၂ ဘုရင်များ

၁၇ ယုဒဘုရင် အာခတ် နန်းစံ ၁၂ နှစ်မှာ ဧလာရဲ့သား ဟောရှာက+ အစ္စရေးပြည်မှာ နန်းတက်လာပြီး ရှမာရိမြို့မှာ ကိုးနှစ် စိုးစံတယ်။ ၂ သူက ယေဟောဝါရှေ့မှာ  မကောင်းတာကို ဆက်လုပ်တယ်။  ဒါပေမဲ့ အရင်က အစ္စရေးဘုရင်တွေလောက်တော့ မဆိုးရွားဘူး။ ၃ အဆီးရီးယားဘုရင် ရှာလမနေဇာ  လာတိုက်ခိုက်တဲ့အခါ+ ဟောရှာက သူ့ဆီမှာ လက်အောက်ခံပြီး ဆက်ကြေးပေးရတယ်။+ ၄ ဟောရှာက အီဂျစ်ဘုရင် သွာဆီ တမန်တွေစေလွှတ်တဲ့အပြင်+ အရင်နှစ်တွေလို အဆီးရီးယားဘုရင်ကို ဆက်ကြေးမပေးတော့ဘူး။ အဲဒီအခါ ပုန်ကန်ဖို့ လျှို့ဝှက်ကြံစည်နေမှန်း အဆီးရီးယားဘုရင် သိသွားပြီး သူ့ကို အကျဉ်းချထားလိုက်တယ်။

၅ အဲဒီနောက် အဆီးရီးယားဘုရင်က တစ်ပြည်လုံးကို ဝင်ရောက်ကျူးကျော်တယ်။  ရှမာရိမြို့ကို  ရောက်လာတဲ့အခါ  သုံးနှစ်  ဝိုင်းရံထားပြီး၊ ၆ ဟောရှာနန်းစံ ကိုးနှစ်မှာ မြို့ကို သိမ်းယူလိုက်တယ်။+ အစ္စရေးတွေကိုလည်း အဆီးရီးယားပြည်ဆီ ပြည်နှင်ဒဏ်ပေးပြီး+ ဟာလအရပ်မှာ၊ ဂေါဇန်မြစ်နားက+ ဟာဗော်မြို့၊ မီးဒီးယားမြို့တွေမှာ+ နေထိုင်စေတယ်။

၇ ဒီလိုဖြစ်ရတာက အစ္စရေးတွေဟာ  သူတို့ကို  အီဂျစ်ပြည်ကနေ၊ အီဂျစ်ဘုရင်ဖာရောရဲ့ လက်အောက်ကနေ ခေါ်ထုတ်လာတဲ့ ယေဟောဝါဘုရားကို  ပြစ်မှားခဲ့လို့ပဲ။+ သူတို့က တခြားဘုရားတွေကို ကိုးကွယ်ပြီး၊+ ၈ သူတို့ရှေ့ကနေ ယေဟောဝါ မောင်းထုတ်ခဲ့တဲ့  လူမျိုးတွေရဲ့  ဓလေ့ထုံးစံတွေနဲ့ အစ္စရေးဘုရင်တွေ ချမှတ်တဲ့ ဓလေ့ထုံးစံတွေကို လိုက်ခဲ့တယ်။

၉ အစ္စရေးတွေက  ယေဟောဝါဘုရားရှေ့မှာ  မဖြောင့်မှန်တာတွေကို လုပ်ဆောင်နေကြတယ်။ ကင်းမျှော်စင်ကနေ ခံတပ်မြို့အထိ မြို့တိုင်းမြို့တိုင်းမှာ အထွတ်အမြတ်နေရာတွေကို တည်ဆောက်တယ်။+ ၁၀ ရှိရှိသမျှ တောင်ကုန်းတွေပေါ်မှာ၊ စိမ်းလန်းတဲ့ အပင်တွေအောက်မှာ+ ကိုးကွယ်ရာကျောက်တိုင်တွေ၊ ကိုးကွယ်ရာသစ်တိုင်တွေ*+ စိုက်ထူတယ်။ ၁၁ သူတို့ရှေ့ကနေ  ယေဟောဝါ  နှင်ထုတ်ခဲ့တဲ့ လူမျိုးတွေလုပ်သလို အထွတ်အမြတ်နေရာတိုင်းမှာ ယဇ်တွေ မီးရှို့ပူဇော်တယ်။+ ဆိုးညစ်တာတွေကို ဆက်လုပ်ပြီး ယေဟောဝါကို အမျက်ထွက်စေကြတယ်။

