Ná na̱ʼa̱yó ña̱ íxato̱ʼóyó inkana

1. ¿Nda̱chun ndáyáʼviní ña̱ ná ixato̱ʼóna miíyó? (Proverbios 22:1).

NDIʼIVAYÓ kúsi̱í-ini ta kúniyó ña̱ ná ixato̱ʼóna miíyó. Ña̱kán Biblia káʼa̱nña, “va̱ʼaka ña̱ ixato̱ʼóna miíyó nu̱úka ña̱ kuumiíyó plata xíʼin oro” (kaʼvi Proverbios 22:1).a

2, 3. ¿Nda̱chun íxayo̱ʼvi̱ña xíʼinyó ña̱ ixato̱ʼóyó inkana ta ndáaña ka̱ʼa̱nyó xa̱ʼa̱ nu̱ú artículo yóʼo?

² Sava yichi̱ íxayo̱ʼvi̱ña xíʼinyó ixato̱ʼóyó inkana. ¿Nda̱chun? Saáchi ña̱ siʼna kíʼinkayó kuenta xíʼin kúú ña̱ va̱ása va̱ʼa kéʼéna ta saátu tiempo ña̱ ndóoyó vitin loʼoní na̱ yiví íxato̱ʼó inkana. Soo miíyó kúni̱vayó to̱ʼó keʼéyó saáchi Jehová káʼa̱nra xíʼinyó ña̱ ná ixato̱ʼóyó ndiʼi na̱ yiví (1 Ped. 2:17).

³ Nu̱ú artículo yóʼo ka̱ʼa̱nyó xa̱ʼa̱ ndáaña kúni̱ kachi ña̱ ixato̱ʼóyó inkana, ta ndáa ki̱ʼva na̱ʼa̱yó ña̱yóʼo xíʼin na̱ veʼeyó, na̱ hermanoyó ta saátu xíʼin na̱ yiví na̱ va̱ása kúú Testigo. Ta saátu ka̱ʼa̱nyó xa̱ʼa̱ ndáa ki̱ʼva na̱ʼa̱yó ña̱ íxato̱ʼóyó inkana ni íxayo̱ʼvi̱ña xíʼinyó.

¿NDÁAÑA KÚNI̱ KACHI ÑA̱ IXATO̱ʼÓYÓ INKANA?

4. ¿Ndáaña kúni̱ kachi ña̱ ixato̱ʼóyó inkana?

⁴ ¿Ndáa ki̱ʼva ka̱ʼún xa̱ʼa̱ ña̱ ixato̱ʼó táʼanyó? Tu̱ʼun ña̱ to̱ʼó xíʼin ña̱ vií keʼéyó xíʼin inkana iin kitáʼan ña̱yóʼo. Tu̱ʼun ña̱ to̱ʼó kúni̱ kachiña ki̱ʼva ña̱ xítoyó á ña̱ ndákanixi̱níyó xa̱ʼa̱ iin na̱ yiví xíʼin ki̱ʼva ña̱ kéʼéyó xíʼinna. Tá xítoyó iin na̱ yiví kúúmiína ña̱ va̱ʼa á kéʼéna ña̱ va̱ʼa á sana kúúmiína iin chiñu ña̱ káʼnuka nu̱ú miíyó, vií xáa̱yó kéʼéyó xíʼinna ta náʼa̱yó ña̱ íxato̱ʼóyóna ta xíʼin ndinuʼu níma̱yó kéʼéyó ña̱yóʼo (Mat. 15:8).

5. ¿Ndáa xa̱ʼa̱ kúú ña̱ íxato̱ʼóyó inkana?

⁵ Jehová kúni̱ra ña̱ ná ixato̱ʼóyó inkana tá kúú, káʼa̱nra xíʼinyó ña̱ ná ixato̱ʼóyó na̱ chíñu (Rom. 13:​1, 7). Sana iinna kivi ndakanixi̱nína: “Íxato̱ʼíi̱ na̱ íxato̱ʼó yi̱ʼi̱”. Soo, ¿á va̱ʼa ndakanixi̱níyó ña̱yóʼo? Va̱ása. Miíyó na̱ ndásakáʼnu Jehová kúnda̱a̱-iniyó ña̱ xíniñúʼu ixato̱ʼóyó inkana, soo su̱ví xa̱ʼa̱ ña̱ kéʼéna á ña̱ kǒo kéʼéna kéʼéyó ña̱yóʼo saáchi kéʼéyóña chi kúʼvi̱-iniyó xíniyó Jehová ta kúni̱yó sakúsi̱íyó-inira (Jos. 4:14; 1 Ped. 3:15).

