Ña̱ káʼa̱nníka ña̱ Biblia xa̱ʼa̱ kúú Reino Ndióxi̱. Jehová kuniñúʼura Reino yóʼo ña̱ va̱ʼa saxínura ña̱ ni̱ka̱ʼa̱nra koo nu̱ú ñuʼú yóʼo nda̱a̱ tá xa̱ʼa̱. ¿Ndáaña kúú Reino Ndióxi̱? ¿Nda̱chun va̱ʼa xíni̱yó ña̱ xa̱a̱ xáʼndachíñuña? ¿Ndáaña xa̱a̱ kéʼéña nda̱a̱ tiempo vitin? ¿Ndáaña keʼéña chí nu̱únínu? Ña̱ pregunta yóʼo ndakuiinyóña nu̱ú lección yóʼo ta saátu nu̱ú ña̱ inka u̱vi̱ lección.

1. ¿Ndáaña kúú Reino Ndióxi̱ ta ndáa ta̱ kúú Rey ti̱xinña?

Reino Ndióxi̱ kúú iin ña̱ chi̱ndúʼú Jehová. Ta̱ Rey ta̱ ndísochíñu xíʼin ña̱yóʼo kúú ta̱ Jesucristo ta xa̱a̱ xáʼndachíñura chí ndiví (Mateo 4:​17; Juan 18:​36). Ña̱ Biblia káʼa̱nña xa̱ʼa̱ ta̱ Jesús ña̱ kaʼndachíñura ndiʼi tiempo (Lucas 1:​32, 33). Xa̱ʼa̱ ña̱ kúúra Rey ti̱xin Reino Ndióxi̱ kaʼndachíñura nu̱ú na̱ yiví iníísaá nu̱ú ñuʼú.

2. ¿Ndáana xáʼndachíñu xíʼin ta̱ Jesús?

Ta̱ Jesús va̱ása xáʼndachíñu iinlá miíra chi: “Nda̱a̱ ndáaka tribu kúúna, nda̱a̱ ndáaka tu̱ʼun káʼa̱nna ni kúúna na̱ ñuu válí á kúúna na̱ ñuu náʼnu [...] kaʼndachíñuna” xíʼinra (Apocalipsis 5:​9, 10). ¿Nda̱saana kaʼndachíñu xíʼin ta̱ Cristo? Nda̱a̱ tá ni̱xi̱yo ta̱ Jesús nu̱ú ñuʼú yóʼo, xa̱a̱ ku̱a̱ʼání na̱ yiví nda̱kaxinna ña̱ kundiku̱nna ta̱ Cristo ña̱ kuuna na̱ cristiano. Soo 144,000 kuití kúú na̱ ku̱ʼu̱n chí ndiví ña̱ kaʼndachíñuna xíʼin ta̱ Jesús (kaʼvi Apocalipsis 14:​1-4). Ndiʼika na̱ cristiano koona nu̱ú ñuʼú yóʼo, ta Reino Ndióxi̱ kúú ña̱ kaʼndachíñu nu̱úna (Salmo 37:​29).

3. ¿Nda̱chun va̱ʼaníka Reino Ndióxi̱ nu̱úka na̱ gobierno ñuyǐví yóʼo?

Ni íyo na̱ xáʼndachíñu na̱ kúni̱ keʼé ña̱ va̱ʼa, soo va̱ása kúchiñuna keʼéna ndiʼi ña̱ káʼa̱nna, soo tá yáʼa tiempo kíxáʼa xáʼndachíñu inkana soo sana na̱yóʼo va̱ása ndíʼi̱ va̱ʼa inina xa̱ʼa̱ na̱ ñuu, soo ta̱ Jesús ta̱ kúú Rey ti̱xin Reino Ndióxi̱ kǒo nda̱a̱ ni iinna ndakiʼin chiñu nu̱úra. Ndióxi̱ “chi̱ndúʼúra iin Reino ña̱ va̱ása ndiʼi-xa̱ʼa̱” (Daniel 2:​44). Ta̱ Jesús kaʼndachíñura iníísaá nu̱ú ñuʼú, ta va̱ása na̱ʼa̱ra ña̱ kúʼvi̱-inira xínira loʼo kuití na̱ yiví, ta̱kán kúni̱níra xínira miíyó, va̱ʼaní-inira, nda̱kúní íyo ña̱ kéʼéra, ta sanáʼa̱ra na̱ yiví ña̱ saátu koo na̱yóʼo, kuʼvi̱-inina kuni̱na inkana, va̱ʼa koo inina, ta vií koo ña̱ keʼéna xíʼin inkana (kaʼvi Isaías 11:9).

