Táxiníyó tíxa̱ʼvi ndaʼa̱ Jehová xa̱ʼa̱ ña̱ íxakáʼnu-inira xa̱ʼa̱yó

1, 2. ¿Nda̱chun káʼa̱nyó ña̱ íyoyó nda̱a̱ táki̱ʼva íyo ta̱ loʼo ta̱ káʼa̱n ña̱ párrafo 1 xa̱ʼa̱?

NÁ NDAKANIXI̱NÍYÓ xa̱ʼa̱ iin ta̱ loʼo, na̱ yivá ta̱ loʼo yóʼo kúikánína. Soo iin ki̱vi̱ na̱túʼunna xíʼinra ña̱ ni̱xi̱ʼi̱ na̱ yivára. Soo su̱ví ña̱yóʼo kúú ndiʼiña, chi saátu ku̱ndaa̱-inira ña̱ na̱ yivára sa̱ndíʼi ndiʼina xu̱ʼún ña̱ xi̱kuumiína ta níkána ku̱a̱ʼání xu̱ʼún. Xa̱ʼa̱ ña̱kán, nu̱úka ña̱ kindo̱ora xíʼin xu̱ʼún ña̱ xi̱kuumiína, xíniñúʼu chaʼvira ndiʼi ña̱ níkána. Ta xa̱a̱ ni̱ka̱ʼa̱nna xíʼinra ña̱ kama ná chaʼvira ndiʼi ña̱ níkána, soo xa̱ʼa̱ ña̱ ku̱a̱ʼání xu̱ʼún níkána nda̱a̱ ni loʼo kǒo kuchiñura chaʼviraña.

² Nda̱a̱ táki̱ʼva ndo̱ʼo ta̱ loʼo yóʼo saátu ndóʼo ndiʼi miíyó na̱ yiví. Ta̱ Adán xíʼin ñá Eva kǒo ku̱a̱chi níxi̱kuumiína tá xi̱ndoona nu̱ú iin ñuʼú ña̱ liviní (Gén. 1:27; 2:​7-9). Si̱íníva kundoona ndiʼi tiempo ta ku̱a̱ʼání ña̱ʼa va̱ʼa kuumiína tá níxiniso̱ʼona. Soo su̱ví saáví níkuu, saáchi kǒo níkivika kundoona nu̱ú ñuʼú ña̱ liviní kán ta saátu kǒo níkivika kutakuna ndiʼi tiempo. Kǒo ña̱ va̱ʼaví nísandákoona ndaʼa̱yó. Ña̱ Biblia káʼa̱nña ña̱yóʼo: “Xa̱ʼa̱ iin ta̱a kúú ña̱ ni̱ki̱ʼvi ku̱a̱chi ñuyǐví yóʼo ta xa̱ʼa̱ ku̱a̱chi yóʼo kúú ña̱ xíʼi̱yó, tasaá kúú ña̱ ki̱xáʼa xíʼi̱ ndiʼi na̱ yiví, chi ndiʼina ni̱ki̱ʼvi ku̱a̱chi” (Rom. 5:12). Herencia ña̱ sa̱ndákoo ta̱ Adán ndaʼa̱yó kúú ku̱a̱chi ña̱ kúúmiíyó ta xa̱ʼa̱ ña̱yóʼo ndiʼiyó xíʼi̱. Ña̱ ku̱a̱chi yóʼo íyoña nda̱a̱ táki̱ʼva íyo ña̱ níkáyó ku̱a̱ʼání xu̱ʼún ta nda̱a̱ ni iinyó kǒo kuchiñu chaʼviña (Sal. 49:8).

3. ¿Ndáaña kúu tá kíʼviyó ku̱a̱chi?

³ Ta̱ Jesús chi̱táʼanra ku̱a̱chi ña̱ kúúmiíyó xíʼin ña̱ níkáyó (Mat. 6:12; Luc. 11:4). Tá kíʼviyó ku̱a̱chi nda̱a̱ táki̱ʼva íyo na̱ níká nu̱ú Jehová saá íyoyó ta xíniñúʼu chaʼviyóña. Jehová ndu̱kúra ki̱ʼva ña̱ chaʼvira xa̱ʼa̱ ku̱a̱chiyó, chi tá kǒo níkeʼéraña ndiʼiyó kuvi (Rom. 6:​7, 23).

