ချစ်ခင်ကြင်နာမှုကို အမြဲမီအောင်လိုက်လေ

“ဖြောင့်မတ်ခြင်းတရားနှင့်ကရုဏာတရား [ချစ်ခင်ကြင်နာမှု၊ NW] ကိုရှာသောသူသည် အသက်ရှင်ခြင်း၊ ဖြောင့်မတ်ခြင်း၊ ဂုဏ်အသရေထင်ရှားခြင်းကိုတွေ့တတ်၏။”—သု၊ ၂၁: ၂၁။

၁။ ဘုရားသခင့်ဝိညာဉ်တော်၏လမ်းပြမှုခံယူသူများ ကြင်နာမှုပြရန် အဘယ်ကြောင့်မျှော်လင့်သင့်သနည်း။

ယေဟောဝါသည် ကြင်နာ၍ ကရုဏာရှိတော်မူသည်။ ကိုယ်တော်သည် “ချစ်သနားခြင်းမေတ္တာကရုဏာနှင့်ပြည့်စုံ၍ စိတ်ရှည်ခြင်း၊ ကျေးဇူးပြုခြင်း၊ သစ္စာစောင့်ခြင်းနှင့်ကြွယ်ဝတော်မူ” သည်။ (ထွက်မြောက်ရာ ၃၄:၆၊ ၇) ထိုကြောင့် ကိုယ်တော်၏ဝိညာဉ်တော်အသီးတွင် မေတ္တာနှင့်ကြင်နာမှုပါဝင်ရခြင်းဖြစ်သည်။—ဂလာတိ ၅:၂၂၊ ၂၃။

၂။ ယခုအဘယ်ဥပမာများကိုသုံးသပ်မည်နည်း။

^၂ ယေဟောဝါ၏သန့်ရှင်းသောဝိညာဉ်တော် သို့မဟုတ်လှုပ်ရှားသောစွမ်းအားဖြင့် လမ်းညွှန်ခံရသူများသည် ယင်း၏ကြင်နာမှုအသီးကိုသီးပြကြသည်။ သူတစ်ပါးနှင့်ဆက်ဆံရာတွင် သူတို့ချစ်ခင်ကြင်နာမှုပြကြသည်။ တမန်တော်ပေါလု၏ပုံသက်သေကို သူတို့အမှန်အတုယူကာ “ကြင်နာမှုပြခြင်း” နှင့်အခြားနည်းများဖြင့် ဘုရားသခင်၏ဓမ္မအမှုဆောင်များအဖြစ် ကိုယ်ကိုယ်ကိုထောက်ခံကြသည်။ (၂ ကောရိန္သု ၆:၃-၁၀) သူတို့၏ကြင်နာမှု၊ ကရုဏာ၊ ခွင့်လွှတ်တတ်သောသဘောသည် “ကရုဏာ [ချစ်ခင်ကြင်နာမှု၊ NW] ကြွယ်ဝသော” ယေဟောဝါ၏ဥပဓိရုပ်နှင့်ညီညွတ်သည်။ ကိုယ်တော်၏နှုတ်ကပါဌ်တော်တွင် ကြင်နာမှုပြသည့်ပုံဥပမာများစွာရှိပါသည်။ (ဆာလံ ၈၆:၁၅။ ဧဖက် ၄:၃၂) ယင်းတို့မှ ကျွန်ုပ်တို့အဘယ်သင်ခန်းစာရရှိသနည်း။

ကြင်နာမှုသည် ကျွန်ုပ်တို့အားအတ္တမရှိစေဘဲ ပျူငှာစေ

၃။ ကြင်နာမှုပြရာတွင် အာဗြဟံသည် အဘယ်နည်းဖြင့်ပုံသက်သေကောင်းပြသနည်း။ ဤကိစ္စတွင် ပေါလုမည်သို့အားပေးသနည်း။

^၃ “ယေဟောဝါ၏မိတ်ဆွေ၊” “ယုံကြည်သောသူတို့၏အဘ” ဘိုးဘေးအာဗြဟံ (အာဗြံ) သည် ကြင်နာမှုပြရာတွင်ပုံသက်သေကောင်းဖြစ်သည်။ (ယာကုပ် ၂:၂၃။ ရောမ ၄:၁၁) သူ၏တူလောတအပါအဝင်၊ သူ၏အိမ်ထောင်သည် ခါလဒဲပြည် ဥရမြို့မှထွက်ခွာပြီး ဘုရားသခင့်အမိန့်တော်အရ ခါနာန်ပြည်ထဲဝင်ခဲ့သည်။ အာဗြဟံသည် ပိုအသက်ကြီးပြီး အိမ်ထောင်ဦးစီးလည်းဖြစ်သော်လည်း လောတအားအကောင်းဆုံးစားကျက်ကိုယူစေပြီး မိမိမူကား ကျန်ကြွင်းသောနေရာတွင်နေထိုင်ခြင်းမှာ ကြင်နာ၍အတ္တသဘောမရှိကြောင်း ထင်ရှားပါသည်။ (ကမ္ဘာဦး ၁၃:၅-၁၈) ထပ်တူကြင်နာမှုမျိုးသည် မိမိအားခုတုံးလုပ်ပြီး သူတစ်ပါးအခွင့်အရေးများရစေရန် လှုံ့ဆော်ပေးပေမည်။ ဤကဲ့သို့သောအတ္တမဆန်သည့်ကြင်နာမှုသည် တမန်တော်ပေါလု၏သြဝါဒနှင့်ညီညွတ်ပေသည်။ “ကိုယ်အကျိုးကို အဘယ်သူမျှမရှာစေနှင့်။ သူ့အကျိုးကို လူတိုင်းရှာစေ။” ပေါလုကိုယ်တိုင်ပင် ‘လူများတို့သည် ကယ်တင်ခြင်းသို့ရောက်စိမ့်သောငှာ ကိုယ်အကျိုးကိုမရှာဘဲ သူ့အကျိုးကိုရှာ၍ ခပ်သိမ်းသောလူတို့၏အလိုသို့ အရာရာ၌လိုက်လျော’ ခဲ့သည်။—၁ ကောရိန္သု ၁၀:၂၄၊ ၃၃။