4. Iin Reino ña̱ kúúmiíní ndee̱ ña̱ kaʼndachíñu iníísaá nu̱ú ñuʼú

Ta̱ Jesucristo kúúmiíníkara ndee̱ ta xíni̱níkara nu̱ú inka na̱ xáʼndachíñu tiempo vitin. Kaʼvindó Mateo 28:​18 ta ka̱ʼa̱nndó xa̱ʼa̱ ña̱yóʼo:

• ¿Nda̱chun káʼnuníka ña̱ xáʼndachíñu ta̱ Jesús nu̱ú inka na̱ xáʼndachíñu ñuyǐví yóʼo?

Na̱ yiví na̱ xáʼndachíñu, iin táʼví kuití nu̱ú ñuʼú yóʼo xáʼndachíñuna soo tá yáʼa tiempo ndíʼi-xa̱ʼa̱va ña̱ xáʼndachíñuna. ¿Á saá kuu xíʼin Reino Ndióxi̱? Kaʼvindó Daniel 7:​14 ta ka̱ʼa̱nndó xa̱ʼa̱ ña̱yóʼo:

• ¿Nda̱chun va̱ʼaníka ña̱ va̱ása ndiʼi-xa̱ʼa̱ ña̱ kaʼndachíñu Ndióxi̱?

• ¿Nda̱chun va̱ʼaka koo tá ná kaʼndachíñuña iníísaá nu̱ú ñuʼú?

5. Inkana xíniñúʼu ndakiʼin nu̱ú na̱ xáʼndachíñu ñuyǐví yóʼo

¿Nda̱chun xíniñúʼu kaʼndachíñu Reino Ndióxi̱ nu̱úka na̱ chíñu ñuyǐví yóʼo? Kotondó VIDEO ta ka̱ʼa̱nndó xa̱ʼa̱ ña̱yóʼo:

VIDEO: ¿Ndáa ki̱ʼva kaʼndachíñu Ndióxi̱? (iin táʼvíña) (1:​41)

• ¿Ndáa tu̱ndóʼo kúú ña̱ táxi na̱ chíñu ñuyǐví yóʼo?

Kaʼvindó Eclesiastés 8:9 ta ka̱ʼa̱nndó xa̱ʼa̱ ña̱yóʼo:

• ¿Á ndákanixi̱níún ña̱ xíniñúʼu kaʼndachíñu Reino Ndióxi̱ nu̱úka na̱ chíñu ñuyǐví yóʼo? ¿Nda̱chun?

6. Na̱ xáʼndachíñu ti̱xin Reino Ndióxi̱ kúnda̱a̱-inina xíʼin ña̱ ndóʼoyó

Ta̱ Jesús, ta̱ kúú Rey nu̱úyó xi̱kuura na̱ yiví tá ni̱xi̱yora nu̱ú ñuʼú yóʼo, ña̱kán “kúnda̱a̱va-inira xíʼin ndiʼi ña̱ ndóʼoyó” (Hebreos 4:​15). Jehová nda̱kaxinra 144,000 ta̱a xíʼin ná ñaʼá na̱ nda̱kú íyo ini xíʼinra ña̱ kaʼndachíñuna xíʼin ta̱ Jesús. Ta na̱yóʼo kaʼndachíñuna xíʼinra “ni nda̱a̱ ndáaka tribu kúúna, nda̱a̱ ndáaka tu̱ʼun káʼa̱nna ni kúúna na̱ ñuu válí á kúúna na̱ ñuu náʼnu” (Apocalipsis 5:9).

• Ta̱ Jesús xíʼin na̱ kaʼndachíñu xíʼinra kúnda̱a̱-inina xíʼin ña̱ ndóʼoyó, ¿á chíka̱a̱ ña̱yóʼo ndee̱ xíʼún? ¿Nda̱chun?

7. Ley ña̱ Reino Ndióxi̱ va̱ʼaníkaña nu̱ú ley na̱ ñuyǐví yóʼo

Na̱ chíñu kéʼéna ley ña̱ va̱ʼa chindeétáʼanña xíʼinyó ta kundaaña miíyó. Saátu Reino Ndióxi̱ kúúmiíña ley ta na̱ yiví xíniñúʼu kuniso̱ʼona ña̱yóʼo. Kaʼvindó 1 Corintios 6:​9-​11 ta ka̱ʼa̱nndó xa̱ʼa̱ ña̱yóʼo:

• ¿Ndáa ki̱ʼva koo ñuyǐví yóʼo tá ndiʼi na̱ yiví ná ixato̱ʼó ña̱ káʼa̱n Ndióxi̱?a

• ¿Á ndákanixi̱níún ña̱ kúúmií Jehová yichi̱ ña̱ ná kuniso̱ʼo na̱ yiví ña̱ ka̱ʼa̱nra tá ná kaʼndachíñu Reinora? ¿Nda̱chun ndákanixi̱níún saá?