6. ¿Á kivi ixato̱ʼóyó na̱ kǒo íxato̱ʼó miíyó? (Koto na̱ʼná ña̱ va̱xi chí nu̱ú kíxáʼa tutu yóʼo).

⁶ Sana kivi ndakanixi̱níyó xa̱ʼa̱ ña̱yóʼo: “¿Á kivi ixato̱ʼíi̱ na̱ kǒo íxato̱ʼó yi̱ʼi̱?” Kiviva. Ná ndakanixi̱níyó xa̱ʼa̱ sava ejemplo. Ta̱ rey Saúl sa̱kúkaʼanra nu̱ú se̱ʼera ta̱ Jonatán nu̱ú inka na̱ yiví (1 Sam. 20:​30-34). Soo nisaá ta̱ Jonatán i̱xato̱ʼóvara yivára ta inkáchi xi̱xa̱ʼa̱nna nu̱ú ku̱a̱chi nda̱a̱ tá ni̱xi̱ʼi̱na (Éx. 20:12; 2 Sam. 1:23). Ta̱ su̱tu̱ Elí chi̱kaa̱ra ku̱a̱chi síkí ña̱ Ana ña̱ ñá xíʼi kúúña (1 Sam. 1:​12-14). Soo ñá Ana xíʼin ña̱ to̱ʼó nda̱kuinñá yuʼúra. Ndiʼi ñuu Israel xi̱kunda̱a̱-ini xa̱ʼa̱ ta̱ Elí ña̱ va̱ása ní xi̱ka̱ʼa̱nra xíʼin se̱ʼera tá xi̱keʼéna ña̱ va̱ása va̱ʼa ta ni va̱ása vií ní xi̱keʼéra chiñu ña̱ xi̱kuumiíra (1 Sam. 1:​15-18; 2:​22-24). Sava na̱ ñuu Atenas xi̱ka̱ʼa̱nna xíʼin ta̱ Pablo ña̱ xi̱kuura iin “ta̱ sána” (Hech. 17:18). Soo ta̱ Pablo xíʼin ña̱ to̱ʼó xi̱ka̱ʼa̱nra xíʼinna (Hech. 17:22). Ejemplo yóʼo náʼa̱ña nu̱úyó xa̱ʼa̱ ña̱ kúʼvi̱-iniyó xíniyó Jehová ta saátu ña̱ kǒo kúni̱yó sandákavayó-inira, chíndeétáʼanña xíʼinyó ña̱ ixato̱ʼóyó inkana ni sava yi̱chi̱ íxayo̱ʼvi̱ña xíʼinyó. Ná kotoyó ndáana xíniñúʼu ixato̱ʼóyó ta nda̱chun xíniñúʼu keʼéyó saá.

NÁ IXATO̱ʼÓYÓ NA̱ VEʼEYÓ

7. ¿Ndáa xa̱ʼa̱ kúú ña̱ kivi ixayo̱ʼvi̱ña xíʼinyó ixato̱ʼóyó na̱ veʼeyó?

⁷ Ña̱ íxayo̱ʼvi̱ xíʼinyó. Xa̱ʼa̱ ña̱ ku̱a̱ʼá tiempo íyoyó xíʼin na̱ veʼeyó kúnda̱a̱-iniyó ndáa ki̱ʼva íyona ta ndáaña va̱ása va̱ʼa kéʼéna. Á iin na̱ veʼeyó kúúmiína iin kue̱ʼe̱ ta íxayo̱ʼvi̱ña xíʼinyó kundaayóna, á kúúmiína iin kue̱ʼe̱ ña̱ naní ansiedad. Á savana kéʼéna á káʼa̱nna tu̱ʼún ña̱ sáxo̱ʼvi̱ miíyó. Inkana kǒo íxato̱ʼóna na̱ veʼeyó xa̱ʼa̱ ña̱kán va̱ása si̱í íyoyó. Ná ka̱ʼa̱nyó xa̱ʼa̱ iin ejemplo: Iin na̱ yiví na̱ kúúmií artritis xóʼvi̱nína saáchi kǒo kívi ka̱nda̱na, ki̱ʼva saá íyo ña̱ va̱ása íxato̱ʼó na̱ yiví na̱ veʼena saáchi ña̱yóʼo saxóʼvi̱ñana ta va̱ása vií íyona. Iin na̱ yiví na̱ kúúmií artritis va̱ása kiviví ndaʼa na̱yóʼo, soo ña̱ íxato̱ʼó táʼanyó kiviva keʼéyó ña̱yóʼo.