4. a) Tá kǒo níchindeétáʼan Ndióxi̱ xíʼinyó, ¿ndáaña kundoʼoyó? (Salmo 49:​7-9). b) Tá káʼa̱n Biblia xa̱ʼa̱ ku̱a̱chi, ¿ndáaña kúni̱ kachiña? (Koto recuadro ña̱ naní “Ku̱a̱chi”).

⁴ Xíniñúʼuyó na̱ chindeétáʼan xíʼinyó ña̱ va̱ʼa ndikó tukuyó kooyó táki̱ʼva ni̱xi̱yo ta̱ Adán xíʼin ñá Eva (kaʼvi Salmo 49:​7-9).a Xa̱ʼa̱ ña̱ chi̱ndeétáʼan Ndióxi̱ xíʼinyó, kivi kooyó ndiʼi tiempo ta saátu kivi ndataku na̱ ni̱xi̱ʼi̱. Saáchi tá kǒo níchindeétáʼanra xíʼinyó, kundoʼoyó nda̱a̱ táki̱ʼva ndóʼo ndiʼi kití chi tá xíʼi̱rí ndíʼi-xa̱ʼa̱varí (Ecl. 3:19; 2 Ped. 2:12).

5. ¿Ndáaña ke̱ʼé Jehová ña̱ va̱ʼa chaʼvira xa̱ʼa̱ ku̱a̱chiyó? (Koto na̱ʼná ña̱ va̱xi chí nu̱ú kíxáʼa tutu yóʼo).

⁵ Ná ndakani tuku xi̱níyó xa̱ʼa̱ ta̱ loʼo ta̱ ni̱ka̱ʼa̱nyó xa̱ʼa̱ nu̱ú párrafo 1. ¿Ndáa ki̱ʼva kunira tá iin ta̱ kúikání ná ka̱ʼa̱n xíʼinra ña̱ chaʼvira ndiʼi ña̱ níkára? Taxinívara tíxa̱ʼvi ndaʼa̱ ta̱yóʼo ta taxivara ña̱ chindeétáʼanra xíʼinra. Ki̱ʼva saá íyo ña̱ ke̱ʼé yiváyó Jehová xa̱ʼa̱yó chi kúʼvi̱ní-inira xínira miíyó, ta̱xira iin regalo ña̱ va̱ʼaní ndaʼa̱yó ña̱ va̱ʼa chaʼvira xa̱ʼa̱ ndiʼi ku̱a̱chi ña̱ sa̱ndákoo ta̱ Adán ndaʼa̱yó. Ña̱yóʼo kúú ña̱ ni̱ka̱ʼa̱n ta̱ Jesús xa̱ʼa̱ ña̱yóʼo: “Ndióxi̱ ni̱kuʼvi̱ní-inira xi̱nira na̱ ñuyǐví ta nda̱taxira se̱ʼera ta̱ mitúʼun xa̱ʼa̱na, ña̱ va̱ʼa ndiʼi na̱ kándíxa miíra kǒo ndiʼi-xa̱ʼa̱na chi kutakuna ndiʼi tiempo” (Juan 3:16). Xa̱ʼa̱ ña̱ ta̱xi Jehová regalo yóʼo ndaʼa̱yó, kivi kutáʼan viíyó xíʼinra.

6. ¿Ndáa tu̱ʼun ña̱ va̱xi nu̱ú Biblia ka̱ʼa̱nyó xa̱ʼa̱ nu̱ú artículo yóʼo, ta nda̱chun?

