¿Ndáa ki̱ʼva ndukúyó consejo?

1. ¿Ndáa ki̱ʼva vií koo ña̱ ndaka̱xinyó keʼéyó? (Proverbios 13:10; 15:22).

NDIʼIYÓ kúni̱yó ña̱ vií ná koo ña̱ ndaka̱xinyó keʼéyó ta vií ná kanaña. Tu̱ʼun Ndióxi̱ káʼa̱nña xíʼinyó ña̱ va̱ʼa vií kanaña xíniñúʼu ndukúyó consejo (kaʼvi Proverbios 13:10;a 15:22).b

2. ¿Ndáaña káʼa̱n Jehová xíʼinyó?

² Iinlá Jehová kúú ta̱ kivi taxi consejo ña̱ va̱ʼaní ndaʼa̱yó. Ña̱kán ná ka̱ʼa̱nyó xíʼinra ña̱ taxira ña̱ ndíchi ndaʼa̱yó. Jehová káʼa̱nra ña̱yóʼo xíʼinyó: “Taxii̱ ña̱ ndíchi ndaʼún ta sanáʼi̱ yóʼó” (Sal. 32:8). Ña̱yóʼo náʼa̱ña nu̱úyó ña̱ ndíʼi̱ní-ini Jehová xa̱ʼa̱yó ña̱kán táxira consejo mií ña̱ xíniñúʼuyó ndaʼa̱yó ta chíndeétáʼanra xíʼinyó ña̱ xa̱a̱yó keʼéyóña.

3. ¿Ndáa pregunta ka̱ʼa̱nyó xa̱ʼa̱ nu̱ú artículo yóʼo?

³ Nu̱ú artículo yóʼo kuniñúʼuyó tu̱ʼun Ndióxi̱ ña̱ va̱ʼa ka̱ʼa̱nyó xa̱ʼa̱ ku̱mí pregunta yóʼo: 1) ¿Ndáaña va̱ʼa xíniñúʼu kuumiíi̱ ña̱ va̱ʼa ndakiʼin consejo?, 2) ¿Ndáana kivi taxi consejo ndaʼíi̱?, 3) ¿Ndáa ki̱ʼva kivi na̱ʼi̱ ña̱ ndixa xíniñúʼi̱ consejo? 4) ¿Nda̱chun kǒo xíniñúʼu ka̱ʼi̱n xíʼin inkana ña̱ ndaka̱xinna ndáaña keʼíi̱?

“¿NDÁAÑA VA̱ʼA XÍNIÑÚʼU KUUMIÍI̱?”

4. ¿Ndáaña va̱ʼa xíniñúʼu kuumiíyó ña̱ va̱ʼa ndakiʼinyó consejo ña̱ táxina ndaʼa̱yó?

⁴ Ña̱ va̱ʼa chindeétáʼan consejo ña̱ táxina ndaʼa̱yó xíʼinyó, xíniñúʼu vitá koo iniyó ta ndakuniyó ña̱ kǒo kívi keʼéyó sava ña̱ʼa. Ná ndakuniyó ña̱ viíva kana ña̱ ndaka̱xinyó keʼéyó tá ná ndukúyó consejo nu̱ú na̱ xínika nu̱ú miíyó. Tá va̱ása vitá íyo iniyó Jehová kǒo chindeétáʼanra xíʼinyó ta sana kivi ndakanixi̱níyó ña̱ kǒo chindeétáʼan consejo ña̱ va̱xi nu̱ú Biblia xíʼinyó (Miq. 6:8; 1 Ped. 5:5). Tá vitá íyo iniyó kuniso̱ʼovayó ndiʼi consejo ña̱ va̱xi nu̱ú Biblia.

5. ¿Ndáa xa̱ʼa̱ kúú ña̱ kivi ni̱nu kuni ta̱ David?