• ¿Nda̱chun va̱ʼa kúnda̱a̱-iniyó na̱ yiví na̱ va̱ása kándíxa ley yóʼo kivi nasa̱mana? (Kotondó versículo 11).

ÑA̱ XA̱A̱ SA̱KUAʼAYÓ

Reino Ndióxi̱ kúúña iin gobierno ta ndixa íyoña, ña̱yóʼo xa̱a̱ xáʼndachíñu chí ndiví ta saátu kaʼndachíñuña nu̱ú iníísaá ñuyǐví.

Ná ndakaʼányó xa̱ʼa̱ ña̱yóʼo

• ¿Ndáana kúú na̱ kaʼndachíñu ti̱xin Reino Ndióxi̱?

• ¿Nda̱chun va̱ʼaníka Reino Ndióxi̱ nu̱ú na̱ chíñu ñuyǐví yóʼo?

• ¿Ndáaña ndátu Jehová ná keʼé na̱ koo ti̱xin Reinora?

NANDUKÚKA XA̱ʼA̱ÑA

Kaʼvi xa̱ʼa̱ ña̱ sa̱náʼa̱ ta̱ Jesús ndáa mií koo Reino Ndióxi̱.

“Reino Ndióxi̱, ¿á iin ña̱ ndíka̱a̱ níma̱ na̱ yiví kúúña?” (Artículo ña̱ va̱xi nu̱ú jw.org)

¿Nda̱chun nda̱kúka íyo ini na̱ testigo Jehová xíʼin Reino Ndióxi̱ nu̱úka na̱ chíñu ñuyǐví yóʼo?

Iinlá Reino Ndióxi̱ ndáaka-inindi̱ (1:​44)

Kaʼvi ña̱ káʼa̱n Biblia xa̱ʼa̱ na̱ 144,000 na̱ nda̱kaxin Jehová kaʼndachíñu xíʼin ta̱ Jesús.

“¿Ndáana ku̱ʼu̱n chí ndiví?” (Artículo ña̱ va̱xi nu̱ú jw.org)

¿Ndáaña sa̱xínu-ini ñá xi̱ndika̱a̱ veʼeka̱a ña̱ iinlá Ndióxi̱ kúú ta̱ kivi ndasavií ña̱ va̱ása va̱ʼa ña̱ kúú nu̱ú ñuyǐví yóʼo?

“Sa̱kúaʼíi̱ ndáa ki̱ʼva nduvií ña̱ va̱ása va̱ʼa kúú nu̱ú ñuʼú yóʼo” (¡Despertad!, tí noviembre ku̱i̱ya̱ 2011)

Reino Ndióxi̱ ki̱xáʼaña xáʼndachíñuña chí ndiví tá ku̱i̱ya̱ 1914. Saá ki̱xáʼa ki̱vi̱ nu̱ú ndíʼi ña̱ xáʼndachíñu na̱ ñuyǐví. ¿Nda̱chun va̱ʼa kúnda̱a̱-iniyó xa̱ʼa̱ ña̱yóʼo? Yóʼo kotoyó ña̱ ni̱ka̱ʼa̱n Biblia kuu ta saátu ña̱ kixáʼa kuu nu̱ú ñuʼú yóʼo xíʼin ña̱ ki̱xáʼa kéʼé na̱ yiví nda̱a̱ tá ku̱i̱ya̱ 1914.

1. ¿Ndáaña ni̱ka̱ʼa̱n Biblia kuu?

Libro ta̱ Daniel ña̱ va̱xi nu̱ú Biblia xa̱a̱ ni̱ka̱ʼa̱nña ña̱ Reino Ndióxi̱ kixáʼaña kaʼndachíñuña tá ná ndiʼi “u̱xa̱ tiempo” (Daniel 4:​16, 17). Tá ni̱ya̱ʼa tiempo, ta̱ Jesús ni̱ka̱ʼa̱nra xa̱ʼa̱ ña̱ kuu xíʼin ña̱ ñuyǐví yóʼo ta sa̱náʼa̱ra ña̱ ta̱ʼán ndiʼi tiempo yóʼo (Lucas 21:​24). Nda̱a̱ táki̱ʼva kotoyó ña̱ u̱xa̱ tiempo ndi̱ʼiña tá ku̱i̱ya̱ 1914.

2. ¿Ndáaña xa̱a̱ kúú nu̱ú ñuʼú yóʼo ta ndáaña xa̱a̱ kéʼé na̱ yiví nda̱a̱ tá ku̱i̱ya̱ 1914?