၄။ ဧည့်ဝတ်ပျူငှာခြင်းဖြင့် ကြင်နာမှုပြခဲ့သည့်အတွက် အာဗြဟံနှင့်စာရာ မည်သို့အကျိုးခံစားရသနည်း။

^၄ တစ်ခါတစ်ရံ ကြင်နာမှုကို လှိုက်လှဲစွာပျူငှာခြင်းဖြင့် တင်ပြနိုင်သည်။ ခရီးသွားနေသော သူစိမ်းသုံးဦးအား အာဗြဟံနှင့်သူ၏ဇနီး စာရာတို့သည် ကြင်နာမှုနှင့်ဧည့်ဝတ်ပျူငှာမှုပြခဲ့သည်။ ဧည့်သည်များအတွက်စားစရာဟင်းလျာကိုပြင်ဆင်ပေးစဉ် မိမိတို့နှင့်ခေတ္တတည်းခိုရန် အာဗြဟံနှင့်စာရာတို့ကဖျောင်းဖျခဲ့သည်။ ထိုဧည့်သည်တို့သည် နောက်ဆုံးယေဟောဝါ၏ကောင်းကင်တမန်များဖြစ်နေကြရာ အရွယ်လွန်၍မြုံနေသောစာရာသည် သားဖွားလိမ့်မည်ဟု ကောင်းကင်တမန်တစ်ပါးက ကတိပြုခဲ့သည်။ (ကမ္ဘာဦး ၁၈:၁-၁၅) ကြင်နာမှုရှိရှိဧည့်ဝတ်ပျူငှာခြင်း အကျိုးကျေးဇူးကြီးလှပါတကား။

၅။ ဂါယုသည် အဘယ်နည်းဖြင့် ကြင်နာမှုပြသနည်း။ ထပ်တူနည်းဖြင့် ကျွန်ုပ်တို့မည်သို့ပြုနိုင်သနည်း။

^၅ ခရစ်ယာန်အပေါင်း ကြင်နာမှုပြနိုင်သည့်နည်းတစ်နည်းကား ဧည့်ဝတ်ပျူငှာခြင်းအားဖြင့်ဖြစ်သည်။ (ရောမ ၁၂:၁၃။ ၁ တိမောသေ ၃:၁၊ ၂) ယင်းနှင့်အညီ ယေဟောဝါ၏ကျေးကျွန်တို့သည် နယ်လှည့်ကြီးကြပ်မှူးများအား ကြင်နာမှုရှေ့ထားပြီး ဧည့်ဝတ်ပြုကြသည်။ ဤသို့ပြုခြင်းကား ပထမရာစုရှိခရစ်ယာန်ဂါယုတင်ပြခဲ့သော ကြင်နာမှုကိုသတိရစေသည်။ မိမိအသိအကျွမ်းမဟုတ်သော “အာဂန္တုတို့” ဖြစ်သည့် ခရီးလှည့်လည်ရောက်ရှိလာသောညီအစ်ကိုများကို ဧည့်ဝတ်ပျူငှာစွာလက်ခံခြင်းဖြင့် “သစ္စာနှင့်အညီ” ပြုသောဝတ်ကိုထမ်းဆောင်ခဲ့သည်။ (၃ ယောဟန် ၅-၈) အများအားဖြင့်ဆိုလျှင် ကြင်နာစွာဖြင့်ဧည့်ဝတ်ပြုနိုင်သူတို့ကို ကျွန်ုပ်တို့သိကျွမ်းပြီးသားဖြစ်သည်။ ဝိညာဏညီအစ်မတစ်ဦး စိတ်ဓာတ်ကျနေဟန်ရှိသည်ကို ကျွန်ုပ်တို့သတိပြုမိမည်။ သူမ၏အိမ်ထောင်ဖက်မှာ မယုံကြည်သူဖြစ်ကောင်းဖြစ်မည်။ သို့မဟုတ် နှင်ထုတ်ခံရသူတစ်ဦးဖြစ်အံ့။ ထိုအခါမျိုးကိုအခွင့်အရေးယူ၍ ကျွန်ုပ်တို့အိမ်ထောင်စုနှင့်အတူ တစ်ခါတစ်ရံ ဝိညာဏပေါင်းသင်းမှုရရှိရန် ထမင်းစားခေါ်ဖိတ်လျှင်မကောင်းပေလော။ ပွဲကြီးပွဲကောင်း မကျွေးမွေးနိုင်သည်တိုင် ဤကဲ့သို့သောညီအစ်မတစ်ဦးအား ကြင်နာမှုပြလိုက်နိုင်ခြင်းမှ မိသားစုပျော်ရွှင်မှုရရှိပေလိမ့်မည်။ (သု၊ ၁၅:၁၇ နှင့်နှိုင်းယှဉ်) ယင်းအတွက် သူမကအမှန်ပင်ကျေးဇူးတင်ကြောင်း နှုတ်အားဖြင့်လည်းကောင်း၊ ကျေးဇူးတင်စာတိုဖြင့်လည်းကောင်း တင်ပြပေလိမ့်မည်။

၆။ လုဒိသည် ကြင်နာမှုမည်သို့ပြခဲ့သနည်း။ ကြင်နာမှုပါအပြုအမူများအတွက် ကျေးဇူးတင်ရန် အဘယ်ကြောင့်အရေးကြီးသနည်း။