8. ¿Nda̱chun xíniñúʼu ixato̱ʼóyó na̱ veʼeyó? (1 Timoteo 5:​4, 8).

⁸ Nda̱chun xíniñúʼu to̱ʼó kooyó (kaʼvi 1 Timoteo 5:​4, 8). Carta nu̱ú ña̱ ka̱ʼyi ta̱ Pablo ña̱ ku̱a̱ʼa̱n ndaʼa̱ ta̱ Timoteo ni̱ka̱ʼa̱nra ndáaña xíniñúʼu keʼé na̱ familia ña̱ va̱ʼa kundaana na̱ veʼena ta saátu ni̱ka̱ʼa̱nra ña̱ ná íxato̱ʼóyó na̱ veʼeyó ta su̱ví xíʼin ña̱ nduxa̱ keʼéyóña. Keʼéyó ña̱yóʼo xa̱ʼa̱ ña̱ kúʼvi̱-iniyó xíniyó Jehová chi saá náʼa̱yó ña̱ ndásakáʼnuyóra, saáchi mií Jehová i̱xava̱ʼa na̱ familia (Efes. 3:​14, 15). Tá íxato̱ʼóyó na̱ veʼeyó saá kúú ña̱ íxato̱ʼóyó Jehová, ña̱kán ndáyáʼviní na̱ʼa̱yó ña̱ íxato̱ʼóyó inkana.

9. ¿Ndáa ki̱ʼva náʼa̱ na̱ xa̱a̱ ti̱ndaʼa̱ ña̱ íxato̱ʼó táʼanna? (Koto na̱ʼná).

⁹ Ndáa ki̱ʼva na̱ʼa̱yó ña̱ to̱ʼó. Ta̱a ta̱ xa̱a̱ ti̱ndaʼa̱ náʼa̱ra ña̱ ndiʼi tiempo íxato̱ʼóra ña̱ síʼíra ni íyo miína á ni íyona nu̱ú ndóo ku̱a̱ʼá na̱ yiví (Prov. 31:28; 1 Ped. 3:7). Nda̱a̱ ni iin yi̱chi̱ va̱ása kánira miíñá va̱ása sandákavara-iniñá ta kǒo náʼa̱ra ña̱ va̱ása ndáyáʼviñá nu̱úra. Iin ta̱ hermano ta̱ ñuu Argentina ta̱ naní Arielb káchira: “Xa̱ʼa̱ ña̱ kúúmií ñá síʼíi̱ iin kue̱ʼe̱ sava yi̱chi̱ káʼa̱nñá tu̱ʼun ña̱ saxóʼvi̱ yi̱ʼi̱. Tá káʼa̱nñá ña̱yóʼo ndákaʼíi̱n ña̱ su̱ví ndixaví saá kúni̱ñá ka̱ʼa̱nñá. Ndákanixi̱níi̱ xa̱ʼa̱ ña̱ káʼa̱n 1 Corintios 13:5 ña̱yóʼo chíndeétáʼanña xíʼi̱n ña̱ vií káʼi̱n xíʼinñá ta to̱ʼó káʼi̱n xíʼinñá” (Prov. 19:11). Iin ñaʼá ñá xa̱a̱ ti̱ndaʼa̱ náʼa̱ñá ña̱ íxato̱ʼóñá yii̱ñá tá káʼa̱n viíñá xa̱ʼa̱ra nu̱ú inkana (Efes. 5:33). Va̱ása káʼa̱nñá tu̱ʼun ña̱ kivi sándakava-inira ta ni kǒo kúsi̱kindaañára ta kǒo ndáʼyi̱ñá nu̱úra, chi kúnda̱a̱-iniñá tá ná keʼéñá saá sándakavañá-inira (Prov. 14:1). Iin ñá hermana ña̱ íyo ñuu Italia, yii̱ ñáyóʼo kúúmiíra kue̱ʼe̱ ña̱ naní ansiedad ñáyóʼo káchiñá: “Sava yi̱chi̱ túvii̱ ña̱ ndeéní ndíʼi̱-inira xa̱ʼa̱ sava ña̱ʼa. Tá ya̱chi̱ va̱ása níxi̱naʼi̱ ña̱ xi̱ ixato̱ʼíi̱ra xíʼin ki̱ʼva ña̱ xi̱kaʼi̱n xíʼinra ta saátu xíʼin ki̱ʼva ña̱ xi̱xitoi̱ nu̱úra. Soo ki̱ʼii̱n kuenta ña̱ kítáʼi̱n xíʼin na̱ yiví na̱ káʼa̱n va̱ʼa xa̱ʼa̱ inkana chíndeétáʼanña xíʼi̱n ña̱ ixato̱ʼíi̱ yiíi̱”.

