Carta na̱ Cuerpo Gobernante

Ndóʼó “xíniñúʼu koondó na̱ sánáʼa̱ inkana” (Heb. 5:12). Ndakanixi̱ní xa̱ʼa ña̱yóʼo. Jehová mií ta̱ va̱ʼaníka sánáʼa̱ nu̱ú iníísaá ñuyǐví, káʼa̱nra xíʼinyó ná sanáʼa̱yó inka na̱ yiví xa̱ʼara. Ña̱ sanáʼa̱yó ña̱ nda̱a̱ xa̱ʼara ti̱xin veʼeyó, ti̱xin congregación, ta saátu ti̱xin ña̱ predicación, iin chiñu va̱ʼaní kúú ña̱yóʼo. Soo ¿ndáaña keʼéyó ña̱ va̱ʼa kuchiñuyó vií sanáʼa̱yó inkana?

Kivi kunda̱a̱-iniyó xa̱ʼa ña̱yóʼo nu̱ú tu̱ʼun ña̱ ni̱ka̱ʼa̱n ta̱ apóstol Pablo xíʼin ta̱ Timoteo: “Ndakundeékaún kaʼviún nu̱ú ndiʼina, taxi ndée ndaʼa̱na, sanáʼa̱na”. Tasaá ni̱ka̱ʼa̱nkara: “Tá saá ná keʼún kivi sáka̱kún miíún ta saátu na̱ xíniso̱ʼo yóʼó” (1 Tim. 4:13, 16). Ña̱ nátúʼunyó xíʼin inkana kivi sáka̱kuña miína. Xa̱ʼa ña̱yóʼo xíniñúʼu sakuaʼayó viíní kaʼviyó ta sánáʼa̱yó inkana. Ña̱ folleto yóʼo kivi chindeéña yóʼó. Ná ka̱ʼa̱nyó xa̱ʼa sava ña̱ʼa ña̱ kúúmiíña:

Tá iin iin lección kúúmiíña iin texto ña̱ káʼa̱n xa̱ʼaña.

Jehová kúú ta̱ va̱ʼaníka sánáʼa̱ (Is. 30:20). Xíʼin folleto yóʼo kivi sakuaʼún viíka kaʼviún ta sanáʼún, soo va̱ása nandósóún chi xa̱ʼa Jehová kúú ña̱ sánáʼa̱yó na̱ yiví, ta miíra kúúra kána na̱yóʼo ña̱ va̱ʼa ndasakáʼnunara (Juan 6:44). Xa̱ʼa ña̱yóʼo ka̱ʼa̱n xíʼinra ná taxira espíritu santo ndaʼún. Kuniñúʼu tu̱ʼunra ña̱ va̱xi nu̱ú Biblia ndiʼi yichi̱. Jehová ndasakáʼnún xíʼin ña̱ sánáʼún su̱víka miíún. Chindeétáʼan xíʼin na̱ xíniso̱ʼo yóʼó ña̱ va̱ʼa ná xa̱a̱na kuʼvi̱ka-inina kunina Jehová.

Jehová ka̱nara yóʼó ña̱ va̱ʼa ku̱ʼún natúʼún xa̱ʼara xíʼin inka na̱ yiví. Xa̱ʼa ña̱yóʼo tá kándíxaún ña̱ kivi chindeéra yóʼó, kiviva sáxi̱núnña (1 Ped. 4:11).

Na̱ chíndeétáʼan xíʼinndó ña̱ sánáʼa̱ndó xa̱ʼa Ndióxi̱,

Na̱ Cuerpo Gobernante na̱ Testigo Jehová