Na̱ discípulo ta̱ Jesús ni̱nda̱ka̱tu̱ʼunnara: “¿Ama koo ña̱ʼa yóʼo, ta ndáa señal na̱ʼa̱ nu̱úndi̱ ña̱ xa̱a̱ íyoún xíʼinndi̱ ta saátu ña̱ xa̱a̱ ku̱yatin ndiʼi-xa̱ʼa̱ ñuyǐví yóʼo?” (Mateo 24:3). Tasaá nda̱kuiin ta̱ Jesús yuʼúna ta ni̱ka̱ʼa̱nra ña̱ ku̱a̱ʼání ña̱ʼa kuu tá ná kixáʼara kaʼndachíñura chí ndiví ña̱ koora Rey ti̱xin Reino Ndióxi̱. Tá kúú, ni̱ka̱ʼa̱nra ña̱ koo guerra, so̱ko xíʼin ña̱ ta̱an (kaʼvi Mateo 24:7). Biblia ni̱ka̱ʼa̱nña ndáaña keʼé na̱ yiví “ki̱vi̱ nu̱ú ndíʼi” saáchi koo “tiempo ña̱ yo̱ʼvi̱ní” (2 Timoteo 3:​1-5). Nda̱a̱ tá ku̱i̱ya̱ 1914 ña̱ kúú xíʼin ña̱ kéʼé na̱ yiví káxiníka náʼa̱ña.

3. ¿Nda̱chun kininíka ki̱xáʼa kúu nu̱ú ñuʼú yóʼo nda̱a̱ tá ki̱xáʼa xáʼndachíñu Reino Ndióxi̱?

Tá ni̱ya̱ʼa loʼo ña̱ ki̱xáʼa ta̱ Jesús kúúra Rey ti̱xin Reino Ndióxi̱ ni̱xi̱yo ku̱a̱chi chí ndiví, ta̱yóʼo ka̱nitáʼanra xíʼin ta̱ Ndi̱va̱ʼa saátu xíʼin na̱ ta̱chí ndi̱va̱ʼa, nda̱a̱ táki̱ʼva káchi Biblia, sa̱kánanara nu̱ú ñuʼú yóʼo xíʼin na̱ ta̱chí ndi̱va̱ʼa na̱ kítáʼan xíʼinra (Apocalipsis 12:​9, 10, 12). Ta̱ Ndi̱va̱ʼa sáa̱níra saáchi xíni̱ra ña̱ si̱lóʼoní tiempo kúma̱ní ta ndiʼi-xa̱ʼa̱ra, xa̱ʼa̱ ña̱kán kúú ña̱ sándoʼora ta sáxo̱ʼvi̱ra na̱ yiví iníísaá nu̱ú ñuʼú. Xa̱ʼa̱ ña̱kán kúú ña̱ kininí kúu nu̱ú ñuʼú, soo Reino Ndióxi̱ sandíʼi-xa̱ʼa̱ña ndiʼi tu̱ndóʼo yóʼo.

NÁ SAKUAʼAKAYÓ XA̱ʼA̱ÑA

4. Profecía náʼa̱ña ña̱ ki̱xáʼa xáʼndachíñu Reino Ndióxi̱ tá ku̱i̱ya̱ 1914

VIDEO: Reino Ndióxi̱ ki̱xáʼaña xáʼndachíñuña tá ku̱i̱ya̱ 1914 (5:​02)

Ta̱ Nabucodonosor xi̱kuura iin rey nu̱ú na̱ ñuu Babilonia ta Ndióxi̱ ta̱xira ña̱ ná xa̱níra xa̱ʼa̱ iin profecía. Ña̱ ni̱xaníra yóʼo, xíʼin ña̱ ni̱ka̱ʼa̱n ta̱ Daniel xa̱ʼa̱, káʼa̱nña xa̱ʼa̱ ña̱ xi̱xaʼndachíñu ta̱ Nabucodonosor ta saátu káʼa̱nña xa̱ʼa̱ Reino Ndióxi̱ (kaʼvindó Daniel 4:​17).a

Kaʼvindó Daniel 4:​20-​26. Tá ndi̱ʼi kuniñúʼundó diagrama ña̱ va̱xi yóʼo ña̱ va̱ʼa ndakuiinndó pregunta:

• A) ¿Ndáaña xi̱ni ta̱ Nabucodonosor ti̱xin xa̱ni? (Kotondó versículo 20 xíʼin 21).

• B) ¿Ndáaña ku̱u xíʼin yitu̱n? (Kotondó versículo 23).

• C) ¿Ndáaña kuu tá ná ndiʼi “u̱xa̱ tiempo”? (Kotondó versículo 26).