⁶ ¿Ndáaña va̱ʼa ndákiʼinyó xa̱ʼa̱ ña̱ íxakáʼnu-ini Jehová xa̱ʼa̱ ku̱a̱chiyó? Ña̱ va̱ʼa kunda̱a̱-iniyó xa̱ʼa̱ ña̱yóʼo, nu̱ú artículo yóʼo ka̱ʼa̱nyó xa̱ʼa̱ sava tu̱ʼun ña̱ ndáyáʼviní ña̱ káʼa̱n Biblia xa̱ʼa̱: ña̱ ndakutáʼan viíyó xíʼin Ndióxi̱, ña̱ ndoo ku̱a̱chiyó, ña̱ cha̱ʼvira xa̱ʼa̱ ku̱a̱chiyó ta saátu ña̱ ka̱ʼa̱nra xa̱ʼa̱yó ña̱ kúúyó na̱ yiví va̱ʼa. Ña̱ sakúaʼayó xa̱ʼa̱ ña̱yóʼo, chindeétáʼanña xíʼinyó ña̱ taxiníkayó tíxa̱ʼvi ndaʼa̱ Jehová xa̱ʼa̱ ndiʼi ña̱ ke̱ʼéra xa̱ʼa̱yó ña̱ va̱ʼa ixakáʼnu-inira xa̱ʼa̱ ku̱a̱chiyó.

NDIÓXI̱ KÚNI̱RA ÑA̱ NDAKUTÁʼAN VIÍYÓ XÍʼINRA

7. a) ¿Ndáaka ña̱ ndi̱ʼi-xa̱ʼa̱ i̱xaa ta̱ Adán xíʼin ñá Eva? b) ¿Ndáaña xíniñúʼuní miíyó na̱ se̱ʼe ta̱ Adán xíʼin ñá Eva? (Romanos 5:​10, 11).

⁷ Su̱ví nda̱saa ña̱ kutaku ta̱ Adán xíʼin ñá Eva ndiʼi tiempo kúú ña̱ ndi̱ʼi-xa̱ʼa̱, chi saátu va̱ása níkivika kutáʼan viína xíʼin yivána Jehová. Tá kúma̱níka ki̱ʼvina ku̱a̱chi, xi̱kuuna na̱ veʼe Ndióxi̱ (Luc. 3:38). Soo xa̱ʼa̱ ña̱ kǒo níxiniso̱ʼokana ña̱ ni̱ka̱ʼa̱n Jehová, kǒo níkivika koona na̱ veʼera. Ña̱yóʼo ku̱uña tá kúma̱níka koo se̱ʼena (Gén. 3:​23, 24; 4:1). Xa̱ʼa̱ ña̱kán, miíyó na̱ kúú se̱ʼena xíniñúʼu ndakutáʼan viíyó xíʼin Jehová (kaʼvi Romanos 5:​10, 11). Ta ndáyáʼviní ña̱ ná ndakutáʼan viíyó xíʼinra. Iin tutu ña̱ káʼa̱n xa̱ʼa̱ Biblia káʼa̱nña ña̱ tá káʼa̱n texto yóʼo xa̱ʼa̱ ña̱ ndakutáʼan viíyó xíʼin Ndióxi̱, xíniñúʼuña iin tu̱ʼun griego ña̱ kúni̱ kachi, “na̱ sáa̱-ini xíni miíyó nduuna migoyó”. Xa̱ʼa̱ ña̱ kúni̱ní Jehová xínira miíyó, ndu̱kúra ki̱ʼva ña̱ va̱ʼa ndakutáʼan viíyó xíʼinra. ¿Ndáa ki̱ʼva ke̱ʼéraña?

ÑA̱ KE̱ʼÉRA ÑA̱ VA̱ʼA NDOO KU̱A̱CHIYÓ

8. ¿Ndáaña ke̱ʼé Jehová?

⁸ Íyo iin ña̱ ndáyáʼviní ke̱ʼé Jehová ña̱ va̱ʼa chaʼvira xa̱ʼa̱ ña̱ ke̱ʼé ta̱ Adán tasaá ndoo ku̱a̱chiyó. Ña̱ ndoo ku̱a̱chiyó kivi chindeétáʼanña xíʼinyó ña̱ va̱ʼa ndikó tukuyó kutáʼan viíyó xíʼin Ndióxi̱ (Rom. 3:25).

9. ¿Ndáaña ni̱ka̱ʼa̱n Jehová xíʼin na̱ israelita keʼéna ña̱ va̱ʼa ixakáʼnu-inira xa̱ʼa̱ ku̱a̱china?

