Ku̱a̱ʼá xu̱ʼún sándíʼina tá xíyo guerra | ¿Nda̱saa sándíʼina?

Tá xíyo guerra ku̱a̱ʼání xu̱ʼún sándíʼina.

• “Ki̱ʼva 2,2 billón ña̱ dólar sándíʼina xíʼin na̱ militar nani kánitáʼanna á tá xáʼa̱nna guerra” (The Washington Post, 13 tí febrero, 2024).

Su̱ví xu̱ʼún kuití kúú ña̱ ndáyáʼvi ña̱ ndíʼi-xa̱ʼa̱. Ná ndakanixi̱níyó xa̱ʼa̱ guerra ña̱ ku̱u chí ñuu Ucrania.

• Na̱ soldado. Ki̱ʼva 500,000 na̱ soldado ni̱xi̱ʼi̱ á tu̱kue̱ʼe̱na nani ki̱xáʼa íyo guerra ti̱xin u̱vi̱ ku̱i̱ya̱.

• Na̱ yiví. Ki̱ʼva 28,000 na̱ yiví xíʼi̱ á tu̱kue̱ʼe̱na. Iin ta̱ chíñu ña̱ ONU ni̱ka̱ʼa̱nra ña̱yóʼo: “Ku̱a̱ʼání na̱ yiví ndíʼi-xa̱ʼa̱ ña̱ íyoní guerra yóʼo va̱ása kuchiñuyó kaʼviyóna”.a

Ku̱a̱ʼání na̱ yiví xóʼvi̱na xa̱ʼa̱ ña̱ íyoní guerra xíʼin tu̱ndóʼo.

• 114 millón. Kúú na̱ yiví na̱ kíta ñuuna xa̱ʼa̱ ña̱ íyo guerra xíʼin ña̱ íyoní ña̱ kini ñuuna nda̱a̱ tá yo̱o̱ septiembre ku̱i̱ya̱ 2023.

• 783 millón. Kúú na̱ yiví na̱ kǒo ña̱ kuxu á na̱ xóʼvi̱ xa̱ʼa̱ ña̱yóʼo. “Xa̱ʼa̱ ña̱ íyo ku̱a̱chi kúú ña̱ íyo so̱ko saáchi yáʼaka 70% na̱ yiví na̱ íyo so̱ko nu̱ú íyona ñuu nu̱ú íyo guerra xíʼin nu̱ú xáʼní táʼanna” (Programa Mundial de Alimentos).

¿Á xa̱a̱ iin ki̱vi̱ ña̱ va̱ása kooka guerra? ¿Á iin kuento kuití kúú ña̱ xa̱a̱yó vií kundooyó? ¿Á kuchiñu xu̱ʼún á inkaka ña̱ʼa ña̱ íyo ñuyǐví yóʼo sandíʼi-xa̱ʼa̱ña guerra xíʼin ña̱ va̱ása kooka so̱ko? ¿Ndáaña káʼa̱n Biblia?

Tiempo ña̱ íyo guerra

Biblia káʼa̱nña xa̱ʼa̱ iin kuáyi̱ xíʼin iin ta̱ yóso sa̱tárí ña̱ va̱ʼa ndanaʼa̱ña ña̱ ku̱a̱ʼa̱nna nu̱ú ku̱a̱chi.

• “Ta ki̱ta inka kuáyi̱ tí kúáʼa ñuʼu̱, ta ta̱ yósó tíyóʼo nda̱kiʼinra chiñu ña̱ sakákura ku̱a̱chi nu̱ú ñuʼú ña̱ va̱ʼa kaʼní-táʼan na̱ íyo nu̱úña, ta nda̱kiʼinra iin espada ña̱ káʼnuní” (Apocalipsis 6:4).

Ta sa̱tá ta̱ yóʼo ndíku̱n inka u̱vi̱na ta na̱yóʼo ndánaʼa̱na ña̱ʼa ña̱ kúú tiempo vitin nu̱ú ñuyǐví yóʼo: so̱ko xíʼin ña̱ xíʼi̱na xa̱ʼa̱ ña̱ íyo kue̱ʼe̱ á xa̱ʼa̱ inkaka ña̱ʼa (Apocalipsis 6:5-8) Ña̱ va̱ʼa kunda̱a̱ka iniyó xa̱ʼa̱ profecía ña̱ va̱xi nu̱ú Biblia yóʼo ta saátu ña̱ va̱ʼa kunda̱a̱ káxi-iniún ña̱ ndixa xínu ña̱yóʼo tiempo vitin, kaʼvi artículo yóʼo “Qué representan los jinetes del Apocalipsis?”

Tiempo ña̱ kǒoka ku̱a̱chi koo

Ti̱xin loʼo tiempo, ña̱ʼa ña̱ íyo ñuyǐví yóʼo va̱ása kuniñúʼukanaña ña̱ koo guerra, soo su̱ví na̱ yiví kúú na̱ keʼé saá. Biblia káchiña:

• “Ndióxi̱ sándiʼi-xa̱ʼa̱ra ndiʼi ku̱a̱chi nu̱ú iníísaá ñuyǐví” (Salmo 46:9).

• Ndióxi̱ va̱ása taxira kooka guerra. “Ta ndaya̱kúnra ti̱kui̱í nu̱úna, ta va̱ása kuvikana, ni va̱ása kusuchíka-inina, ni va̱ása kuakukana, ni va̱ása xo̱ʼvi̱kana. Ndióxi̱ sandíʼi-xa̱ʼa̱ra ndiʼi ña̱ʼa ña̱ sa̱xóʼvi̱ miíyó”. (Apocalipsis 21:4).

• Ndióxi̱ taxira vií kooyó. “Na̱ ñui̱ koona nu̱ú kǒoka tu̱ndóʼo koo, nu̱ú va̱ása kundi̱ʼi̱ka-inina, nu̱ú kivi ndakindee̱na” (Isaías 32:18).

Profecía ña̱ va̱xi nu̱ú Biblia, náʼa̱ña nu̱úyó xa̱ʼa̱ ña̱ íyo guerra vitin xíʼin ña̱ kúú inkaka ña̱ʼa ndána̱ʼa̱ña ña̱ ti̱xin loʼo tiempo va̱ása kooka ku̱a̱chi.

¿Ndáaña keʼé Ndióxi̱ ña̱ va̱ása kooka ku̱a̱chi? Kuniñúʼura Reinora, iin gobierno ña̱ íyo chí ndiví (Mateo 6:10). Ña̱ va̱ʼa kunda̱a̱-iniún ndáaña kúú Reino yóʼo ta ndáaña keʼéña xa̱ʼún koto video yóʼo: ¿Ndáa ki̱ʼva kaʼndachíñu Ndióxi̱?