¿Ndáa ki̱ʼva kivi kusi̱í-iniyó ni ndóoyó ñuyǐví ña̱ yo̱ʼvi̱ní? | ¿Ndáaña káʼa̱n Biblia?

Tiempo ña̱ yo̱ʼvi̱ní ndóoyó vitin, va̱ása kívi kiʼinyó kuenta xíʼin ndiʼi ña̱ʼa ña̱ kúú. Soo ndáyáʼvika ña̱ kusi̱í-iniyó nu̱úka ña̱ kiʼinyó kuenta xíʼin ña̱ ndóʼoyó. Ni yáʼayó nu̱ú tu̱ndóʼo Biblia káʼa̱nña ña̱yóʼo, “na̱ si̱í-ini ndiʼi tiempo si̱í íyona” (Proverbios 15:15). ¿Ndáa ki̱ʼva kivi kusi̱íka-iniún? Biblia kivi chindeétáʼanña xíʼún. Koto ña̱ kivi chindeétáʼan xíʼún.

Ña̱ chindeétáʼan xíʼún ña̱ kǒo kundi̱ʼiní-iniún

Biblia káʼa̱nña ña̱yóʼo: “Ña̱ sándi̱ʼi̱-ini na̱ yiví kúú ña̱ sándakava-inina, soo iin tu̱ʼun va̱ʼa kúú ña̱ chíka̱a̱ ndee̱ xíʼinna” (Proverbios 12:25).

• Biblia kivi chindeétáʼanña xíʼún ña̱ kǒo kundi̱ʼiní-iniún. Tá kúni̱ún kunda̱a̱-iniún xa̱ʼa̱ ña̱yóʼo koto artículo ña̱ naní “¿Qué dice la Biblia sobre la ansiedad?”.

Ña̱ chindeétáʼan xíʼún ña̱ kǒo kuni mitúʼún

Biblia káʼa̱nña ña̱yóʼo: “Na̱ ndixa kúú migoyó ndiʼi tiempo kúʼvi̱-inina xínina miíyó, tá íyo tu̱ndóʼo nu̱úyó nda̱a̱ táki̱ʼva íyo ñaniyó á ku̱ʼvayó saá íyona xíʼinyó” (Proverbios 17:17).

• Iin consejo ña̱ táxi Biblia ndaʼa̱yó kúú ña̱ koo migoyó ña̱ va̱ʼa kǒo kuni mitúʼunyó. Kaʼvi artículo ña̱ naní “Ña̱ va̱ása kuni mitúʼún, ndukú na̱ koo migoún: Biblia kivi chindeétáʼan xíʼún”.

Kuʼvi̱-iniún kuniún Ndióxi̱ ta saátu na̱ yiví

Biblia káʼa̱nña ña̱yóʼo: “Kuʼvi̱-iniún kuniún Jehová Ndióxi̱ún xíʼin ndiʼi níma̱ún, xíʼin ndiʼi ña̱ tákún ta xíʼin ndiʼi xi̱níún. [...] Kuʼvi̱-iniún kuniún inka na̱ yiví nda̱a̱ táki̱ʼva kúʼvi̱-iniún xíniún miíún”a (Mateo 22:37-39).

• Ña̱ keʼún oración kúú ña̱ chindeétáʼanka xíʼún ña̱ kuʼvi̱ka-iniún kuniún Ndióxi̱. Tá kúni̱ún kunda̱a̱-iniún xa̱ʼa̱ ña̱yóʼo koto artículo ña̱ naní “¿Escucha Dios nuestras oraciones?”.

• Tá kéʼéyó xíʼin inkana ndiʼi ña̱ kúni̱yó keʼéna xíʼinyó saá kúú ña̱ náʼa̱kayó ña̱ kúʼvi̱ka-iniyó xíniyóna. Tá kúni̱ún kunda̱a̱-iniún xa̱ʼa̱ ña̱yóʼo koto artículo ña̱ naní “¿Qué es la Regla de Oro?”.

Ña̱ kaʼviún Biblia kúú ña̱ chindeétáʼanka xíʼún ña̱ kusi̱íka-iniún tiempo ña̱ yo̱ʼvi̱ ndóoyó vitin. Kivi kixáʼún kaʼviún xíʼindi̱ ta kunda̱a̱-iniún ndáaña sánáʼa̱ Biblia ta kǒo xu̱ʼún kiʼinndi̱ ndaʼún.