⁹ Tá tiempo ña̱ xi̱ndoo na̱ israelita, Jehová ni̱ka̱ʼa̱nra xíʼinna ndáaña kivi keʼéna ña̱ va̱ʼa koo káʼnu-inira xa̱ʼa̱ ku̱a̱china tasaá kutáʼan viína xíʼinra. Iin yichi̱ nu̱ú ku̱i̱ya̱ xi̱keʼéna ña̱ xi̱naní Ki̱vi̱ ña̱ ndóo ku̱a̱china, ta ki̱vi̱ yóʼo kúú ña̱ xi̱sokó ta̱ su̱tu̱ káʼnu kití xa̱ʼa̱ ku̱a̱chi na̱ ñuu. Ta ni xi̱sokóvana kití yóʼo, va̱ása níxi̱kivi ndoo ndiʼi ku̱a̱chi na̱ israelita, saáchi ndáyáʼviníkava na̱ yiví nu̱ú kití. Soo tá xíʼin ndiʼi níma̱na xi̱ndikó-inina ta xi̱sokóna ña̱ʼa ña̱ xi̱ndukú Jehová nu̱úna, xi̱ ixakáʼnuva-inira xa̱ʼa̱na (Heb. 10:​1-4). Ta ña̱ʼa ña̱ xi̱sokóna Ki̱vi̱ ña̱ ndóo ku̱a̱china ta saátu ña̱ xi̱sokóna inkaka yichi̱, xi̱sandákaʼánñana ña̱ kúúna na̱ yiví ku̱a̱chi ta xi̱xiniñúʼuna iin ña̱ ndakata va̱ʼa ku̱a̱china tasaá kǒo ndikókana so̱kóna ña̱ʼa xa̱ʼa̱ ku̱a̱china.

10. ¿Ndáaña ke̱ʼé Jehová ña̱ va̱ʼa ixakáʼnu-inira xa̱ʼa̱ ndiʼi ku̱a̱chiyó?

¹⁰ ¿Ndáaña ke̱ʼé Jehová ña̱ va̱ʼa ixakáʼnu-inira xa̱ʼa̱ ndiʼi ku̱a̱chiyó? Ta̱xira se̱ʼera ta̱ kúni̱níra xínira ña̱ va̱ʼa chaʼvira xa̱ʼa̱ ku̱a̱chi ku̱a̱ʼání na̱ yiví (Heb. 9:28). Ta̱ Jesús ni̱xi̱ʼi̱ra ña̱ va̱ʼa chaʼvira xa̱ʼa̱ na̱ yiví (Mat. 20:28). ¿Ndáaña kúni̱ kachi ña̱ chaʼvira xa̱ʼa̱yó?

CHA̱ʼVIRA ÑA̱ VA̱ʼA SA̱KǍKURA MIÍYÓ

11. a) Tá káʼa̱n Biblia xa̱ʼa̱ ña̱ chaʼvina xa̱ʼa̱yó, ¿ndáaña kúni̱ kachiña? b) ¿Ndáa ki̱ʼva xi̱niñúʼu koo ta̱ chaʼvi xa̱ʼa̱yó?

¹¹ Tá káʼa̱n Biblia xa̱ʼa̱ tu̱ʼun chaʼvina, kúni̱ kachiña ña̱ chaʼvina xa̱ʼa̱ iin ña̱ʼa ña̱ va̱ʼa ndakiʼinnaña.b Ta ña̱yóʼo kúú ña̱ ke̱ʼé Jehová ña̱ va̱ʼa kooyó nda̱a̱ táki̱ʼva xi̱kuni̱ra tá xa̱ʼa̱. Ná ndakaʼányó chi ta̱ Adán xíʼin ñá Eva kǒo níkivika koona ndiʼi tiempo nda̱a̱ táki̱ʼva xi̱kuni̱ Jehová. Xa̱ʼa̱ ña̱kán, ña̱ xi̱niñúʼu chaʼvi Jehová xa̱ʼa̱yó inkáchi xi̱niñúʼu kooña xíʼin ña̱ sa̱ndíʼi-xa̱ʼa̱na (1 Tim. 2:6). Iin ta̱a ta̱ sáxi̱nu ña̱yóʼo kúú ta̱ kivi chaʼvi xa̱ʼa̱yó: 1) ta̱ kǒo ku̱a̱chi kúúmií, 2) ta̱ kivi koo ndiʼi tiempo nu̱ú ñuʼú, 3) ta saátu kuni̱ra kuvira xa̱ʼa̱yó. Tá sáxi̱nura u̱ni̱ saá ña̱yóʼo saá kúú ña̱ kivi chaʼvira xa̱ʼa̱ ku̱a̱chiyó.

