétáʼanra xíʼin na̱ yiví na̱ xi̱xoʼvi̱ xa̱ʼa̱ ña̱ ni̱ki̱ʼvina iin ku̱a̱chi. Ta ni̱ka̱ʼa̱nra ña̱yóʼo: “Na̱ íyo va̱ʼa kǒo xíniñúʼuna iin doctor, chi na̱ ndeéndóʼova kúú na̱ xíniñúʼu iin doctor”. Ta ni̱ka̱ʼa̱nkara: “Va̱ása va̱xii̱ ña̱ kanai̱ na̱ yiví va̱ʼa chi na̱ íyo ku̱a̱chiva va̱xii̱ xa̱ʼa̱” (Mat. 9:12, 13). Ta ni̱na̱ʼa̱ra ña̱yóʼo xíʼin ña̱ ke̱ʼéra. Tá kúú, i̱xakáʼnu-inira xa̱ʼa̱ ku̱a̱chi ña̱ ni̱ki̱ʼvi ñá ñaʼá ñá nda̱kata xa̱ʼa̱ra xíʼin ti̱kui̱í nu̱úñá (Luc. 7:37-50). Ta saátu ku̱a̱ʼání ña̱ʼa ña̱ ndáyáʼvi sa̱náʼa̱ra iin ñá ñaʼá ñá ñuu Samaria ni xi̱kunda̱a̱-inira ña̱ xi̱kiʼviñá ku̱a̱chi kini (Juan 4:7, 17-19, 25, 26). Na̱ yiví xíʼi̱na xa̱ʼa̱ ña̱ kúúna na̱ yiví ku̱a̱chi, soo ta̱xi Jehová ndee̱ ndaʼa̱ ta̱ Jesús ña̱ sandátakura na̱ ta̱a, ná ñaʼá ta saátu na̱ va̱lí (Mat. 11:5).
11. ¿Nda̱chun xi̱kutóo na̱ yiví na̱ xi̱kiʼvi ku̱a̱chi kuyatinna nu̱ú ta̱ Jesús?
11 Nda̱a̱ na̱ yiví na̱ xi̱kiʼvi ku̱a̱chi ña̱ ndeéní, xi̱kutóona kuyatinna nu̱ú ta̱ Jesús. Saáchi xi̱kunda̱a̱-inira xíʼin ña̱ xi̱ndoʼona ta xi̱kundáʼvi-inira xi̱xinirana (Luc. 15:1, 2). Ta saátu xi̱kaʼa̱nra tu̱ʼun va̱ʼa xíʼinna ta va̱ʼa ni̱xi̱yo inira xíʼinna xa̱ʼa̱ ña̱ xi̱naʼa̱na ña̱ xi̱kandíxanara (Luc. 19:1-10). Ta̱ Jesús ni̱na̱ʼa̱ra ña̱ kúndáʼviní-ini yivára xínira na̱ yiví (Juan 14:9). Xíʼin ña̱ ni̱ka̱ʼa̱nra ta saátu xíʼin ña̱ ke̱ʼéra, ni̱na̱ʼa̱ra ña̱ kúʼvi̱ní-ini Jehová xínira miíyó ta kúndáʼvi-inira xínira miíyó. Ta kúni̱ra chindeétáʼanra xíʼinyó ña̱ va̱ása ki̱ʼvikayó ku̱a̱chi. Ta̱ Jesús chi̱ndeétáʼanra xíʼin na̱ yiví ña̱ kuni̱na sandákoona ña̱ va̱ása va̱ʼa kéʼéna ta ndakundiku̱nnara (Luc. 5:27, 28).
12. ¿Ndáaña ni̱ka̱ʼa̱n ta̱ Jesús kuu tá ná kuvira?
12 Xi̱kunda̱a̱va-ini ta̱ Jesús ndáaña kundoʼora. Ku̱a̱ʼá yichi̱ ni̱ka̱ʼa̱nra xíʼin na̱ xi̱ndiku̱n miíra ña̱ xi̱íkónara ta kaʼnínara (Mat. 17:22; 20:18, 19). Saátu xi̱kunda̱a̱-inira ña̱ tá ná kuvira saá ndoo ku̱a̱chi na̱ yiví, nda̱a̱ táki̱ʼva ni̱ka̱ʼa̱n ta̱ Juan xíʼin na̱ profeta. Ta saátu ni̱ka̱ʼa̱nra ña̱ tá ná kuvira, ku̱a̱ʼání na̱ yiví ndakundiku̱nnara (Juan 12:32). Ta na̱ yiví na̱ xa̱a̱ kandíxa ta̱ Jesús ta kundiku̱nna yichi̱ra, kivi sakúsi̱ína-ini Jehová tasaá sa̱ñána ndaʼa̱ ku̱a̱chi (Rom. 6:14, 18, 22; Juan 8:32). Ndakúní ni̱xi̱yo ini ta̱ Jesús ta chi̱kaa̱-inira kuvira ña̱ va̱ʼa sakǎkura miíyó (Juan 10:17, 18).
13. ¿Ndáaña ke̱ʼéna xíʼin ta̱ Jesús, ta ndáaña sákuaʼayó xa̱ʼa̱ Jehová xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó? (Koto na̱ʼná).