⁵ Ná kotoyó ndáaña sakúaʼayó xíʼin ejemplo ta̱ rey David, ni ku̱a̱ʼá ña̱ʼa xi̱xinira keʼéra vitání ni̱xi̱yo-inira. Tá kúma̱níka koora rey xi̱xitara nu̱ú ta̱ rey Saúl (1 Sam. 16:​18, 19). Tá nda̱kaxin Jehová miíra ña̱ koora rey ta̱xira espíritu santora ndaʼa̱ra (1 Sam. 16:​11-13). Va̱ʼaní xi̱ka̱ʼa̱n na̱ ñuu xa̱ʼa̱ra saáchi ku̱chiñura ka̱nitáʼanra xíʼin na̱ xi̱saa̱-ini xi̱xini miíra, tá kúú xa̱ʼníra ta̱ filisteo ta káʼnuní ta̱ xi̱naní Goliat (1 Sam. 17:​37, 50; 18:7). Tá va̱ása vitá níxi̱yo-ini ta̱ David sana kivi ndakanixi̱níra ña̱yóʼo: “Xa̱ʼa̱ ña̱ ku̱a̱ʼání ña̱ʼa xa̱a̱ kúchiñui̱ kéʼíi̱ va̱ása xíniñúʼu taxivína consejo ndaʼíi̱”. Soo ta̱yóʼo kǒo níkeʼéra saá.

6. ¿Nda̱chun va̱ʼa kúnda̱a̱-iniyó ña̱ xi̱ndiku̱nva ta̱ David consejo ña̱ xi̱taxina ndaʼa̱ra? (Koto na̱ʼná ña̱ va̱xi chí nu̱ú kíxáʼa tutu yóʼo).

⁶ Tá xa̱a̱ ndu̱u ta̱ David rey, nda̱kutáʼanra xíʼin na̱ ta̱a na̱ xa̱a̱ xu̱xa-ini ña̱ va̱ʼa ndukúra consejo nu̱úna (1 Crón. 27:​32-34). Ndiʼi tiempo va̱ʼaní xi̱xiniso̱ʼora consejo, ni ñaʼá á ta̱a kúú na̱ xi̱taxi consejo ndaʼa̱ra. Ña̱yóʼo kúú ña̱ ke̱ʼé ñá Abigaíl, ñá xi̱kuu ñá síʼi ta̱ Nabal, ta̱yóʼo kininí xi̱keʼéra ta ndeéní xi̱kuuta̱a-inira. Ta̱ David vitá ni̱xi̱yo inira ta xi̱niso̱ʼora consejo ña̱ ni̱ka̱ʼa̱nñá xíʼinra, ta xa̱ʼa̱ ña̱yóʼo kǒo níkeʼéra ña̱ va̱ása va̱ʼa (1 Sam. 25:​2, 3, 21-25, 32-34).

7. ¿Ndáaña sákuaʼayó xíʼin ña̱ ke̱ʼé ta̱ David? (Eclesiastés 4:13; koto na̱ʼná).

⁷ ¿Ndáaña sákuaʼayó xíʼin ña̱ ke̱ʼé ta̱ David? Ni ku̱a̱ʼání ña̱ xíni̱yó keʼéyó á kúúmiíyó iin chiñu ña̱ ndáyáʼviní kǒo xíniñúʼu ndakanixi̱níyó ña̱ xíni̱níyó ta ni va̱ása xíniñúʼu taxina consejo ndaʼa̱yó. Ni nda̱a̱ ndáaka na̱ táxi consejo ndaʼa̱yó xíniñúʼu kuniso̱ʼoyó na̱yóʼo (kaʼvi Eclesiastés 4:13).c Ta ña̱yóʼo chindeétáʼanña xíʼinyó ña̱ kǒo keʼéyó ña̱ va̱ása va̱ʼa ta ni va̱ása saxóʼvi̱yó miíyó á inka na̱ yiví.

“¿NDÁANA KIVI TAXI CONSEJO NDAʼÍI̱?”

8. ¿Nda̱chun iin ña̱ va̱ʼa kúú ña̱ ndu̱kú ta̱ David consejo nu̱ú ta̱ Jonatán?