12. ¿Nda̱chun va̱ʼa cha̱ʼvi ta̱ Jesús xa̱ʼa̱ ku̱a̱chiyó?

¹² Ná ka̱ʼa̱nyó xa̱ʼa̱ u̱ni̱ ña̱ʼa ña̱ ke̱ʼé ta̱ Jesús ña̱ va̱ʼa chaʼvira xa̱ʼa̱yó: 1) kǒo ku̱a̱chi níxikuumiíra ta “va̱ása níki̱ʼvira ku̱a̱chi”, 2) xa̱ʼa̱ ña̱kán kivi kutakura ndiʼi tiempo nu̱ú ñuʼú yóʼo, 3) saátu ni̱xi̱yo tu̱ʼvara ña̱ kuvira xa̱ʼa̱yó (1 Ped. 2:22; Heb. 10:​9, 10). Ta̱ Jesús xi̱kuura iin ta̱a ta̱ kǒo ku̱a̱chi kúúmií, nda̱a̱ táki̱ʼva ni̱xi̱yo ta̱ Adán tá kúma̱níka ki̱ʼvira ku̱a̱chi (1 Cor. 15:45). Ña̱kán, xa̱ʼa̱ ña̱ ni̱xi̱ʼi̱ra xa̱ʼa̱yó ndo̱o ku̱a̱chi ña̱ sa̱ndákoo ta̱ Adán ndaʼa̱yó, tasaá kivi ndikó tukuyó kuumiíyó ña̱ sa̱ndíʼi-xa̱ʼa̱ ta̱ Adán (Rom. 5:19). Xa̱ʼa̱ ña̱yóʼo, ta̱ Jesús kúú ta̱ ni̱xa̱a̱ ku̱u “ta̱ Adán ta̱ ki̱xi nu̱ú ndíʼi”. Ña̱kán kǒo xíniñúʼu kuvi tuku inka na̱ kǒo ku̱a̱chi kúúmií xa̱ʼa̱yó. Saáchi ta̱ Jesús “iin yichi̱ nda̱taxira miíra ndaʼa̱ Ndióxi̱ ta va̱ása ndikókara keʼéra ña̱yóʼo” (Heb. 7:27; 10:12).

13. ¿Nda̱chun kivi kutáʼan viíyó xíʼin Jehová?

¹³ Ña̱ ndoo ku̱a̱chiyó kúni̱ kachiña ña̱ i̱xatu̱ʼva Ndióxi̱ iin ña̱ʼa ña̱ va̱ʼa ndakutáʼan vií tukuyó xíʼinra. Soo ña̱ va̱ʼa ndoo ña̱yóʼo xi̱niñúʼu chaʼvina xa̱ʼa̱yó, ta ta̱ cha̱ʼvi xa̱ʼa̱ ku̱a̱chiyó kúú ta̱ Jesús tá ni̱xi̱ʼi̱ra xa̱ʼa̱yó (Efes. 1:7; Heb. 9:14).

NDIÓXI̱ KÁʼA̱NRA ÑA̱ KÚÚYÓ NA̱ YIVÍ VA̱ʼA

14. ¿Ndáaña ka̱ʼa̱nyó xa̱ʼa̱, ta nda̱chun?

