Yíʼviní na̱ yiví xa̱ʼa̱ ña̱ ndeéní xáʼni-táʼanna | ¿Ndáaña káʼa̱n Biblia xa̱ʼa̱ ña̱yóʼo?

Tá julio ña̱ ku̱i̱ya̱ 2022 ku̱a̱ʼání na̱ yiví xi̱niñúʼuna tu̱xi̱í ña̱ xa̱ʼní-táʼanna:

• “Tá xa̱ʼnína ta̱ Shinzo Abe ta̱ xi̱kuu primer ministro chí Japón, nu̱ú iníísaá ñuyǐví ndeéní ni̱yi̱ʼvína, saáchi chí ñuu yóʼo loʼoníva xáʼni-táʼan na̱ yiví ta íyo ley ña̱ káʼa̱n xa̱ʼa̱ ña̱ va̱ása kuniñúʼuna tu̱xi̱í” (10 tí julio 2022, The Japan Times).

• “Ndeéní ni̱yi̱ʼvína chí Dinamarca saáchi xíʼin tu̱xi̱í xa̱ʼní iin ta̱a u̱ni̱ na̱ yiví ini iin tienda ña̱ íyo chí Copenhague” (4 tí julio 2022, Reuters).

• “Chí Sudáfrica ni̱xi̱ʼi̱ 15 na̱ yiví tá ki̱xaa̱ sava na̱ ta̱a ta sa̱káʼndina tu̱xi̱í nu̱ú ñúʼu na̱ xíʼi chí Soweto” (10 tí julio 2022, The Guardian).

• “Tá ni̱xi̱yo vikó tá 4 tí julio, yáʼaka 220 na̱ yiví xa̱ʼnína xíʼin ka̱a chí Estados Unidos” (5 tí julio 2022, CBS News).

¿Á kixaa̱ iin ki̱vi̱ ña̱ va̱ása kuuka ña̱yóʼo? ¿Ndáaña káʼa̱n Biblia?

Va̱ása kaʼní-táʼankana

Tu̱ʼun Ndióxi̱ káʼa̱nña ña̱ ndóoyó “ki̱vi̱ nu̱ú ndíʼi”, xa̱ʼa̱ ña̱yóʼo ku̱a̱ʼání na̱ yiví kue̱ʼe̱nína, ndi̱va̱ʼaní-inina ta kininí kéʼéna (2 Timoteo 3:1, 3). Tá kéʼéna ña̱yóʼo, ndeéní sáyi̱ʼvína na̱ yiví (Lucas 21:11). Soo Biblia káʼa̱nña ña̱ kixaa̱va iin ki̱vi̱ ña̱ va̱ása kaʼní-táʼanka na̱ yiví, na̱ yiví “koona nu̱ú kǒoka tu̱ndóʼo koo, nu̱ú va̱ása kundi̱ʼi̱ka-inina, nu̱ú kivi ndakindee̱na” (Isaías 32:18). Soo, ¿ndáaña keʼé Ndióxi̱ ña̱ va̱ása kaʼní-táʼankana?

Ndióxi̱ sandíʼi-xa̱ʼa̱ra ndiʼi na̱ kéʼé ña̱ va̱ása va̱ʼa ta saátu ndiʼi ña̱ xíniñúʼuna ña̱ xáʼni-táʼanna.

• Na̱ kéʼé ña̱ va̱ása va̱ʼa ndiʼi-xa̱ʼa̱na (Proverbios 2:22).

• “Ndióxi̱ sándiʼi-xa̱ʼa̱ra ndiʼi ku̱a̱chi nu̱ú xáʼni-táʼanna iníísaá ñuyǐví. Sándiʼi-xa̱ʼa̱ra ndiʼi ña̱ʼa ña̱ xíniñúʼuna tá xáʼni-táʼanna, ta xáʼmira carrona” (Salmo 46:9).

Ndióxi̱ sanáʼa̱ra na̱ yiví ña̱ vií kundoona tasaá kúú ña̱ va̱ása kaʼní-táʼankana.

• “Ni iinna kǒo kundi̱va̱ʼa xíʼin na̱ ñui̱ nu̱ú koona; ta ndiʼi na̱ yiví na̱ kundoo nu̱ú ñuʼú kunda̱a̱-inina xa̱ʼa̱ Jehová nda̱a̱ táki̱ʼva ñúʼu ti̱kui̱í tá mar” (Isaías 11:9).

• Nda̱a̱ tiempo vitin, Ndióxi̱ sánáʼa̱ra na̱ yiví ña̱ va̱ása kaʼní-táʼanna ta ni va̱ása kuniñúʼuna tu̱xi̱í, ta saátu sánáʼa̱rana ña̱ ndasana espadana ya̱ta̱ ta lanzana ndasanaña ña̱ xáʼndana yitu̱n (Miqueas 4:3).

Tá kúni̱ún kunda̱a̱ka-iniún ndáaña káʼa̱n Biblia xa̱ʼa̱ iin ñuyǐví nu̱ú va̱ása kooka ña̱ sayíʼvi miíyó, kaʼvi artículo ña̱ naní “¿Es posible librarse del miedo?”.

Ña̱ va̱ʼa kunda̱a̱-iniún ndáana kúú na̱ chindeétáʼan xíʼin na̱ yiví ña̱ va̱ása kaʼní-táʼankana, kaʼvi artículo ña̱ naní “¡Por fin paz en la Tierra!”.