Kánitáʼanní na̱ yiví xa̱ʼa̱ ña̱ política | ¿Ndáaña káʼa̱n Biblia?

Tiempo vitin ku̱a̱ʼání na̱ yiví kúni̱na kaʼnína na̱ kúúmií iin chiñu ti̱xin ña̱ política.

¿Nda̱chun kánitáʼanní na̱ yiví xa̱ʼa̱ ña̱ política? ¿Á kixaa̱ iin ki̱vi̱ ña̱ va̱ása keʼékana ña̱yóʼo? ¿Ndáaña káʼa̱n ña̱ Biblia?

Ña̱ Biblia ni̱ka̱ʼa̱nña ña̱ ndataʼví-táʼan na̱ yiví xa̱ʼa̱ ña̱ política

Ña̱ Biblia ni̱ka̱ʼa̱nña ña̱ tiempo so̱ndíʼi ña̱ ndóoyó vitin, ndi̱va̱ʼaní koo ini na̱ yiví ta va̱ása kindo̱o-inina xíʼin nda̱a̱ ni iin ña̱ʼa.

“Ki̱vi̱ nu̱ú ndíʼi, koo tiempo ña̱ yo̱ʼvi̱ní ta kǒo kundeé-inina xíʼinña. Saáchi na̱ yiví kuʼvi̱-inina kunina miína, [...] va̱ása taxina tíxa̱ʼvi, va̱ása nda̱kú koo inina, [...] va̱ása kindo̱o-inina xíʼin ni iin ña̱ʼa, [...] xi̱kótáʼanna, so̱ʼoní koona, ni̱nuní kunina” (2 Timoteo 3:1-4).

Ña̱ Biblia ni̱ka̱ʼa̱nña ña̱ kooní na̱ yiví na̱ ndi̱va̱ʼa-ini tiempo vitin, tá kúú na̱ kuni̱ koo contra xíʼin na̱ chíñu ta saátu na̱ kútóoní kanitáʼan xa̱ʼa̱ ña̱ política (Lucas 21:9). Soo su̱ví ndiʼi tiempoví koo na̱ yiví na̱ ndi̱va̱ʼaní-ini xíʼin na̱ ndátaʼví-táʼan xa̱ʼa̱ ña̱ política.

Kixaa̱ iin ki̱vi̱ ña̱ va̱ása kanitáʼankana xa̱ʼa̱ ña̱ política

Ña̱ Biblia káʼa̱nña ña̱ sandíʼi-xa̱ʼa̱ Ndióxi̱ ndiʼi na̱ chíñu na̱ íyo nu̱ú ñuʼú yóʼo ta iinlá Reino miíra kaʼndachíñu.

“Ndióxi̱ ta̱ íyo chí ndiví ndaka̱xinra iin ta̱ kaʼndachíñu ta [...] sandíʼi-xa̱ʼa̱ra ndiʼi na̱ chíñu yóʼo ta sakúachi válírana, ta iinlá ña̱ kaʼndachíñura kúú ña̱ koo ndiʼi tiempo” (Daniel 2:44).

Tá ná kaʼndachíñu Reino Ndióxi̱ va̱ása kooka ku̱a̱chi ta va̱ʼaní kutáʼan ndiʼi na̱ yiví.

Ta̱ Jesucristo, ta̱ koo Rey ti̱xin Reino Ndióxi̱ naníra “Ta̱ chíñu ta̱ sándiʼi-xa̱ʼa̱ ku̱a̱chi”. Tá ná kaʼndachíñu ta̱yóʼo va̱ása kooka ku̱a̱chi ta va̱ʼaní kundooyó (Isaías 9:6, 7).
Tiempo vitin ndiʼi na̱ kúni̱ ña̱ ná kaʼndachíñu Reino yóʼo va̱ʼaní ndóona ta va̱ása kánitáʼanna. Ña̱ Biblia káʼa̱nña ña̱yóʼo xa̱ʼa̱na: “Espadana, ndasanaña ya̱ta̱ ta lanzana, ndasanaña kiʼí. Ndiʼi na̱ ñuu va̱ása kanitáʼankana xíʼin espada ni va̱ása sakúaʼakana ku̱ʼu̱nna nu̱ú ku̱a̱chi ña̱ kanitáʼanna” (Isaías 2:3, 4).

Tá kúni̱ún kunda̱a̱ka-iniún xa̱ʼa̱ ña̱yóʼo, kaʼvi artículo ña̱ naní “¿Qué cosas logrará el Reino de Dios?” ta saátu koto video ña̱ naní ¿Ndáa ki̱ʼva kaʼndachíñu Ndióxi̱?