¹⁴ ¿Ndáaña va̱ʼa ndákiʼinyó xa̱ʼa̱ ña̱ ndo̱o ku̱a̱chiyó? Ña̱ va̱ʼa ndakuiinyó pregunta yóʼo, ná ka̱ʼa̱nyó ndáaña kúni̱ kachi sava tu̱ʼun ña̱ káʼa̱n Biblia xa̱ʼa̱. Chi ña̱yóʼo chindeétáʼanña xíʼinyó ña̱ kunda̱a̱-iniyó ndáaña va̱ʼa ndákiʼinyó xa̱ʼa̱ ña̱ íxakáʼnu-ini Jehová xa̱ʼa̱ ku̱a̱chiyó.

15, 16. a) ¿Ndáaña va̱ʼa ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó? b) ¿Ndáa ki̱ʼva kúniyó xa̱ʼa̱ ña̱ kivi sa̱ñáyó ndaʼa̱ ku̱a̱chi ta kǒo kuvikayó?

¹⁵ Ña̱ Biblia káʼa̱nña, xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi sa̱ñáyó ndaʼa̱ ku̱a̱chi. Siaʼa íyo ña̱ ni̱ka̱ʼa̱n ta̱ apóstol Pedro: “Saáchi ndóʼó kúnda̱a̱-inindó ña̱ su̱ví oro á plata kúú ña̱ níxiniñúʼura ña̱ sakǎkura ndóʼó chi ña̱ ndíʼi-xa̱ʼa̱va kúú ña̱yóʼo, nu̱úka ña̱yóʼo xi̱niñúʼura ni̱i̱ ta̱ Cristo ña̱ ndáyáʼviní, ña̱ íyo nda̱a̱ táki̱ʼva íyo ni̱i̱ iin tí ndikachi” (1 Ped. 1:​18, 19).

¹⁶ Xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi sa̱ñáyó ndaʼa̱ ku̱a̱chi ta va̱ása kuvikayó (Rom. 5:21). Táxiníyó tíxa̱ʼvi ndaʼa̱ Jehová xíʼin ta̱ Jesús, saáchi xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi ndoo ku̱a̱chiyó (1 Cor. 15:22).

17, 18. a) ¿Ndáaña kúni̱ kachi ña̱ kooyó na̱ yiví va̱ʼa? b) ¿Ndáaña va̱ʼa ndákiʼinyó xa̱ʼa̱ ña̱yóʼo?

¹⁷ Tá káʼa̱n Ndióxi̱ ña̱ kúúyó na̱ yiví va̱ʼa kúni̱ kachiña, ña̱ kǒo kíʼinkara kuenta xíʼin ku̱a̱chiyó ta ndákataraña. Soo, ¿á kúni̱ kachi ña̱yóʼo ña̱ yáʼandoso Jehová ley ña̱ kúúmiíra? Va̱ásaví. Kǒo kútóo Jehová ña̱ ki̱ʼviyó ku̱a̱chi, ña̱kán su̱ví xa̱ʼa̱ ña̱ va̱ʼaní íyo ña̱ kéʼéyó kúú ña̱ káʼa̱nra ña̱ kǒoka ku̱a̱chi kúúmiíyó. Soo Jehová kúni̱vara koo káʼnu-inira xa̱ʼa̱ ku̱a̱chiyó, chi kándíxayó ña̱ ke̱ʼéra ta saátu ña̱ ke̱ʼé ta̱ Jesús ña̱ va̱ʼa sakǎkuna miíyó (Rom. 3:24; Gál. 2:16).

