¿Á kixaa̱ ki̱vi̱ ña̱ va̱ása kooka guerra? | ¿Ndáaña káʼa̱n Biblia xa̱ʼa̱ ña̱yóʼo?

“Vitin kúú tiempo ña̱ chikaa̱yó ndee̱ ña̱ kǒo kanitáʼanyó. Vitin kúú tiempo ña̱ ka̱ʼnu̱-iniyó ta kǒo kanitáʼanyó” (ña̱ ni̱ka̱ʼa̱n ta̱ António Guterres ta̱ kúú secretario general na̱ Naciones Unidas xa̱ʼa̱ ña̱ ku̱u chí Israel ki̱vi̱ sábado 13 tí abril ña̱ ku̱i̱ya̱ 2024).

Ña̱ kúu chí Oriente Próximo (oeste ña̱ Asia) náʼa̱ña nu̱úyó ndáaña kúu iníísaá ñuyǐví.

“Íyoníka guerra tiempo vitin nu̱úka tá ni̱xi̱yo ña̱ Segunda Guerra Mundial, ta ku̱a̱ʼání na̱ yiví xóʼvi̱ xa̱ʼa̱ ña̱yóʼo, chi 2,000 millón na̱ yiví ndóona nu̱ú íyo guerra yóʼo” (Consejo de Seguridad de la ONU, 26 tí enero ña̱ ku̱i̱ya̱ 2023).

Ñuu yóʼo kúú nu̱ú íyoní guerra: Israel, Gaza, Siria, Azerbaiyán, Ucrania, Sudán, Etiopía, Níger, Myanmar xíʼin Haití.a

¿Á kixaa̱ ki̱vi̱ ña̱ va̱ása kooka guerra? ¿Á kuchiñu na̱ níʼi yichi̱ nu̱ú na̱ yiví sandíʼi-xa̱ʼa̱na guerra? ¿Ndáaña káʼa̱n Biblia xa̱ʼa̱ ña̱yóʼo?

Íyoní ku̱a̱chi ñuyǐví yóʼo

Ku̱a̱chi ña̱ íyo iníísaá ñuyǐví náʼa̱ña ña̱ xa̱a̱ ku̱nu̱mí ndiʼi-xa̱ʼa̱ guerra. Xa̱ʼa̱ ña̱ íyoní guerra kúnda̱a̱-iniyó ña̱ xínu profecía ña̱ va̱xi nu̱ú Biblia, ña̱ káʼa̱n ña̱ ndóoyó tiempo nu̱ú ndíʼi. Nu̱ú Mateo 24:3 káchiña: “Xa̱a̱ ku̱yatin ndiʼi-xa̱ʼa̱ ñuyǐví yóʼo”.

• “Ta kuniso̱ʼondó ka̱ʼa̱nna xa̱ʼa̱ guerra [...]. Saáchi kanitáʼan iin ñuu xíʼin inka ñuu, ta iin país xíʼin inka país” (Mateo 24:6, 7).

Kaʼvi artículo yóʼo “¿Cuál es la señal de ‘los últimos días’ o ‘los tiempos finales’?” ña̱ va̱ʼa kunda̱a̱-iniún ndáa ki̱ʼva xínu ña̱ káʼa̱n Biblia xa̱ʼa̱ guerra ña̱ kúu tiempo vitin.

Iin guerra ña̱ sandíʼi-xa̱ʼa̱ ndiʼi ku̱a̱chi

Biblia káʼa̱nña ña̱ kixaa̱ iin tiempo ña̱ va̱ása kooka guerra, soo su̱ví na̱ yiví kúú na̱ sandíʼi-xa̱ʼa̱ ña̱yóʼo, chi Ndióxi̱ kúú ta̱ sandíʼi-xa̱ʼa̱ guerra (Apocalipsis 16:14, 16) Tá ná ndiʼi kuu ña̱yóʼo, Ndióxi̱ saxínura ña̱ ni̱ka̱ʼa̱nra ña̱ viíní koo na̱ yiví (Salmo 37:10, 11, 29).

Ña̱ va̱ʼa sakúaʼakaún ndáa ki̱ʼva sandíʼi-xa̱ʼa̱ Ndióxi̱ guerra, kaʼvi artículo ña̱ naní “¿Ndáaña kúú Armagedón?”.