¿Á kivi chindeétáʼan ña̱ káʼa̱n Biblia xíʼinyó ña̱ kundeé-iniyó ya̱ʼayó nu̱ú iin kue̱ʼe̱?

Ña̱ káʼa̱n Biblia xa̱ʼa̱ ña̱yóʼo

Kiviva, Ndióxi̱ ndíʼi̱ní-inira xa̱ʼa̱ na̱ nda̱kú íyo ini xíʼinra ni kúúmiína iin kue̱ʼe̱. Ña̱yóʼo kúú ña̱ káʼa̱n Biblia: “Mií Jehová chindeétáʼan xíʼinna tá ndeé ndóʼona kánuuna nu̱ú xi̱tona” (Salmo 41:3). Yóʼo va̱xi u̱ni̱ ña̱ kivi chindeétáʼan xíʼinyó tá kúúmiíyó iin kue̱ʼe̱ ña̱ ndeéní:

1. Ka̱ʼa̱nyó xíʼin Ndióxi̱ ña̱ ná taxira ndee̱ ndaʼa̱yó ña̱ va̱ʼa kundeé-iniyó. Tu̱ʼun Ndióxi̱ káchiña: “Ndióxi̱ sandíkora-inindó”, ña̱yóʼo chindeétáʼanña xíʼinyó ña̱ va̱ása kundi̱ʼi̱ní-iniyó, ta saátu Ndióxi̱ taxira ndee̱ ndaʼa̱yó ña̱ kundeé-iniyó ni kúúmiíyó iin kue̱ʼe̱ ña̱ ndeéní (Filipenses 4:6, 7).

2. Ná kǒo ndakava-iniyó. Ña̱ Biblia káchiña: “Ña̱ kúsi̱í-iniyó iin ña̱ va̱ʼaní kúúña, soo ña̱ kúsuchí-iniyó sákuvitáña miíyó” (Proverbios 17:22, Dios habla hoy [Versión Popular]). Tá chíka̱a̱yó ndeé ña̱ kusi̱í-iniyó va̱ása ndakavaví-iniyó, ta chindeétáʼantuña xíʼinyó ña̱ kundeé-iniyó ni kúúmiíyó iin kue̱ʼe̱.

3. Ná kǒo nandósó-iniyó xa̱ʼa̱ ña̱ ndátuyó ndakiʼinyó chí nu̱únínu. Tá ná ndakaʼányó xa̱ʼa̱ ña̱ ndátuyó ndakiʼinyó chí nu̱únínu, ña̱yóʼo chindeétáʼanña xíʼinyó ña̱ kusi̱í-iniyó ni kúúmiíyó iin kue̱ʼe̱ (Romanos 12:12). Nu̱ú tu̱ʼun Ndióxi̱ ka̱ʼa̱nña ña̱ kixaa̱ iin ki̱vi̱ ta nda̱a̱ ni iinkana va̱ása ka̱ʼa̱nna: “Kue̱ʼe̱ kúúmiíi̱” (Isaías 33:24). Ndióxi̱ sandíʼi-xa̱ʼa̱ra ndiʼi kue̱ʼe̱ nda̱a̱ ña̱ kǒo ta̱tán kúúmií. Ta saátu va̱ása kuxiku̱a̱ʼáka na̱ yiví, saáchi ña̱ Biblia káchiña: “Ná nduyúta̱ka ku̱ñuna nu̱úka ki̱ʼva ña̱ ni̱xi̱yoña tá xi̱kuuna na̱ va̱lí, ná ndikó tuku ndee̱ ña̱ xi̱kuumiína tá ni̱xi̱yo válína” (Job 33:25).

Nota: Ndi̱ʼi̱ na̱ testigo Jehová kándíxaníndi̱ ña̱ chindeétáʼan Ndióxi̱ xíʼinndi̱, soo ni saá xáʼa̱nvandi̱ nu̱ú na̱ doctor tá kúúmiíndi̱ iin kue̱ʼe̱ (Marcos 2:17). Soo va̱ása káʼa̱nndi̱ xíʼin na̱ yiví ndáa ta̱tán kúú ña̱ kuniñúʼuna chi iin tá iin miíyó xíniñúʼu ndaka̱xinyó ndáaña keʼéyó.