၁၉၉၆ ခုနှစ်အတွက် သီအိုကရက်တစ် ဓမ္မအမှုကျောင်း

ကျိုးကြောင်းဆင်ခြင် စာအုပ် [လိပ်] မှ နံပါတ် ၄ ကျောင်းသားအတွက်

ဇန် ၁ (ကက စ. ၃၃၃ အပိုဒ် ၃–စ. ၃၃၄ အပိုဒ် ၃)

ရှင်ပြန်ထမြောက်ခြင်းဟူသည် ရုပ်မဲ့စိုးလ်နှင့် သွေးသားခန္ဓာပေါင်းစပ်ခြင်းလော

ထိုသို့ ဖြစ်နိုင်ရန်၊ လူ၌ သွေးသားခန္ဓာမှ ခွဲထွက်နိုင်သော ရုပ်မဲ့စိုးလ်တစ်ခု ရှိဖို့လိုသည်။ ကျမ်းစာက ဤသို့မသွန်သင်ပါ။ ထိုအယူအဆကို ဂရိအတွေးအခေါ်မှရယူခဲ့ခြင်းဖြစ်သည်။ စိုးလ်နှင့်ပတ်သက်သောကျမ်းစာသွန်သင်ချက်အကြောင်းကို စာမျက်နှာ ၃၇၅-၃၇၈ ၌ဖော်ပြထား၏။ ခရစ်ယာန်ဘောင်၏ မသေနိုင်သောရုပ်မဲ့စိုးလ်အယူဆိုင်ရာဇာစ်မြစ်ကိုသိလိုလျှင် စာမျက်နှာ ၃၇၉၊ ၃၈၀ တွင်ရှု။

ယေရှုသည် သွေးသားခန္ဓာဖြင့်ထမြောက်သလော။ ယခု ကောင်းကင်၌ ထိုခန္ဓာမျိုးဖြင့်နေသလော

၁ ပေ. ၃:၁၈၊ သမ– “ခရစ်တော်လည်း သင်တို့ကို ဘုရားသခင့်ထံ ပို့သွင်းရအံ့သောငှာ သူတော်ကောင်းအဖြစ်၊ မသူတော်တို့အဖို့ အပြစ်များအတွက် တစ်ကြိမ်တည်းအသေခံတော်မူ၏။ ရုပ်ခန္ဓာ၌ သေဒဏ်ခံသော်လည်း နာမ်ခန္ဓာ၌ [“နာမ်ဝိညာဉ်အားဖြင့်၊” သမ္မာ; “ဝိညာဉ်တော်အားဖြင့်၊” သမ္မာကျမ်း; “ဝိညာဉ်အားဖြင့်၊” သက] ရှင်တော်မူ [၏။]” (ယေရှု သေရာမှထမြောက်စဉ် နာမ်ခန္ဓာဖြင့်ဖြစ်၏။ ဂရိစာ၌ “အသွေးအသား” နှင့် “နာမ်ဝိညာဉ်” တို့ကို ဆန့်ကျင်သောတရားများအဖြစ် တင်ပြထားပြီး နှစ်ခုစလုံးလည်း သွယ်ဝိုက်ကံနှင့်ဆိုင်သော ကာရကအမျိုးအစားဖြစ်သည်။ ထို့ကြောင့် ဘာသာပြန်သူသည် “နာမ်ဝိညာဉ်အားဖြင့်” ဟူ၍ပြန်ဆိုလျှင် ၎င်းနှင့်အညီ “ကိုယ်ခန္ဓာအားဖြင့်” ဟူ၍ ပြန်ဆိုသင့်သည်။ “ကိုယ်ခန္ဓာ၌” ဟူ၍ပြန်ဆိုလျှင် “နာမ်ဝိညာဉ်၌” ဟူ၍ တစ်သမတ်တည်း ပြန်ဆိုသင့်၏။)

တ. ၁၀:၄၀၊ ၄၁– “သုံးရက်မြောက်သောနေ့၌ ဘုရားသခင်သည် [ယေရှုခရစ်ကို] ထမြောက်စေတော်မူ၍ လူအပေါင်းတို့အား ထင်ရှားစွာပြတော်မမူ။ ဘုရားသခင်ခန့်ထားတော်မူနှင့်သော သက်သေခံတည်းဟူသော ငါတို့အား ထင်ရှားစွာပြတော်မူ၏။” (အခြားသူများလည်း ကိုယ်တော်.ကို အဘယ်ကြောင့်မမြင်ရကြသနည်း။ နာမ်ဝိညာဉ်သတ္တဝါဖြစ်တော်မူသောကြောင့်တည်း။ ထို့ ပြင် ရှေးကကောင်းကင်တမန်များနည်းတူ အသွေးအသားကိုယ်ခန္ဓာဖြင့်ထင်ရှားသောအခါ တပည့်တော်များရှေ့မှာသာ ပြတော်မူသည်။)

၁ ကော. ၁၅:၄၅– “ရှေ့ ဦးစွာသောလူအာဒံသည် အသက်ရှင်သောသတ္တဝါဖြစ်၏ဟုလာသတည်း။ ယခုတွင် နောက်ဆုံးဖြစ်သောအာဒံ [ဖန်ဆင်းစကအာဒံကဲ့သို့စုံလင်သောယေရှုခရစ်] မူကား အသက်ရှင်စေတတ်သောဝိညာဉ်ဖြစ်၏။”

ဇန် ၈ (ကက စ. ၃၃၄ အပိုဒ် ၄–စ. ၃၃၅ အပိုဒ် ၂)

ယေရှုထမြောက်စဉ်က ခန္ဓာမျိုးနှင့်ပတ်သက်၍ လုကာ ၂၄:၃၆-၃၉ က ဘာကိုဆိုလိုသနည်း

လု. ၂၄:၃၆-၃၉– “[တပည့်တော်တို့] ထိုသို့အချင်းချင်းပြောဆိုသောအခါ၊ ယေရှုသည် သူတို့အလယ်၌ ရပ်တော်မူလျက် သင်တို့အား ငြိမ်သက်ခြင်းဖြစ်စေသတည်းဟု မိန့်တော်မူ၏။ တပည့်တော်တို့သည် တစ္ဆေကိုမြင်သည်ဟုစိတ်ထင်နှင့် ထိတ်လန့်ကြောက်ရွံ့ ခြင်းသို့ရောက်ကြ၏။ ကိုယ်တော်ကလည်း၊ အဘယ်ကြောင့် တုန်လှုပ်ခြင်းရှိကြသနည်း။ အဘယ်ကြောင့် အထူးထူးအထွေထွေသောစိတ်ရှိကြသနည်း။ ငါ့လက်ကိုကြည့်ကြလော့။ ငါ့ခြေကိုလည်းကြည့်ကြလော့။ ငါ့ကိုယ်ပင်ဖြစ်၏။ ငါ့ကိုကြည့်ရှုစမ်းသပ်ကြလော့။ ငါသည် သင်တို့မြင်သည်အတိုင်း အရိုးအသားနှင့်ပြည့်စုံ၏။ တစ္ဆေမည်သည်ကား ဤကဲ့သို့မပြည့်စုံဟု မိန့်တော်မူ [၏။]”

လူသားတို့သည် နာမ်ဝိညာဉ်များကိုမမြင်နိုင်။ ထို့ကြောင့် တပည့်တော်တို့က မိမိတို့သည် တစ္ဆေ သို့မဟုတ် ရူပါရုံမြင်သည်ဟု ထင်ကြသည်။ (မာကု ၆:၄၉၊ ၅၀ နှင့်နှိုင်းယှဉ်။) ယေရှုက မိမိ တစ္ဆေမဟုတ်ကြောင်း သူတို့ကိုစိတ်ချစေတော်မူ၏။ သူတို့သည် ကိုယ်တော့်အသွေးအသားခန္ဓာကိုမြင်နိုင် ကိုင်နိုင်ပြီး အရိုးတော်ကိုလည်းထိတွေ့နိုင်၏။ သူတို့ရှေ့ မှာလည်း စားတော်ခေါ်၏။ ထို့နည်းတူ၊ ရှေးကလည်း ကောင်းကင်တမန်များသည် ရုပ်ခန္ဓာကိုဆောင်ပြီး လူတို့ရှေ့ ကိုယ်ယောင်ပြကြသည်။ စားသောက်ကြသည်။ အချို့ဆိုလျှင် အိမ်ထောင်ပြုပြီး သားသမီးများပင်ထွန်းကားကြသည်။ (က. ၆:၄; ၁၉:၁-၃) ယေရှုထမြောက်တော်မူသည့်နောက်၌ တစ်မျိုးတည်းသောရုပ်ခန္ဓာဖြင့် အစဉ်ထင်ရှားတော်မမူ။ (မိမိသည် နာမ်ဝိညာဉ်ဖြစ်ပြီဟူသောအချက်ကို တပည့်တော်တို့စိတ်ထဲစွဲမှတ်စေလို၍ထိုသို့ ပြုခြင်းဖြစ်နိုင်၏။) ထို့ကြောင့်လည်း ကိုယ်တော်နှင့်ရင်းနှီးစွာပေါင်းဖော်သူများပင် ကိုယ်တော့်အား မြင်မြင်ချင်း မှတ်မိကြသည်မဟုတ်။ (ယော. ၂၀:၁၄၊ ၁၅; ၂၁:၄-၇) သို့ရာတွင် ရုပ်ခန္ဓာဖြင့် သူတို့ရှေ့ အဖန်ဖန်ပေါ်ထွန်းပြီး သူတို့ပြန်၍သတိရလောက်သော စကားနှင့်အပြုအမူများကို ပြောဆိုပြုမူခြင်းအားဖြင့် မိမိ အမှန်ပင် သေခြင်းမှထမြောက်ကြောင်း ခိုင်မာစွာယုံကြည်စေတော်မူ၏။

