“Keʼéndó ña̱ káʼa̱n tu̱ʼun Ndióxi̱”

1, 2. ¿Nda̱chun si̱íní íyo miíyó na̱ ndásakáʼnu Jehová? (Santiago 1:​22-25).

JEHOVÁ xíʼin ta̱ Jesús kúni̱na ña̱ si̱í kooyó. Ta̱ ka̱ʼyi Salmo 119:2 ka̱chira: “Si̱íní íyo na̱ kándíxa ña̱ káʼa̱nra ta saátu na̱ nándukú miíra xíʼin ndiʼi níma̱na”. Saátu ta̱ Jesús ni̱ka̱ʼa̱nra ña̱yóʼo: “Na̱ si̱íka íyo kúú na̱ xíniso̱ʼo tu̱ʼun Ndióxi̱ ta kéʼéna ña̱ káʼa̱nña” (Luc. 11:28).

² Si̱íní íyo miíyó na̱ ndásakáʼnu Jehová. ¿Nda̱chun? Ku̱a̱ʼáníva kúú ña̱ʼa ña̱ sákusi̱í-iniyó. Iin ña̱yóʼo kúú ña̱ káʼvi ni̱ʼiyó tu̱ʼun Ndióxi̱ ta chíkaa̱yó ndee̱ ña̱ keʼéyó ña̱ sákuaʼayó nu̱úña (kaʼvi Santiago 1:​22-25).

3. ¿Ndáaña va̱ʼa ndákiʼinyó tá kéʼéyó ña̱ káʼa̱n tu̱ʼun Ndióxi̱?

³ ¿Ndáaña va̱ʼa ndákiʼinyó tá kéʼéyó ña̱ káʼa̱n tu̱ʼun Ndióxi̱? Iin ña̱ va̱ʼa ndákiʼinyó kúú ña̱ sákusi̱íyó-ini Jehová ta ña̱yóʼo sákusi̱íña-ini miíyó (Ecl. 12:13). Ta saátu tá ndíku̱nyó ña̱ káʼa̱n tu̱ʼun Ndióxi̱ chíndeétáʼanña xíʼinyó ña̱ vií kutáʼanyó xíʼin na̱ veʼeyó ta saátu chíndeétáʼanña xíʼinyó ña̱ vií kutáʼanyó xíʼin na̱ hermanoyó. Sana xa̱a̱ kíʼinvayó kuenta ndáa ki̱ʼva chíndeétáʼanña xíʼinyó. Saátu va̱ása yáʼayó nu̱ú tu̱ndóʼo táʼan ña̱ ndóʼo na̱ va̱ása ndíku̱n ña̱ káʼa̱n Jehová. Ta̱ rey David ni̱ka̱ʼa̱nra nu̱ú iin yaa xa̱ʼa̱ ley Jehová, xa̱ʼa̱ chiñu ña̱ xáʼndara ta saátu ndáa ki̱ʼva ndátiinra ku̱a̱chi, ka̱chira: “Na̱ kéʼé ña̱ káʼún, ku̱a̱ʼání ña̱ va̱ʼa ndakiʼinna” (Sal. 19:​7-11).

4. ¿Nda̱chun sava yichi̱ íxayo̱ʼvi̱ña xíʼinyó keʼéyó ña̱ káʼa̱n tu̱ʼun Ndióxi̱?

⁴ Soo ni saá, kúnda̱a̱va-iniyó ña̱ íxayo̱ʼvi̱ña xíʼinyó keʼéyó ña̱ káʼa̱n tu̱ʼun Ndióxi̱. Ni íyoní chiñu nu̱úyó xíniñúʼu taváyó tiempo ña̱ va̱ʼa kaʼviyó tu̱ʼun Ndióxi̱ tasaá kunda̱a̱-iniyó ndáaña kúú ña̱ kúni̱ Jehová keʼéyó. Ña̱kán nu̱ú artículo yóʼo sakúaʼayó ndáaña kivi keʼéyó ña̱ va̱ʼa kaʼviyó tu̱ʼun Ndióxi̱ ndiʼi ki̱vi̱. Ta saátu kotoyó ndáaña chindeétáʼan xíʼinyó ña̱ ndakanixi̱níyó xa̱ʼa̱ ña̱ káʼviyó ta keʼéyó ña̱ káʼa̱nña.

TAVÁ TIEMPO ÑA̱ KAʼVIÚN TU̱ʼUN NDIÓXI̱

5. ¿Ndáa chiñu kúú ña̱ íyoní nu̱úyó?