10. ¿Ndáa ki̱ʼva na̱ʼa̱ na̱ va̱lí ña̱ íxato̱ʼóna na̱ yivána?

¹⁰ Ndóʼó na̱ va̱lí kuniso̱ʼondó yivándó ta xíʼin ña̱ to̱ʼó ka̱ʼa̱nndó xíʼinna (Éx. 21:17; Efes. 6:​1-3). Nani kúchée na̱yóʼo sana xíniñúʼu kundaandó miína ña̱kán chikaa̱ndó ndee̱ ña̱ kiʼinndó kuenta xíʼinna. Ná ka̱ʼa̱nyó xa̱ʼa̱ ña̱ ndo̱ʼo iin ñá hermana ñá naní María. Tá ki̱ʼin kue̱ʼe̱ yiváñá, ni va̱ása kúúra testigo Jehová, ñáyóʼo ki̱xáʼañá ndáañára soo va̱ása va̱ʼa níxi̱keʼéra xíʼinñá. Ñá María káchikañá: “Ni̱ka̱ʼi̱n xíʼin Jehová ña̱ ná chindeétáʼanra xíʼi̱n ña̱ ixato̱ʼíi̱ yivái̱. Ta xi̱ndakanixi̱níi̱, tá Jehová káʼa̱nra xíʼi̱n ña̱ ixato̱ʼíi̱ na̱ yivái̱ taxivara ndee̱ ndaʼíi̱ ña̱ keʼíi̱ ña̱yóʼo. Tá ni̱ya̱ʼa tiempo ku̱ndaa̱-inii̱ ña̱ xíniñúʼu ixato̱ʼíi̱ yivái̱ ni va̱ása va̱ʼa níxi̱keʼéra xíʼi̱n”. Tá íxato̱ʼóyó na̱ veʼeyó ni va̱ása va̱ʼa kéʼéna xíʼinyó, náʼa̱yó ña̱ íxato̱ʼóyó Jehová chi ta̱yóʼo kúú ta̱ i̱xava̱ʼa na̱ familia.

NÁ IXATO̱ʼÓYÓ NA̱ HERMANO

11. ¿Nda̱chun kivi ixayo̱ʼvi̱ña xíʼinyó ña̱ ixato̱ʼóyó na̱ hermano?

¹¹ Ña̱ íxayo̱ʼvi̱ xíʼinyó. Na̱ hermano chíkaa̱vana ndee̱ ña̱ kéʼéna ña̱ káʼa̱n Biblia. Soo sava yi̱chi̱ va̱ása va̱ʼa kéʼéna xíʼinyó káʼa̱nna ña̱ va̱ása va̱ʼa xa̱ʼa̱yó á sásáa̱na miíyó. Tá ke̱ʼéna ña̱ va̱ása va̱ʼa xíʼinyó kivi ixayo̱ʼvi̱ña xíʼinyó ixato̱ʼóyóna (Col. 3:13). ¿Ndáaña kivi chindeétáʼan xíʼinyó?