¹⁸ ¿Ndáaña va̱ʼa ndákiʼinyó xa̱ʼa̱ ña̱ káʼa̱n Jehová ña̱ kúúyó na̱ yiví va̱ʼa? Jehová nda̱kaxinra sava na̱ ndásakáʼnu miíra ña̱ kaʼndachíñuna xíʼin ta̱ Jesús chí ndiví ta ni̱xa̱a̱na ndu̱una se̱ʼe Ndióxi̱ (Tito 3:7; 1 Juan 3:1). Xa̱ʼa̱ ña̱ xa̱a̱ i̱xakáʼnu-inira xa̱ʼa̱ ku̱a̱china, íyona nda̱a̱ táki̱ʼva íyo na̱ kǒo níki̱ʼvi ku̱a̱chi nda̱a̱ ni iin yichi̱. Xa̱ʼa̱ ña̱kán kivi kaʼndachíñuna ti̱xin Reino Ndióxi̱ (Rom. 8:​1, 2, 30). Ta ndiʼi na̱ ndásakáʼnu Jehová na̱ ndátu koo nu̱ú ñuʼú ndiʼi tiempo, xa̱a̱ kúúna migora ta xa̱a̱ i̱xakáʼnu-inira xa̱ʼa̱ ku̱a̱china (Sant. 2:​21-23). Ndiʼi na̱ ka̱ku tá ná koo ña̱ Armagedón ndátuna koona ndiʼi tiempo ta kǒo kuvikana (Juan 11:26). “Na̱ ke̱ʼé ña̱ va̱ʼa” ta saátu “na̱ ke̱ʼé ña̱ va̱ása va̱ʼa”, xa̱ʼa̱ ña̱ kǒo níxi̱xini̱na Jehová ndatakuvana (Hech. 24:15; Juan 5:​28, 29). Tá ná ya̱ʼa tiempo, ndiʼi na̱ koo nu̱ú ñuʼú yóʼo na̱ nda̱kúní íyo ini xíʼin Jehová, xa̱a̱na koona nda̱a̱ táki̱ʼva íyo na̱ se̱ʼera (Rom. 8:21). Xa̱a̱ kúni̱níyó ña̱ ná kixaa̱ ki̱vi̱ ña̱ ndikó tukuyó kooyó se̱ʼe yiváyó Jehová ta kǒo ku̱a̱chi kuumiíyó.

19. ¿Ndáa ki̱ʼva íyoyó vitin xa̱ʼa̱ ña̱ ke̱ʼé Jehová xíʼin ta̱ Jesús xa̱ʼa̱yó? (Koto recuadro ña̱ naní “Ña̱ ke̱ʼé Jehová ña̱ va̱ʼa ixakáʼnu-inira xa̱ʼa̱yó”).

¹⁹ Ña̱ nda̱a̱ kúúña, ndo̱ʼoyó nda̱a̱ táki̱ʼva ndo̱ʼo ta̱ loʼo ta̱ kǒo níkuchiñu chaʼvi xu̱ʼún ña̱ xi̱niká na̱ yivára. Soo Jehová chi̱ndeétáʼan xíʼinyó, chi ndu̱kúra ki̱ʼva ña̱ i̱xakáʼnu-inira xa̱ʼa̱ ku̱a̱chiyó, ta ta̱ Jesús kúú ta̱ cha̱ʼvi ña̱ va̱ʼa sakǎkura miíyó. Tá kándíxayó ña̱ ni̱xi̱ʼi̱ ta̱ Jesucristo xa̱ʼa̱yó, kivi ndoo ku̱a̱chiyó ta kǒo kuvikayó. Tá íxakáʼnu-ini Jehová xa̱ʼa̱yó, íyoyó nda̱a̱ táki̱ʼva íyo na̱ kǒo ku̱a̱chi níki̱ʼvi. Soo vitin ña̱ ndáyáʼvi va̱ʼaka kúú ña̱ va̱ʼaní kítáʼanyó xíʼin yiváyó Jehová chi kúʼvi̱ní-inira xínira miíyó.

20. ¿Ndáaña sakúaʼayó nu̱ú inka artículo?

²⁰ Tá ndákanixi̱níyó xa̱ʼa̱ ndiʼi ña̱ ke̱ʼé Jehová xíʼin ta̱ Jesús xa̱ʼa̱yó, táxiníyó tíxa̱ʼvi ndaʼa̱na (2 Cor. 5:15). Tá kǒo níchindeétáʼanna xíʼinyó, kǒo ña̱ va̱ʼa ndátuvíyó ndakiʼinyó. Nu̱ú inka artículo sakúaʼayó xa̱ʼa̱ sava ejemplo ña̱ va̱xi nu̱ú Biblia, ña̱ chindeétáʼan xíʼinyó ña̱ kunda̱a̱-iniyó ña̱ tá xa̱a̱ íxakáʼnu-ini Jehová xa̱ʼa̱ ku̱a̱chiyó, kǒo xíniñúʼu ndakanikaxi̱níyó ña̱ kúúmiíyó ku̱a̱chi.