Ná kandíxayó Ndióxi̱ tá ndáka̱xinyó ña̱ keʼéyó

1. ¿Nda̱chun xi̱kusi̱í-ini ta̱ Pablo xa̱ʼa̱ ndiʼi ña̱ ke̱ʼéra?

TA̱ APÓSTOL Pablo xi̱kunda̱a̱-inira ña̱ si̱lóʼoní tiempo xi̱kuma̱ní ta kaʼnínara. Soo tá xi̱ndakanixi̱níra xa̱ʼa̱ ndiʼi ña̱ ke̱ʼéra, xi̱kusi̱íníva-inira. ¿Nda̱chun? Ña̱yóʼo kúú ña̱ ni̱ka̱ʼa̱nra: “Ku̱chiñui̱ xi̱nui̱ ta ni̱xa̱i̱ nda̱a̱ nu̱ú ndíʼi ta kǒo nísandákoi̱ ña̱ kandíxai̱ Ndióxi̱” (2 Tim. 4:​6-8). Ndiʼi tiempo ña̱ ka̱chíñura nu̱ú Jehová viíní ni̱xi̱yo ña̱ nda̱kaxinra ke̱ʼéra, xa̱ʼa̱ ña̱kán xi̱kandíxara ña̱ xi̱kusi̱íva-ini Jehová xíʼin ña̱ ke̱ʼéra. Nda̱a̱ táki̱ʼva ke̱ʼé ta̱ Pablo, saátu miíyó kúni̱yó ndaka̱xin viíyó ña̱ keʼéyó ta sakúsi̱íyó-ini Jehová. ¿Ndáa ki̱ʼva kivi keʼéyó ña̱yóʼo?

2. ¿Ndáaña kúni̱ kachi ña̱ na̱ʼa̱yó ña̱ ndixa kándíxayó Ndióxi̱?

² Tá ni̱ka̱ʼa̱n ta̱ Pablo xa̱ʼa̱ miíra ta saátu xa̱ʼa̱ inkaka na̱ cristiano na̱ nda̱kúní ni̱xi̱yo ini, ka̱chira: “Ndiʼi ña̱ kéʼéyó, kéʼéyóña xa̱ʼa̱ ña̱ kándíxayó Ndióxi̱ ta su̱ví xa̱ʼa̱ ña̱ʼa ña̱ xítoyó” (2 Cor. 5:7). ¿Ndáaña xi̱kuni̱ra kachira xíʼin ña̱yóʼo? Ña̱ xi̱kuni̱ra kachira kúúña, na̱ yiví na̱ va̱ása kándíxa Jehová kíʼin kuitína kuenta xíʼin ña̱ xítona, ña̱ xíniso̱ʼona xíʼin ña̱ ndóʼona tá ndáka̱xinna ña̱ keʼéna. Soo iin na̱ yiví na̱ ndixa kándíxa Jehová kúú na̱ ndákanixi̱ní ndáaña kútóora tá ndáka̱xinna ña̱ keʼéna. Ta va̱ása xíka-inina ña̱ tá ndíku̱nna consejo ña̱ táxi Jehová ndaʼa̱na nu̱ú Biblia, va̱ʼaní kundoona tiempo vitin ta saátu kándíxana ña̱ ku̱a̱ʼání ña̱ va̱ʼa taxira ndaʼa̱na chí nu̱únínu (Sal. 119:66; Heb. 11:6).

3. ¿Ndáaña va̱ʼa ndakiʼinyó tá náʼa̱yó ña̱ kándíxayó Ndióxi̱? (2 Corintios 4:18).

³ Ña̱ nda̱a̱ kúúña, sava yichi̱ tá ndáka̱xinyó ña̱ keʼéyó kíʼinyó kuenta xíʼin ña̱ xíniso̱ʼoyó, ña̱ xítoyó xíʼin ña̱ ndóʼoyó. Soo tá ña̱ xíniso̱ʼo kuitíyó, ña̱ xítoyó xíʼin ña̱ ndóʼoyó kíʼinyó kuenta xíʼin tá ndáka̱xinyó keʼéyó iin ña̱ ndáyáʼviní, sana va̱ása viíví kana ña̱ ndaka̱xinyó keʼéyó ta kixi tu̱ndóʼo nu̱úyó. ¿Nda̱chun? Saáchi ndiʼi ña̱ xíniso̱ʼoyó, ña̱ xítoyó xíʼin ña̱ ndóʼoyó, su̱ví ndiʼi tiempoví chindeétáʼanña xíʼinyó. Soo tá ña̱yóʼo kuití kíʼinyó kuenta xíʼin tá ndáka̱xinyó keʼéyó iin ña̱ʼa, sana kivi xa̱a̱yó keʼéyó iin ña̱ kǒo kútóo Jehová (Ecl. 11:9; Mat. 24:​37-39). Soo tá náʼa̱yó ña̱ kándíxayó Jehová tá ndáka̱xinyó ña̱ keʼéyó, viíva kana ña̱ kúni̱yó keʼéyó ta kindo̱ova-inira xíʼinña (Efes. 5:10). Tá ndíku̱nyó consejo ña̱ táxi Ndióxi̱ ndaʼa̱yó, saá kúú ña̱ kǒo kundi̱ʼi-iniyó ta kusi̱íní-iniyó (Sal. 16:​8, 9; Is. 48:​17, 18). Ta tá ná ndakundeéyó na̱ʼa̱yó ña̱ kándíxayó Ndióxi̱, kivi kutakuyó ndiʼi tiempo (kaʼvi 2 Corintios 4:18).