Yitu̱n tú ni̱xa̱níra xíʼin ta saátu Reino Ndióxi̱

ÑA̱ PROFECÍA (Daniel 4:​20-​36)

Xáʼndachíñuna

A) Iin yitu̱n tú súkunní

Kǒo níxaʼndachíñukana

B) “Kaʼndandó tú yitu̱n” ta taxindó “ná ya̱ʼa u̱xa̱ tiempo”

Ki̱xáʼa xáʼndachíñu tukuna

C) “Kixáʼa kaʼndachíñu tukún”

Ña̱ ni̱xi̱nu yichi̱ nu̱ú:

• D) ¿Ndáa ta̱ ndákiʼin nu̱ú yitu̱n? (Kotondó versículo 22).

• E) ¿Ama sa̱ndákoora ña̱ xáʼndachíñura? (Kaʼvindó Daniel 4:​29-​33).

• F) ¿Ndáaña ndo̱ʼora tá ni̱ya̱ʼa “u̱xa̱ tiempo”? (Kaʼvindó Daniel 4:​34-​36).

ÑA̱ NI̱XI̱NU YICHI̱ NU̱Ú

Xáʼndachíñuna

D) Ta̱ Nabucodonosor, rey ñuu Babilonia

Kǒo níxaʼndachíñukana

E) Ta̱ Nabucodonosor sa̱na̱ra tá ni̱ya̱ʼa ku̱i̱ya̱ 606 t.x.b ta ti̱xin u̱xa̱ ku̱i̱ya̱ va̱ása níxaʼndachíñura

Ki̱xáʼa xáʼndachíñu tukuna

F) Ta̱ Nabucodonosor nda̱ʼara ta ki̱xáʼa tukura xáʼndachíñura

Ña̱ ni̱xi̱nu yichi̱ u̱vi̱:

• G) ¿Ndáana nda̱kiʼin nu̱ú yitu̱n yóʼo? (Kaʼvindó 1 Crónicas 29:​23).

• H) ¿Ama va̱ása níxaʼndachíñukana? ¿Nda̱chun va̱ʼa kúnda̱a̱-iniyó ña̱ va̱ása xáʼndachíñuna tá ni̱xi̱yo ta̱ Jesús nu̱ú ñuʼú yóʼo? (Kaʼvindó Lucas 21:24).

• I) ¿Ndáa mií ta ama ki̱xáʼa xa̱ʼndachíñu tukuna?

ÑA̱ NI̱XI̱NU YICHI̱ U̱VI̱

Xáʼndachíñuna

G) Na̱ rey ñuu Israel xi̱ndakiʼinna nu̱ú ña̱ xáʼndachíñu Ndióxi̱

Kǒo níxaʼndachíñukana

H) Sa̱ndíʼi-xa̱ʼa̱na ñuu Jerusalén ku̱i̱ya̱ 607 t.x.; ta va̱ása níxaʼndachíñuka na̱ rey ñuu Israel ki̱ʼva 2,520 ku̱i̱ya̱

Ki̱xáʼa xáʼndachíñu tukuna

I) Ta̱ Jesús ndu̱ura Rey ta ki̱xáʼara xáʼndachíñura chí ndiví ti̱xin Reino Ndióxi̱ tá ku̱i̱ya̱ 1914

5. Tá 1914 na̱samaní ña̱ kúu nu̱ú ñuʼú yóʼo

Kotondó VIDEO.

VIDEO: Tá ku̱i̱ya̱ 1914 na̱samaní ña̱ kúú nu̱ú ñuʼú yóʼo (1:​10)

Ta̱ Jesús ni̱ka̱ʼa̱nra nda̱saa koo ñuyǐví yóʼo tá ná kixáʼara kaʼndachíñura. Kaʼvindó Lucas 21:​9-​11 ta ka̱ʼa̱nndó xa̱ʼa̱ ña̱yóʼo:

• Ña̱ káʼa̱n profecía yóʼo, ¿ndáaña xa̱a̱ xítoún xínu ta ndáaña xa̱a̱ xíniso̱ʼún káʼa̱nna xa̱ʼa̱?

Ta̱ apóstol Pablo ni̱ka̱ʼa̱nra nda̱saa koo na̱ yiví ki̱vi̱ so̱ndíʼi ña̱ xáʼndachíñu na̱ ñuyǐví yóʼo. Kaʼvindó 2 Timoteo 3:​1-5 ta ka̱ʼa̱nndó xa̱ʼa̱ ña̱yóʼo:

• ¿Ndáaña káʼa̱n texto yóʼo xa̱a̱ xítoún kéʼé na̱ yiví?

6. Ña̱ kúnda̱a̱-iniyó ña̱ xa̱a̱ xáʼndachíñu Reino Ndióxi̱ ¿ndáaña xíniñúʼu keʼéyó?