⁸ Ná kotoyó inka ña̱ ke̱ʼé ta̱ David. Ta̱yóʼo xi̱xiniso̱ʼora consejo ña̱ xi̱taxi 1) na̱ va̱ʼaní xi̱kitáʼan xíʼin Jehová 2) na̱ xi̱kunda̱a̱-ini xíʼin ña̱ xi̱ndoʼora. Tá kúú, tá xi̱kunira ndasaviíra ku̱a̱chi xíʼin ta̱ rey Saúl, ndu̱kúra consejo nu̱ú ta̱ Jonatán se̱ʼe mií ta̱ Saúl. ¿Nda̱chun ndu̱kúra consejo nu̱ú ta̱ Jonatán? Saáchi ta̱yóʼo va̱ʼaní xi̱kitáʼanra xíʼin Jehová ta xi̱xini va̱ʼara ta̱ Saúl (1 Sam. 20:​9-13). ¿Ndáa ki̱ʼva kundiku̱nyó ejemplo ta̱ David?

9. Tá xíniñúʼuyó iin consejo, ¿ndáana xíniñúʼu ndukúyóña nu̱ú? Ka̱ʼa̱n xa̱ʼa̱ iin ejemplo (Proverbios 13:20).

⁹ Tá xíniñúʼuyó iin consejo xa̱ʼa̱ iin ña̱ʼa, iin ña̱ va̱ʼava kúú ña̱ 1) ndukúyóña nu̱ú iin na̱ va̱ʼaní kítáʼan xíʼin Jehová 2) ta xíni̱va̱ʼana xa̱ʼa̱ ña̱ kúni̱yó ka̱ʼa̱nyó xíʼinnad (kaʼvi Proverbios 13:20).e Ná ndakanixi̱níyó xa̱ʼa̱ iin ta̱ loʼo ta̱ kúni̱ tindaʼa̱. ¿Ndáana kivi ndukúra consejo nu̱ú? Kiviva taxi ta̱ migora ta ta̱ʼán tindaʼa̱ consejo ndaʼa̱ra ta nda̱a̱ va̱ʼa chindeétáʼanña xíʼinra tá va̱xiña nu̱ú Biblia. Soo va̱ʼaníka consejo taxi iin na̱ xa̱a̱ ku̱a̱ʼá tiempo tindaʼa̱ ndaʼa̱ra ta si̱í íyona, va̱ʼa kítáʼanna xíʼin Jehová, ta xíni̱ va̱ʼana miíra.

10. ¿Ndáaña ka̱ʼa̱nyó xa̱ʼa̱?

¹⁰ Xa̱a̱ ni̱ka̱ʼa̱nyó xa̱ʼa̱ u̱vi̱ ña̱ʼa ña̱ xíniñúʼu kuumiíyó ta ndáana kivi taxi consejo ndaʼa̱yó. Vitin ná kotoyó nda̱chun xíniñúʼu taxina consejo ndaʼa̱yó ta saátu á kivi ka̱ʼa̱nyó xíʼin inkana ña̱ ka̱ʼa̱nna xíʼinyó ndáaña keʼéyó.

“¿NDÁA KI̱ʼVA NA̱ʼI̱ ÑA̱ NDIXA XÍNIÑÚʼI̱ CONSEJO?”

11, 12. a) ¿Ndáaña kǒo xíniñúʼu keʼéyó? b) ¿Ndáaña ke̱ʼé ta̱ Rehoboam tá xi̱niñúʼu ndaka̱xinra keʼéra iin ña̱ ndáyáʼviní?

¹¹ Sava na̱ yiví ndúkúna consejo nu̱ú inkana soo xa̱a̱ ya̱chi̱ví ndaka̱xinna ña̱ keʼéna ta káʼa̱n kuitína xíʼin na̱ yiví kán á va̱ʼa íyo ña̱ nda̱kaxinna keʼéna. Na̱ kéʼé ña̱yóʼo su̱ví ndixaví kúni̱na kuniso̱ʼona consejo. Ejemplo ta̱ rey Rehoboam kivi chindeétáʼanña xíʼinyó ña̱ kǒo keʼéyó saá.