4. ¿Ndáa ki̱ʼva kivi kunda̱a̱-iniyó á kéʼéyó iin ña̱ʼa xa̱ʼa̱ ña̱ kándíxayó Ndióxi̱ á xa̱ʼa̱ ña̱ xíto kuitívayó?

⁴ Ndiʼiyó xíniñúʼu ndakanixi̱ní xa̱ʼa̱ ña̱yóʼo: “¿Ndáaña táxii̱ chindeétáʼan xíʼi̱n tá ndáka̱xii̱n keʼíi̱ iin ña̱ʼa? ¿Á ña̱ xíto kuitíi̱ kúú ña̱ táxii̱ ná chindeétáʼan xíʼi̱n? ¿Á consejo ña̱ táxi Jehová kúú ña̱ táxii̱ ná chindeétáʼan xíʼi̱n?”. Nu̱ú artículo yóʼo sakúaʼayó ndáa ki̱ʼva na̱ʼa̱yó ña̱ ndixa kándíxayó Ndióxi̱ tá ná ndaka̱xinyó keʼéyó ña̱yóʼo. Ña̱ nu̱ú, tá ndáka̱xinyó ndáa chiñu kachíñuyó. Ña̱ u̱vi̱, tá ndáka̱xinyó na̱ tindaʼa̱ xíʼinyó. Ña̱ u̱ni̱, tá káʼa̱n na̱ ñuu Ndióxi̱ xíʼinyó ña̱ keʼéyó iin ña̱ʼa. Tá ná ka̱ʼa̱nyó xa̱ʼa̱ iin tá iin ña̱yóʼo, kotoyó ndáaña kivi chindeétáʼan xíʼinyó ña̱ va̱ʼa vií koo ña̱ ndaka̱xinyó keʼéyó.

TÁ NDÁKA̱XINYÓ NDÁA CHIÑU KACHÍÑUYÓ

5. ¿Ndáaña va̱ása xíniñúʼu kiʼinníyó kuenta xíʼin tá ndáka̱xinyó chiñu ña̱ kachíñuyó?

⁵ Ndiʼivayó kúni̱ kuumií iin chiñu nu̱ú kivi kiʼinyó xu̱ʼún ña̱ va̱ʼa kuniñúʼuyó xíʼin na̱ veʼeyó (Ecl. 7:12; 1 Tim. 5:8). Savana kúúmiína iin chiñu nu̱ú va̱ʼaka cháʼvinana ta xu̱ʼún yóʼo nániña ña̱ va̱ʼa satána á kueena ña̱ xíniñúʼuna xíʼin na̱ veʼena ta saátu nda̱a̱ kivi ndataánva̱ʼana loʼoña ña̱ kuniñúʼuna chí nu̱únínu. Ta íyotu sava na̱ kúúmií chiñu nu̱ú loʼoní cháʼvinana ta xu̱ʼún yóʼo náni kuitíña ña̱ satána ña̱ xíniñúʼuna xíʼin na̱ veʼena. Xa̱ʼa̱ ña̱kán tá ndáka̱xinyó ndáa chiñu kachíñuyó, kúni̱vayó kunda̱a̱-iniyó nda̱saa chaʼvina miíyó. Soo tá ña̱yóʼo kuití kíʼinyó kuenta xíʼin, va̱ása na̱ʼa̱yó ña̱ ndáa-iniyó Jehová.

6. ¿Ndáa ki̱ʼva náʼa̱yó ña̱ ndixa kándíxayó Ndióxi̱ tá ndáka̱xinyó chiñu ña̱ kachíñuyó? (Hebreos 13:5).