^၆ ဘုရားတရားကြည်ညိုသောအမျိုးသမီးလုဒိ နှစ်ခြင်းခံပြီးနောက် ပေါလုနှင့်အပေါင်းအပါတို့အား “ကျွန်မသည် သခင်ဘုရား [ယေဟောဝါ၊ NW] ၌အမှန်ယုံကြည်သည်ကို သင်တို့သည်ထင်မှတ်လျှင် ကျွန်မအိမ်သို့ဝင်၍နေကြပါဟု တောင်းပန်လျက်အနိုင်သွေးဆောင်” ခဲ့သည်ဟုလုကာပြောပြသည်။ လုဒိ၏ကြင်နာမှုကို သူတို့အမှန်ကျေးဇူးတင်ခဲ့ကြပေမည်။ (တမန်တော် ၁၆:၁၄၊ ၁၅၊ ၄၀) ကျေးဇူးကန်းခြင်းမူကား အမှန်အကျိုးနည်း၍ မကောင်းမှုဖြစ်သည်။ တစ်ခါက၊ ချို့ငဲ့သောအသက် ၈၀ ရှိညီအစ်မတစ်ဦးသည် ဧည့်သည်အချို့ကိုထမင်းစားခေါ်ဖိတ်ခဲ့သည်။ လူငယ်တစ်ဦးမှာ မလာနိုင်ကြောင်းကိုပင်အသိမပေးသည့်အတွက် သူမအလွန်စိတ်ထိခိုက်ခဲ့သည်။ အခြားတစ်ချိန်တွင်၊ မိမိတို့အတွက် အမျိုးသမီးငယ်တစ်ဦး အထူးချက်ပြုတ်ထားသည့်ထမင်းစားပွဲကို ညီအစ်မနှစ်ဦး သွားမစားခဲ့ပါ။ “သူတို့နှစ်ယောက်စလုံးမေ့သွားသည်မဟုတ်။ . . . သတိရလျက်နှင့်မလာကြခြင်းဖြစ်သည့်အတွက် စိတ်မကောင်းခဲ့ပါ။ သူတို့အနက်တစ်ဦးမျှလည်း မတောင်းပန်နိုင်ကြသည်အထိ ကြင်နာမှုမဲ့ပြီး မေတ္တာမရှိကြပါ” ဟုသူမဆိုသည်။ ထပ်တူအခြေအနေမျိုးတွင် ကြင်နာမှုဖြစ်သည့်ဝိညာဉ်အသီးက သင့်အား ကျေးဇူးတင်စာနာတတ်ရန် လှုံ့ဆော်ပေးမည်လော။

ကြင်နာမှုသည် ကျွန်ုပ်တို့အားစာနာစေ

၇။ ယာကုပ်သင်္ဂြိုဟ်ခံလိုသည့်ဆန္ဒအတိုင်းပြုမူရန် ကြိုးစားမှုများက ကြင်နာမှုနှင့်ပတ်သက်၍ အဘယ်အချက်ကိုဖေါ်ပြသနည်း။

^၇ ကြင်နာမှုသည် သူတစ်ပါးကိုစာနာစေသည်။ သူတို့ဆန္ဒကိုလည်း ထောက်ထားစေသည်။ ဥပမာတင်ပြရလျှင်၊ မိမိအားအီဂျစ်ပြည်တွင် မသင်္ဂြိုဟ်ခြင်းအားဖြင့် ချစ်ခင်ကြင်နာမှုပြရန် သားယောသပ်အား ယာကုပ် (ဣသရေလ) တောင်းဆိုခဲ့သည်။ ယင်းသို့ပြုရန် ယာကုပ်၏ရုပ်ကလာပ်ကို ဝေးလံသောအရပ်သို့ သယ်ဆောင်စရာအကြောင်းရှိသော်လည်း ယောသပ်နှင့်ယာကုပ်၏အခြားသားများသည် “ခါနာန်ပြည်သို့ဆောင်သွား၍ အာဗြဟံသည် ကိုယ်ပိုင်သောသင်္ချိုင်းဖို့ ဟိတ္တိအမျိုးသား ဧဖရုန်၌ဝယ်ထားသောမံရေမြို့ရှေ့မပ္ပေလလယ်ပြင်တွင်ရှိသောမြေတွင်း၌ သင်္ဂြိုဟ်ကြ၏။” (ကမ္ဘာဦး ၄၇:၂၉။ ၄၉:၂၉-၃၁။ ၅၀:၁၂၊ ၁၃) ထိုပုံသက်သေအတိုင်းပင် ခရစ်ယာန်အိမ်သားတစ်ဦး ကျမ်းစာနှင့်ညီညွတ်စွာ သင်္ဂြိုဟ်စေလိုသည့်အတိုင်း ပြုလုပ်ပေးရန် ချစ်ခင်ကြင်နာမှုကလှုံ့ဆော်ပေးသင့်သည်မဟုတ်လော။

၈။ ကြင်နာမှုအတွက်ကျေးဇူးဆပ်ခြင်းအကြောင်း ရာခပ်၏အဖြစ်အပျက်က ကျွန်ုပ်တို့အားအဘယ်အရာသွန်သင်ပေးသနည်း။