¹² Tá ni̱xi̱ʼi̱ ta̱ Salomón, se̱ʼera ta̱ Rehoboam ni̱xa̱a̱ ndu̱u rey chí ñuu Israel. Tiempo saá va̱ʼaní ni̱xi̱yo na̱ ñuu kán, soo na̱ ñuu Israel ki̱xáʼana káʼa̱n kúáchina ña̱ ku̱a̱ʼání ña̱ʼa xi̱ndukú ta̱ Salomón nu̱úna. Ta saá ni̱ka̱ʼa̱nna xíʼin ta̱ Rehoboam ña̱ loʼoka chiñu ná taxira ndaʼa̱na. Ta̱ rey kán ni̱ka̱ʼa̱nra xíʼinna ña̱ xi̱niñúʼu ndakanixi̱níra xa̱ʼa̱ ña̱yóʼo. Ta va̱ʼa ni̱xi̱yo ña̱ ke̱ʼéra chi ndu̱kúra consejo nu̱ú na̱ xi̱ku̱a̱ʼa̱ na̱ xi̱chindeétáʼan xíʼin ta̱ Salomón (1 Rey. 12:​2-7). Soo kǒo níxiinra kuniso̱ʼora consejo ña̱ ta̱xina ndaʼa̱ra. ¿Nda̱chun? Á sana xa̱a̱ ya̱chi̱ví nda̱kaxinra ña̱ keʼéra ta xi̱ndatu kuitíra ña̱ ka̱ʼa̱nna xíʼinra ña̱ va̱ʼava íyo ña̱ nda̱kaxinra keʼéra. Ta saá ke̱ʼévara, saáchi tándi̱ʼi ni̱nda̱ka̱tu̱ʼúnra na̱ migora na̱ válíka ta na̱yóʼo ni̱ka̱ʼa̱nna míí ña̱ xi̱kunira ña̱ ná ka̱ʼa̱nna xíʼinra (1 Rey. 12:​8-14). Xa̱ʼa̱ ña̱ xi̱niso̱ʼo ta̱ Rehoboam ña̱ ni̱ka̱ʼa̱n na̱yóʼo xíʼinra, ku̱a̱ʼání na̱ ñuu va̱ása níxiniso̱ʼokanara ta ku̱a̱ʼání tu̱ndóʼo ki̱xi nu̱úra (1 Rey. 12:​16-19).

13. ¿Ndáaña kivi chindeétáʼan xíʼinyó ña̱ kuniso̱ʼoyó consejo ña̱ táxina ndaʼa̱yó?

¹³ ¿Ndáaña sákuaʼayó xíʼin ña̱ ke̱ʼé ta̱ Rehoboam? Tá ndúkúyó consejo ná kuniso̱ʼoyó ña̱ káʼa̱nna xíʼinyó. Ná ndakanixi̱níyó xa̱ʼa̱ ña̱yóʼo: “Tá ndúkúi̱ consejo nu̱ú iinna ta kǒo kútói̱ ña̱ ni̱ka̱ʼa̱nna xíʼi̱n, ¿á kéʼíi̱ña?”. Ná ka̱ʼa̱nyó xa̱ʼa̱ iin ejemplo.

14. ¿Ndáaña kǒo xíniñúʼu nandóso-iniyó xa̱ʼa̱? Ka̱ʼa̱n xa̱ʼa̱ iin ejemplo (koto na̱ʼná).