တပည့်တော်တို့သည် ယခုယေရှုကောင်းကင်၌ရှိသောခန္ဓာတော်ဖြင့် ကိုယ်တော်ကို တကယ်မြင်ကြခြင်းဖြစ်ခဲ့ပါမူ ဘုန်းပွင့်သောခရစ်တော်ကို “[ဘုရားသခင်၏] ဇာတိအဖြစ်တော်၏ပုံသဏ္ဌာန်” ဟူ၍ တမန်တော်ပေါလု ညွှန်းဆိုတော့မည်မဟုတ်။ အကြောင်းမှာ၊ ဘုရားသခင်သည် နာမ်ဝိညာဉ်ဖြစ်၍ ဘယ်အခါကမျှ အသွေးအသားဖြစ်ခဲ့တော်မမူ။—ဟေဗြဲ ၁:၃; ၁ တိမောသေ ၆:၁၆ နှင့်နှိုင်း။

စာမျက်နှာ ၃၃၄ ၌ ကိုးကားသော ၁ ပေတရု ၃:၁၈ နှင့် ၁ ကောရိန္သု ၁၅:၄၅ တို့ကို စွဲမှတ်ထားလျှင် ယေရှုထမြောက်သည့်နောက်ပိုင်း ကိုယ်ယောင်တော်ပြခြင်းအကြောင်းတို့ကိုဖတ်ရှုသောအခါ မှန်ကန်စွာသဘောပေါက်နိုင်ပေမည်။

ဇန် ၁၅ (ကက စ. ၃၃၅ အပိုဒ် ၄–စ. ၃၃၆ အပိုဒ် ၂)

ခရစ်တော်နှင့်အတူ ကောင်းကင်အသက်တာကိုခံစားစေရန် မည်သူများအား ထမြောက်စေတော်မူမည်နည်း။ သူတို့ ကောင်းကင်၌ ဘာပြုကြမည်နည်း

လု. ၁၂:၃၂– “သိုးစုငယ်၊ သင်တို့သည် မကြောက်ကြနှင့်။ သင်တို့အဘသည် သင်တို့အား နိုင်ငံကိုပေးခြင်းငှာ အလိုရှိတော်မူ၏။” (ယုံကြည်သူတိုင်း သိုးစုငယ်၌ ပါဝင်သည်မဟုတ်။ အရေအတွက် အကန့်အသတ်ရှိသည်။ ရည်ရွယ်ချက်တစ်ခုဖြင့် သူတို့ကောင်းကင်သို့သွားရခြင်းဖြစ်သည်။)

ဗျာ. ၂၀:၄၊ ၆– “ပလ္လင်များကိုလည်း ငါမြင်၏။ ပလ္လင်ပေါ်မှာထိုင်သောသူတို့သည် တရားစီရင်ရသောအခွင့်ကိုရကြ၏။ . . . ပထမထမြောက်ခြင်းကို ဝင်စားသောသူသည် မင်္ဂလာရှိသောသူ၊ သန့်ရှင်းသောသူဖြစ်၏။ ထိုသို့သောသူသည် ဒုတိယသေခြင်း၏လက်နှင့်ကင်းလွတ်လျက် ဘုရားသခင်၏ယဇ်ပုရောဟိတ်၊ ခရစ်တော်၏ယဇ်ပုရောဟိတ်ဖြစ်၍ အနှစ်တစ်ထောင်ပတ်လုံး ခရစ်တော်နှင့်အတူ စိုးစံရကြလိမ့်မည်။”

“ကောင်းကင်” ဟူသောခေါင်းစဉ်အောက်၊ စာမျက်နှာ ၁၆၂-၁၆၈ တို့ကိုလည်းရှု။

ကောင်းကင်အသက်တာသို့ထမြောက်သောသူတို့သည် အဆုံး၌ ကောင်းကင်တွင် ဘုန်းပွင့်သော ရုပ်ခန္ဓာကိုရကြမည်လော

ဖိ. ၃:၂၀၊ ၂၁၊ သက– “သခင်ယေရှုခရစ် [သည်] . . . တန်ခိုးတော်အားဖြင့် ငါတို့၏သေကျေပျက်စီးတတ်သောကိုယ်ခန္ဓာကို ဘုန်းအသရေနှင့်ပြည့်စုံသော ကိုယ်တော်၏ကိုယ်ခန္ဓာနှင့်တူအောင် ပြောင်းလဲစေတော်မူလိမ့်မည်။” (သူတို့၏သွေးသားခန္ဓာသည် အဆုံး၌ ကောင်းကင်တွင် ဘုန်းပွင့်မည်ဟု ဆိုနေခြင်းဖြစ်သလော။ သို့တည်းမဟုတ်၊ သူတို့သည် ထမြောက်သောအခါ၊ နိမ့်ကျသောသွေးသားခန္ဓာအစား၊ ဘုန်းရှိသောဝိညာဉ်ခန္ဓာကိုရကြမည်ဟု ဆိုနေခြင်းလော။ အောက်ပါကျမ်းချက်များ ဖြေဆိုပါစေ။)

၁ ကော. ၁၅:၄၀၊ ၄၂-၄၄၊ ၄၇-၅၀၊ သမ္မာ– “ကောင်းကင်ကိုယ်လည်းရှိ၏။ မြေကြီးကိုယ်လည်းရှိ၏။ ကောင်းကင်ကိုယ်၏ဂုဏ်အသရေလည်းတစ်မျိုး၊ မြေကြီးကိုယ်၏ဂုဏ်အသရေလည်းတစ်မျိုးဖြစ်၏။ ထိုနည်းတူပင်၊ သေသောသူတို့၏ထမြောက်ခြင်းအကြောင်းအရာဖြစ်၏။ . . . စိုက်သောအခါ ဇာတိပကတိကိုယ်ဖြစ်၏။ ထမြောက်သောအခါ ဝိညာဏကိုယ်ဖြစ်၏။ . . . ရှေ့ ဦးစွာသောလူ [အာဒံ] သည် မြေကြီးကဖြစ်သောကြောင့် မြေသားဖြစ်၏။ ဒုတိယလူ [ယေရှုခရစ်] သည် ကောင်းကင်ဘုံက ဖြစ်တော်မူသတည်း။ မြေသားတို့သည် ထိုမြေသားကဲ့သို့ဖြစ်ကြ၏။ ကောင်းကင်သားတို့သည် ထိုကောင်းကင်သားကဲ့သို့ ဖြစ်ကြ၏။ ငါတို့သည် မြေသား၏ပုံသဏ္ဌာန်ကိုဆောင်သကဲ့သို့၊ ကောင်းကင်သား၏ပုံသဏ္ဌာန်ကို ဆောင်ကြလိမ့်မည်။ ညီအစ်ကိုတို့၊ ငါဆိုသည်ကား၊ လူ့အသွေးအသားသည် ဘုရားသခင်၏နိုင်ငံတော်ကို အမွေမခံနိုင်။” (ခန္ဓာနှစ်မျိုးရောနှောခြင်း၊ ကောင်းကင်သို့ သွေးသားခန္ဓာကိုဆောင်သွားခြင်း မရှိနိုင်။)

ဇန် ၂၂ (ကက စ. ၃၃၆ အပိုဒ် ၃–စ. ၃၃၇ အပိုဒ် ၃)

ရှင်ပြန်ထမြောက်ခြင်းသည် လူသားတို့အဖို့ အဘယ်အဓိပ္ပာယ်ရှိမည်ဖြစ်ကြောင်း ယေရှုမည်သို့သာဓကပြတော်မူသနည်း

ယော. ၁၁:၁၁၊ ၁၄-၄၄၊ သမ္မာ– “[ယေရှုက တပည့်တော်တို့အား] ငါတို့အဆွေလာဇရုသည် အိပ်ပျော်ပြီ။ သို့သော်လည်း သူ့ကိုနှိုးခြင်းအလိုငှာ ငါသွားမည်ဟု မိန့်တော်မူ၏။ . . . ယေရှုကလာဇရုသေပြီ။ . . . ဟုအတည့်အလင်းမိန့်တော်မူ၏။ . . . ယေရှုသည် ရောက်တော်မူသောအခါ၊ လာဇရုသည် သင်္ချိုင်းဂူ၌ လေးရက်ရှိနှင့်သည်ကို တွေ့တော်မူ၏။ . . . ယေရှုကလည်း [လာဇရု၏အစ်မတစ်ယောက်ဖြစ်သူ မာသအား] ငါသည် ထမြောက်ခြင်းအကြောင်း၊ အသက်ရှင်ခြင်းအကြောင်းဖြစ်၏ [ဟုမိန့်တော်မူ၏] . . . လာဇရု၊ ထွက်လာလော့ဟု ကြီးသောအသံနှင့်ဟစ်ခေါ်တော်မူ၏။ ထိုအခါ သေလွန်သောသူသည် ခြေလက်၌ ပုဆိုးနံငယ်နှင့် ပတ်ရစ်လျက် မျက်နှာကိုလည်း ပဝါနှင့်စည်းလျက်ထွက်လာ၏။ ယေရှုက သူ့ကိုဖြေ၍လွှတ်ကြလော့ဟု မိန့်တော်မူ၏။” (အကယ်၍ ယေရှုသည် လာဇရုအား နောက်တစ်ဘဝဖြစ်သော သုခဘုံမှ ပြန်ခေါ်ခဲ့သည်မှန်လျှင် သူ့အားကျေးဇူးပြုရာရောက်တော့မည်မဟုတ်။ သို့သော်၊ လာဇရုအား သက်မဲ့အဖြစ်မှ ထမြောက်စေတော်မူခြင်းဖြစ်၍ သူနှင့်သူ့အစ်မများအပေါ် ကျေးဇူးပြုခြင်းဖြစ်ပေသည်။ လာဇရုသည် အသက်ရှင်သူတစ်ဦးဖြစ်လာပြန်၏။)