⁶ Xíniñúʼu kiʼinyó kuenta tá ndáka̱xinyó ndáa chiñu kúú ña̱ kachíñuyó chi kivi sakúxíkaña miíyó nu̱ú Jehová, tá ná keʼéyó ña̱yóʼo saá kúú ña̱ na̱ʼa̱yó ña̱ ndixa kándíxayó Ndióxi̱. Ná ndakanixi̱níyó xa̱ʼa̱ ña̱yóʼo: “¿Á kivi xa̱i̱ keʼíi̱ iin ña̱ʼa ña̱ va̱ása kútóo Jehová tá ná kiʼii̱n chiñu yóʼo? ¿Á kivi kasiña nu̱úi̱ ña̱ ndasakáʼnui̱ Jehová? Tá ná kiʼii̱n chiñu yóʼo, ¿á sandákoi̱ na̱ veʼi̱ ku̱a̱ʼá tiempo?” (Prov. 6:​16-19; Filip. 1:10). Tá saá íyoña, iin ña̱ va̱ʼaka kivi keʼún kúú ña̱ kǒo kiʼún chiñu yóʼo ni íxayo̱ʼvi̱ña xíʼún ña̱ ndani̱ʼún iin chiñu nu̱ú kachíñún. Xa̱ʼa̱ ña̱ kándíxayó Jehová, náʼa̱yó xíʼin ña̱ ndáka̱xinyó keʼéyó ña̱ kándíxavayó ña̱ miíra taxi ña̱ xíniñúʼuyó (Mat. 6:33; kaʼvi Hebreos 13:5).

7, 8. ¿Ndáa ki̱ʼva ni̱na̱ʼa̱ ta̱ Javier ña̱ ndixa kándíxara Ndióxi̱? (Koto na̱ʼná).

⁷ Iin ta̱ hermano ta̱ íyo chí Sudamérica ta̱ naní Javier,a xi̱kunda̱a̱-inira ña̱ ndáyáʼviní na̱ʼa̱yó ña̱ ndixa kándíxayó Ndióxi̱ tá ndáka̱xinyó ña̱ keʼéyó. Ta̱yóʼo káchira: “Ti̱xin empresa nu̱ú xi̱kachíñui̱ nda̱ni̱ʼíi̱ iin chiñu nu̱ú kivi kiʼii̱n ku̱a̱ʼáka xu̱ʼún nu̱úka ña̱ xi̱kiʼii̱n nu̱ú xi̱kachíñui̱, ña̱kán ni̱ka̱ʼi̱n ña̱ kúni̱i̱ chiñu yóʼo. Nda̱kanixi̱níi̱ ña̱ tá ná kiʼii̱n chiñu yóʼo saá kǒoka ña̱ kundi̱ʼi-inii̱ xa̱ʼa̱”. Soo ta̱ Javier xi̱kuni̱níra xa̱a̱ra koora precursor. Ta̱yóʼo káchikara: “Ña̱ va̱ʼa kiʼii̱n chiñu yóʼo, ni̱ka̱ʼa̱nna xíʼi̱n ña̱ ku̱ʼi̱n nu̱ú ta̱ kíʼin kuenta xíʼin na̱ káchíñu kán ña̱ va̱ʼa nda̱ka̱tu̱ʼunra yi̱ʼi̱ xa̱ʼa̱ sava ña̱ʼa. Soo tá kúma̱níka ku̱ʼi̱n nu̱úra ni̱ka̱ʼi̱n xíʼin Jehová ña̱ ná chindeétáʼanra xíʼi̱n, saáchi iinlá miíra kúnda̱a̱-ini ndáaña kúú ña̱ va̱ʼaka chindeétáʼan xíʼi̱n. Xi̱kuni̱vai̱ kuumií iin chiñu ña̱ ndáyáʼvika ta kiʼii̱n ku̱a̱ʼáka xu̱ʼún, soo kǒo kiʼinvíi̱ chiñu yóʼo tá ná kasiña nu̱úi̱ ña̱ keʼíi̱ ku̱a̱ʼáka chiñu nu̱ú Jehová”.