^၈ ကျွန်ုပ်တို့ကို သူတစ်ပါးချစ်ခင်ကြင်နာမှုပြသည့်အခါ ကျေးဇူးတင်ကြောင်းပြောခြင်းဖြင့် သို့မဟုတ် တစ်နည်းနည်းဖြင့် ကျေးဇူးမပြုသင့်သလော။ အမှန်ပြုသင့်သည်။ ပြည့်တန်ဆာရာခပ်သည် ဣသရေလသူလျှိုများကိုဝှက်ထားပေးခြင်းဖြင့် ကြင်နာမှုပြခဲ့သည်။ သို့ဖြစ်သောကြောင့် ယေရိခေါမြို့ကိုဖျက်ဆီးချိန်တွင် သူမနှင့်သူမ၏အိမ်ထောင်သားများကို အသက်ချမ်းသာပေးခြင်းဖြင့် ဣသရေလအမျိုးသားများသည် ချစ်ခင်ကြင်နာမှုပြခဲ့သည်။ (ယောရှု ၂:၁-၂၁။ ၆:၂၀-၂၃) ကျွန်ုပ်တို့ကိုယ်တိုင် ကရုဏာပြ၍ကြင်နာခြင်းအားဖြင့် ကြင်နာမှုကို ကျေးဇူးဆပ်သင့်ကြောင်းတင်ပြသည့် ပုံသက်သေကောင်းပါတကား။

၉။ ကျွန်ုပ်တို့အားချစ်ခင်ကြင်နာမှုပြရန် သူတစ်ဦးအားတောင်းဆိုခြင်းသည် လျောက်ပတ်သည်ဟူ၍ အဘယ်ကြောင့်ဆိုနိုင်သနည်း။

^၉ စကားမစပ် ကျွန်ုပ်တို့အား ချစ်ခင်ကြင်နာမှုပြရန် သူတစ်ဦးအားတောင်းဆိုနိုင်ပါသည်။ ဣသရေလ၏ပထမဘုရင် ရှောလု၏သား ယောနသန်သည် ထိုသို့ပြုခဲ့သည်။ မိမိချစ်ခင်သော အသက်ပိုငယ်သူအဆွေဒါဝိဒ်အား မိမိနှင့်မိမိအိမ်ထောင်အား ချစ်ခင်ကြင်နာမှုပြရန် ယောနသန်တောင်းဆိုခဲ့သည်။ (၁ ဓမ္မရာဝင် ၂၀:၁၄၊ ၁၅။ ၂ ဓမ္မရာဇဝင် ၉:၃-၇) ရှောလုပြစ်မှားခဲ့သောဂိဗောင်အမျိုးသားတို့အတွက် ဂလဲ့စားချေချိန်တွင် ယင်းကိုဒါဝိဒ်သတိရခဲ့သည်။ မိမိနှင့်ယောနသန်စပ်ကြားပြုခဲ့သော ‘ယေဟောဝါရှေ့သစ္စာကတိ’ ကိုသတိရကာ ယောနသန်၏သား မေဖိဗောရှက်အသက်ကို ချမ်းသာပေးခြင်းဖြင့် ဒါဝိဒ်သည် ချစ်ခင်ကြင်နာမှုပြခဲ့သည်။ (၂ ဓမ္မရာဇဝင် ၂၁:၇၊ ၈) ကျွန်ုပ်တို့လည်း ‘ကျွန်ုပ်တို့၏အဟုတ်ကို အဟုတ်’ ဖြစ်စေကြသလော။ (ယာကုပ် ၅:၁၂) ကျွန်ုပ်တို့သည် အသင်းတော်အကြီးအကဲများဖြစ်ကြပါမူ ယုံကြည်သူချင်းတို့သည် ချစ်ခင်ကြင်နာမှုပြခံလိုသည့်အခါ ထပ်တူကရုဏာမျိုးပြကြပါသလော။

ကြင်နာမှုသည် နှောင်ကြိုးများကို ခိုင်မြဲစေ

၁၀။ ရုသ၏ချစ်ခင်ကြင်နာမှုကြောင့် မည်သို့ကောင်းချီးရသနည်း။

^၁၀ ချစ်ခင်ကြင်နာမှုသည် အိမ်ထောင်နှောင်ကြိုးကို ခိုင်မြဲစေပြီး ပျော်ရွှင်မှုတိုးပွားစေသည်။ ယင်းသို့ဖြစ်ကြောင်း မောဘအမျိုးသမီး ရုသအဖြစ်အပျက်က ထင်ရှားသည်။ ဗက်လင်မြို့အနီး အသက်ကြီးသူဗောဇ၏လယ်ကွင်းတွင် ကောက်သင်းကောက်သူအဖြစ် သူမအလုပ်ကြိုးပမ်းပြီး ချို့တဲ့သောမုဆိုးမဖြစ်သူ၊ ယောက္ခမနောမိနှင့်မိမိအတွက် ဝမ်းစာရှာခဲ့သည်။ (ရုသ ၂:၁၄-၁၈) နောင်တွင် ရုသအားဗောဇက “သင်သည် ငွေရတတ်သောလူပျို၊ ဆင်းရဲသောလူပျိုတစ်စုံတစ်ယောက်ကိုမမှီမဝဲဘဲနေ၍ အရင်ပြုသောကျေးဇူးထက် နောက်ပြုသောကျေးဇူး သာ၍ကြီး၏” ဟုဆိုသည်။ (ရုသ ၃:၁၀) နောမိအား ရုသသည် ဦးစွာချစ်ခင်ကြင်နာမှုပြသည်။ “နောက်ပြုသောကျေးဇူး” က မိမိ၏သေလွန်သောခင်ပွန်းနှင့် သက်ကြီးရွယ်အိုနောမိအတွက် မျိုးဆက်ရှိစေရန် သက်ကြီးသူဗောဇကိုထိမ်းမြားရန်အသင့်ရှိခြင်းဖြင့် ချစ်ခင်ကြင်နာမှုပြခြင်းဖြစ်သည်။ ဗောဇအားဖြင့် ရုသသည် ဒါဝိဒ်၏အဘိုး ဩဗက်၏မိခင်ဖြစ်လာလေသည်။ ယေရှုခရစ်၏ဘိုးဘွားစာရင်းဝင်သူဖြစ်စေခြင်းဖြင့် ဘုရားသခင်သည် သူမအား “စုံလင်သောဆု” ချပေးတော်မူသည်။ (ရုသ ၂:၁၂။ ၄:၁၃-၁၇။ မဿဲ ၁:၃-၆၊ ၁၆။ လုကာ ၃:၂၃၊ ၃၁-၃၃) သူမနှင့်သူမ၏အိမ်ထောင်စုအတွက် ရုသ၏ချစ်ခင်ကြင်နာမှုသည် ကောင်းချီးကြွယ်ဝလှသည်တကား။ ယနေ့ ဘုရားတရားကြည်ညိုသောအိမ်ထောင်များတွင် ချစ်ခင်ကြင်နာမှုရှိသောအခါ ကောင်းချီးများ၊ ပျော်ရွှင်မှုနှင့်အိမ်ထောင်နှောင်ကြိုးခိုင်မြဲခြင်း ဖြစ်ပေါ်စေသည်။