မာ. ၅:၃၅-၄၂– “တရားဇရပ်မှူးအိမ်မှလူလာ၍ ကိုယ်တော်၏သမီးသေပါပြီ။ အဘယ်ကြောင့် ဆရာကိုနှောင့်ယှက်သေးသနည်းဟု ဆိုကြ၏။ ထိုစကားကို ယေရှုသည် ကြားလျှင် မကြောက်ကြနှင့်။ ယုံကြည်ခြင်းစိတ်တစ်ခုသာရှိစေလော့ဟု တရားဇရပ်မှူးအား ချက်ချင်းမိန့်တော်မူ၏။ [ကိုယ်တော်သည်] သူငယ်၏မိဘတို့ကိုလည်းကောင်း၊ ကိုယ်တော်နှင့်ပါသောသူတို့ကိုလည်းကောင်း ခေါ်ပြီးလျှင် သူငယ်လျောင်းရာအရပ်သို့ဝင်၍ သူငယ်၏လက်ကိုကိုင်တော်မူလျက် တလိသကုမိ ဟု မိန့်တော်မူ၏။ အနက်ကား မိန်းမငယ် ထလော့၊ ငါဆို၏ဟုဆိုလိုသတည်း။ ထိုခဏချင်းတွင် မိန်းမငယ်သည် ထ၍လှမ်းသွား၏။ သူသည် တစ်ဆယ့်နှစ်နှစ်အရွယ်ရှိ၏။ ထိုသူတို့သည် [“ပီတိအဟုန်ဖြင့်၊” ကဘ] အလွန်မိန်းမောတွေဝေခြင်းသို့ရောက်ကြ၏။” (ခရစ်တော်၏ အနှစ်တစ်ထောင်အုပ်စိုးမှုအတွင်း အထွေထွေထမြောက်ခြင်းဖြစ်ပျက်သောအခါ သန်းပေါင်းများစွာသောမိဘများနှင့် သားသမီးများ ပြန်လည်ဆုံစည်းကြရသဖြင့် ဝမ်းမြောက်ခြင်းပီတိ လျှမ်းဝေယိုဖိတ်ကြရှာမည်။)

ကမ္ဘာပေါ်သို့ထမြောက်လာသူများ အဘယ်မျှော်လင့်ချက်ရှိကြမည်နည်း

လု. ၂၃:၄၃၊ ကဘ– “သင့်အားယနေ့ ငါအမှန်ဆို၏။ သင်သည် ငါနှင့်အတူ ပရဒိသု၌ ရှိလိမ့်မည်။” (ဘုရင်ခရစ်တော်အုပ်ချုပ်မှုအောက်၌ တစ်ကမ္ဘာလုံး ပရဒိသုအဖြစ်သို့ ပြောင်းလဲသွားမည်။)

ဗျာ. ၂၀:၁၂၊ ၁၃– “သေလွန်သောသူအကြီးအငယ်တို့သည် ပလ္လင်တော်ရှေ့ မှာ ရပ်နေကြသည်ကိုငါမြင်၏။ စာစောင်များကိုဖွင့်ထား၏။ အသက်စာစောင်တည်းဟူသော အခြားတစ်ပါးသော စာစောင်ကိုလည်းဖွင့်လေ၏။ သေလွန်သောသူတို့သည် မိမိတို့အကျင့်အတိုင်း စာစောင်တို့၌ ရေးထားချက်များနှင့်အညီ တရားစီရင်ခြင်းကိုခံရကြ၏။ . . . လူအသီးအသီးတို့သည် မိမိတို့အကျင့်အတိုင်း တရားစီရင်ခြင်းကိုခံရကြ၏။” (စာစောင်များကိုဖွင့်ခြင်းက ဟေရှာယ ၂၆:၉ နှင့်အညီ ဘုရားသခင့်အလိုတော်ဆိုင်ရာ ပညာပေးခြင်းအချိန်ကို ညွှန်းနေပေသည်။ “အသက်စာစောင်” ကိုဖွင့်ခြင်းကလည်း ထိုပညာရေးစနစ်ကိုနာခံသူတို့ မိမိတို့နာမည် ထိုစာစောင်ထဲ၌ စာရင်းထည့်သွင်းခံရဖို့အခွင့်ရှိကြောင်းကိုပြပေသည်။ သူတို့သည် စုံလင်သောလူသားများအဖြစ် ထာဝစဉ်အသက်ရှင်ခြင်းတည်းဟူသော မျှော်လင့်ချက်ရှိပေသည်။)

ဇန် ၂၉ (ကက စ. ၃၃၈ အပိုဒ် ၁)

အချို့သူတို့ထမြောက်ရခြင်းမှာ တရားစီရင်ချက်ချခံရပြီးနောက် ဒုတိယသေခြင်းအပြစ်ဒဏ်ကိုခံဖို့သာလော

ယောဟန် ၅:၂၈၊ ၂၉ ၏အဓိပ္ပာယ်ကား အဘယ်နည်း။ ယင်းကျမ်းချက်က ဤသို့ဆိုသည်– “သင်္ချိုင်းများမှာရှိသောသူအပေါင်းတို့သည် သားတော်၏စကားသံကိုကြား၍ ထွက်ရမည့်အချိန်ကာလရောက်လတ္တံ့။ ကောင်းသောအကျင့်ကိုကျင့်သောသူတို့သည် အသက်ရှင်ရာထမြောက်ခြင်းသို့လည်းကောင်း၊ ဆိုးယုတ်သောအကျင့်ကိုကျင့်သောသူတို့သည် အပြစ်စီရင်ရာထမြောက်ခြင်းသို့လည်းကောင်း ထွက်ရကြလတ္တံ့။” ယေရှုမိန့်ဆိုသောအထက်ပါစကားများကို နောက်ပိုင်း၌ ယောဟန်အား ပေးတော်မူသောဗျာဒိတ်တော်နှင့်အညီ နားလည်ရန်ဖြစ်သည်။ (စာမျက်နှာ ၃၃၇ ၌ကိုးကားသော ဗျာဒိတ် ၂၀:၁၂၊ ၁၃ ကိုရှု။) ယခင် ကောင်းမှုပြုသူကော၊ မကောင်းမှုပြုလေ့ရှိသူပါ “မိမိတို့အကျင့်အတိုင်း တရားစီရင်ခြင်းကိုခံရကြ” မည်။ အဘယ်အကျင့်များနည်း။ လူတို့သည် ယခင်ဘဝကအကျင့်အကြံကြောင့် အပြစ်စီရင်ခံရမည်ဟု ကျွန်ုပ်တို့ယူမှတ်လျှင် “သေသောသူသည် အပြစ်တရား၏လက်မှ လွတ်လျက်ရှိ၏” ဟုဆိုသော ရောမ ၆:၇ နှင့်ကိုက်ညီမည်မဟုတ်။ လူတို့အား၊ ဖျက်ဆီးဖို့အတွက် ထမြောက်စေလျှင်လည်း အဓိပ္ပာယ်မဲ့သောလုပ်ရပ်ဖြစ်မည်။ ထို့ကြောင့် ယောဟန် ၅:၂၈၊ ၂၉ (က) ၌၊ ရှင်ပြန်ထမြောက်ခြင်းကို ယေရှုကြိုပြောနေခြင်းဖြစ်၍ အခန်းငယ် ၂၉ ၏ကျန်အပိုင်း၌ ထမြောက်လာသူများ လူ့စုံလင်မှုသို့ရောက်ပြီး တရားစီရင်ခံရသည့်နောက်ပိုင်း ခံရသောအကျိုးအပြစ်အကြောင်း မိန့်ဆိုနေခြင်းဖြစ်သည်။

ဖေ ၅ (ကက စ. ၃၃၈ အပိုဒ် ၂–စ. ၃၃၉ အပိုဒ် ၂)