¹⁴ Ná ndakanixi̱níyó ña̱ táxina iin chiñu ndaʼa̱ iin ta̱ hermano nu̱ú ku̱a̱ʼáka xu̱ʼún chaʼvina miíra soo ku̱a̱ʼá tiempo kuxíkára nu̱ú na̱ veʼera xa̱ʼa̱ chiñu yóʼo. Soo tá kúma̱níka kiʼinra chiñu yóʼo ndúkúra consejo nu̱ú iin ta̱ anciano. Ta̱yóʼo xíniñúʼura Biblia ña̱ chindeétáʼanra xíʼinra ta káʼa̱nra xíʼinra ña̱ siʼnaka xíniñúʼu keʼéra kúú ña̱ chindeétáʼanra xíʼin na̱ veʼera ña̱ ndasakáʼnuna Ndióxi̱ (Efes. 6:4; 1 Tim. 5:8). Soo ta̱ hermano yóʼo kǒo kútóora consejo ña̱ ta̱xi ta̱ anciano ndaʼa̱ra ta va̱ʼaka ndáka̱tu̱ʼúnra iinka na̱ hermano ta na̱kán káʼa̱nna xíʼinra ña̱ kiviva kiʼinra chiñu kán. ¿Á ndixa consejo xi̱ndukúra, á xi̱ndatu kuitíra ña̱ ná ka̱ʼa̱n iinna xíʼinra ña̱ va̱ʼava kúú ña̱ xa̱a̱ nda̱kaxinra keʼévara? Ná kǒo nandósóyó chi níma̱yó kivi sandáʼviña miíyó (Jer. 17:9). Sava yichi̱, consejo ña̱ xíniñúʼuyó kǒo kutóovíyóña.

“¿Á XÍNIÑÚʼU KA̱ʼI̱N XÍʼIN INKANA ÑA̱ NDAKAXINNA ÑA̱ KEʼÍI̱?”

15. ¿Ndáaña kǒo xíniñúʼu keʼéyó ta nda̱chun?

¹⁵ Jehová kúni̱ra ña̱ iin tá iin miíyó ná ndaka̱xinyó ña̱ keʼéyó (Gál. 6:​4, 5). Nda̱a̱ táki̱ʼva xa̱a̱ ku̱ndaa̱-iniyó, tá kúma̱níka ndaka̱xinyó ña̱ keʼéyó, siʼnaka ná nandukúyó consejo ña̱ va̱xi nu̱ú Biblia ta saátu ka̱ʼa̱nyó xíʼin na̱ hermano na̱ xa̱a̱ xu̱xa-ini. Soo kǒo xíniñúʼu ka̱ʼa̱nyó xíʼinna ña̱ ná ndaka̱xinna ndáaña keʼéyó. Ña̱kán va̱ása xíniñúʼu nda̱ka̱tu̱ʼúnvíyó miína ña̱yóʼo: “Tá miíún ná ndoʼo ña̱yóʼo ¿ndáaña keʼún?”. Ta saátu va̱ása keʼéyó nda̱a̱ táki̱ʼva kéʼé inkana ña̱ kǒo ndákanixi̱nína xa̱ʼa̱ ña̱ kúni̱na keʼéna.

16. ¿Ndáaña xi̱xiniñúʼu keʼé na̱ cristiano na̱ ñuu Corinto? (1 Corintios 8:7; 10:​25, 26).

¹⁶ Ná kotoyó ndáaña ku̱u tá siglo nu̱ú ti̱xin congregación ña̱ Corinto. Na̱ cristiano kán xi̱niñúʼu ndaka̱xinna ndáaña xi̱niñúʼu keʼéna xíʼin ku̱ñu ña̱ xi̱sokóna nu̱ú ndióxi̱ vatá. Ta̱ Pablo ni̱ka̱ʼa̱nra xíʼinna: “Kúnda̱a̱-iniyó na̱ ndióxi̱ vatá va̱ása ndáyáʼvina ñuyǐví yóʼo, ta iinlá kuití kúú Ndióxi̱ íyo” (1 Cor. 8:4). Savana xi̱satávana ku̱ñu ta kuxunaña ni xi̱sokóna ña̱kán nu̱ú ndióxi̱ vatá. Soo inkana va̱ása nísatána ku̱ñu ña̱ kuxuna saáchi ña̱ xínitúni̱na va̱ása nítaxiña ña̱ keʼéna ña̱yóʼo (Kaʼvi 1 Corintios 8:7; 10:​25, 26). Iin tá iinna xi̱niñúʼu ndaka̱xin ndáaña keʼéna. Ta̱ Pablo va̱ása níka̱ʼa̱nra xíʼinna ña̱ ndaka̱xinna ndáaña keʼé inkana ni ña̱ keʼéna nda̱a̱ táki̱ʼva kéʼé na̱kán, chi ni̱ka̱ʼa̱nra ña̱yóʼo nu̱ú Romanos 14:​10-12: “Ndióxi̱ ndatiinra ku̱a̱chi xíʼin iin tá iinyó”.