⁸ Ta̱ Javier káchikara: “Tá ndáka̱tu̱ʼun ta̱ kíʼin kuenta xíʼin na̱ káchíñu kán yi̱ʼi̱, ni̱ka̱ʼa̱nra xíʼi̱n ña̱ xíniñúʼu kachíñu ni̱ʼii̱ ku̱a̱ʼáka hora. Tasaá xíʼin ña̱ to̱ʼó ni̱ka̱ʼi̱n xíʼinra ña̱ va̱ása kivi keʼíi̱ ña̱yóʼo, saáchi sásiña nu̱úi̱ ña̱ ndásakáʼnui̱ Ndióxi̱”. Ta̱ Javier va̱ása níkiʼinvíra chiñu yóʼo, ta tá ni̱ya̱ʼa u̱vi̱ semana ki̱xáʼara kúúra precursor. Ta suvi mií ku̱i̱ya̱ saá nda̱ni̱ʼíra iin chiñu nu̱ú kivi kachíñura loʼo kuití ki̱vi̱. Ta̱yóʼo káchira: “Jehová xi̱niso̱ʼovara oración ña̱ ni̱ka̱ʼi̱n xíʼinra ta ta̱xira ña̱ ná ndani̱ʼíi̱ iin chiñu nu̱ú kivi kachíñui̱ loʼo ki̱vi̱ tasaá kivi koi̱ precursor. Vitin kúsi̱íní-inii̱ ña̱ kúúmiíi̱ iin chiñu ña̱ va̱ása sási nu̱úi̱ ña̱ kachíñui̱ nu̱ú Jehová ta saátu ña̱ chindeétáʼi̱n xíʼin na̱ hermano”.

9. ¿Ndáaña sákuaʼún xíʼin ña̱ ndo̱ʼo ta̱ Trésor?

⁹ ¿Ndáaña keʼéyó tá chiñu ña̱ kúúmiíyó sásiña nu̱úyó ña̱ ndasakáʼnuyó Jehová? Ná kotoyó ña̱ ndo̱ʼo iin ta̱ hermano ta̱ íyo chí Congo ta̱ naní Trésor. Ta̱yóʼo káchira: “Nda̱ni̱ʼíi̱ iin chiñu ña̱ xi̱kutóoníi̱ keʼíi̱. Ku̱a̱ʼáka xu̱ʼún xi̱chaʼvina yi̱ʼi̱ kán ta saátu xi̱ ixato̱ʼónína yi̱ʼi̱”. Soo xa̱ʼa̱ ña̱ xi̱kaʼa̱nna xíʼin ta̱ Trésor ña̱ kachíñura ku̱a̱ʼáka hora nda̱a̱ xi̱kuaá, ku̱a̱ʼá yichi̱ xi̱kuma̱níra reunión. Ta sava na̱ xi̱kachíñu xíʼin ta̱ Trésor xi̱ ixandúxana xíʼinra ña̱ ná ka̱ʼa̱nra ña̱ vatá xíʼin na̱ yiví ña̱ va̱ʼa ná kǒo kunda̱a̱-inina xa̱ʼa̱ ña̱ va̱ása va̱ʼa xi̱keʼéna ti̱xin empresa nu̱ú xi̱kachíñura. Xi̱kuni̱vara sandákoora chiñu yóʼo, soo saátu xi̱ndi̱ʼi̱-inira á kivi ndani̱ʼíra inka chiñu. ¿Ndáaña chi̱ndeétáʼan xíʼinra? Ta̱yóʼo káchira: “Ña̱ káʼa̱n Habacuc 3:​17-19 chi̱ndeétáʼan xíʼi̱n ña̱ kunda̱a̱-inii̱ ña̱ kundaava Jehová yi̱ʼi̱ ni ná kuumiíi̱ loʼo kuití xu̱ʼún, xa̱ʼa̱ ña̱kán sa̱ndákovai̱ chiñu kán”. Ta̱ Trésor káchikara: “Ku̱a̱ʼání na̱ patrón ndákanixi̱nína ña̱ ku̱a̱ʼá na̱ yiví kúni̱na kuumiína iin chiñu nu̱ú va̱ʼaka cháʼvinana ni sava yichi̱ sándákoona ña̱ ndáyáʼvika. Tá kúú ña̱ tavána tiempo ña̱ koona xíʼin na̱ veʼena ta saátu ña̱ sakúaʼana xa̱ʼa̱ Ndióxi̱. Kúsi̱íní-inii̱ saáchi va̱ása nísandákoi̱ ña̱ kitáʼan viíi̱ xíʼin Jehová ta saátu xíʼin na̱ veʼi̱. Tá ni̱ya̱ʼa iin ku̱i̱ya̱, mií Jehová chi̱ndeétáʼan xíʼi̱n ña̱ nda̱ni̱ʼíi̱ iin chiñu nu̱ú xi̱kiʼii̱n xu̱ʼún ña̱ kuniñúʼi̱ ta saátu ni̱xi̱yoka tiempo nu̱úi̱ ña̱ kachíñui̱ nu̱ú Jehová. Tá siʼnaka chiñu Jehová ndíʼi̱-iniyó xa̱ʼa̱ ni sava yichi̱ loʼoní xu̱ʼún kúúmiíyó, miíra kundaa miíyó”. Xa̱ʼa̱ ña̱kán tá xíniso̱ʼoyó ña̱ káʼa̱n Jehová ta saátu kándíxayó ña̱ káʼa̱nra taxira ndaʼa̱yó chí nu̱únínu, saá kúú ña̱ na̱ʼa̱yó ña̱ ndixa kándíxayóra tá ndáka̱xinyó ña̱ keʼéyó ta ku̱a̱ʼání ña̱ va̱ʼa taxira ndaʼa̱yó xa̱ʼa̱ ña̱yóʼo.