၁၁။ ဖိလေမုန်၏ကြင်နာမှုက အဘယ်အကျိုးသက်ရောက်ခဲ့သနည်း။

^၁၁ ကြင်နာမှုသည် ယေဟောဝါလူမျိုး၏အသင်းတော်များအတွင်း နှောင်ကြိုးခိုင်မြဲစေသည်။ ခရစ်ယာန်အမျိုးသား ဖိလေမုန်သည် ယုံကြည်သူချင်းတို့အား ချစ်ခင်ကြင်နာမှုပြခြင်းအတွက် နာမည်ကျော်ကြားခဲ့သည်။ ပေါလုကသူ့အားဤသို့ဆိုသည်။ “သင်သည် သခင်ယေရှုခရစ်ကိုယုံကြည်၍ သန့်ရှင်းသူအပေါင်းတို့ကိုချစ်သည်ဟု ငါသည်ကြားလျှင် ငါ၏ဘုရားသခင့်ကျေးဇူးတော်ကို အစဉ်ချီးမွမ်း၍ သင့်အဖို့အလိုငှာ ဆုတောင်းပတ္ထနာပြုလျက်နေ၏။ . . . အချင်းငါ့ညီ၊ သင်သည် သန့်ရှင်းသူတို့၏စိတ်နှလုံးကို သက်သာစေသောကြောင့် သင်၏မေတ္တာကိုထောက်၍ ငါတို့သည် အလွန်ဝမ်းမြောက်ချမ်းသာခြင်းရှိ၏။” (ဖိလေမုန် ၄-၇) ဖိလေမုန်အားဖြင့် သန့်ရှင်းသူများ မည်သို့ဝမ်းမြောက်ချမ်းသာရရှိသည်ကို ကျမ်းစာမဖေါ်ပြပါ။ သို့ရာတွင် ဘိသိက်ခံချင်းတို့အတွက် ချမ်းသာရရှိသော နည်းအမျိုးမျိုးဖြင့် ချစ်ခင်ကြင်နာမှုပြခဲ့ပေမည်။ ယင်းကလည်း သူတို့နှောင်ကြိုးကိုပိုခိုင်မြဲစေခဲ့မည်အမှန်။ ယနေ့ ခရစ်ယာန်များချစ်ခင်ကြင်နာမှုပြကြသည့်အခါ ထပ်တူပင်ဖြစ်တတ်ပါသည်။

၁၂။ ဩနေသိဖော်၏ကြင်နာမှုမှ အဘယ်အကျိုးဖြစ်ထွန်းသနည်း။

^၁၂ ဩနေသိဖော်၏ကြင်နာမှုသည်လည်း အကျိုးပေးခဲ့သည်။ ပေါလုက“ထာဝရဘုရား၏ကရုဏာတော်သည် ဩနေသိဖော်၏အိမ်၌ သက်ရောက်ပါစေသော။ သူသည် ငါ့ကိုအဖန်ဖန်သက်သာစေပြီ။ ငါ၌သံကြိုးချည်နှောင်လျက်ရှိသော်လည်း သူသည်ရှက်ကြောက်ခြင်းမရှိဘဲ ရောမမြို့သို့ရောက်သောအခါ သာ၍ကြိုးစားလျက် ငါ့ကိုရှာ၍တွေ့၏။ သူသည် ထိုနေ့ရက်၌ သခင်ဘုရား၏လက်မှ ကရုဏာတော်ကိုခံရမည်အကြောင်း ထာဝရဘုရားသည် ပေးသနားတော်မူပါစေသော။ သူသည် ဧဖက်မြို့၌လည်း ငါ့ကိုအဘယ်မျှလောက်ပြုစုသည်ကို သင်သည်အမှန်သိ၏” ဟုဆိုသည်။ (၂ တိမောသေ ၁:၁၆-၁၈) ဝတ်ပြုသူချင်းတို့အား ချစ်ခင်ကြင်နာမှုကြိုးစား၍ပြကြမည်ဆိုလျှင် ကျွန်ုပ်တို့ပျော်ရွှင်မှုရှိပြီး ခရစ်ယာန်အသင်းတော်အတွင်း ညီအစ်ကိုချင်းမေတ္တာနှောင်ကြိုးကိုလည်း ခိုင်မြဲစေပါလိမ့်မည်။

၁၃၊ ၁၄။ ဖိလိပ္ပိမြို့ရှိအသင်းတော်သည် အဘယ်နည်းဖြင့် ပုံသက်သေကောင်းဖြစ်ခဲ့သနည်း။ ၄င်း၏ကြင်နာမှုကို ပေါလု မည်သို့တုံ့ပြန်ခဲ့သနည်း။

