သူလျှိုတွေကို ရာခပ် ဝှက်ထား

အစ္စရေးသူလျှိုတွေဟာ ယေရိခေါမြို့ကိုသွားပြီး စုံစမ်းတုန်းက ရာခပ်လို့ခေါ်တဲ့ အမျိုးသမီးအိမ်မှာ တည်းခိုကြတယ်။ ဒါကို ယေရိခေါဘုရင် သိတာနဲ့ စစ်သားတွေ လွှတ်လိုက်တယ်။ ရာခပ်လည်း သူလျှိုနှစ်ယောက်ကို အိမ်မိုးပေါ်မှာ ဝှက်ထားပြီး စစ်သားတွေကို လမ်းလွှဲလိုက်တယ်။ ပြီးတော့ ရာခပ်က သူလျှိုတွေကို ‘ယေဟောဝါဟာ ရှင်တို့ဘက်မှာရှိပြီး ဒီပြည်ကို ရှင်တို့အနိုင်ရမယ်ဆိုတာ သိလို့ ကူညီပေးတာ။ ကျွန်မ မိသားစုကို ကယ်မယ်လို့ ကတိပေးပါ’ ဆိုပြီး တောင်းဆိုတယ်။

သူလျှိုတွေလည်း ရာခပ်ကို ‘မင်းအိမ်မှာရှိသူမှန်သမျှ အသက်ချမ်းသာရမယ်။ ပြတင်းပေါက်ကနေ ကြိုးနီတစ်ချောင်း ချထားပါ၊ မင်းမိသားစု ကာကွယ်ခံရမယ်’ လို့ ပြန်ပြောတယ်။

ရာခပ်ဟာ သူလျှိုတွေကို ပြတင်းပေါက်ကနေ ကြိုးနဲ့ လျှောချပေးတယ်။ တောင်ပေါ်မှာ သုံးရက် ပုန်းနေပြီးနောက် ယောရှုဆီ သူတို့ပြန်သွားတယ်။ အဲဒီနောက် အစ္စရေးတွေဟာ ဂျော်ဒန်မြစ်ကိုကူးပြီး ပြည်ကိုသိမ်းပိုက်ဖို့ ပြင်ဆင်ကြတယ်။ ယေရိခေါမြို့ဟာ သူတို့အနိုင်ရတဲ့ ဦးဆုံးမြို့ဖြစ်တယ်။ ယေဟောဝါဟာ အဲဒီမြို့ကို တစ်ရက်တစ်ကြိမ်၊ ခြောက်ရက်လှည့်ပတ်ချီတက်ဖို့ မိန့်မှာတယ်။ ခုနစ်ရက်မြောက်နေ့မှာ မြို့ကို ခုနစ်ပတ်,ပတ်ကြရတယ်။ ပြီးတော့ ပုရောဟိတ်တွေဟာ တံပိုးမှုတ်ပြီး စစ်သားတွေက အသံကျယ်ကျယ်နဲ့ အော်ကြတယ်။ အဲဒီအခါ မြို့ရိုး ပြိုကျသွားတယ်။ ဒါပေမဲ့ ရာခပ်အိမ်ကတော့ မပျက်စီးဘဲ ကျန်နေတယ်။ ရာခပ်ဟာ ယေဟောဝါကို ယုံကြည်ကိုးစားလို့ သူနဲ့ သူ့မိသားစု လွတ်မြောက်ခဲ့တယ်။