TÁ NDÁKA̱XINYÓ NA̱ TINDAʼA̱ XÍʼINYÓ

10. ¿Ndáaña kéʼé savana tá ndáka̱xinna na̱ tindaʼa̱ xíʼinna?

¹⁰ Mií Jehová chi̱ndúʼú xa̱ʼa̱ ña̱ tíndaʼa̱yó, xa̱ʼa̱ ña̱kán su̱ví iin ku̱a̱chiví kúú ña̱ kuni̱yó tindaʼa̱yó. Tá kúú, tá iin ñá hermana ndákanixi̱níñá ña̱ tindaʼa̱ñá xíʼin iin ta̱ hermano sana kiʼinñá kuenta xíʼin ña̱ va̱ʼa kúúmiíra, ki̱ʼva ña̱ náʼa̱ra, ki̱ʼva ña̱ kéʼéra, ndáaña káʼa̱n inkana xa̱ʼa̱ra, á íyo xu̱ʼúnra, á ndáara na̱ veʼera ta saátu á sákusi̱íra-iniñá.b Ni ndáyáʼviva ña̱yóʼo, soo su̱ví ña̱yóʼo kuití kúú ña̱ xíniñúʼu kiʼinñá kuenta xíʼin tá ndáka̱xinñá ña̱ keʼéñá.

11. ¿Ndáa ki̱ʼva náʼa̱ iinna ña̱ ndixa kándíxana Jehová tá ndáka̱xinna na̱ tindaʼa̱ xíʼinna? (1 Corintios 7:39).

¹¹ Kúsi̱íní-ini Jehová xíʼin na̱ hermano na̱ viíní ndíku̱n consejo ña̱ táxira ndaʼa̱na tá ndáka̱xinna na̱ tindaʼa̱ xíʼinna. Tá iin ta̱ hermano á iin ñá hermana kúni̱na kakana xíʼin inkana, iin consejo ña̱ xíniñúʼu kundiku̱nna kúú ña̱ kundatuna nda̱a̱ ná ya̱ʼa tiempo ña̱ “kúni̱nína ku̱su̱nna xíʼin inka” (1 Cor. 7:36). Inka consejo ña̱ viíní xíniñúʼu kundiku̱nna kúú ña̱ kiʼinna kuenta á kúúmií na̱ hermano na̱ kúni̱na tindaʼa̱na xíʼin táʼan ña̱ va̱ʼa ña̱ kúúmií Jehová (Prov. 31:​10-13, 26-28; Efes. 5:33; 1 Tim. 5:8). Soo tá iin na̱ va̱ása kúú testigo Jehová kúni̱na tindaʼa̱na xíʼin iin na̱ ndásakáʼnu Jehová, xíniñúʼu kundiku̱nna consejo ña̱ káʼa̱n ña̱ xíniñúʼu tindaʼa̱ kuitína xíʼin na̱ ndíku̱n ta̱ Jesús, nda̱a̱ táki̱ʼva káchi 1 Corintios 7:39 (kaʼviña). Tá saá ná keʼéna, na̱ʼa̱na ña̱ ndixa kándíxana Jehová ta saátu kándíxana ña̱ miíra chindeétáʼan xíʼinna ña̱ kǒo kuni mitúʼunna (Sal. 55:22).

12. ¿Ndáaña sákuaʼún xíʼin ña̱ ndo̱ʼo ñá Rosa?