12. ¿Nda̱chun ndáyáʼviní ña̱ ixato̱ʼóyó na̱ hermanoyó? (2 Pedro 2:​9-12).

¹² Nda̱chun xíniñúʼu to̱ʼó kooyó (kaʼvi 2 Pedro 2:​9-12). Nu̱ú carta u̱vi̱ ña̱ ka̱ʼyi̱ ta̱ Pedro ni̱ka̱ʼa̱nra ña̱ sava na̱ cristiano na̱ ni̱xi̱yo tá siglo nu̱ú ni̱ka̱ʼa̱nna ña̱ va̱ása va̱ʼa xa̱ʼa̱ na̱ anciano. ¿Ndáaña ndo̱ʼo na̱ ángel tá xi̱tona ña̱yóʼo? Ta̱ Pedro ka̱chira, xa̱ʼa̱ ña̱ íxato̱ʼóna Jehová kǒo níka̱ʼa̱nna ña̱ va̱ása va̱ʼa xa̱ʼa̱ na̱ ta̱a yóʼo. Ndákanda̱ní-iniyó xíʼin ña̱yóʼo, saáchi na̱ ángel ni kǒo ku̱a̱chi kúúmií na̱yóʼo kǒo níka̱ʼa̱nna ña̱ va̱ása va̱ʼa xa̱ʼa̱ na̱ ta̱a kán, chi ta̱xina ña̱ mií Jehová ná ndatiin ku̱a̱chi xíʼin na̱yóʼo (Rom. 14:​10-12; chitáʼanña xíʼin Judas 9). Ku̱a̱ʼáníva ña̱ va̱ʼa kivi sakúaʼayó xíʼin ña̱ ke̱ʼé na̱ ángel yóʼo. Tá va̱ása íxato̱ʼóyó na̱ íxandi̱va̱ʼa xíʼinyó va̱ása ixato̱ʼóvíyó na̱ hermano. Ná chika̱a̱yó ndee̱ ña̱ ixato̱ʼóyóna (Rom. 12:10). Ta saá na̱ʼa̱yó ña̱ íxato̱ʼóyó Jehová.

13, 14. ¿Ndáa ki̱ʼva náʼa̱yó ña̱ íxato̱ʼóyó na̱ hermano? (Koto na̱ʼná).

¹³ Ndáa ki̱ʼva na̱ʼa̱yó ña̱ to̱ʼó. Ndóʼó na̱ anciano viíní sanáʼa̱ndó na̱ hermano (Filem. 8, 9). Tá xíniñúʼu taxindó consejo ndaʼa̱ iinna kǒo sa̱a̱ndó, chi xíniñúʼu vií keʼéndó xíʼinna. Ndóʼó ná hermana kǒo ka̱ʼa̱nndó tu̱ʼun vatá ni kǒo chikaa̱ndó ku̱a̱chi síkí inkana, tá saá ná keʼéndó na̱ congregación viíní kitáʼanna ta ixato̱ʼó táʼanna (Tito 2:​3-5). Ndiʼiyó kivi na̱ʼa̱ ña̱ íxato̱ʼóyó na̱ anciano. ¿Ndáa ki̱ʼva keʼéyóña? Tá xíniso̱ʼoyóna ta káʼa̱nyó xíʼinna ña̱ táxiyó tíxa̱ʼvi xa̱ʼa̱ ña̱ viíní sánáʼa̱na ti̱xin reunión, ña̱ va̱ʼaní kíʼinna kuenta xíʼin ña̱ predicación ta saátu chíndeétáʼanna xíʼin na̱ ku̱a̱ʼa̱n kúxíká nu̱ú Ndióxi̱ (Gál. 6:1; 1 Tim. 5:17).