Kaʼvindó Mateo 24:​3, 14 ta ka̱ʼa̱nndó xa̱ʼa̱ ña̱yóʼo:

• ¿Ndáa chiñu ña̱ xa̱a̱ kéʼéna náʼa̱ ña̱ xa̱a̱ xáʼndachíñu Reino Ndióxi̱?

• ¿Ndáa ki̱ʼva kivi keʼún chiñu yóʼo?

Reino Ndióxi̱ xa̱a̱ xáʼndachíñuña, ta si̱lóʼoní kúma̱ní ta kixáʼaña kaʼndachíñuña nu̱ú iníísaá ñuyǐví. Kaʼvindó Hebreos 10:​24, 25 ta ka̱ʼa̱nndó xa̱ʼa̱ ña̱yóʼo:

• ¿Ndáaña xíniñúʼu keʼé ndiʼiyó xa̱ʼa̱ ña̱ “xa̱a̱ ku̱nu̱mí kixaa̱ ki̱vi̱” kán?

ÑA̱ XA̱A̱ SA̱KUAʼAYÓ

Profecía ña̱ va̱xi nu̱ú Biblia ta saátu ña̱ kúu nu̱ú ñuʼú yóʼo, náʼa̱ña ña̱ xa̱a̱ ki̱xáʼa xáʼndachíñu Reino Ndióxi̱. Ta miíyó náʼa̱yó ña̱ kándíxayó ña̱yóʼo tá nátúʼunyó xa̱ʼa̱ Reino yóʼo ta saátu tá xáʼa̱nyó reunión.

Ná ndakaʼányó xa̱ʼa̱ ña̱yóʼo

• ¿Ndáaña ku̱u tá ndi̱ʼi ña̱ u̱xa̱ tiempo ña̱ káʼa̱n libro ta̱ Daniel xa̱ʼa̱?

• ¿Ndáaña sáxi̱nu̱-iniún ña̱ ki̱xáʼa Reino Ndióxi̱ xáʼndachíñuña tá ku̱i̱ya̱ 1914?

• ¿Ndáa ki̱ʼva kivi na̱ʼún nu̱ú inkana ña̱ kándíxaún ña̱ xa̱a̱ xáʼndachíñu Reino Ndióxi̱?

NANDUKÚKA XA̱ʼA̱ÑA

Kaʼvi xa̱ʼa̱ sava na̱ historiador ta saátu ña̱ káʼa̱n savana xa̱ʼa̱ nda̱saa xa̱a̱ ku̱a̱ʼa̱n nása̱ma ñuyǐví yóʼo nda̱a̱ tá ku̱i̱ya̱ 1914.

“Tiempo ña̱ sa̱ndákoo na̱ yiví keʼéna ña̱ va̱ʼa” (¡Despertad!, tí abril ku̱i̱ya̱ 2007)

Koto ndáa ki̱ʼva na̱sama iin ta̱a ña̱ kéʼéra tá ku̱nda̱a̱-inira xa̱ʼa̱ profecía ña̱ va̱xi nu̱ú Mateo 24:​14.

“Béisbol kúú ña̱ xi̱kutóoníkai̱ kusíkíi̱” (La Atalaya, núm. 3, 2017)

¿Nda̱chun va̱ʼa xíni̱yó profecía ña̱ va̱xi nu̱ú capítulo 4 ña̱ libro ta̱ Daniel káʼa̱nña xa̱ʼa̱ Reino Ndióxi̱?

“¿Ama ki̱xáʼa xáʼndachíñu Reino Ndióxi̱? (Táʼví nu̱ú)” (La Atalaya, 1 tí octubre ku̱i̱ya̱ 2014)

¿Ndáaña náʼa̱ ña̱ “u̱xa̱ tiempo” ña̱ káʼa̱n capítulo 4 ña̱ libro ta̱ Daniel ndi̱ʼiña tá ku̱i̱ya̱ 1914?

“¿Ama ki̱xáʼa xáʼndachíñu Reino Ndióxi̱? (Táʼví u̱vi̱)” (La Atalaya, 1 tí noviembre ku̱i̱ya̱ 2014)

Reino Ndióxi̱ xa̱a̱ xáʼndachíñuña. Si̱lóʼo kúma̱ní ta kaʼndachíñuña nu̱ú ñuʼú yóʼo. Ná kotoyó sava ña̱ kuchiñu Reino Ndióxi̱ keʼéña ta ná kaʼndachíñuña ta xíʼin ña̱ si̱í-ini kundatún ña̱yóʼo.

1. ¿Ndáaña keʼé Reino Ndióxi̱ ña̱ va̱ʼaní kooyó ta va̱ása kooka ña̱ kini nu̱ú ñuʼú yóʼo?