17. ¿Ndáaña kuu tá ná kundiku̱n kuitíyó táʼan ña̱ kéʼé inkana? Ka̱ʼa̱n xa̱ʼa̱ iin ejemplo (koto na̱ʼná).

¹⁷ ¿Ndáaña kúú ña̱ kivi kundoʼoyó tiempo vitin? Ná ndakanixi̱níyó, á kivi ndakiʼinyó sava táʼví válí ña̱ kúúmií ni̱i̱. Iin tá iin na̱ cristiano ndaka̱xin á ndakiʼinna ña̱yóʼo á va̱ása.f Sana kivi ixayo̱ʼvi̱ña xíʼinyó ña̱ kunda̱a̱-iniyó xa̱ʼa̱ ña̱yóʼo, soo iin tá iinyó xíniñúʼu ndaka̱xin ndáaña keʼéyó (Rom. 14:4). Tá ná keʼéyó táʼan ña̱ kéʼé inkana, ña̱ xínitúni̱yó va̱ása chindeétáʼankaña xíʼinyó. Viíka koo ña̱ keʼéyó tá ná nandukúyó ña̱ káʼa̱n Biblia ndáaña xíniñúʼu keʼéyó (Heb. 5:14). Tá ná ndaka̱xinyó ña̱ keʼéyó, siʼna ná nandukúyó xa̱ʼa̱ ña̱yóʼo ta kotoyó ndáa texto va̱xi nu̱ú Biblia kivi chindeétáʼan xíʼinyó. Soo tá túviyó ña̱ xíniñúʼukayó ña̱ chindeétáʼanna xíʼinyó ndáaña keʼéyó, va̱ʼaka ná ndukúyó consejo nu̱ú na̱ cristiano na̱ xa̱a̱ xu̱xa-ini.

NÁ NDUKÚKAYÓ CONSEJO

18. ¿Ndáaña xa̱a̱ kéʼé Jehová xa̱ʼa̱yó?

¹⁸ Jehová táxira ña̱ miíyó ná ndaka̱xin ndáaña keʼéyó, ta saá náʼa̱ra ña̱ ndáa-inira miíyó. Ta̱xira tu̱ʼunra ndaʼa̱yó ta saátu na̱ migoyó na̱ xa̱a̱ xu̱xa-ini xíʼin tu̱ʼunra na̱ kivi chindeétáʼan xíʼinyó ña̱ kunda̱a̱-iniyó ndáa ki̱ʼva kundiku̱nyó texto ña̱ va̱xi nu̱ú Biblia. Saá náʼa̱ Jehová ña̱ viíní ndáara miíyó (Prov. 3:​21-23). ¿Ndáa ki̱ʼva na̱ʼa̱yó ña̱ táxiyó tíxa̱ʼvi ndaʼa̱ra xa̱ʼa̱ ndiʼi ña̱ xa̱a̱ kéʼéra xa̱ʼa̱yó?

19. ¿Ndáa ki̱ʼva sákusi̱íyó-ini Jehová?

¹⁹ Na̱ íyo se̱ʼe kúsi̱íní-inina tá xítona na̱ se̱ʼena xáa̱na nda̱kúní íyo inina xíʼin Jehová, ndíchi íyona ta̱ chíndeétáʼanna xíʼin inkana. Ki̱ʼva saá ndóʼo yiváyó ta̱ íyo chí ndiví chi kúsi̱í-inira tá xítora ña̱ nda̱kú íyo iniyó xíʼinra, tá ndúkúyó consejo, ta ña̱ ndáka̱xinyó keʼéyó ndásakáʼnuña miíra.