၁၂ “ဝတ်မပြုပါနဲ့”+  လို့  ယေဟောဝါ မိန့်မှာထားလျက်နဲ့ ရွံမုန်းဖွယ်ရုပ်တုတွေကို* သူတို့ဝတ်ပြုကြတယ်။+ ၁၃ ယေဟောဝါက ပရောဖက်တွေ၊ စိတ်အာရုံမြင်ရသူတွေကတစ်ဆင့်+ အစ္စရေးနဲ့ယုဒလူတွေကို “မင်းတို့ရဲ့ ဆိုးညစ်တဲ့လမ်းစဉ်ကို စွန့်လွှတ်ကြ။+ ဘိုးဘေးတွေကို ငါမိန့်မှာခဲ့တဲ့၊ ငါ့ကျွန် ပရောဖက်တွေကတစ်ဆင့် ပေးခဲ့တဲ့ ပညတ်ချက်တွေ၊ ဥပဒေတွေ၊ ပညတ်ကျမ်းမှာ ရေးထားတာတွေကို လိုက်နာကြပါ” ဆိုပြီး မပြတ်သတိပေးတယ်။ ၁၄ ဒါပေမဲ့ သူတို့ နားမထောင်ဘူး။ ယေဟောဝါဘုရားကို မယုံကြည်ခဲ့တဲ့ ဘိုးဘေးတွေလို ခေါင်းမာနေတုန်းပဲ။+ ၁၅ ကိုယ်တော့်စည်းမျဉ်းတွေ၊ သတိပေးချက်တွေအပြင်+ ဘိုးဘေးတွေနဲ့ ကိုယ်တော်ဖွဲ့ခဲ့တဲ့ ပဋိညာဉ်ကိုပါ ငြင်းပယ်တယ်။+ ပတ်ဝန်းကျင်  လူမျိုးတွေကို  အတုမယူရဘူးလို့ ယေဟောဝါမိန့်မှာထားလျက်နဲ့ သူတို့ကို အတုယူတယ်။+ အသုံးမကျတဲ့ ရုပ်တုတွေနောက်ကို ဆက်လိုက်ပြီး+ ကိုယ့်ကိုယ်ကိုယ် အသုံးမကျသူတွေဖြစ်အောင် လုပ်ကြတယ်။+

၁၆ သူတို့က ယေဟောဝါဘုရားရဲ့ ပညတ်ချက်တွေကို စွန့်ပစ်တဲ့အပြင် နွားငယ်ရုပ်တုနှစ်ခု သွန်းလုပ်ပြီး+ ကိုးကွယ်ရာသစ်တိုင်ကို လုပ်တယ်။+ ကောင်းကင်ပေါ်က ကြယ်တွေကို ဦးချပြီး+ ဗာလဘုရားကို ဝတ်ပြုတယ်။+ ၁၇ ကိုယ့်သားသမီးတွေကိုလည်း  မီးရှို့ပူဇော်တယ်။+ နတ်ဆိုးအတတ်ကို လိုက်စားပြီး+ အတိတ်နိမိတ်တွေ ကောက်ကြတယ်။ ယေဟောဝါရှေ့မှာ မကောင်းတာလုပ်ဖို့၊ အမျက်တော်ထွက်အောင် လုပ်ဖို့ပဲ စိတ်ပြင်းပြနေကြတယ်။

၁၈ ဒါကြောင့် ယေဟောဝါအကြီးအကျယ် အမျက်ထွက်ပြီး အစ္စရေးတွေကို ရှေ့တော်ကနေ ဖယ်ရှားပစ်တယ်။+ ယုဒအနွယ်ကလွဲလို့ တစ်ယောက်ကိုမှ ချန်မထားဘူး။

၁၉ ယုဒအနွယ်ကလည်း ယေဟောဝါဘုရားရဲ့ ပညတ်ချက်တွေကို မစောင့်ထိန်းဘူး။+ အစ္စရေးတွေလိုက်တဲ့ ဓလေ့ထုံးစံတွေနောက်ကို လိုက်ကြတယ်။+ ၂၀ ဒါနဲ့ ယေဟောဝါက အစ္စရေးသားမြေး အားလုံးကို ပစ်ပယ်လိုက်တယ်။ သူတို့ကို အရှက်တကွဲဖြစ်စေပြီး တိုက်ခိုက်လုယက်သူတွေလက်ထဲ အပ်လိုက်တဲ့အတွက် နောက်ဆုံးမှာ ရှေ့တော်ကနေ သူတို့ ဖယ်ရှားခံလိုက်ရတယ်။ ၂၁ ဘုရားက အစ္စရေးတွေကို ဒါဝိဒ်အမျိုးကနေ ခွဲထုတ်လိုက်တဲ့အခါ နေဗတ်သား ယေရောဗောင်ကို သူတို့ မင်းမြှောက်ကြတယ်။+ ဒါပေမဲ့ ယေရောဗောင်က အစ္စရေးတွေကို ယေဟောဝါနောက်လိုက်ရာကနေ လမ်းလွဲစေပြီး ကြီးလေးတဲ့အပြစ် ကျူးလွန်စေခဲ့တယ်။ ၂၂ အစ္စရေးတွေဟာ ယေရောဗောင် ကျူးလွန်ခဲ့တဲ့ အပြစ်တွေကို တစ်ခုမကျန် လိုက်လုပ်ကြတယ်။+ အဲဒီလမ်းစဉ်ကို  မစွန့်ပစ်တဲ့အတွက်၊ ၂၃ နောက်ဆုံးမှာ ယေဟောဝါက မိမိကျွန် ပရောဖက်တွေကတစ်ဆင့် ပြောခဲ့တဲ့အတိုင်း အစ္စရေးတွေကို ရှေ့တော်ကနေ ဖယ်ရှားလိုက်တယ်။+ ဒါကြောင့် အစ္စရေးတွေဟာ ဇာတိမြေကနေ အဆီးရီးယားပြည်ကို ပြည်နှင်ခံရပြီး+ အခုအချိန်ထိ အဲဒီမှာပဲ နေရတယ်။