⁵ Ku̱a̱ʼání miíyó na̱ ndásakáʼnu Jehová íyoní chiñu nu̱úyó, saáchi kéʼéyó chiñu ña̱ ndáyáʼvi ña̱ káʼa̱n Biblia xa̱ʼa̱. Tá kúú, ku̱a̱ʼáníyó xíniñúʼu kachíñuyó ña̱ va̱ʼa ni̱ʼíyó ña̱ xíniñúʼuyó ta saátu taxiyó ña̱ xíniñúʼu na̱ veʼeyó (1 Tim. 5:8). Ku̱a̱ʼání na̱ hermano ndáana na̱ veʼena na̱ ndeéndóʼo á na̱ xa̱a̱ ku̱chée. Ta ndiʼiyó xíniñúʼu kundaayó miíyó ña̱ va̱ʼa kǒo kiʼin kue̱ʼe̱ miíyó. Saátu íyo chiñu nu̱úyó ti̱xin congregación. Ta iin ña̱ ndáyáʼviní kúú ña̱ natúʼunyó xa̱ʼa̱ tu̱ʼun Ndióxi̱. Ña̱kán xa̱ʼa̱ ña̱ íyoní chiñu nu̱úyó kivi xa̱a̱yó ndakanixi̱níyó: “¿Ndáaña kivi keʼíi̱ ña̱ va̱ʼa tavái̱ tiempo ña̱ kaʼvii̱ Biblia ndiʼi ki̱vi̱, ndakanixi̱níi̱ xa̱ʼa̱ ña̱ káʼvii̱ ta keʼíi̱ ña̱ káʼa̱nña?”.

6. ¿Ndáaña kivi keʼún ña̱ va̱ʼa kaʼvi ni̱ʼún Biblia? (Koto na̱ʼná).

⁶ Ndáyáʼviní kaʼviyó Biblia, ña̱kán xíniñúʼu chikaa̱yó ndee̱ ña̱ kaʼviyóña (Filip. 1:10). Nu̱ú kíxáʼa libro ña̱ Salmo káchiña ña̱ na̱ yiví na̱ si̱í-ini “ña̱ kútóokana kaʼvina kúú ley Jehová, ñuú xíʼin káʼñu káʼvinaña ta ndákanixi̱nína xa̱ʼa̱ña” (Sal. 1:​1, 2). Ña̱kán xíniñúʼu taváyó tiempo ña̱ kaʼviyóña. ¿Ndáa hora kúú ña̱ va̱ʼaka kaʼviyó Biblia? Miíyó kúú na̱ xíniñúʼu ndaka̱xin ndáa hora kúú ña̱ va̱ʼaka kaʼviyóña, soo ndáyáʼviní ña̱ kaʼvi ni̱ʼiyóña. Iin ta̱ hermano ta̱ naní Victor káchira: “Kútói̱ kaʼvii̱ Biblia tá xi̱ta̱a̱n ni íxayo̱ʼvi̱ña xíʼi̱n ndakoi̱, soo hora yóʼo kúú ña̱ kǒo ña̱ʼa sási nu̱úi̱ ta kǒo ña̱ sándi̱ʼi̱-inii̱ ña̱kán va̱ʼaka kúnda̱a̱-inii̱ xíʼin ña̱ káʼvii̱”. ¿Á ndóʼún nda̱a̱ táki̱ʼva ndóʼo ta̱ Victor? Ndakanixi̱ní xa̱ʼa̱ ña̱yóʼo: “¿Ama kúú ña̱ va̱ʼaka kaʼvii̱ Biblia?”.

NDAKANIXI̱NÍ XA̱ʼA̱ ÑA̱ KÁʼVIÚN

7, 8. Ka̱ʼa̱n xa̱ʼa̱ iin ejemplo ña̱ náʼa̱ nu̱úyó ndáaña kǒo xíniñúʼu keʼéyó tá káʼviyó Biblia.