¹⁴ Iin ñá hermana ñá naní Rocío xi̱ ixayo̱ʼvi̱ña xíʼinñá ña̱ ixato̱ʼóñá iin ta̱ anciano ta̱ ta̱xi consejo ndaʼa̱ñá. Ñáyóʼo káchiñá: “Túvii̱ ña̱ va̱ása vií níka̱ʼa̱nra xíʼi̱n ta tá íyoi̱ veʼi̱ xi̱kaʼi̱n ña̱ va̱ása va̱ʼa xa̱ʼa̱ra. Xi̱na̱ʼi̱ ña̱ va̱ása níxi̱sa̱i̱ xíʼinra soo mií ña̱ nda̱a̱ xi̱saa̱vai̱ xíʼinra ta ni kǒo níxi̱kuni̱i̱ kundiku̱i̱n consejo ña̱ ta̱xira”. ¿Ndáaña chi̱ndeétáʼan xíʼinñá? Ñáyóʼo káchiñá: “Ka̱ʼvii̱ 1 Tesalonicenses 5:​12, 13 ta ki̱ʼii̱n kuenta ña̱ va̱ása ní ixato̱ʼíi̱ra ña̱kán ña̱ xínitúni̱ ki̱xáʼaña sándi̱ʼi̱ña-inii̱. Ni̱ka̱ʼi̱n xíʼin Jehová ta saátu na̱ndukúi̱ tutu ña̱ tává na̱ ñuu Ndióxi̱ ña̱ kivi chindeétáʼan xíʼi̱n ña̱ nasamai̱ ña̱ ndákanixi̱níi̱. Tá ni̱ya̱ʼa tiempo ki̱ʼii̱n kuenta ña̱ miívai̱ kúú ñá va̱ása va̱ʼa níxi̱keʼé ta su̱ví ta̱ hermano kán. Kúnda̱a̱-inii̱ ña̱ tá kúnii̱ na̱ʼi̱ ña̱ íxato̱ʼíi̱ inkana xíniñúʼu vitá kǒo inii̱ ta saátu xíniñúʼu chikaa̱kai̱ ndee̱ ña̱ keʼíi̱ ña̱yóʼo. Soo kúsi̱í-inii̱ chi xíto Jehová ña̱ chika̱i̱ ndee̱”.

NÁ IXATO̱ʼÓYÓ NA̱ VA̱ÁSA KÚÚ TESTIGO

15. ¿Nda̱chun kivi ixayo̱ʼvi̱ña xíʼinyó ña̱ ixato̱ʼóyó na̱ va̱ása kúú Testigo?

¹⁵ Ña̱ íxayo̱ʼvi̱ xíʼinyó. Ti̱xin ña̱ predicación ku̱a̱ʼání yi̱chi̱ ndáni̱ʼíyó na̱ yiví na̱ kǒo kúni̱ kunda̱a̱-ini xa̱ʼa̱ Ndióxi̱ ni ña̱ káʼa̱n Biblia xa̱ʼa̱ (Efes. 4:18). Savana kǒo kúni̱na kuniso̱ʼona ña̱ nátúʼunyó xíʼinna xa̱ʼa̱ ña̱ kándíxana tá ni̱xi̱yo válína. Sava na̱ káchíñuyó nu̱ú kue̱ʼe̱nína á na̱ maestro ndúkúna ku̱a̱ʼání ña̱ʼa nu̱úyó á íxayo̱ʼvi̱ña xíʼinyó kutáʼanyó xíʼin na̱ káchíñuyó xíʼin á na̱ káʼvi xíʼinyó escuela. Ta xa̱ʼa̱ ña̱yóʼo íxayo̱ʼvi̱ña xíʼinyó ixato̱ʼóyóna nda̱a̱ táki̱ʼva kúni̱yó ña̱ ná ixato̱ʼóna miíyó.

16. ¿Nda̱chun ndáyáʼviní ixato̱ʼóyó na̱ kǒo kúú testigo Jehová? (1 Pedro 2:12; 3:15).