^၁၃ အသင်းတော်လိုက် ဝတ်ပြုသူချင်းတို့အား ချစ်ခင်ကြင်နာမှုပြသည့်အခါ သူတို့အချင်းချင်းဖွဲ့စည်းထားသောနှောင်ကြိုးကို ခိုင်မြဲစေသည်။ ဤကဲ့သို့စည်းကြပ်သောနှောင်ကြိုးမျိုးသည် ပေါလုနှင့် ဖိလိပ္ပိမြို့ရှိအသင်းတော်စပ်ကြား၌ရှိသည်။ အမှန်မှာ ဖိလိပ္ပိအသင်းတော်ထံ သူစာရေးခဲ့ရခြင်းအကြောင်းမှာ သူတို့၏ကြင်နာမှုနှင့်ထောက်ပံ့ကူညီမှုကို ကျေးဇူးတင်ကြောင်းတင်ပြရန်အတွက်ဖြစ်သည်။ သူဤသို့ရေးခဲ့သည်။ “ဧဝံဂေလိတရားကိုဟောစပြု၍ မာကေဒေါနိပြည်မှ ငါထွက်ဆဲရှိသောအခါ အလှူလှူခြင်း၊ အလှူခံခြင်းအမှု၌ သင်တို့မှတစ်ပါး အဘယ်အသင်းတော်မျှ ငါနှင့်မဆက်ဆံကြ။ သက်သာလောနိတ်မြို့၌ငါရှိစဉ်ပင် ငါလိုသောအရာကို သင်တို့သည် နှစ်ကြိမ်တိုင်အောင်ပေးလိုက်ကြ၏။ . . . ယခုအခါ အရာရာ၌ငါရတတ်၏။ ဥစ္စာကြွယ်ဝ၏။ မွှေးကြိုင်သောအနံ့နှင့်ပြည့်စုံ၍ ဘုရားသခင်နှစ်သက်အားရတော်မူသောယဇ်တည်းဟူသော သင်တို့ပေးလိုက်သောအရာတို့ကို ဧပဖြောဒိတ်လက်မှ ငါခံရသည်ဖြစ်၍ ကြွယ်ဝလျက်ရှိ၏။”—ဖိလိပ္ပိ ၄:၁၅-၁၈။

^၁၄ ယင်းကြောင့် ကြင်နာစိတ်ရှိသောဖိလိပ္ပိအသင်းတော်သားများအတွက် ပေါလုဆုပတ္ထနာပြုခဲ့ခြင်းသည် အံ့ဩစရာမဟုတ်ပေ။ သူဤသို့ဆိုသည်။ “ငါသည် ဆုတောင်းပတ္ထနာပြုသောအခါခါ ဝမ်းမြောက်သောစိတ်နှင့်သင်တို့ရှိသမျှအဖို့ကို အစဉ်ဆုတောင်းပတ္ထနာပြုလျက် သင်တို့ကိုအောက်မေ့သောအခါအခါ၊ သင်တို့သည်ရှေ့ဦးစွာသောနေ့ရက်မှစ၍ ယခုတိုင်အောင် ဧဝံဂေလိတရားကိုဆက်ဆံ၍ခံစားကြောင်းကို ငါထောက်သဖြင့် ဘုရားသခင်၏ကျေးဇူးတော်ကိုချီးမွမ်းပါ၏။” (ဖိလိပ္ပိ ၁:၃-၅) ဤကဲ့သို့သောကြင်နာမှုဖြင့် ဘုရားသခင့်နိုင်ငံသတင်းဟောပြောခြင်းလုပ်ငန်းကို ရက်ရက်ရောရောထောက်ပံ့ပေးခြင်းသည် အသင်းတော်အား ဘယ်သောအခါမျှ ဆင်းရဲချို့ငဲ့စေမည်မဟုတ်ပါ။ ယင်းနှင့်စပ်လျဉ်း၍ ဖိလိပ္ပိအသင်းသားများ ကြင်နာမှုရှိရှိပြုမူကြပြီးနောက် သူတို့အား ပေါလုဤသို့စိတ်ချစေခဲ့သည်။ “ငါ၏ဘုရားသခင်သည် ဘုန်းအာနုဘော်၌ စံပယ်တော်မူသောစည်းစိမ်ရှိသည်အတိုင်း သင်တို့အလိုရှိသမျှတို့ကို ယေရှုခရစ်အားဖြင့် ပြည့်စုံစေတော်မူလိမ့်မည်။” (ဖိလိပ္ပိ ၄:၁၉) မှန်ပါသည်။ ကြင်နာမှုနှင့်ရက်ရောမှုကို ဘုရားသခင်ဆုချတော်မူသည်။ ကိုယ်တော်၏နှုတ်ကပါဌ်တော်က ဤသို့ဆိုသည်။ “ကောင်းသောအကျင့်ကိုကျင့်သောသူမည်သည်ကား . . . သခင်ဘုရား [ယေဟောဝါ၊ NW] ၏လက်တော်မှအကျိုးကိုခံရလိမ့်မည်။”—ဧဖက် ၆:၈။

အမျိုးသမီးများ ကြင်နာမှုပြကြသောအခါ

၁၅၊ ၁၆။ (က) ဒေါ်ကာ၏ကြင်နာမှုကို မည်သို့မှတ်မိကြသနည်း။ သူမသေဆုံးသောအခါ ဘာဖြစ်ပျက်ခဲ့သနည်း။ (ခ) ယနေ့ ကြင်နာမှုရှိခရစ်ယာန်အမျိုးသမီးများသည် ကောင်းသောအကျင့်များကို မည်သို့များစွာပြုကြသနည်း။