¹² Ná kotoyó ña̱ ndo̱ʼo ñá Rosa, iin ñá precursora ñá íyo chí Colombia. Nu̱ú xi̱kachíñu ñáyóʼo xi̱nitáʼanñá xíʼin iin ta̱a ta̱ va̱ása kúú testigo Jehová ta ta̱yóʼo ki̱xáʼara kútóorañá. Ta saátu ñá Rosa xi̱kutóoñá ta̱ ta̱a yóʼo. Ñáyóʼo káchiñá: “Va̱ʼaní ta̱a xi̱kuura. Xi̱keʼéra ku̱a̱ʼání chiñu ña̱ va̱ʼa chindeétáʼanra xíʼin na̱ yiví ñuu nu̱ú ni̱xi̱yora ta saátu kǒo níxi̱xaʼmira, kǒo níxi̱xiniñúʼura droga ta saátu kǒo níxi̱xiʼira ku̱a̱ʼání ndixi. Xi̱kutóoníi̱ ndáa ki̱ʼva xi̱kaʼa̱nra xíʼi̱n. Xi̱keʼéra ndiʼi ña̱ xi̱kuni̱i̱ ná keʼé iin ta̱a ta̱ tindaʼa̱ xíʼi̱n, soo su̱ví testigo Jehová níxikuura”. Ñáyóʼo káchikañá: “I̱xayo̱ʼvi̱níña xíʼi̱n ña̱ ka̱ʼi̱n xíʼinra ña̱ va̱ása kakai̱ xíʼinra saáchi mií ña̱ nda̱a̱ xi̱kutóonívai̱ra. Tiempo saá xi̱kuni mitúʼunníi̱ ta xi̱kuni̱i̱ tindaʼíi̱, soo kǒo níndani̱ʼíi̱ iin ta̱ hermano ta̱ kivi tindaʼa̱ xíʼi̱n”. Soo ñá Rosa va̱ása níkiʼin kuitíñá kuenta xíʼin ña̱ xi̱xitoñá, saáchi nda̱kanixi̱níñá ña̱ tá ná tindaʼa̱ñá xíʼin ta̱ ta̱a yóʼo kivi kuxíkáñá nu̱ú Jehová. Xa̱ʼa̱ ña̱kán ku̱xíkáñá nu̱ú ta̱ ta̱a yóʼo ta va̱ása níxi̱kaʼa̱nkañá xíʼinra ta ña̱ ni̱ndi̱ʼi̱ka-iniñá xa̱ʼa̱ kúú ña̱ kachíñuñá nu̱ú Jehová. Tá ni̱ya̱ʼa loʼo tiempo, ka̱nanañá ña̱ ku̱ʼu̱nñá Escuela nu̱ú Sákuaʼa na̱ Nátúʼun xa̱ʼa̱ ña̱ Kaʼndachíñu Ndióxi̱ ta vitin kúúñá precursora especial. Ñáyóʼo káchiñá: “Ku̱a̱ʼání bendición ta̱xi Jehová ndaʼíi̱ xa̱ʼa̱ ña̱ nda̱kaxii̱n ke̱ʼíi̱ ta vitin kúsi̱íní-inii̱”. Tá kútóoníyó inkana, íxayo̱ʼvi̱níña xíʼinyó keʼéyó ña̱ káʼa̱n Jehová, soo tá ndákanixi̱níyó nda̱a̱ táki̱ʼva ndákanixi̱ní Jehová ku̱a̱ʼání ña̱ va̱ʼa ndakiʼinyó.

TÁ KÁʼA̱N NA̱ ÑUU NDIÓXI̱ XÍʼINYÓ KEʼÉYÓ IIN ÑA̱ʼA

13. ¿Ndáaña kivi kundoʼoyó tá káʼa̱n na̱ ñuu Ndióxi̱ xíʼinyó keʼéyó iin ña̱ʼa?

¹³ Ku̱a̱ʼání yichi̱ káʼa̱n na̱ ñuu Ndióxi̱ xíʼinyó ndáaña keʼéyó, ta ña̱yóʼo chíndeétáʼanña xíʼinyó ña̱ va̱ʼaka kachíñuyó nu̱ú Jehová. Ta sava yichi̱ na̱ káʼa̱n ña̱yóʼo xíʼinyó kúú na̱ anciano, na̱ superintendente ña̱ circuito, na̱ káchíñu Betel á na̱ Cuerpo Gobernante. Soo sava yichi̱ kivi ixayo̱ʼvi̱ña xíʼinyó kunda̱a̱-iniyó nda̱chun káʼa̱nna xíʼinyó keʼéyó iin ña̱ʼa. ¿Ndáaña keʼéyó? ¿Á kixáʼayó ndakaniníxi̱níyó xa̱ʼa̱ ña̱ kivi kundoʼoyó tá ná keʼéyó ña̱ káʼa̱nna xíʼinyó? Ta nu̱úka ña̱ kuniso̱ʼoyó ña̱ káʼa̱nna xíʼinyó, ¿á kixáʼayó ndakanixi̱níyó ña̱ va̱ása va̱ʼa íyo ña̱ ni̱ka̱ʼa̱n na̱ hermano xíʼinyó keʼéyó? Tá ná keʼéyó ña̱yóʼo saá na̱ʼa̱yó ña̱ kíʼin kuitíyó kuenta xíʼin kúú ña̱ xítoyó ta va̱ása na̱ʼa̱yó ña̱ ndixa kándíxayó Ndióxi̱.