⁷ Tá xa̱a̱ nda̱kaxinyó iin hora ña̱ kaʼviyó Biblia, xíniñúʼu kiʼinyó kuenta ña̱ va̱ása kaʼvi kuitíyóña ta nandóso-iniyó xa̱ʼa̱ña. Sana tá káʼviyó iin tutu ni loʼo kǒo ndákaʼányó xa̱ʼa̱ ña̱ ka̱ʼviyó, tasaá kivi kundoʼoyó tá káʼviyó Biblia. Sana xa̱a̱ ndákanixi̱níyó nda̱saa capítulo kaʼviyó iin tá iin ki̱vi̱, ta iin ña̱ va̱ʼava kúú ña̱ ná chikaa̱yó ndee̱ ña̱ saxínuyóña (1 Cor. 9:26). Tá kúni̱yó kunda̱a̱-iniyó xíʼin ña̱ káʼa̱n Biblia va̱ása xíniñúʼu kaʼvi kuitíyóña chi íyo inkaka ña̱ xíniñúʼu keʼéyó.

⁸ Ná ndakanixi̱níyó xa̱ʼa̱ ejemplo yóʼo. Va̱ʼaníva chíndeétáʼan sa̱vi̱ xíʼin planta, soo tá ku̱a̱ʼání sa̱vi̱ ná kuun va̱ása chindeétáʼanvíra xíʼin planta. Va̱ʼaníka tá ná kuun yáárá chi saá kúú ña̱ kivi xi̱xinrá nu̱ú ñuʼú tasaá chindeétáʼanra xíʼin planta ña̱ kuaʼnunú. Ña̱kán tá káʼviyó Biblia va̱ása xíniñúʼu kamaní kaʼviyóña chi tá saá ná keʼéyó kivi nandósóyó xa̱ʼa̱ ña̱ ka̱ʼviyó ta va̱ása keʼéyó ña̱ káʼa̱nña (Sant. 1:24).

9. ¿Ndáaña xíniñúʼu keʼéyó tá kamaní káʼviyó Biblia?

⁹ Tá káʼviún Biblia ta kíʼún kuenta ña̱ kamaní ku̱a̱ʼún káʼviúnña. ¿Ndáaña kivi keʼún? Kivi kixáʼún kúeeka kaʼviúnña ña̱ va̱ʼa ndakanixi̱níún xa̱ʼa̱ ña̱ káʼviún. Tá íxayo̱ʼvi̱ña xíʼún ndakanixi̱níún xa̱ʼa̱ ña̱ káʼviún va̱ása ndi̱ʼi̱-iniún. Kivi taváún ku̱a̱ʼá loʼoka tiempo ña̱ ndakanixi̱níún xa̱ʼa̱ ña̱ káʼviún, á kivitu loʼo versículo kaʼviún ña̱ va̱ʼa ndakanixi̱níún xa̱ʼa̱ña. Ta̱ Víctor ta̱ ni̱ka̱ʼa̱nyó xa̱ʼa̱ nu̱ú ña̱ párrafo 6 káchira: “Va̱ása ku̱a̱ʼáníví káʼvii̱, iin capítulo kuitíva káʼvii̱ sava yichi̱. Xa̱ʼa̱ ña̱ káʼvii̱ Biblia tá xi̱ta̱a̱n va̱ʼa ndákanixi̱níi̱ xa̱ʼa̱ña iníísaá ki̱vi̱”. Su̱ví ña̱ ndáyáʼvika kúú ña̱ ku̱a̱ʼání kaʼviyó, chi ña̱ ndáyáʼvika kúú ña̱ kunda̱a̱-iniyó xíʼin ña̱ káʼviyó (Sal. 119:97; koto recuadro ña̱ naní “Pregunta ña̱ chindeétáʼan xíʼún ña̱ ndakanixi̱níún xa̱ʼa̱ ña̱ káʼviún”).