မြေကြီးပေါ်ထမြောက်လာသူများနှင့်ပတ်သက်၍ ဗျာဒိတ် ၂၀:၄-၆ က ဘာကိုပြသနည်း

ဗျာ. ၂၀:၄-၆၊ ကဘ– “ငါသည် ပလ္လင်များကိုမြင်၏။ ပလ္လင်များပေါ်မှာ ထိုင်နေကြသူများလည်း ရှိ၏။ တရားစီရင်ခြင်းအာဏာကို သူတို့အား အပ်နှင်းတော်မူသည်။ မှန်ပေ၏၊ ယေရှုအတွက် သက်သေခံ၍ ဘုရားသခင်၏နှုတ်ကပါဌ်တော်ကိုဟောပြောသည့်အတွက် ပုဆိန်ဖြင့်ကွပ်မျက်ခံရသောသူတို့၏စိုးလ်များကို ငါမြင်၏။ . . . သူတို့သည် အသက်ရှင်လာကြပြီး ဘုရင်များအဖြစ် ခရစ်တော်နှင့်အတူ အနှစ်တစ်ထောင်အုပ်စိုးကြလေသည်။ (ကျန်လူသေတို့သည် အနှစ်တစ်ထောင်မကုန်မီ အသက်မရှင်ကြပါ။) ဤကား ပထမထမြောက်ခြင်းတည်း။ ပထမထမြောက်ခြင်း၌ပါဝင်သောမည်သူမဆို မင်္ဂလာရှိ၍သန့်ရှင်း၏။ ဒုတိယသေခြင်းသည် သူတို့အပေါ် ဩဇာမရှိ။ သူတို့သည် ဘုရားသခင်နှင့်ခရစ်တော်၏ ယဇ်ပုရောဟိတ်များဖြစ်ကြလိမ့်မည်။ ဘုရင်များအဖြစ်ဖြင့်လည်း ခရစ်တော်နှင့်အတူ အနှစ်တစ်ထောင် အုပ်စိုးကြလိမ့်မည်။”

ကဘ၊ Mo နှင့် သက တို့၌ပါသော (ကွင်းထဲမှ) စကားညှပ်တို့က ၎င်း၏အထက်စကားကို အောက်စကားများနှင့် ဆက်စပ်ပေးသည်။ ရှင်းလင်းစွာတင်ပြထားသည့်အတိုင်း “ကျန်လူသေတို့” သည် ပထမထမြောက်ခြင်းကိုဝင်စားသူများမဟုတ်။ ထိုထမြောက်ခြင်းမှာ ခရစ်တော်နှင့်အတူ အနှစ်တစ်ထောင်စိုးစံကြသူများအဖို့ဖြစ်သည်။ သို့ ဖြစ်လျှင် ခရစ်တော်နှင့်အတူ၊ ကောင်းကင်တွင် အနှစ်တစ်ထောင်အုပ်စိုးမည့်သူများမှလွဲ၍ အခြားလူသားများ အသက်ရှင်ကြမည်မဟုတ်ဟု ဆိုလိုသလော။ မဆိုလို။ ထိုသို့သာဆိုလိုလျှင် သူတို့သည် ယဇ်ပုရောဟိတ်လုပ်ငန်းလုပ်ဆောင်ကြလျက်နှင့် အကျိုးရမည့်သူ တစ်ယောက်မျှရှိမည်မဟုတ်။ သူတို့အုပ်ချုပ်သောနယ်ပယ်သည်လည်း လူနေမဲ့ကမ္ဘာဖြစ်ရချေအံ့။

သို့ဖြစ်လျှင် “ကျန်လူသေတို့” သည် မည်သူများနည်း။ အာဒံ့အပြစ်ကြောင့် သေလွန်သော လူသားအားလုံးဖြစ်၏။ ထို့ ပြင်၊ ဆင်းရဲဒုက္ခကြီးကိုကပ်ကျော်သူ၊ သို့မဟုတ် အနှစ်တစ်ထောင်အတွင်း မွေးဖွားသူများဖြစ်ကြသော်လည်း ထိုအပြစ်၏သေဆိပ်မှ ချမ်းသာရရန် လိုသေးသူများလည်းပါဝင်သည်။—ဧဖက် ၂:၁၊ ၂ နှင့်နှိုင်း။

အနှစ်တစ်ထောင်မကုန်မီ “အသက်မရှင်ကြ” ဟုဆိုရာ၌ အဘယ်အဓိပ္ပာယ်နည်း။ သူတို့၏ထမြောက်ခြင်းအကြောင်းကို ပြောနေသည်မဟုတ်။ ဤ ‘အသက်ရှင်ခြင်း’ သည် လူသားများအဖြစ် ရှင်နေခြင်းသာမဟုတ်။ လူ့စုံလင်မှုကိုရ၍ အာဒံ့အပြစ်၏အာနိသင်ရှိသမျှနှင့် ကင်းလွတ်ခြင်းကိုဆိုလိုသည်။ ကောင်းကင်သွားသူများ “အသက်ရှင်လာကြ” သည်ဟု ဆိုပြီးသည့်နောက် တစ်ဆက်တည်း အခန်း ၅ တွင် အထက်ပါအတိုင်းဆိုသည်ကို သတိပြုပါ။ ကောင်းကင်သွားသူများအဖို့ဆိုလျှင် အပြစ်၏ဆိုးကျိုးရှိသမျှနှင့်ကင်းလွတ်သောအသက်ကိုဆိုလို၏။ သူတို့သည် အထူးမျက်နှာသာတော်ကြောင့် မသေနိုင်သောအဖြစ်ကိုပင် ဝင်စားရ၏။ (၁ ကော. ၁၅:၅၄) ထို့ကြောင့် “ကျန်လူသေတို့” အဖို့ဆိုလျှင် လူ့စုံလင်မှုဖြင့် အပြည့်အဝအသက်ရှင်ခြင်းဖြစ်ပေမည်။

ဖေ ၁၂ (ကက စ. ၃၃၉ အပိုဒ် ၃–စ. ၃၄၀ အပိုဒ် ၃)

မြေကြီးဆိုင်ရာထမြောက်ခြင်း၌ မည်သူများပါဝင်ကြမည်နည်း

ယော. ၅:၂၈၊ ၂၉– “ဤအမှုအရာကို အံ့သြခြင်းမရှိကြနှင့်။ သင်္ချိုင်း [“အောက်မေ့ရာဂူသင်္ချိုင်း၊” ကဘ] များမှာရှိသောသူအပေါင်းတို့သည် သားတော် [ယေရှု] ၏စကားသံကိုကြား၍ ထွက်ရမည့်အချိန်ကာလရောက်လတ္တံ့။” (“အောက်မေ့ရာဂူသင်္ချိုင်း” ဟုပြန်ဆိုသော ဂရိစကားလုံးသည် taʹphos [“တားဖော့၊” တစ်ခုသောသင်္ချိုင်း] သို့မဟုတ် haiʹdes [လူသေတို့၏သင်္ချိုင်း] ၏ဗဟုဝုစ်ကိန်းမဟုတ်။ mne·meiʹon [အောက်မေ့ခြင်း၊ အောက်မေ့ရာဂူသင်္ချိုင်း] ၏သွယ်ဝိုက်ကံနှင့်ဆိုင်သောပုံစံဖြစ်သည်။ သေလွန်သူနှင့်ဆိုင်သောအကြောင်း မှတ်ဉာဏ်၌ ထိန်းသိမ်းခြင်းကို အလေးအနက်ပြုသည်။ ထာဝရအသက်ရှင်ခွင့်နှင့်တကွ ထမြောက်လာမည့်သူများမှာ ခွင့်မလွှတ်နိုင်သောအပြစ်ကျူးလွန်သဖြင့် ဘုရားသခင့်မှတ်ဉာဏ်အထဲမှချေဖျက်ခံရပြီး ဂေဟင်္နာသို့ရောက်သွားသော ပုဂ္ဂိုလ်များမဟုတ်။ သတိရအောက်မေ့တော်မူခြင်းခံရသော ပုဂ္ဂိုလ်များတည်း။—မ. ၁၀:၂၈; မာ. ၃:၂၉; ဟေဗြဲ ၁၀:၂၆; မာလ. ၃:၁၆။)

တ. ၂၄:၁၅– “ဖြောင့်မတ်သောသူ၊ မဖြောင့်မတ်သောသူရှိသမျှတို့သည် သေခြင်းမှထမြောက်ကြလိမ့်မည်ဟူ၍ . . . အကျွန်ုပ်လည်း ဘုရားသခင်ကိုအမှီပြု၍ မျှော်လင့်ပါ၏။” (ဘုရားသခင့်ဖြောင့်မတ်သောလမ်းစဉ်နှင့်အညီ အသက်ရှင်ခဲ့သူများကော၊ မသိ၍ မတရားမှုများပြုလုပ်ခဲ့သူတို့ပါ ထမြောက်လာကြမည်။ သေလွန်သူ မည်သူမည်ဝါ ထမြောက်မည် မထမြောက်မည်နှင့်ပတ်သက်သော ကျွန်ုပ်တို့၏မေးခွန်းအားလုံးကို သမ္မာကျမ်းစာက ဖြေကြားခြင်းမပြုပါ။ သို့သော်၊ အကြောင်းစုံသိသူ ဘုရားသခင်သည် မိမိ၏ဖြောင့်မတ်ခြင်းစံများကို မပစ်ပယ်သော်လည်း ကရုဏာတော်ဖြင့် တရားမျှတမှုကိုထိန်းကာ မျက်နှာမလိုက်ဘဲ စီရင်တော်မူလိမ့်မည်။ ကမ္ဘာဦး ၁၈:၂၅ နှင့်နှိုင်း။)

