Ndióxi̱ i̱xava̱ʼa ndiví xíʼin ñuʼú

Jehová kúú ta̱ i̱xava̱ʼa miíyó. Miíra ke̱ʼé ku̱a̱ʼání ña̱ʼa, savaña va̱ʼa xítoyó ta savaña va̱ása kívi kuniyóña. Soo siʼnaka ku̱a̱ʼání na̱ ángel i̱xava̱ʼara. ¿Á xíni̱ún ndáana kúú na̱ ángel? Jehová ke̱ʼé na̱yóʼo ta nda̱a̱ táki̱ʼva íyo miíra saá íyona. Miíyó kǒo kívi kuniyó Jehová ta saátu na̱ ángel kǒo kívi kuniyóna. Ta̱ ángel ta̱ siʼnaka i̱xava̱ʼa Ndióxi̱ kúú ta̱ chi̱ndeé táʼan xíʼinra ke̱ʼéra ndiʼika ña̱ʼa. Ta̱yóʼo chi̱ndeé táʼanra xíʼinra ña̱ i̱xava̱ʼara ki̱mi xíʼin ndiʼi ña̱ íyo chí ndiví. Ñuʼú ña̱ ndóoyó yóʼo mií Jehová i̱xava̱ʼaña ta liviní ke̱ʼéraña.

Tándi̱ʼi Jehová viíní i̱xava̱ʼara ñuʼú ña̱ va̱ʼa koo kití nu̱úña xíʼin na̱ yiví. I̱xava̱ʼara ñu̱ʼu ña̱ sándáye̱ʼe̱ nu̱ú ñuʼú yóʼo. Saátu ke̱ʼéra yuku̱ súkun, mar xíʼin yu̱ta.

¿Ndáaña ke̱ʼéka Jehová? Ni̱ka̱ʼa̱nra: “Keʼíi̱ ku̱ʼu̱, yitu̱n válí xíʼin tú náʼnu”. Tasaá nu̱ú ñuʼú ki̱xaʼá xáʼnu ku̱a̱ʼání nu̱ú ku̱i̱ʼi xíʼin yita. Jehová i̱xava̱ʼatura ku̱a̱ʼání kití: Tá kúú tí ndáchí, tí ñúʼu ti̱xin ti̱kui̱í ta saátu tí xíka nu̱ú ñuʼú. I̱xava̱ʼara kití válí tá kúú tí leso ta saátu tí náʼnu tá kúú tí elefante. ¿Ndáa kití kúú tí kútóokaún?

Tasaá Jehová ni̱ka̱ʼa̱nra xíʼin ta̱ ángel ta̱ siʼnaka i̱xava̱ʼara: “Ná keʼéyó ta̱ ta̱a”. Na̱ yiví va̱ʼaníka na̱kuva̱ʼana nu̱ú kití chi va̱ʼa kéʼéna ku̱a̱ʼání ña̱ʼa, va̱ʼa káʼa̱nna, va̱ʼa ndákanixi̱nína ta va̱ʼa káʼa̱nna xíʼin Ndióxi̱. Na̱yóʼo kúú na̱ kundaa ñuʼú yóʼo xíʼin kití tí íyo nu̱úña. ¿Á xíni̱ún yukú ta̱ xi̱kuu ta̱a ta̱ nu̱ú? ¿Á kúni̱ún kunda̱a̱ka-iniún xa̱ʼara?