^၁၅ ယုပ္ပေမြို့မှတပည့်မဒေါ်ကာ (တဗိသ) ၏ချစ်ခင်ကြင်နာမှုသည် ဆုချမခံရဘဲမဖြစ်ခဲ့။ “ထိုမိန်းမသည် ကောင်းသောအကျင့်၊ စွန့်ကြဲခြင်းအကျင့်နှင့်ပြည့်စုံလျက်” ‘ဖျားနာ၍သေသောအခါ’ လုဒ္ဒမြို့သို့ ပေတရုထံတပည့်များသည် လူစေလွှတ်ခေါ်လာစေသည်။ သူရောက်လာသည်နှင့် “အထက်ခန်းသို့ခေါ်ပင့်၍ မုဆိုးမများတို့သည် ငိုကြွေးလျက် သူတို့နှင့်အတူ ဒေါ်ကာရှိစဉ်အခါလုပ်ခဲ့သောအင်္ကျီနှင့်အဝတ်များကိုပြ” ကြသည်။ ထိုမြင်ကွင်းကို မြင်ယောင်လိုက်ပါ။ ဒေါ်ကာသည် မည်မျှကြင်နာမှုရှိကြောင်း မျက်ရည်တလည်လည်နှင့် တမန်တော်အား မုဆိုးမများဝမ်းနည်းစွာပြောပြနေမည်။ သူမ၏ချစ်ခြင်းမေတ္တာနှင့်ကြင်နာမှု၏သက်သေအဖြစ် ထိုအင်္ကျီများကို ထုတ်ပြနေမည်။ အားလုံးကို အပြင်သို့ထွက်စေပြီး ပေတရုဒူးထောက်ဆုတောင်းကာ ရုပ်ကလာပ်ဘက်သို့လှည့်၏။ နားဆင်ပါ။ သူက “တဗိသ၊ ထလော့” ဟုဆိုသည်။ ထိုသို့နှင့် ရှုစားဦးလော့။ “ထိုမိန်းမသည်မျက်စိကိုဖွင့်၍ ပေတရုကိုမြင်လျှင် ထ၍ထိုင်၏။ ပေတရုသည် မိမိလက်ကိုသူ့အားပေး၍ ချီကြွပြီးမှ သန့်ရှင်းသူတို့နှင့်မုဆိုးမတို့ကိုခေါ်၍ အသက်ရှင်လျက်ရှိသောမိန်းမကိုပြလေ၏။” (တမန်တော် ၉:၃၆-၄၁) ဘုရားသခင်ထံတော်မှ ကြီးမြတ်လှသောကောင်းချီးပါတကား။

^၁၆ ဤကား ယေရှုခရစ်၏တမန်တော်တစ်ပါးပြုသော မှတ်တမ်းတင်သည့် ပထမဆုံးထမြောက်ခြင်းပင်ဖြစ်သည်။ ဤအံ့ချီးဖွယ်အမှုဖြစ်ပေါ်စေသည့်အခြေအနေများသည် ကြင်နာမှု၌အခြေခံပါသည်။ ဒေါ်ကာသာ ချစ်ခင်ကြင်နာမှုကို ကြွယ်ဝစွာမတင်ပြ၊ ကောင်းသောအကျင့်၊ စွန့်ကြဲခြင်းအကျင့်နှင့် မပြည့်စုံခဲ့လျှင် အသက်ရှင်ပြန်ထမြောက်ခွင့်ရမည်ဟု မည်သူဆိုနိုင်မည်နည်း။ ဒေါ်ကာနှင့် ထိုမုဆိုးမများကောင်းချီးရသည်သာမက သူမ၏ရှင်ပြန်ထမြောက်ခြင်းအံ့ဖွယ်ရာကြောင့် ဘုရားသခင်၏ဘုန်းတော်အတွက် သက်သေခံချက်ဖြစ်ခဲ့ပေသည်။ မှန်သည်။ “ထိုအကြောင်းကို ယုပ္ပေမြို့၌ အနှံ့အပြားသိကြ၍ လူများတို့သည် သခင်ဘုရားကိုယုံကြည်ခြင်းသို့ရောက်ကြ၏။” (တမန်တော် ၉:၄၂) ယနေ့ ကြင်နာမှုရှိသောခရစ်ယာန်အမျိုးသမီးများသည်လည်း ယုံကြည်သူချင်းများအတွက် အင်္ကျီများချုပ်ပေးခြင်း၊ သက်ကြီးရွယ်အိုများအတွက် ချက်ပြုတ်ပေးခြင်း၊ သူတစ်ပါးအား ဧည့်ဝတ်ပျူငှာခြင်း အစရှိသည့်ကောင်းသောအကျင့်များကို များစွာပြုတတ်ကြသည်။ (၁ တိမောသေ ၅:၉၊ ၁၀) ယင်းကား တွေ့မြင်သူတို့အတွက် သက်သေခံချက်ကောင်းဖြစ်ပေသည်။ အလုံးစုံတို့ထက် ဘုရားရေးရာဆက်ကပ်အပ်နှံခြင်းနှင့်ချစ်ခင်ကြင်နာမှုသည် ဤ ‘အမျိုးသမီးတပ်မဟာအား သတင်းကောင်းကြေညာ’ ရန်လှုံ့ဆော်ပေးသဖြင့် ယေဟောဝါဘုရား၏ဘုန်းတော်ထင်ရှားသည့်အတွက် မည်မျှဝမ်းသာအားရနိုင်သည်တကား။—ဆာလံ ၆၈:၁၁။

ချစ်ခင်ကြင်နာမှုကို အမြဲမီအောင်လိုက်လေ

၁၇။ သု၊ ၂၁:၂၁ တွင် မည်သို့ဆိုသနည်း။ ဘုရားတရားကြည်ညိုသူများနှင့် ထိုစကားများမည်သို့သက်ဆိုင်သနည်း။