ဗျာ. ၂၀:၁၃၊ ၁၄– “သမုဒ္ဒရာသည် မိမိ၌ရှိသောလူသေတို့ကို အပ်ပေး၏။ မရဏာနှင့်မရဏာနိုင်ငံသည်လည်း မိမိတို့၌ရှိသောလူသေတို့ကို အပ်ပေးကြ၏။ လူအသီးအသီးတို့သည် မိမိတို့အကျင့်အတိုင်း တရားစီရင်ခြင်းကို ခံရကြ၏။ ထိုအခါ မရဏာနှင့်မရဏာနိုင်ငံ [“ဟေးဒီးစ်၊” ကဘ] ကို မီးအိုင်ထဲသို့ချပစ်လေ၏။ ထိုသေခြင်းကား ဒုတိယသေခြင်းဖြစ်သတည်း။” (အာဒံ့အပြစ်ကြောင့် သေရသူတို့သည် ပင်လယ်ထဲ၌ရှိသည်ဖြစ်စေ၊ လူသေတို့၏မြေကြီးသင်္ချိုင်းထဲ၌မြှုပ်နှံသည်ဖြစ်စေ ရှင်ပြန်ထမြောက်လာကြလိမ့်မည်။)

“ကယ်တင်ခြင်း” ဟူသောအဓိကခေါင်းစဉ်ကိုလည်းရှု။

ကုဋေပေါင်းများစွာသောသူများ သေရာမှထမြောက်လာလျှင် အဘယ်မှာနေထိုင်ကြမည်နည်း

ခပ်များများခန့်မှန်းရလျှင် ကမ္ဘာပေါ်အသက်ရှင်ခဲ့သူအရေအတွက် ၂၀,၀၀၀,၀၀၀,၀၀၀ ရှိ၏။ ကျွန်ုပ်တို့သိရသည့်အတိုင်း သူတို့အားလုံး ထမြောက်လာကြမည်မဟုတ်။ အားလုံးထမြောက်လာသည်ပဲထား၊ နေရာလပ် ကျယ်ကျယ်ပြောပြောရှိဦးမည်။ လက်ရှိကမ္ဘာ့ကုန်းမြေမျက်နှာပြင် အကျယ်အဝန်းမှာ ၅၇,၀၀၀,၀၀၀ စတုရန်းမိုင် (၁၄၇,၆၀၀,၀၀၀ စတုရန်းကီလိုမီတာ) ဖြစ်သည်။ ထက်ဝက်ကိုအခြားစီမံကိန်းအတွက် ဖယ်ထားပါက လူတစ်ဦးလျှင် တစ်ဧက (၀.၃၇ ဟက်တာခန့်) နီးပါးရှိဦးမည်။ ၎င်းမှ လိုသည်ထက် ပိုပိုလျှံလျှံရိက္ခာရယူနိုင်သည်။ ယနေ့ရိက္ခာရှားပါးမှု၏ရင်းမြစ်မှာ ကမ္ဘာကြီးက လုံလောက်အောင် မထုတ်လုပ်နိုင်၍မဟုတ်။ နိုင်ငံရေးဘက်ပြိုင်မှုနှင့် စီးပွားရေးလောဘကြောင့်တည်း။

ဖေ ၁၉ (ကက စ. ၃၄၁ အပိုဒ် ၁၊ ၂)

ခရစ်တော်၏ ရောက်ရှိခြင်းဆိုင်ရာအခြင်းအရာများသည် အလွန်တိုတောင်းသောအချိန်အတွင်း ဖြစ်ပျက်သလော။ သို့မဟုတ် အနှစ်များစွာကြာရှည်သောအချိန်ပိုင်းအတွင်း ဖြစ်ပျက်သလော

မ. ၂၄:၃၇-၃၉။ “လူသားသည် ကြွလာ [“ရောက်ရှိခြင်း၊” ကဘ; ဂရိ၊ pa·rou·siʹa (ပါရိုစီးယား)] သောအခါ နောဧလက်ထက်၌ဖြစ်သကဲ့သို့ ဖြစ်လိမ့်မည်။ ရေလွှမ်းမိုးခြင်းမဖြစ်မီကာလ၌ နောဧသည် သင်္ဘောထဲသို့ဝင်သောနေ့တိုင်အောင် လူများတို့သည် စားသောက်လျက်၊ ထိမ်းမြားစုံဖက်လျက်နေ၍ ရေလွှမ်းမိုးခြင်းရောက်သဖြင့် လူခပ်သိမ်းတို့ကို သုတ်သင်ပယ်ရှင်းသည်တိုင်အောင် သတိမဲ့နေကြသည်နည်းတူ၊ လူသားကြွလာသောအခါ၌ ဖြစ်လိမ့်မည်။” (“နောဧလက်ထက်” က အဆိုပါအခြင်းအရာများသည် အနှစ်များစွာအတွင်း ဖြစ်ပျက်သောအရာများဖြစ်၏။ ယေရှုက မိမိရောက်ရှိခြင်းကာလကို ထိုခေတ်အဖြစ်အပျက်နှင့်ခိုင်းနှိုင်းတော်မူ၏။)

မဿဲ ၂၄:၃၇ ၌ ဂရိစကားလုံး pa·rou·siʹa ကိုသုံးထားသည်။ စာသားအရ၊ ၎င်း၏အဓိပ္ပာယ်မှာ “ဘေးချင်းယှဉ်နေခြင်း” ဟူ၍ဖြစ်သည်။ လစ်ဒဲလ်နှင့်စကော့ တို့၏ဂရိ—အင်္ဂလိပ်အဘိဓာန် (အောက်စဖော့၊ ၁၉၆၈) က pa·rou·siʹa ကို “လူတို့၏ရောက်ရှိခြင်း” ဟူ၍ ဦးစွာအနက်ဖွင့်သည်။ ဖိလိပ္ပိ ၂:၁၂ ၌ ယင်းစကားလုံး၏အဓိပ္ပာယ် ပေါ်လွင်နေသည်။ ထိုတွင် ပေါလုက မိမိ၏ “မျက်မှောက်” [“ရောက်ရှိခြင်း၊” (pa·rou·siʹa)] နှင့် “မျက်ကွယ်” [“မရောက်ရှိခြင်း” (a·pou·siʹa အာပိုစီးယား)] နှစ်ရပ်ကိုယှဉ်ထားသည်။ သို့ရာတွင် “လူသားသည်” အာမဂေဒုန်စစ်ပွဲအတွင်း ယေဟောဝါ၏လက်မရွံ့အာဏာသားအဖြစ် “ကြီးစွာသောဘုန်းတန်ခိုးအာနုဘော်ကိုဆောင်လျက် မိုးတိမ်ကိုစီး၍ကြွလာတော်မူ” မည်ဟုဆိုသော မဿဲ ၂၄:၃၀ ၌မူ er·khoʹme·non (အယ်ရ်ခိုးမယ်နွန်) ဟူသောဂရိစကားလုံးကိုသုံး ထားသည်။ အချို့ဘာသာပြန်သူများက ထိုဂရိစကားလုံးနှစ်ခုစလုံးကို “ကြွလာ” ဟူ၍ပြန်ဆိုကြသော်လည်း စေ့စပ်သောဘာသာပြန်သူများမူ ၎င်းတို့၏ခြားနားချက်ကိုသိသာအောင်ပြန်ဆိုကြပေသည်။

ဖေ ၂၆ (ကက စ. ၃၄၁ အပိုဒ် ၃–စ. ၃၄၂ အပိုဒ် ၂)

ခရစ်တော်သည် လူ့မျက်စိဖြင့်မြင်နိုင်သည့်နည်းနှင့် ကြွလာမည်လော

ယော. ၁၄:၁၉၊ သမ– “ခဏမျှကြာသော် ဤလောကသားတို့သည် ငါ့ကိုမြင်ရတော့မည်မဟုတ်။ သင်တို့ [ယေရှု၏သစ္စာရှိတမန်တော်များ] မူကား ငါအသက်ရှင်သည့်အတိုင်း ရှင်ကြလတ္တံ့သောကြောင့် မြင်ရကြလိမ့်မည်။” (ယေရှုက မိမိသည် ပြန်လာ၍ တမန်တော်တို့အား မိမိရှိရာ ကောင်းကင်သို့ ခေါ်ဆောင်သွားမည်ဟု ကတိတော်ပေးထား၏။ သူတို့သည် ကိုယ်တော်နည်းတူ ဝိညာဉ်သတ္တဝါများဖြစ်ကြမည်ဖြစ်၍ ကိုယ်တော်ကိုမြင်ရကြလိမ့်မည်။ သို့သော် လောကသားများမူ ကိုယ်တော်ကို တစ်ဖန်တွေ့ရကြတော့မည်မဟုတ်။ ၁ တိမောသေ ၆:၁၆ နှင့်နှိုင်း။)

တ. ၁၃:၃၄– “ထိုသခင် [ယေရှု] ကို သေခြင်းမှထမြောက်စေ၍ နောက်တစ်ဖန်ပုပ်စပ်ခြင်းသို့မပြန်ဘဲ အစဉ်ကင်းလွတ်ရမည်အခွင့်ကို ပေးတော်မူသည်။” (လူ့ခန္ဓာသည် သဘာဝအားဖြင့် ပုပ်စပ်တတ်သည်။ ထို့ကြောင့် ၁ ကောရိန္သု ၁၅:၄၂၊ ၄၄ က “ပုပ်စပ်” ခြင်းဟူသောစကားလုံးကို “ဇာတိပကတိကိုယ်” နှင့်တွဲလျက်သုံးထားသည်။ ယေရှုသည် ဘယ်တော့မျှ ထိုသို့သောကိုယ်ရှိတော့မည်မဟုတ်။)