14. ¿Ndáaña chindeétáʼan xíʼinyó ña̱ kuniso̱ʼoyó ña̱ káʼa̱n na̱ ñuu Ndióxi̱ xíʼinyó? (Hebreos 13:17).

¹⁴ Kándíxayó ña̱ mií Jehová kúú ta̱ níʼi yichi̱ nu̱ú na̱ ñuura ta xíni̱ra ndáaña kúú ña̱ va̱ʼaka chindeétáʼan xíʼinyó. Xa̱ʼa̱ ña̱kán kándíxavayó ña̱ káʼa̱n na̱ ñuura xíʼinyó ta ndi̱ku̱n kéʼéyóña ta va̱ása káʼa̱nkúáchiyó (kaʼvi Hebreos 13:17). Tá xíniso̱ʼoyó ña̱ káʼa̱n na̱ ñuu Jehová xíʼinyó, chíndeétáʼanyó xíʼin na̱ congregación ña̱ vií kutáʼanna (Efes. 4:​2, 3). Kúnda̱a̱va-iniyó ña̱ na̱ yiví ku̱a̱chi kúú na̱ hermano na̱ káʼa̱n xíʼinyó ndáaña keʼéyó, soo tá ná keʼéyó ña̱ káʼa̱nna xíʼinyó mií Jehová taxi ku̱a̱ʼání ña̱ va̱ʼa ndaʼa̱yó (1 Sam. 15:22). Ta saátu kándíxayó ña̱ tá xíniñúʼu nasa̱ma iin ña̱ʼa ña̱ xa̱a̱ ni̱ka̱ʼa̱n na̱ ñuu Ndióxi̱ xíʼinyó keʼéyó, mií Jehová chindeétáʼan xíʼinna ña̱ nasamana ña̱yóʼo (Miq. 7:7).

15, 16. ¿Ndáaña chi̱ndeétáʼan xíʼin ta̱ Kevin ña̱ kandíxakara Jehová? (Koto na̱ʼná).

¹⁵ Vitin ná ka̱ʼa̱nyó xa̱ʼa̱ iin experiencia ña̱ chindeétáʼan xíʼinyó kunda̱a̱-iniyó ña̱ íyo ku̱a̱ʼání ña̱ va̱ʼa ndakiʼinyó tá náʼa̱yó ña̱ ndixa kándíxayó Ndióxi̱. Tá kúú, chí ñuu Perú íyo ku̱a̱ʼání na̱ yiví na̱ káʼa̱n tu̱ʼun sáʼán ta saátu íyo ku̱a̱ʼání na̱ káʼa̱n inka nu̱ú tu̱ʼun. Iin tu̱ʼun ña̱ káʼa̱nna ñuu yóʼo kúú ña̱ quechua. Xa̱a̱ ku̱a̱ʼání ku̱i̱ya̱, na̱ hermano na̱ káʼa̱n tu̱ʼun quechua xíkana nándukúna na̱ yiví na̱ káʼa̱n tu̱ʼun yóʼo ku̱a̱ʼá ñuu ña̱ va̱ʼa natúʼunna xíʼinna xa̱ʼa̱ Ndióxi̱. Soo na̱samava ki̱ʼva ña̱ xi̱nandukúna na̱ yiví yóʼo ña̱ va̱ʼa saxínuna ña̱ káʼa̱n ley ña̱ íyo ñuu kán (Rom. 13:1). Xa̱ʼa̱ ña̱kán sava na̱ hermano ki̱xáʼana ndákanixi̱nína á kivika ndani̱ʼína na̱ yiví na̱ káʼa̱n tu̱ʼun quechua. Soo na̱ hermano yóʼo xi̱ndiku̱nna ña̱ ni̱ka̱ʼa̱n na̱ ñuu Ndióxi̱ xíʼinna, ta mií Jehová chi̱ndeétáʼan xíʼinna ña̱ va̱ʼa nda̱ni̱ʼína ku̱a̱ʼáka na̱ yiví na̱ káʼa̱n tu̱ʼun yóʼo.