Ti̱xin guerra ña̱ Armagedón, ta̱ Jesús ta̱ kúú Rey ti̱xin Reino Ndióxi̱ sandíʼi-xa̱ʼa̱ra na̱ yiví na̱ kéʼé ña̱ va̱ása va̱ʼa ta saátu na̱ xáʼndachíñu nu̱ú ñuʼú yóʼo (Apocalipsis 16:​14, 16). Tiempo saá, xi̱nu ndiʼi ña̱ káʼa̱n Biblia ta kúú ña̱yóʼo: “Si̱lóʼova tiempo kúma̱ní, ta na̱ yiví na̱ kéʼé ña̱ va̱ása va̱ʼa ndiʼi-xa̱ʼa̱na” (Salmo 37:​10). Tá ná kaʼndachíñu ta̱ Jesús viíní kundooyó ta kǒo na̱ keʼé ña̱ va̱ása va̱ʼa iníísaá nu̱ú ñuyǐví (kaʼvi Isaías 11:4).

2. ¿Ndáa ki̱ʼva kundooyó nu̱ú ñuʼú yóʼo tá ná xi̱nu ña̱ kúni̱ Ndióxi̱?

Tá ná kaʼndachíñu Reino Ndióxi̱, “na̱ yiví va̱ʼa kúú na̱ koo nu̱ú ñuʼú, ta ndiʼi tiempo kundoona nu̱úña” (Salmo 37:​29). Ndakanixi̱ní ndáa ki̱ʼva koo na̱ yiví tá ndiʼina ná keʼéna ña̱ va̱ʼa, kuʼvi̱-inina kunina Jehová ta saátu kuʼvi̱-inina kunina inkana, nda̱a̱ ni iinna va̱ása kuumií kue̱ʼe̱ ta ndiʼina kutaku ndiʼi tiempo, liviní kooña.

3. ¿Ndáaña va̱ʼa taxi Reino Ndióxi̱ tá ná sandíʼi-xa̱ʼa̱ña na̱ kéʼé ña̱ va̱ása va̱ʼa?

Tá ná ndiʼi-xa̱ʼa̱ na̱ yiví na̱ kéʼé ña̱ va̱ása va̱ʼa ta̱ Jesús koora Rey ti̱xin 1,000 ku̱i̱ya̱. Tiempo kán, ta̱ Jesús xíʼin na̱ 144,000 na̱ kaʼndachíñu xíʼinra chindeétáʼanna xíʼin na̱ yiví ña̱ ka̱kuna ndaʼa̱ ku̱a̱chi. Tá ná ndiʼi tiempo kán, ñuyǐví nduliviña ta na̱ yiví si̱íní kundoona nu̱úña saáchi kandíxana ley Jehová. Tá ná ndiʼi, ta̱ Jesús ndataxira ña̱ xáʼndachíñura ndaʼa̱ yivára, Jehová. Ta ki̱vi̱ Ndióxi̱ nduyi̱i̱ña ndiʼi tiempo (Mateo 6:​9, 10). Ta tiempo saá na̱ʼa̱ Jehová ña̱ va̱ʼaní xáʼndachíñura ta ndáara na̱ ñuura. Tasaá Jehová sandíʼi-xa̱ʼa̱ra ta̱ Ndi̱va̱ʼa xíʼin na̱ ta̱chí ndi̱va̱ʼa á inkaka na̱ va̱ása íxato̱ʼó ña̱ xáʼndachíñura (Apocalipsis 20:​7-​10). Ndiʼi ña̱ va̱ʼa ña̱ keʼé Reino Ndióxi̱ kooña ndiʼi tiempo.

NÁ SAKUAʼAKAYÓ XA̱ʼA̱ÑA

4. Reino Ndióxi̱ sandíʼi-xa̱ʼa̱ña ndiʼi na̱ xáʼndachíñu ñuyǐví yóʼo

“Xa̱ʼa̱ ña̱ xáʼndachíñu na̱ yiví nu̱ú táʼan miína nina tu̱ndóʼova íyo” (Eclesiastés 8:9). Jehová ti̱xin Reinora ndasaviíra ndiʼi ña̱ va̱ása va̱ʼa kúú nu̱ú ñuʼú yóʼo.

Kaʼvindó Daniel 2:​44 xíʼin 2 Tesalonicenses 1:​6-8, ta ka̱ʼa̱nndó xa̱ʼa̱ ña̱yóʼo:

• Jehová xíʼin se̱ʼera ta̱ Jesús ¿ndáaña keʼéna xíʼin na̱ xáʼndachíñu ñuyǐví yóʼo ta saátu xíʼin na̱ kítáʼan xíʼinna?