ယော. ၆:၅၁– “ငါသည် ကောင်းကင်မှဆင်းသက်သောအသက်မုန့်ဖြစ်၏။ ဤမုန့်ကိုစားသောသူမည်သည်ကား၊ အစဉ်မပြတ်အသက်ရှင်လိမ့်မည်။ ငါပေးသောမုန့်ကား၊ လောကီသားတို့၏အသက်အဖို့အလိုငှာစွန့်သော ငါ၏အသားပေတည်းဟု မိန့်တော်မူ၏။” (ယေရှုသည် အသားတော်ကိုစွန့်ပြီးမှပြန်ယူတော်မမူ။ မိမိစုံလင်သောလူ့အသက်ယဇ်၏ အကျိုးကျေးဇူးကို လူသားတို့မခံစားရအောင် ပြုတော်မမူ။)

မတ် ၄ (ကက စ. ၃၄၂ အပိုဒ် ၄–စ. ၃၄၃ အပိုဒ် ၅)

ယေရှုသည် ကောင်းကင်သို့တက်ကြွသွားသည့် “နည်းတူ” ကြွလာမည်ဟုဆိုရာ၌ ဘာကိုဆိုလိုသနည်း

တ. ၁:၉-၁၁– “တမန်တော်တို့သည် ကြည့်ရှုလျက်နေကြစဉ် သခင်ဘုရားသည် အထက်သို့ဆောင်ယူခြင်းကိုခံတော်မူ၍ မိုးတိမ်သည် ကိုယ်တော်ကို မျက်ကွယ်အောင် ခံယူလေ၏။ ထိုသို့ကြွတော်မူသည်ကို တမန်တော်တို့သည် ကောင်းကင်သို့ စေ့စေ့ကြည့်မျှော်လျက်နေကြစဉ်တွင် လူနှစ်ယောက်တို့သည် ဖြူစင်သောအဝတ်ကိုဝတ်ဆင်လျက် တမန်တော်တို့အနားမှာပေါ်လာ၍ အိုဂါလိလဲလူတို့၊ အဘယ်ကြောင့် ကောင်းကင်သို့ကြည့်မျှော်လျက်နေကြသနည်း။ သင်တို့နှင့်ခွာ၍ ကောင်းကင်သို့ဆောင်ယူခြင်းကိုခံတော်မူသော ထိုယေရှုသည် သင်တို့မျက်မှောက်၌ ကောင်းကင်သို့ကြွသွားတော်မူသည်နည်းတူ တစ်ဖန်ကြွလာတော်မူလတ္တံ့ဟုပြောဆို၏။” (ဤတွင် “နည်းတူ” ဟုဆိုကြောင်း၊ “အလားတူခန္ဓာဖြင့်” ဟုမဆိုကြောင်း သတိပြုပါ။ တက်ကြွသော “နည်း” မှာ မည်သို့နည်း။ အခန်းငယ် ၉ ဆိုသည့်အတိုင်း မြင်ကွင်းမှပျောက်ကွယ်သွားခြင်းဖြစ်၏။ ကိုယ်တော့်ထွက်ခွာခြင်းကို တပည့်တော်များသာ မြင်လိုက်ရသည်။ လောကသားများ မသိလိုက်ရ။ ခရစ်တော်တစ်ဖန်ပြန်ကြွလာခြင်းလည်း ထို့နည်းတူဖြစ်မည်။)

‘မိုးတိမ်နှင့်တကွကြွလာခြင်း’ နှင့် ‘ရှိသမျှသောသူတို့ မြင်ရကြခြင်း’ မှာ ဘာကိုဆိုလိုသနည်း

ဗျာ. ၁:၇– “ကြည့်ရှုလော့။ မိုးတိမ်နှင့်တကွကြွလာတော်မူသည်ဖြစ်၍ ကိုယ်တော်ကိုထိုးဖောက်သောသူတို့နှင့် ရှိသမျှသောသူတို့သည် ကိုယ်တော်ကို ရှုမြင်ရကြလိမ့်မည်။ မြေကြီးသားအမျိုးမျိုးရှိသမျှတို့သည် ကိုယ်တော်ကြောင့် ငိုကြွေးမြည်တမ်းရကြလိမ့်မည်။” (မဿဲ ၂၄:၃၀; မာကု ၁၃:၂၆; လုကာ ၂၁:၂၇ တို့ကိုပါရှု။)

“မိုးတိမ်” ကဘာကိုတင်စားသနည်း။ မျက်ကွယ်ဖြစ်၏။ လေယာဉ်တစ်စင်းသည် ထူထပ်သောမိုးတိမ်အထဲ၌ရှိလျှင်ဖြစ်စေ၊ ၎င်းအထက်၌ရှိလျှင်ဖြစ်စေ၊ မြေပြင်ပေါ်မှလူတို့သည် ယင်း၏စက်သံကိုကြားချင်ကြားမည်။ သို့သော် အများအားဖြင့် ယင်းကိုမမြင်နိုင်။ ယေဟောဝါက “မိုးတိမ်တိုက်၌ သင့်ဆီသို့ ငါလာမည်” ဟု မောရှေအား မိန့်တော်မူ၏။ ဘုရားသခင်ကို မောရှေမမြင်ရပါ။ ထိုတိမ်တိုက်က ယေဟောဝါ၏မျက်ကွယ်ရောက်ရှိခြင်းကိုပြသည်။ (ထွ. ၁၉:၉; ဝတ်ပြုရာ ၁၆:၂ နှင့် တောလည်ရာ ၁၁:၂၅ တို့ကိုလည်းရှု။) ခရစ်တော်သည် ကောင်းကင်တွင် မျက်ဝါးထင်ထင် ပေါ်ထွန်းပါက “ရှိသမျှသောသူတို့သည်” ကိုယ်တော်ကိုမြင်ကြရမည်မဟုတ်။ ဥပမာ၊ ဩစတြေးလျတိုက်ပေါ်မှာပေါ်ထွန်းလျှင် ဥရောပ၊ အာဖရိကနှင့် အမေရိကန်တိုက်များ၌ ကိုယ်တော်ကို မြင်ရမည်မဟုတ်။

အဘယ်အဓိပ္ပာယ်ဖြင့် ‘ရှိသမျှသောသူတို့ ကိုယ်တော်ကိုမြင်ကြ’ မည်နည်း။ ရှိသမျှသောသူတို့သည် ကမ္ဘာ့အခြင်းအရာများကိုထောက်၍ မျက်ကွယ်နည်းဖြင့် ရောက်ရှိတော်မူကြောင်းကို သိမြင်ကြမည်။ ယောဟန် ၉:၄၁ ကလည်း ပကတိမြင်ခြင်းမဟုတ်သောမြင်ခြင်းအကြောင်းကိုရည်ညွှန်းလျက် ဤသို့ဆို၏– “ယေရှုကလည်း၊ သင်တို့သည် မျက်စိကန်းသည်မှန်လျှင် အပြစ်မရှိ။ ငါတို့မျက်စိမြင်သည်ဟုယခုဆိုကြ၏။ ထိုကြောင့် သင်တို့၌ အပြစ်တည်သည်ဟု [ဖာရိရှဲတို့အား] မိန့်တော်မူ၏။” (ရောမ ၁:၂၀ နှင့်နှိုင်း။) ခရစ်တော်တစ်ဖန်ပြန်ကြွလာသည့်နောက် အချို့သူများယုံကြည်ကြ၏။ ကိုယ်တော်.ရောက်ရှိခြင်းဆိုင်ရာနိမိတ်ကို အသိအမှတ်ပြုကြ၏။ အချို့က သာဓကရှိလျက်နှင့်ငြင်းပယ်ကြ၏။ သို့သော် ဘုရားသခင့်လက်မရွံ့ အာဏာသားအဖြစ် ယေရှုအရေးယူတော်မူသောအခါ ဤသူများပင်လျှင် ပေါ်ထွန်းသောတန်ခိုးတော်ကိုထောက်၍ ဖျက်ဆီးခြင်းသည် လူ့ထံမှမဟုတ်၊ ကောင်းကင်မှသက်ရောက်သည်ကို သိမြင်ရကြမည်။ ဘာဖြစ်နေသည်ကိုသူတို့သဘောပေါက်ကြမည်။ အကြောင်းမှာ သူတို့အား ကြိုတင်သတိပေးခဲ့သောကြောင့်တည်း။ သူတို့အပေါ်ကျရောက်သောဥပဒ်ကြောင့် “ငိုကြွေးမြည်တမ်းရကြလိမ့်မည်။”

“ကိုယ်တော်ကိုထိုးဖောက်သောသူတို့” သည် မည်သူများနည်း။ ယေရှုအဆုံးစီရင်ခံရစဉ် စာသားအတိုင်း ကိုယ်တော်ကိုထိုးဖောက်သူများမှာ ရောမစစ်သားများဖြစ်သည်။ သို့သော် သူတို့သေသွားသည်မှာ ကြာလေပြီ။ ထို့ကြောင့် “နောက်ဆုံးကာလ” အတွင်း ခရစ်တော်၏နောက်လိုက်စစ်တို့ကို အလားတူ နှိပ်စက် ‘ထိုးဖောက်’ ကြသောလူတို့ကို ရည်ညွှန်းနေခြင်းဖြစ်ရပေမည်။—မ. ၂၅:၄၀၊ ၄၅။

ပုဂ္ဂိုလ်တစ်ဦးသည် မျက်ဝါးထင်ထင် မရောက်ရှိပါက တကယ် ‘လာသည်၊’ ‘ရောက်ရှိသည်’ ဟု ဆိုနိုင်မည်လော