^၁၇ ဘုရားသခင့်မျက်နှာသာတော်ခံစားလိုသူအားလုံး ချစ်ခင်ကြင်နာမှုကို မီအောင်လိုက်ရမည်။ ပညာရှိစကားတစ်ခွန်းက “ဖြောင့်မတ်ခြင်းတရားနှင့်ကရုဏာတရား [ချစ်ခင်ကြင်နာမှု၊ NW] ကိုရှာသောသူသည် အသက်ရှင်ခြင်း၊ ဖြောင့်မတ်ခြင်း၊ ဂုဏ်အသရေထင်ရှားခြင်းကိုတွေ့တတ်၏။” (သု၊ ၂၁:၂၁) ဘုရားတရားကြည်ညိုသူသည် ဘုရားသခင့်ဖြောင့်မတ်ခြင်းကို ကြိုးစား၍မီအောင်လိုက်သည်။ မြင့်မြတ်သောစံချိန်များ၏လမ်းပြညွှန်ကြားမှုကို အမြဲခံယူသည်။ (မဿဲ ၆:၃၃) သူတစ်ပါးအား ကာယရေးနှင့်အထူးသဖြင့်ဝိညာဉ်ရေးအရ သစ္စာရှိမေတ္တာ သို့မဟုတ် ချစ်ခင်ကြင်နာမှုကို အဆက်မပြတ်တင်ပြသည်။ သို့ဖြင့် ဖြောင့်မတ်ခြင်းကိုသူရှာတွေ့သည်။ အကြောင်းမူကား၊ ယေဟောဝါ၏ဝိညာဉ်တော်သည် ဖြောင့်မတ်သောနည်းလမ်းအတိုင်းအသက်ရှင်စေရန် သူ့အားအထောက်အကူပြုပေသည်။ အမှန်မှာ ဘုရားတရားကြည်ညိုသူယောဘနည်းတူ သူသည် ‘ဖြောင့်မတ်ခြင်းပါရမီကိုဝတ်ဆင်’ ထားမည်။ (ယောဘ ၂၉:၁၄) ဤကဲ့သို့သောသူသည် မိမိဘုန်းထင်ရှားရန် မရှာကြံ။ (သု၊ ၂၅:၂၇) ၄င်းအစား ယေဟောဝါသူ့အားရရှိစေသော မည်သည့်ဘုန်းထင်ရှားမှုကိုမဆိုခံယူပါသည်။ လူလူချင်းတို့အား ကိုယ်တိုင်ချစ်ခင်ကြင်နာမှုပြသဖြင့် သူ့အားကြင်နာစွာဆက်ဆံရန် တိုက်တွန်းလှုံ့ဆော်ခံရသူများထံမှ ရိုသေလေးစားမှုရရှိကောင်းရရှိမည်။ ထို့ပြင် ဘုရားသခင့်အလိုတော်ကို သစ္စာရှိရှိဆောင်ရွက်သူတို့သည် အလျင်အမြန်ကုန်လွန်သောနှစ်အနည်းငယ်အတွက်သာမဟုတ် ထာဝစဉ်ကာလအတွက် အသက်ရှင်ခြင်းကိုရှာတွေ့သည်။

၁၈။ ချစ်ခင်ကြင်နာမှုကို ကျွန်ုပ်တို့အဘယ်ကြောင့် မီအောင်လိုက်သင့်သနည်း။

^၁၈ ထိုကြောင့် ယေဟောဝါဘုရားသခင်ကိုချစ်မြတ်နိုးသူအားလုံး ချစ်ခင်ကြင်နာမှုကို မီအောင်လိုက်ကြလော့။ ယင်းအရည်အချင်းကိုဘုရားသခင်သော်လည်းကောင်း၊ အခြားသူများသော်လည်းကောင်းမြတ်နိုးပါသည်။ ယင်းက ဧည့်ဝတ်ပျူငှာချင်စိတ်ကိုတိုးပွားစေ၍ စာနာစိတ်ရှိစေသည်။ ကြင်နာမှုသည် မိသားစုအတွင်းနှင့်ခရစ်ယာန်အသင်းတော်တွင် နှောင်ကြိုးများကို ခိုင်မြဲစေသည်။ ချစ်ခင်ကြင်နာမှုပြသောအမျိုးသမီးများသည် ကျေးဇူးတင်ခံရပြီး အလွန်မြတ်နိုးခံရကြသည်။ ဤထူးမြတ်သောအရည်အချင်းကို မီအောင်လိုက်သူအားလုံး ချစ်ခင်ကြင်နာမှုအရှင် ယေဟောဝါဘုရားသခင်၏ဘုန်းတော်ထင်ရှားစေသတည်း။

သင်မည်သို့ဖြေဆိုမည်နည်း

▫ ကြင်နာမှုပြရာတွင် အာဗြဟံသည် ပုံသက်သေကောင်း မည်သို့ဖြစ်သနည်း။

▫ ကြင်နာမှုကိုကျေးဇူးဆပ်ခြင်းအကြောင်း ရာခပ်၏အဖြစ်အပျက်က ကျွန်ုပ်တို့အားမည်သို့သွန်သင်ပေးသနည်း။

▫ ဖိလိပ္ပိအသင်းတော်သည် ကြင်နာမှုကိုမည်သို့ပြခဲ့သနည်း။

▫ ယနေ့ ကြင်နာစိတ်ရှိခရစ်ယာန်အမျိုးသမီးများသည် ကောင်းသောအကျင့်များကို မည်သို့ကျင့်ကြသနည်း။

▫ ချစ်ခင်ကြင်နာမှုကို အဘယ်ကြောင့်မီအောင်လိုက်သင့်သနည်း။