၂၄ အဲဒီနောက် အဆီးရီးယားဘုရင်က ဗာဗုလုန်မြို့၊ ကုသမြို့၊ အာဝမြို့၊ ဟာမတ်မြို့၊ သေဖရဝိမ်မြို့က+ လူတွေကို ခေါ်လာပြီး အစ္စရေးတွေရဲ့နေရာဖြစ်တဲ့  ရှမာရိမြို့တွေမှာ  နေထိုင်စေတယ်။ အဲဒီလူတွေက ရှမာရိမြို့ကို အပိုင်ရပြီး ပတ်ဝန်းကျင်မြို့တွေမှာ နေထိုင်ကြတယ်။ ၂၅ သူတို့ နေထိုင်ခါစတုန်းက ယေဟောဝါကို ကြောက်ရွံ့ရိုသေမှု မရှိကြဘူး။ ဒါကြောင့် ယေဟောဝါက  ခြင်္သေ့တွေ  လွှတ်လိုက်တဲ့အတွက်+ လူတချို့ ကိုက်သတ်ခံရတယ်။ ၂၆ အဲဒီအခါ “အရှင်မင်းကြီး ဖမ်းခေါ်လာပြီး ရှမာရိမြို့တွေမှာ နေရာချပေးတဲ့  လူမျိုးတွေဟာ အဲဒီပြည်ကို စောင့်ရှောက်တဲ့ ဘုရားသခင်ရဲ့ ဘာသာဓလေ့တွေကို မသိကြပါဘူး။ အဲဒီပြည်ကို စောင့်ရှောက်တဲ့ ဘုရားသခင်ရဲ့ ဘာသာဓလေ့ကို တစ်ယောက်မှ မသိကြတဲ့အတွက် အဲဒီဘုရားက ခြင်္သေ့တွေ လွှတ်လိုက်လို့ သူတို့ ကိုက်သတ်ခံနေရပြီ” ဆိုတဲ့သတင်း အဆီးရီးယားဘုရင်ဆီ ရောက်လာတယ်။

၂၇ ဒါကြောင့် အဆီးရီးယားဘုရင်က “အဲဒီပြည်ကနေ ဖမ်းခေါ်သွားခံရသူတွေထဲက ပုရောဟိတ်တစ်ယောက်ကို ပြန်လာခိုင်းပြီး  အဲဒီပြည်ကို  စောင့်ရှောက်တဲ့ ဘုရားသခင်ရဲ့ ဘာသာဓလေ့ကို သင်ပေးစေ” ဆိုပြီး အမိန့်ချတယ်။ ၂၈ ဒါနဲ့ ရှမာရိမြို့ကနေ ဖမ်းခေါ်သွားခံရသူတွေထဲက ပုရောဟိတ်တစ်ယောက်က ဗေသလမြို့မှာ ပြန်နေထိုင်ပြီး+ ယေဟောဝါကို ကြောက်ရွံ့ရိုသေတတ်လာအောင် သင်ပေးတယ်။+