တမန်တော်ပေါလုက “ငါသည် ကိုယ်ခန္ဓာအားဖြင့် သင်တို့နှင့်ကွာလျက်ရှိသော်လည်း ဝိညာဉ်အားဖြင့်မကွာ၊ ကိုယ်တိုင် သင်တို့နှင့်အတူ ရှိ” သည်ဟု ကောရိန္သုမြို့ရှိအသင်းတော်အား ပြောခဲ့သည်။—၁ ကော. ၅:၃။

ယေဟောဝါက မိမိသည် “ဆင်းသက်” ၍ ဘေဘယ်လ်ဆောက်လုပ်သူများ၏စကားကို ရှုပ်ထွေးစေမည်ဟုမိန့်ဆို၏။ (က. ၁၁:၇) မိမိသည် “ဆင်းလာ” ၍ ဣသရေလလူတို့ကို အဲဂုတ္တုလူတို့၏ကျွန်ဘဝမှ လွတ်မြောက်စေမည်ဟုလည်း မိန့်တော်မူ၏။ “ငါကိုယ်တိုင်သွား၍” ဣသရေလူတို့ကို ကတိတော်ပြည်သို့ပို့ဆောင်မည်ဟုလည်း မောရှေအား အာမခံတော်မူ၏။ (ထွ. ၃:၈; ၃၃:၁၄) သို့သော် အဘယ်လူသားကမျှ ကိုယ်တော်ကိုမမြင်ချေ။—ထွ. ၃၃:၂၀; ယော. ၁:၁၈။

မတ် ၁၁ (ကက စ. ၃၄၄ အပိုဒ် ၁-၅)

သမ္မာကျမ်းစာက အဘယ်အခြင်းအရာများကို ခရစ်တော်၏ရောက်ရှိခြင်းနှင့် ဆက်စပ်သနည်း

ဒံ. ၇:၁၃၊ ၁၄– “လူသား [ယေရှုခရစ်] နှင့်တူသောသူတစ်ဦးသည် မိုးတိမ်ကိုစီးလျက် အသက်ကြီးသောသူ [ယေဟောဝါဘုရားသခင်] ၏အထံတော်သို့ ရောက်လာ၏။ ထိုသူကို အထံတော်ပါးသို့သွင်းကြ၏။ အရပ်ရပ်တို့၌နေ၍ အသီးသီးအခြားခြားသောဘာသာစကားကိုပြောသော လူမျိုးတကာတို့ကိုအုပ်စိုးစေခြင်းငှာ ထိုသူသည် နိုင်ငံနှင့်တကွ အာဏာစက်တန်ခိုးကိုရ၏။”

၁ သက်. ၄:၁၅၊ ၁၆– “သခင်ဘုရား၏ဗျာဒိတ်တော်အားဖြင့် တစ်ဖန်ငါတို့ဆိုသည်ကား၊ သခင်ဘုရားကြွလာတော်မူသောအခါ အသက်ရှင်၍ကျန်ကြွင်းသောငါတို့သည် အိပ်ပျော်ပြီးသောသူတို့၏အရင်အဦး နေရာကျရကြမည်မဟုတ်။ သခင်ဘုရားသည် ကြွေးကြော်ခြင်း၊ ကောင်းကင်တမန်မင်းအသံပေးခြင်း၊ ဘုရားသခင်၏တံပိုးတော်ကိုမှုတ်ခြင်းနှင့်တကွ၊ ကောင်းကင်ဘုံမှ ကိုယ်တိုင်ဆင်းသက်တော်မူ၍၊ ခရစ်တော်၌သေလွန်သောသူတို့သည် အဦးထမြောက်ကြလိမ့်မည်။” (ထို့ကြောင့်၊ ခရစ်တော်နှင့်အတူအုပ်ချုပ်မည့်ပုဂ္ဂိုလ်များသည် ကိုယ်တော်ရှိရာကောင်းကင်သို့ ထမြောက်ခြင်းခံရကြမည်။—လွန်ခဲ့သောနှစ်ပေါင်းများစွာက သေလွန်ခဲ့သူများက အလျင်၊ သခင်ပြန်ကြွလာသည့်နောက်ပိုင်းသေလွန်ခဲ့သူတို့က နောက်မှ ထမြောက်ကြလိမ့်မည်။)

မ. ၂၅:၃၁-၃၃– “လူသားသည် မိမိဘုန်းအာနုဘော်ကိုဆောင်လျက်၊ သန့်ရှင်းသောကောင်းကင်တမန်များအခြံအရံတို့နှင့်တကွ ကြွလာတော်မူသောအခါ ဘုန်းရှိသောပလ္လင်တော်ပေါ်မှာထိုင်၍ ရှေ့တော်၌ လူမျိုးအပေါင်းတို့ကို စုဝေးစေသဖြင့် သိုးထိန်းသည် သိုးနှင့်ဆိတ်တို့ကို တခြားစီခွဲထားသကဲ့သို့ လူအပေါင်းတို့ကို အသီးအခြားခွဲ၍ သိုးတို့ကိုလက်ယာတော်ဘက်၊ ဆိတ်တို့ကိုလက်ဝဲတော်ဘက်၌ ထားတော်မူလတ္တံ့။”

၂ သက်. ၁:၇-၁၀– “သခင်ယေရှုသည် တန်ခိုးရှိသောကောင်းကင်တမန်တို့နှင့်အတူ ကောင်းကင်ဘုံကပေါ်ထွန်းတော်မူ၍ ဘုရားသခင်ကိုမသိသောသူ၊ ငါတို့သခင်ယေရှုခရစ်၏ဧဝံဂေလိတရားကို နားမထောင်သောသူတို့ကို မီးလျှံအားဖြင့်ဒဏ်ပေးတော်မူသောအခါ၊ သင်တို့ကိုဆင်းရဲစေဖူးသောသူတို့၌ ဆင်းရဲခြင်းကိုလည်းကောင်း၊ ဆင်းရဲခံရဖူးသောသင်တို့၌ ငါတို့နှင့်အတူ ချမ်းသာခြင်းကိုလည်းကောင်း၊ ဘုရားသခင်ဆပ်ပေး၍ တရားသဖြင့် စီရင်တော်မူလိမ့်မည်။ . . . ထိုသူတို့သည် သခင်ဘုရား၏မျက်နှာတော်နှင့်လည်းကောင်း၊ တန်ခိုးရှိသောဘုန်းတော်နှင့်လည်းကောင်း ကွာ၍ ထာဝရပျက်စီးခြင်းတည်းဟူသော အပြစ်ဒဏ်ကိုခံရကြလတ္တံ့။”

လု. ၂၃:၄၂၊ ၄၃၊ ကဘ– “သူ [ယေရှုနှင့်ဘေးချင်းယှဉ်လျက် နှက်တိုင်တင်ခံရသော ကိုယ်ချင်းစာနာတတ်သည့် ရာဇဝတ်သား] ကဆက်လက်၍ ‘ယေရှု၊ ကိုယ်တော်၏နိုင်ငံတော်သို့ ကိုယ်တော်ကြွဝင်သောအခါ ကျွန်တော်အား သတိရတော်မူပါ’ ဟု ဆက်လက်ပြောဆိုလေသည်။ သူ့အား ယေရှုက ‘သင့်အားယနေ့ ငါအမှန်ဆို၏။ သင်သည် ငါနှင့်အတူ ပရဒိသု၌ ရှိလိမ့်မည်’ ဟု မိန့်တော်မူ၏။ (ယေရှုအုပ်စိုးမှုအောက်၌ တစ်ကမ္ဘာလုံး ပရဒိသုဖြစ်လာမည်။ ဘုရားသခင်သတိရတော်မူသောလူသေများ ထမြောက်လာပြီး ကမ္ဘာပေါ် စုံလင်သောအသက်ကို မွေ့လျော်နိုင်သောအခွင့်ကို ရကြလိမ့်မည်။)

မတ် ၁၈ (ကက စ. ၃၄၅ အပိုဒ် ၂–စ. ၃၄၆ အပိုဒ် ၃)

ဥပုသ်

အဓိပ္ပာယ်သတ်မှတ်ချက်– Sabbath (ဥပုသ်) ဟူသောအင်္ဂလိပ်စကားကို ဟေဗြဲလို sha·vathʹ (ရှာဗသ်) မှကောက်ယူထားသည်။ အဓိပ္ပာယ်မှာ “နားသည်၊ စဲသည်၊ ရပ်ဆိုင်းသည်” ဟူ၍ဖြစ်၏။ မောရှေပညတ်ပါ ဥပုသ်စနစ်၌ အပတ်စဉ်ဥပုသ်၊ နှစ်တစ်လျှောက်လုံး အထူးသတ်မှတ်သော အခြားရက်များ၊ သတ္တမလနှင့် ငါးဆယ်မြောက်နှစ် ပါဝင်သည်။ ဂျူးတို့၏အပတ်စဉ်ဥပုသ်၊ သူတို့ပြက္ခဒိန်သီတင်းပတ်၏သတ္တမရက်သည် သောကြာနေ့နေဝင်ချိန်မှ စနေနေ့နေဝင်ချိန်အထိဖြစ်သည်။ ခရစ်ယာန်အမည်ခံများစွာတို့က ရိုးရာအတိုင်း တနင်္ဂနွေနေ့ကို နားနေ့၊ ဝတ်ပြုရာနေ့အဖြစ် သတ်မှတ်ကြသည်။ အချို့က ဂျူးပြက္ခဒိန်ရက်အတိုင်း ဥပုသ်စောင့်ကြသည်။