13 Ni̱xi̱íkóna ta̱ Jesús, ti̱innara, ni̱ka̱ʼa̱n ndi̱va̱ʼana xíʼinra, ni̱ka̱ʼa̱nna ña̱ vatá xa̱ʼa̱ra, ni̱ka̱ʼa̱nna ña̱ kaʼnínara ta ndeéní ka̱ninara. Tándi̱ʼi, na̱ soldado ka̱tikaanara ndaʼa̱ yitu̱n ña̱ va̱ʼa kuvira. Ku̱ndeé-ini ta̱ Jesús xíʼin ndiʼi ña̱ ke̱ʼéna xíʼinra, soo ni̱xo̱ʼvi̱ní-ini Jehová tá xi̱nira ña̱ ke̱ʼéna xíʼin se̱ʼera. Ni xi̱kuʼvi̱ní-ini Jehová xi̱xinirara ta ni íyoní ndee̱ ndaʼa̱ra, va̱ása níndatavárara nu̱ú tu̱ndóʼo yóʼo. ¿Nda̱chun kǒo níkeʼéra ña̱yóʼo? Xa̱ʼa̱ ña̱ kúʼvi̱-inira xínira miíyó. Ta̱ Jesús ka̱chira: “Saáchi Ndióxi̱ ni̱kuʼvi̱ní-inira xi̱nira na̱ ñuyǐví ta nda̱taxira se̱ʼera ta̱ mitúʼun xa̱ʼa̱na, ña̱ va̱ʼa ndiʼi na̱ kándíxa miíra kǒo ndiʼi-xa̱ʼa̱na chi kutakuna ndiʼi tiempo” (Juan 3:16).
Ña̱ va̱ʼa ndatavá Jehová miíyó ndaʼa̱ ku̱a̱chi ta va̱ása kuviyó, ta̱xira ña̱ kaʼnína se̱ʼera ni ni̱xo̱ʼvi̱ní-inira xa̱ʼa̱ ña̱yóʼo. (Koto párrafo 13).
14. ¿Ndáaña sákuaʼún xíʼin ña̱ ke̱ʼé ta̱ Jesús?
14 Tá ta̱xi Jehová se̱ʼera ta̱ Jesús ña̱ ni̱xi̱ʼi̱ra xa̱ʼa̱yó, saá kúú ña̱ ni̱na̱ʼa̱ra ña̱ kúʼvi̱ní-inira xínira miíyó ni nda̱kiʼinyó ku̱a̱chi ña̱ sa̱ndákoo ta̱ Adán xíʼin ñá Eva ndaʼa̱yó. Ta saátu náʼa̱ra ña̱ kúʼvi̱ní-inira xínira yóʼó. ¿Á va̱ása ndákanda̱-iniún xíʼin ña̱ ke̱ʼé Jehová xa̱ʼún, ña̱ ta̱xira ni̱xo̱ʼvi̱ se̱ʼera ña̱ va̱ʼa sakǎkura yóʼó ta va̱ása kuumiíkaún ku̱a̱chi? (1 Juan 4:9, 10). Jehová kúni̱ra chindeétáʼanra xíʼin ndiʼiyó ña̱ kundeé-iniyó ta kǒo ki̱ʼviyó ku̱a̱chi.
15. ¿Ndáaña xíniñúʼu keʼéyó tasaá ndakiʼinyó ña̱ va̱ʼa xa̱ʼa̱ ña̱ ni̱xi̱ʼi̱ ta̱ Jesús?
15 Va̱ʼaní ke̱ʼé Jehová ña̱ ta̱xira se̱ʼera ña̱ ni̱xi̱ʼi̱ra xa̱ʼa̱yó chi saá kúú ña̱ kivi ixakáʼnu-inira xa̱ʼa̱ ku̱a̱chiyó. Soo íyo iin ña̱ xíniñúʼu keʼé miíyó. Ta̱ Juan ta̱ xi̱sandákuchi na̱ yiví ta saátu ta̱ Jesús ni̱ka̱ʼa̱nna ndáaña xíniñúʼu keʼéyó: “Ndikó-inindó saáchi Reino Ndióxi̱ ña̱ íyo chí ndiví xa̱a̱ ku̱yatinña” (Mat. 3:1, 2; 4:17). Ña̱kán xíniñúʼu ndandikó-iniyó xa̱ʼa̱ ku̱a̱chi ña̱ kíʼviyó tá kúni̱yó kuyatinyó nu̱ú Jehová. Soo, ¿ndáaña kúni̱ kachi ña̱ ndandikó-iniyó? Ta, ¿ndáa ki̱ʼva chíndeétáʼanña xíʼinyó ña̱ sakúsi̱íyó-ini Jehová ni kúúyó na̱ yiví ku̱a̱chi? Nu̱ú inka artículo sakúaʼayó xa̱ʼa̱ ña̱yóʼo.
YAA 18 Tixaʼviún Jehová
a ÑA̱ KÚNI̱ KACHIÑA: Tá káʼa̱n tu̱ʼun Ndióxi̱ xa̱ʼa̱ ku̱a̱chi, su̱ví inkáchi ku̱a̱chi káʼa̱nña xa̱ʼa̱. Tá kúú, kíʼviyó ku̱a̱chi tá kéʼéyó ña̱ kǒo kútóo Jehová á tá va̱ása kéʼéyó ña̱ káʼa̱nra xíʼinyó. Ta saátu kúúyó na̱ yiví ku̱a̱chi chi ta̱ Adán sa̱yáʼara ña̱yóʼo ndaʼa̱yó. Ta xa̱ʼa̱ ku̱a̱chi ña̱ sa̱yáʼara ndaʼa̱yó kúú ña̱ xíʼi̱ ndiʼiyó.