၂၉ ဒါပေမဲ့  လူမျိုးတိုင်းကဘုရားတွေ ကိုယ်စီလုပ်ပြီး ရှမာရိလူတွေ ဆောက်ခဲ့တဲ့ အထွတ်အမြတ်နေရာတွေက ဝတ်ကျောင်းတွေမှာ ထားကြတယ်။ ကိုယ်နေထိုင်တဲ့မြို့တွေမှာ အဲဒီအတိုင်း လုပ်ကြတယ်။ ၃၀ ဗာဗုလုန်မြို့သားတွေက  သုကုတ်ဗေနုတ်ဘုရား၊ ကုသမြို့သားတွေက နေရဂါလဘုရား၊ ဟာမတ်မြို့သားတွေက+ အရှိမဘုရား၊ ၃၁ အာဝမြို့သားတွေက  နိဗဟာဇဘုရားနဲ့ တာတက်ဘုရားတွေကို လုပ်ကြတယ်။ သေဖရဝိမ်မြို့သားတွေက ကိုယ့်သားသမီးကို သေဖရဝိမ်ဘုရားတွေဖြစ်တဲ့  အာဒရာမေလက်နဲ့  အာနမေလက်ဆီ မီးရှို့ပူဇော်တတ်ကြတယ်။+ ၃၂ ယေဟောဝါကို သူတို့ ကြောက်ရွံ့ရိုသေကြပေမဲ့ အထွတ်အမြတ်နေရာတွေမှာ အမှုဆောင်ဖို့ ပုရောဟိတ်ကို သာမန်လူတွေထဲကနေ ခန့်အပ်တယ်။ အဲဒီယဇ်ပုရောဟိတ်တွေက အထွတ်အမြတ်နေရာတွေမှာရှိတဲ့ ဝတ်ကျောင်းတွေမှာ လူတွေအတွက် ဆောင်ရွက်ပေးကြတယ်။+ ၃၃ ဒီလိုနဲ့ သူတို့က ယေဟောဝါကို ကြောက်ရွံ့ရိုသေပေမဲ့ ကိုယ်ထွက်ခွာခဲ့တဲ့ တိုင်းပြည်မှာရှိတဲ့ ဘာသာဓလေ့အတိုင်း ကိုယ့်ဘုရားတွေကိုပဲ ကိုးကွယ်ကြတယ်။+

၃၄ သူတို့ဟာ  ဘာသာဓလေ့ဟောင်းတွေနောက်ကို ဒီနေ့အထိ လိုက်နေတုန်းပဲ။ တစ်ယောက်မှ ယေဟောဝါကို မကိုးကွယ်ကြဘူး။ အစ္စရေးဆိုပြီး နာမည်ပြောင်းပေးခဲ့တဲ့  ယာကုပ်ရဲ့အမျိုးကို ယေဟောဝါပေးခဲ့တဲ့ ဥပဒေတွေ၊ တရားစီရင်ချက်တွေ၊ ပညတ်တရားနဲ့ မိန့်မှာချက်တွေကို  မကျင့်ကြဘူး။+ ၃၅ ယေဟောဝါက ယာကုပ်အမျိုးနဲ့ ပဋိညာဉ်ဖွဲ့ချိန်မှာ+ “တခြားဘုရားတွေကို မကြောက်နဲ့။ ဦးမချ၊ ဝတ်မပြုနဲ့။ ယဇ်မပူဇော်နဲ့။+ ၃၆ မင်းတို့ကို အီဂျစ်ပြည်ကနေ ကြီးမားတဲ့တန်ခိုး၊ အားကြီးတဲ့လက်ရုံးနဲ့ ခေါ်ထုတ်လာတဲ့အရှင်+ ငါယေဟောဝါကိုပဲ ကြောက်ရွံ့ရိုသေပါ။+ ငါ့ကိုပဲ ဦးချဝတ်ပြုပြီး ငါ့ဆီကိုပဲ ပူဇော်သက္ကာတွေ ဆက်သကြပါ။ ၃၇ မင်းတို့အတွက် ငါရေးထားတဲ့ စည်းမျဉ်းတွေ၊ တရားစီရင်ချက်တွေ၊ ပညတ်တရားနဲ့ မိန့်မှာချက်တွေကို+ အမြဲ ဂရုတစိုက်  လိုက်လျှောက်ပါ။   တခြားဘုရားတွေကို မကြောက်နဲ့။ ၃၈ မင်းတို့နဲ့ ငါဖွဲ့ထားတဲ့ ပဋိညာဉ်ကို မမေ့ပါနဲ့။+ တခြားဘုရားတွေကို မကြောက်နဲ့။ ၃၉ ရန်သူတွေရဲ့လက်ထဲကနေ ကယ်တင်ခဲ့တဲ့ မင်းတို့ရဲ့ဘုရား ယေဟောဝါကိုပဲ ကြောက်ရွံ့ရိုသေကြပါ” လို့မိန့်မှာခဲ့တယ်။

၄၀ ဒါပေမဲ့ သူတို့ မနာခံဘူး။ ဘာသာဓလေ့ဟောင်းတွေနောက်ကိုပဲ လိုက်ကြတယ်။+ ၄၁ အဲဒီလူမျိုးတွေက ယေဟောဝါကို ကြောက်ရွံ့ရိုသေလာပေမဲ့+ ရုပ်တုတွေကိုလည်း ဝတ်ပြုကြတယ်။ သူတို့ရဲ့သားမြေးတွေလည်း ဘိုးဘေးတွေလုပ်ခဲ့တဲ့အတိုင်း အခုချိန်အထိ လုပ်နေကြတုန်းပဲ။