10. Ka̱ʼa̱n xa̱ʼa̱ iin ejemplo ña̱ náʼa̱ ndáa ki̱ʼva keʼún ña̱ káʼa̱n Biblia (1 Tesalonicenses 5:​17, 18).

¹⁰ Ni nda̱a̱ ndáaka hora káʼviún Biblia ta ni nda̱saaka tiempo káʼviúnña, chikaa̱ ndee̱ ña̱ keʼún ña̱ káʼa̱nña. Tá káʼviúnña ndakanixi̱ní xa̱ʼa̱ ña̱yóʼo: “¿Ndáa ki̱ʼva keʼíi̱ ña̱ káʼa̱n ña̱yóʼo vitin á chí nu̱únínu?”. Tá kúú, tá ná kaʼviún 1 Tesalonicenses 5:​17, 18 (kaʼviña) ndakanixi̱ní xa̱ʼa̱ ña̱ káʼa̱nña, ta ndakanixi̱ní ndáa ki̱ʼva íyo oración ña̱ káʼún xíʼin Ndióxi̱. ¿Á xíʼin ndiʼi níma̱ún káʼún xíʼin Ndióxi̱? ¿Á káʼa̱n ni̱ʼún xíʼinra? ¿Ndáaña kúú ña̱ táxiún tíxa̱ʼvi xa̱ʼa̱ tá káʼún xíʼin Ndióxi̱? Sana ndákanixi̱níún xa̱ʼa̱ u̱ni̱ ña̱ʼa ña̱ kivi taxiún tíxa̱ʼvi xa̱ʼa̱ tá káʼún xíʼin Ndióxi̱. Tá ná kuniñúʼún loʼo minuto ña̱ ndakanixi̱níún xa̱ʼa̱ ña̱yóʼo, saá kúú ña̱ va̱ása kuniso̱ʼo kuitíún ña̱ káʼa̱n tu̱ʼun Ndióxi̱ chi saátu kixáʼún keʼún ña̱ káʼa̱nña. Tá ndiʼi ki̱vi̱ ná kaʼviún Biblia, tá ná ya̱ʼa tiempo va̱ʼaka kachíñún nu̱ú Jehová. Soo, ¿ndáaña keʼún tá kíʼún kuenta ña̱ íyoka ña̱ xíniñúʼu viíka keʼún?

CHIKAA̱ NDEE̱ ÑA̱ LOʼO TÁ LOʼO KEʼÚN ÑA̱ KÁʼA̱N BIBLIA

11. ¿Nda̱chun ndákava-iniyó sava yichi̱ tá káʼviyó Biblia? Ka̱ʼa̱n xa̱ʼa̱ iin ejemplo.

¹¹ Tá káʼviún Biblia ta kíʼún kuenta ña̱ íyo ku̱a̱ʼání ña̱ xíniñúʼu keʼún, kivi ndakava-iniún. Ná ndakanixi̱níyó xa̱ʼa̱ ña̱yóʼo. Iin ki̱vi̱ ka̱ʼviyó iin versículo ña̱ káʼa̱n xa̱ʼa̱ ña̱ va̱ása va̱ʼa ndaka̱xinyó na̱ kitáʼan xíʼinyó (Sant. 2:​1-8). Xa̱ʼa̱ ña̱ ki̱ʼún kuenta ña̱ va̱ása xíniñúʼu ndaka̱xiún na̱ kitáʼan xíʼún ki̱xáʼún chíkaa̱ún ndee̱ ña̱ nasamaún ña̱ kéʼún. Ta va̱ʼaníva íyo ña̱ kúni̱ún keʼún, tasaá tá inka ki̱vi̱ káʼviún iin texto ña̱ káʼa̱n xa̱ʼa̱ ña̱ xíniñúʼu kiʼún kuenta xíʼin tu̱ʼun ña̱ káʼún (Sant. 3:​1-12). Tasaá ki̱ʼún kuenta ña̱ va̱ása va̱ʼa íyo ña̱ káʼún sava yichi̱, ña̱kán chíkaa̱ún ndee̱ ña̱ viíka koo ña̱ ka̱ʼún. Tá inka ki̱vi̱ káʼviún ña̱ káʼa̱n xa̱ʼa̱ ña̱ kǒo kutáʼún xíʼin na̱ ñuyǐví (Sant. 4:​4-12). Tasaá chíkaa̱ún ndee̱ ña̱ kiʼún kuenta xíʼin película ña̱ xítoún ta saátu yaa ña̱ xíniso̱ʼún, ña̱kán ndákavaní-iniún tá ndákanixi̱níún xa̱ʼa̱ ndiʼi ña̱ xíniñúʼu keʼún.

12. ¿Nda̱chun kǒo xíniñúʼu ndakava-iniún tá íyo sava ña̱ xíniñúʼu nasamaún? (Koto nota).

¹² Va̱ása ndakava-iniún tá íyo sava ña̱ xíniñúʼu viíka keʼún. Ña̱yóʼo náʼa̱ña ña̱ vií káʼviún Biblia ta vitá íyo iniún, ta ndákuniún ña̱ íyo sava ña̱ va̱ása va̱ʼa kéʼún.a Ndakaʼán chi ndiʼi tiempova xíniñúʼu nasamayó ki̱ʼva ña̱ kéʼéyó (Col. 3:10). ¿Ndáaña chindeétáʼan xíʼún ña̱ keʼún ña̱ káʼa̱n tu̱ʼun Ndióxi̱?

13. ¿Ndáaña chindeétáʼan xíʼún ña̱ viíka koo ña̱ keʼún? (Koto na̱ʼná).

