Ki̱nína na̱ yiví ti̱xin escuela | ¿Ndáaña káʼa̱n Biblia xa̱ʼa̱ ña̱yóʼo?

Tá 24 tí yo̱o̱ mayo ña̱ ku̱i̱ya̱ 2022, ku̱u iin tu̱ndóʼo ña̱ ndeéní chí ñuu Uvalde (Texas, Estados Unidos). Nu̱ú periódico ña̱ naní The New York Times, “Ni̱ka̱ʼa̱nña ña̱ iin ta̱a xa̱ʼníra 19 na̱ va̱lí xíʼin u̱vi̱ ná maestra ti̱xin iin escuela ña̱ naní Robb”.

Táʼan tu̱ndóʼo yóʼo xa̱a̱ ku̱a̱ʼání yichi̱ kúuña. Nu̱ú periódico ña̱ naní USA Today ni̱ka̱ʼa̱nña ña̱ ñuu Estados Unidos, iinlá ku̱i̱ya̱ ni̱ya̱ʼa, 249 yichi̱ ni̱ki̱ʼvina ki̱nína ti̱xin escuela, ku̱a̱ʼáníka ki̱nína ku̱i̱ya̱ ña̱ ni̱ya̱ʼa nu̱úka ndiʼi ku̱i̱ya̱ naní tá 1970.

¿Nda̱chun kúu tu̱ndóʼo táʼan ña̱yóʼo? ¿Ndáaña kivi sandíko-iniyó tá yáʼayó nu̱ú tu̱ndóʼo táʼan ña̱yóʼo? ¿Á íyo iin ña̱ kivi chindeétáʼan xíʼinyó ña̱ kandíxayó ña̱ kixaa̱ iin ki̱vi̱ ña̱ ndiʼi-xa̱ʼa̱ tu̱ndóʼo yóʼo? Ña̱ Biblia káʼa̱n xa̱ʼa̱ ña̱yóʼo.

¿Nda̱chun kininí ku̱a̱ʼa̱n ndúu ñuyǐví yóʼo?

•  Ña̱ Biblia káʼa̱nña ña̱ “ki̱vi̱ nu̱ú ndíʼi” kúú ña̱ ndóoyó tiempo vitin, ta saátu káʼa̱nña ña̱ ku̱a̱ʼánína “va̱ása kuʼvi̱-inina kunina na̱ veʼena” ta “ndi̱va̱ʼaní koo inina”, kue̱ʼe̱ní koona á yukúní koona. Ta ndiʼi na̱ yiví yóʼo “kininíka xa̱a̱na keʼéna” (2 Timoteo 3:1-5, 13). Tá kúni̱ún kunda̱a̱ka-iniún xa̱ʼa̱ ña̱yóʼo, kaʼvi artículo ña̱ naní “¿Predijo la Biblia cómo sería la gente en nuestros días?”.

Ku̱a̱ʼání na̱ yiví ndáka̱tu̱ʼunna miína nda̱chun táxi Ndióxi̱ ña̱ íyoní tu̱ndóʼo, tá kúú ña̱ kínína ti̱xin escuela. Ña̱ va̱ʼa kunda̱a̱ka-iniún ndáaña káʼa̱n Biblia xa̱ʼa̱ ña̱yóʼo, kaʼvi artículo ña̱ naní “¿Por qué le pasan cosas malas a la gente buena?”.

¿Ndáaña kivi sandíko-iniyó tá yáʼayó nu̱ú tu̱ndóʼo táʼan ña̱yóʼo?

•  “Ndiʼi ña̱ ni̱ka̱ʼyi̱ xi̱naʼá ni̱ka̱ʼyi̱ña ña̱ va̱ʼa sanáʼa̱ña miíyó, chi tu̱ʼun Ndióxi̱ chíndeétáʼanña xíʼinyó [...], ta sándi̱koña-iniyó ña̱ va̱ʼa kundatuyó ña̱ taxi Ndióxi̱ ndaʼa̱yó chí nu̱únínu” (Romanos 15:4).

Consejo ña̱ va̱xi nu̱ú tu̱ʼun Ndióxi̱ chindeétáʼanña xíʼún ña̱ ya̱ʼún nu̱ú tu̱ndóʼo ña̱ íyo ñuyǐví yóʼo. Tá kúni̱ún kunda̱a̱ka-iniún xa̱ʼa̱ ña̱yóʼo, kaʼvi revista ¡Despertad! ña̱ naní “¿Acabará algún día la violencia?”.

Sava yichi̱ na̱ va̱lí xíniso̱ʼona noticia ña̱ va̱ása va̱ʼa ta yíʼvina. Tá íyo se̱ʼún ta kúni̱ún chindeétáʼún xíʼinna, kaʼvi artículo ña̱ naní “El efecto de las noticias en los niños”.

¿Á kixaa̱ iin ki̱vi̱ ña̱ ndiʼi-xa̱ʼa̱ tu̱ndóʼo?

•  “Chindeérana ya̱ʼana nu̱ú tu̱ndóʼo á ku̱a̱chi ña̱ ndóʼona” (Salmo 72:14).

•  “Espada ña̱ kánitáʼanna ya̱ta̱ táʼvivana nduuña, ta lanza ka̱ana nduuña ña̱ xáʼnda yitu̱n. Ta kǒo kuniñúʼukana espada ña̱ kanitáʼanna xíʼin na̱ inka ñuu chi kǒoka guerra koo” (Miqueas 4:3).

Ndióxi̱ keʼéra ña̱ kǒo kívi keʼé na̱ yiví. Reinora ña̱ íyo chí nu̱ú ndiví kúú ña̱ sandíʼi-xa̱ʼa̱ tu̱xi̱í ta saátu sandíʼi-xa̱ʼa̱ña ndiʼi tu̱ndóʼo. Tá kúni̱ún kunda̱a̱ka-iniún xa̱ʼa̱ ña̱ keʼé Reino Ndióxi̱, kaʼvi artículo ña̱ naní “El Reino de Dios traerá ‘paz en abundancia’”.