• Ña̱ kúnda̱a̱-iniún xa̱ʼa̱ Jehová ta saátu xa̱ʼa̱ ta̱ Jesús, ¿ndáa ki̱ʼva chindeétáʼanña xíʼún ña̱ kunda̱a̱-iniún ña̱ viíní ndatiinna ku̱a̱chi xíʼin na̱ yiví?

5. Ta̱ Jesús kúú iin rey ta̱ va̱ʼaní

Xa̱ʼa̱ ña̱ kúú ta̱ Jesús Rey ti̱xin Reino Ndióxi̱ keʼéra ku̱a̱ʼání ña̱ va̱ʼa ña̱ chindeétáʼan xíʼin na̱ yiví na̱ íyo iníísaá nu̱ú ñuʼú. Kotondó VIDEO ña̱ va̱ʼa kunda̱a̱-inindó ndáa ki̱ʼva ni̱na̱ʼa̱ ta̱ Jesús ña̱ kúni̱ra chindeétáʼanra xíʼin na̱ yiví ta saátu Ndióxi̱ ta̱xira ndee̱ ndaʼa̱ra ña̱ va̱ʼa keʼéra ña̱yóʼo.

VIDEO: Ta̱ Jesús ni̱na̱ʼa̱ra ña̱ keʼé Reino Ndióxi̱ (1:​13)

Ña̱ ke̱ʼé ta̱ Jesús tá ni̱xi̱yora nu̱ú ñuʼú yóʼo náʼa̱ña ña̱ keʼéra táʼan ña̱yóʼo ti̱xin Reino Ndióxi̱. Ña̱ ni̱ka̱ʼa̱n Ndióxi̱ ña̱ va̱xi yóʼo, ¿ndáaña kúú ña̱ kútóokaún kuniún xi̱nu? Kaʼvindó ndiʼi texto nu̱ú va̱xi ña̱ ni̱ka̱ʼa̱n Ndióxi̱ keʼéra.

6. Tíxa̱ʼvi Reino Ndióxi̱ viíní kooyó chí nu̱únínu

VIDEO: Ña̱ liviní koo chí nu̱únínu (4:​38)

Kaʼvindó Salmo 145:​16 ta ka̱ʼa̱nndó xa̱ʼa̱ ña̱yóʼo:

• ¿Ndáaña ndóʼún tá kúnda̱a̱-iniún ña̱ taxi Jehová ndiʼi ña̱ xíniñúʼu na̱ yiví?

ÑA̱ XA̱A̱ SA̱KUAʼAYÓ

Reino Ndióxi̱ saxínuña ña̱ kúni̱ra. Ndasaliviña nu̱ú ñuʼú yóʼo nu̱ú koo na̱ yiví na̱ kéʼé ña̱ va̱ʼa ta ndasakáʼnuna Jehová ndiʼi tiempo.

Ná ndakaʼányó xa̱ʼa̱ ña̱yóʼo

• ¿Ndáaña keʼé Reino Ndióxi̱ ña̱ ndasayi̱i̱ña ki̱vi̱ Jehová?

• ¿Nda̱chun va̱ʼa kúnda̱a̱-iniyó ña̱ saxínu Reino Ndióxi̱ ndiʼi ña̱ va̱xi nu̱ú Biblia?

• Ndiʼi ña̱ saxínu Reino Ndióxi̱, ¿ndáaña kútóokaún kuniún?

NANDUKÚKA XA̱ʼA̱ÑA

Kunda̱a̱-ini ndáaña kúú Armagedón.

“¿Ndáaña kúú Armagedón?” (Artículo ña̱ va̱xi nu̱ú jw.org)

Koto ndáaña kuu tá ná kixaa̱ “tu̱ndóʼo ña̱ káʼnu” ña̱ ni̱ka̱ʼa̱n ta̱ Jesús xa̱ʼa̱ (Mateo 24:21).

“¿Ndáaña kúú tu̱ndóʼo ña̱ káʼnu?” (Artículo ña̱ va̱xi nu̱ú jw.org)

¿Ndáa ki̱ʼva kivi ndakanixi̱ní na̱ familia ña̱ si̱íní koona tá ná saxínu Reino Ndióxi̱ ña̱ ni̱ka̱ʼa̱nra koo?

Ndakanixi̱ní ña̱ xa̱a̱ íyoún nu̱ú ñuyǐví xa̱á (1:​50)

Kaʼvi xa̱ʼa̱, “Ku̱a̱ʼání pregunta xi̱kuumií” ña̱ va̱ʼa kotondó ndáa ki̱ʼva nda̱ni̱ʼí iin ta̱ xi̱kitáʼan xíʼin na̱ político ña̱ xi̱kuni̱ra kunda̱a̱-inira.

“Biblia chi̱ndeétáʼan xíʼinna ña̱ na̱samana” (La Atalaya, 1 tí enero ku̱i̱ya̱ 2012)