¹³ Iin ña̱ chindeétáʼan xíʼún kúú ña̱ ndakuniún ña̱ íyo sava ña̱ va̱ása kuchiñún keʼún ta loʼo tá loʼo xíniñúʼu keʼún ña̱ káʼviún nu̱ú Biblia (Prov. 11:2). Kivi keʼún ña̱yóʼo: nu̱ú iin tutu kaʼyíún ndiʼi ña̱ xíniñúʼu viíka keʼún, ndaka̱xin iin á u̱vi̱ ña̱ kivi kixáʼún keʼún ta chí nu̱únínu kivika keʼún inkakaña. ¿Ndáaña kivi kixáʼún keʼún?

14. ¿Ndáaña siʼna kivi kixáʼún keʼún?

¹⁴ Kivi kixáʼún keʼún ña̱ va̱ása íxayo̱ʼvi̱ní xíʼún á iin ña̱ xíniñúʼuníka nasamaún. Tá xa̱a̱ na̱kunda̱a̱-iniún ndáaña kúni̱ún kixáʼún keʼún. Nandukú xa̱ʼa̱ña nu̱ú tutu ña̱ tává na̱ ñuu Ndióxi̱. Kivi kuniñúʼún Índice de las publicaciones Watch Tower á Guía de estudio para los testigos de Jehová. Ka̱ʼa̱n xíʼin Jehová ná taxira ndee̱ ndaʼún ña̱ kuni̱ún keʼúnña (Filip. 2:13). Tándi̱ʼi, keʼé ña̱ sa̱kúaʼún. Tá ná kuniún ña̱ viíní ki̱xáʼún kéʼún iin ña̱ʼa, ña̱yóʼo chindeétáʼanña xíʼún ña̱ kuni̱ún keʼún inkaka ña̱ʼa. Tasaá kǒo ixayo̱ʼvi̱ña xíʼún keʼún inkaka ña̱ ka̱ʼyiún nu̱ú tutu.

KEʼÉ ÑA̱ KÁʼA̱N TU̱ʼUN NDIÓXI̱

15. ¿Nda̱chun síín íyo na̱ ndásakáʼnu Jehová nu̱ú na̱ yiví na̱ káʼa̱n ña̱ káʼvina Biblia? (1 Tesalonicenses 2:13).

¹⁵ Sava na̱ yiví káʼa̱nna ña̱ xa̱a̱ ku̱a̱ʼání yichi̱ káʼvina Biblia. Soo, ¿á kándíxana ña̱ káʼa̱nña? ¿Á kéʼéna ña̱ káʼa̱nña? Ku̱a̱ʼánína va̱ása kéʼévínaña. Soo, miíyó na̱ ndásakáʼnu Jehová síínva íyoyó. Nda̱a̱ táki̱ʼva ke̱ʼé na̱ cristiano na̱ ni̱xi̱yo tá siglo nu̱ú, saátu miíyó kándíxayó ña̱ tu̱ʼún Ndióxi̱ kúú Biblia. Ña̱kán chíkaa̱níyó ndee̱ ña̱ keʼéyó ña̱ káʼa̱nña (kaʼvi 1 Tesalonicenses 2:13).

16. ¿Ndáaña chindeétáʼan xíʼinyó keʼéyó ña̱ káʼa̱n tu̱ʼun Ndióxi̱?

¹⁶ Sava yichi̱ íxayo̱ʼvi̱vaña xíʼinyó kaʼviyó Biblia ta keʼéyó ña̱ káʼa̱nña. Sana kǒo tiempo nu̱úyó kaʼviyóña. Á kamaní káʼviyóña ta kǒo kúnda̱a̱-iniyó xíʼinña á sanatu ndákava-iniyó tá kíʼinyó kuenta ña̱ ku̱a̱ʼání ña̱ xíniñúʼu viíka keʼéyó. Ni nda̱a̱ ndáaka ña̱ íxayo̱ʼvi̱ xíʼún, chindeétáʼanva Jehová xíʼún ña̱ viíka keʼúnña. Taxi ná chindeétáʼan Ndióxi̱ xíʼún, kǒo kuniso̱ʼo kuitíún ña̱ káʼa̱n tu̱ʼunra ta nandóso-iniún xa̱ʼa̱ña. Tá ná kaʼvi ni̱ʼún ña̱ Biblia ta keʼún ña̱ káʼa̱nña saá kúú ña̱ si̱íní koún (Sant. 1:25).