¹⁶ Nda̱chun xíniñúʼu to̱ʼó kooyó. Ná ndakaʼányó chi kíʼinva Jehová kuenta ndáa ki̱ʼva kéʼéyó xíʼin na̱ va̱ása kúú Testigo. Ta̱ apóstol Pedro ni̱ka̱ʼa̱nra xíʼin na̱ cristiano ña̱ ki̱ʼva ña̱ kéʼéna, kivi chindeétáʼanña xíʼin inka na̱ yiví ña̱ xa̱a̱na ndasakáʼnuna Ndióxi̱. Ña̱kán ta̱xira consejo ndaʼa̱na ña̱ ka̱ʼa̱nna xa̱ʼa̱ ña̱ kándíxana tá ka̱chira “vitání koo inindó ndakuiinndó yuʼúna ta xíʼin ña̱ to̱ʼó keʼéndóña” (kaʼvi 1 Pedro 2:12; 3:15). Tá xi̱ndakiʼinna tu̱ʼunna xa̱ʼa̱ ña̱ xi̱kandíxana nu̱ú iin na̱ juez á nu̱ú nda̱a̱ ndáaka na̱ yiví, xíʼin ña̱ to̱ʼó xi̱ka̱ʼa̱nna xíʼin na̱kán saáchi xi̱kiʼin Ndióxi̱ kuenta xíʼin ña̱ xi̱keʼéna. Jehová xíniso̱ʼora ndiʼi ña̱ káʼa̱nyó xíʼin ña̱ kéʼéyó ta xa̱ʼa̱ ña̱yóʼo íxato̱ʼóyó na̱ kǒo kúú Testigo.

17. ¿Ndáa ki̱ʼva náʼa̱yó ña̱ íxato̱ʼóyó na̱ kǒo kúú Testigo?

¹⁷ Ndáa ki̱ʼva na̱ʼa̱yó ña̱ to̱ʼó. Tá ku̱a̱ʼa̱nyó predicación va̱ása kúni̱yó na̱ʼa̱yó ña̱ xíni̱níkayó xa̱ʼa̱ Biblia nu̱ú na̱ yiví. Ná ndakaʼányó chi ndáyáʼviní na̱yóʼo nu̱ú Ndióxi̱ ta saátu ná ndakanixi̱níyó ña̱ ndáyáʼviníkana nu̱úyó (Ageo 2:7; Filip. 2:3). Tá iinna káʼa̱n ndi̱va̱ʼana xíʼinyó xa̱ʼa̱ ña̱ kándíxayó va̱ása keʼéyó nda̱a̱ táki̱ʼva kéʼé na̱kán xíʼinyó ta ni ná kǒo ndakuiinyó yuʼúna nda̱a̱ táki̱ʼva kéʼéna xíʼinyó (1 Ped. 2:23). Tá ni̱ka̱ʼa̱nyó ña̱ va̱ása va̱ʼa xíʼinna ná ndukúyó ña̱ káʼnu-ini nu̱úna. ¿Ndáa ki̱ʼva na̱ʼayó ña̱ íxato̱ʼóyó na̱ káchíñu xíʼinyó? Ndíchi ná kooyó ta ná chikaa̱yó ndee̱ ña̱ vií keʼéyó xíʼin na̱ káchíñuyó xíʼin ta saátu xíʼin na̱ kachíñuyó nu̱ú (Tito 2:​9, 10). Saátu ndáyáʼviní viíní keʼéyó chiñuyó nu̱ú káchíñuyó ta xíʼin ndinuʼu-iniyó ná keʼéyóña, ni inkana kǒo kúsi̱í-inina xíʼinyó soo Jehová kúsi̱íva-inira xíʼinyó (Col. 3:​22, 23).

18. ¿Nda̱chun ndáyáʼviní ña̱ ixato̱ʼóyó inkana?

¹⁸ Sa̱kuaʼayó nda̱chun xíniñúʼu ixato̱ʼóyó inkana. Ku̱ndaa̱-iniyó tá íxato̱ʼóyó na̱ veʼeyó náʼa̱yó ña̱ íxato̱ʼóyó Jehová ta̱ i̱xava̱ʼa familia. Saátu tá íxato̱ʼóyó na̱ hermanoyó náʼa̱yó ña̱ íxato̱ʼóyó yiváyó ta̱ íyo chi ndiví, ta tá íxato̱ʼóyó na̱ kǒo kúú Testigo ña̱yóʼo kivi chindeétáʼanña xíʼinna ña̱ xa̱a̱na ndasakáʼnuna Ndióxi̱. Ni tá kǒo íxato̱ʼó inkana miíyó ndáyáʼviníva ña̱ ixato̱ʼóyóna, saáchi saá taxi Jehová bendición ndaʼayó. Ta káʼa̱nra ña̱yóʼo xíʼinyó: “Ixato̱ʼíi̱ na̱ íxato̱ʼó yi̱ʼi̱” (1 Sam. 2:30).