¹⁶ Ta̱ Kevin kúúra iin anciano ta ndíkaa̱ra iin congregación nu̱ú káʼa̱nna tu̱ʼun quechua, ta̱yóʼo ni̱ndi̱ʼi̱ní-inira xa̱ʼa̱ ña̱ ni̱ka̱ʼa̱n na̱ ñuu Ndióxi̱ xíʼinna ña̱ nasa̱ma ki̱ʼva ña̱ xi̱nandukúna na̱ yiví na̱ káʼa̱n tu̱ʼun yóʼo. Ta̱yóʼo káchira: “Xi̱ndakaniníxi̱níi̱ xa̱ʼa̱ ña̱yóʼo ‘¿Ta vitin ndáa ki̱ʼva keʼéyó ña̱ va̱ʼa ndani̱ʼíyó na̱ yiví na̱ káʼa̱n tu̱ʼun quechua?’”. ¿Ndáaña ke̱ʼé ta̱ Kevin? Ta̱yóʼo káchira: “Nda̱kaniníxi̱níi̱ xa̱ʼa̱ ña̱ káʼa̱n Proverbios 3:5. Saátu nda̱kanixi̱níi̱ xa̱ʼa̱ ña̱ ke̱ʼé ta̱ Moisés, saáchi Jehová ta̱xira iin chiñu káʼnu ndaʼa̱ra ña̱ tavára na̱ ñuu Israel chí ñuu Egipto ta ku̱ʼu̱nra xíʼinna chí nu̱ú ndíkaa̱ mar Rojo, ni xi̱naʼa̱ ña̱ va̱ása kivi ka̱kuvína nu̱ú na̱ ñuu Egipto tá ná ku̱ʼu̱nna yóʼo. Soo ta̱ Moisés xi̱niso̱ʼovara ña̱ ni̱ka̱ʼa̱n Jehová xíʼinra ta mií Jehová ke̱ʼé iin milagro ña̱ káʼnuní ta sa̱kǎkura na̱ ñuu Israel” (Éx. 14:​1, 2, 9-11, 21, 22). Ta̱ Kevin chi̱kaa̱ra ndee̱ ña̱ keʼéra ña̱ ni̱ka̱ʼa̱n na̱ ñuu Ndióxi̱, ¿ta ndáaña va̱ʼa nda̱kiʼinra xa̱ʼa̱ ña̱yóʼo? Ta̱yóʼo káchira: “Ndákanda̱ní-inii̱ tá xítoi̱ ndáa ki̱ʼva chi̱ndeétáʼan Jehová xíʼinndi̱. Tá ya̱chi̱ ku̱a̱ʼání xi̱xikandi̱ ña̱ va̱ʼa ndani̱ʼíndi̱ iin á u̱vi̱ na̱ yiví na̱ káʼa̱n tu̱ʼun quechua, soo vitin xáʼa̱nndi̱ ñuu nu̱ú íyo ku̱a̱ʼání na̱ yiví na̱ káʼa̱n tu̱ʼun yóʼo. Ku̱a̱ʼáka na̱ yiví nátúʼunndi̱ xíʼin xa̱ʼa̱ Ndióxi̱, íyo ku̱a̱ʼáka revisitandi̱ ta saátu ku̱a̱ʼáka na̱ yiví káʼvindi̱ xíʼin. Ta íyo ku̱a̱ʼánítu na̱ yiví na̱ xáʼa̱n reunión”. Xíʼin ña̱yóʼo kúnda̱a̱-iniyó ña̱ tá náʼa̱yó ña̱ ndixa kándíxayó Jehová, miíra taxi ku̱a̱ʼání ña̱ va̱ʼa ndaʼa̱yó.

17. ¿Ndáaña sa̱kúaʼún nu̱ú artículo yóʼo?

¹⁷ Yóʼo sa̱kúaʼayó ama kúú ña̱ ndáyáʼviní na̱ʼa̱yó ña̱ ndixa kándíxayó Ndióxi̱ tá ndáka̱xinyó ña̱ keʼéyó. Ta saátu xíniñúʼu ndakundeéyó chikaa̱yó ndee̱ ña̱ keʼéyó ña̱yóʼo tá ndáka̱xinyó ndáaña kotoyó á kusikíyó, tá xíniñúʼu ndaka̱xinyó á kaʼvi va̱ʼayó á ndáa ki̱ʼva sakúaʼnuyó na̱ va̱lí se̱ʼeyó. Tá ndáka̱xinyó ndáaña keʼéyó, ná kiʼinyó kuenta á chindeétáʼan ña̱yóʼo xíʼinyó ña̱ kutáʼan va̱ʼayó xíʼin Jehová. Saátu xíniñúʼu kiʼinyó kuenta á xíniso̱ʼoyó consejo ña̱ táxi Jehová ndaʼa̱yó ta saátu á kándíxayó ña̱ kundaara miíyó. Ta ná ndakaʼányó ña̱ va̱ása xíniñúʼu kiʼin kuitíyó kuenta xíʼin ña̱ʼa ña̱ xítoyó. Tá saá kéʼéyó, “kachíñuyó nu̱ú Jehová Ndióxi̱yó ndiʼi tiempo” (Miq. 4:5).