ခရစ်ယာန်များသည် သီတင်းပတ်ဥပုသ်စောင့်ရမည့်တာဝန်ရှိသလော

ထွ. ၃၁:၁၆၊ ၁၇– “ဣသရေလအမျိုးသားအစဉ်အဆက်တို့သည် ထာဝရပဋိညာဉ်ဖြစ်စေခြင်းငှာ၊ ဥပုသ်နေ့ရက်အစဉ်အတိုင်း ဥပုသ်စောင့်ရကြမည်။ ထိုသို့စောင့်လျှင် ငါနှင့်ဣသရေလအမျိုးသားစပ်ကြား၌ ထာဝရလက္ခဏာသက်သေဖြစ်လိမ့်မည်။” (ဥပုသ်စောင့်ခြင်းမှာ ယေဟောဝါနှင့်ဣသရေလလူတို့စပ်ကြား လက္ခဏာသက်သေတစ်ရပ်ဖြစ်ကြောင်း သတိပြုပါ။ အခြားလူတိုင်းလည်း ဥပုသ်စောင့်ရလျှင် ထူးတော့မည်မဟုတ်။ “ထာဝရ” ဟုပြန်ဆိုသော ဟေဗြဲစကားလုံးသည် ‛oh·lamʹ (အိုလမ်) ဖြစ်၍ အခြေခံအားဖြင့် ပစ္စုပ္ပန်ကာလ၏ရှုထောင့်မှကြည့်လျှင် အကန့်အသတ်မဲ့သော၊ သို့တည်းမဟုတ် အဆုံးမမြင်နိုင်သော ရှည်လျားသည့်အချိန်ပိုင်းကိုဆိုလိုသည်။ ထာဝရကာလဖြစ်နိုင်သည်။ သို့သော် ထာဝရကာလကိုအမြဲဆိုလိုချင်မှဆိုလိုမည်။ ထပ်တူဟေဗြဲစကားလုံးကို တောလည်ရာ ၂၅:၁၃ ၌ ယဇ်ပုရောဟိတ်စနစ်နှင့်စပ်လျဉ်း၍ သုံးထား၏။ ဟေဗြဲ ၇:၁၂ အရ နောက်ပိုင်း၌ ၎င်းစနစ်ဆုံးခန်းတိုင်ခဲ့လေသည်။)

ရော. ၁၀:၄၊ သမ္မာ– “ယုံကြည်သောသူရှိသမျှအဖို့ ဖြောင့်မတ်ခြင်းအလိုငှာ ခရစ်တော်သည် ပညတ်တရား၏ဆုံးခြင်းအကြောင်းဖြစ်တော်မူ၏။” (ဥပုသ်စောင့်ခြင်းသည် ထိုပညတ်၏တစ်ကဏ္ဍဖြစ်သည်။ ဘုရားသခင်သည် ခရစ်တော်အားဖြင့် ထိုပညတ်ကို အဆုံးတိုင်စေတော်မူသည်။ ဘုရားသခင့်ရှေ့မှောက်၌ ကျွန်ုပ်တို့ဖြောင့်မတ်ခြင်းရှိမရှိဟူသည့်အချက်သည်၊ ခရစ်တော်ကိုယုံကြည်ခြင်းပေါ်မူတည်သည်။ အပတ်စဉ်ဥပုသ်စောင့်ခြင်းနှင့်မဆိုင်။) (ဂလာတိ ၄:၉-၁၁၊ ဧဖက် ၂:၁၃-၁၆ တို့ကိုလည်းရှု။)

ကော. ၂:၁၃-၁၆– “[ဘုရားသခင်သည်] သင်တို့အပြစ်ရှိသမျှတို့ကို လွှတ်တော်မူ၏။ ငါတို့နှင့်ဆန့်ကျင်ဘက်ဖြစ်သော ဝိနည်းအထုံးအဖွဲ့နှင့်စပ်ဆိုင်သော လက်မှတ်ကိုချေ၍ . . . ပယ်ရှင်းတော်မူပြီ။ . . . ထိုကြောင့် စားသောက်ခြင်းအမှု၊ ပွဲနေ့၊ လဆန်းနေ့၊ ဥပုသ်နေ့တို့ကိုစောင့်ခြင်းအမှုတွင် သင်တို့ကို အဘယ်သူမျှမစစ်ကြော မစီရင်စေနှင့်။” (လူတစ်ယောက်သည် ပညတ်တရားအောက်၌ရှိ၍ ဥပုသ်ဖျက်သောအပြစ်ကျူးလွန်သူအဖြစ် စီရင်ခံရလျှင် ထွက်မြောက်ရာ ၃၁:၁၄ နှင့် တောလည်ရာ ၁၆:၃၂-၃၅ အရ၊ သူ့ကို ပရိသတ်တစ်ရပ်လုံးက ခဲနှင့်ပေါက်သတ်ရမည်ဖြစ်သည်။ ဥပုသ်စောင့်ရမည်ဟု အငြင်းအခုံလုပ်သူတို့အနေနှင့် ထိုပညတ်တရားအောက်၌ ကျွန်ုပ်တို့မရှိဟူသောအချက်ကိုထောက်၍ ဝမ်းသာဖို့ကောင်းပေသည်။ ဤတွင်ကိုးကားသောကျမ်းချက်တင်ပြသည့်အတိုင်း ဣသရေလလူတို့အား ပေးတော်မူသောဥပုသ်ကိုစောင့်မှသာလျှင် ဘုရားသခင့်ရှေ့ မျက်နှာသာတော်ရမည်မဟုတ်တော့ချေ။)

တနင်္ဂနွေနေ့သည် ဘယ်ပုံဘယ်နည်းဖြင့် ခရစ်ယာန်ဘောင်အများထုအတွက် အဓိကဝတ်ပြုနေ့ဖြစ်လာသနည်း

ခရစ်တော်သည် တစ်သီတင်း၏ပထမနေ့ (ယခုအခေါ် တနင်္ဂနွေနေ့) ၌ ရှင်ပြန်ထမြောက်သော်လည်း ထိုနေ့ကို သီတင်းပတ်၏အခါကြီးရက်ကြီးအဖြစ်သတ်မှတ်ရန် ကျမ်းစာကမညွှန်ကြားချေ။

“‘Dies Solis,’ သို့မဟုတ် ‘Sunday’ (တနင်္ဂနွေ) ဟူသော တိတ္ထိအမည်ဟောင်းကို အပတ်စဉ်ခရစ်ယာန်ပွဲအဖြစ် အောက်မေ့ခြင်းအကြောင်းရင်းမှာ အဓိကအားဖြင့် တိတ္ထိနှင့် [အမည်ခံ] ခရစ်ယာန်အယူပေါင်းစပ်မှုကြောင့်ဖြစ်၏။ ကွန်စတင်တိုင်းက ထိုအယူပေါင်းစပ်မှုကိုအကြောင်းပြု၍ [စီ.အီး. ၃၂၁ ခု၊ အမိန့်ထုတ်ပြန်ချက်၌] သီတင်းပတ်၏ပထမနေ့ကို ‘Sun (နေမင်းကြီး) ၏နေ့မြတ်’ အဖြစ် သတ်မှတ်ရန် မိမိ၏လက်အောက်ခံပြည်သူများဖြစ်သော တိတ္ထိနှင့်ခရစ်ယာန်တို့ထံ အဆိုသွင်း၏။ . . . ဤကား အင်ပါယာအတွင်း ကွဲပြားသောဘာသာတရားများကို တစ်မျိုးတည်းသောဥပဒေဖြင့် ပေါင်းစည်းသော သူ၏နည်းပရိယာယ်တည်း။”—Lectures on the History of the Eastern Church (အရှေ့အသင်းတော်ရာဇဝင်ဆိုင်ရာလက်ချာများ။ နယူးယောက်၊ ၁၈၇၁)၊ အေ.ပီ. စတန်လီ စ. ၂၉၁။

မတ် ၂၅ (ကက စ. ၃၄၆ အပိုဒ် ၄–စ. ၃၄၇ အပိုဒ် ၂)

အာဒံသည် ဥပုသ်စောင့်ရန် ပညတ်ခံရသဖြင့် သူ၏သားမြေးများလည်း ဥပုသ်စောင့်ရသလော

ယေဟောဝါသည် ကမ္ဘာကို လူသားများနေထိုင်နိုင်အောင်ပြင်ဆင်ပြီးနောက် ရုပ်ဝတ္ထုနှင့်မြေကြီးဆိုင်ရာမိမိလုပ်ငန်းမှ အနားယူတော်မူလေသည်။ ဤအချက်ကို ကမ္ဘာဦး ၂:၁-၃ က တင်ပြသည်။ သို့သော် သီတင်းပတ်၏သတ္တမနေ့ကိုဥပုသ်အဖြစ်စောင့်ရန် အာဒံအား ဘုရားသခင်ညွှန်ကြားကြောင်း ကျမ်းစာမည်သည့်နေရာ၌မျှ မဆိုထားချေ။

တရား. ၅:၁၅– “သင် [ဣသရေလ] သည်အဲဂုတ္တုပြည်၌ ကျွန်ခံကြောင်းကိုလည်းကောင်း၊ သင်၏ဘုရားသခင်ထာဝရဘုရားသည် အားကြီးသောလက်ရုံးတော်ကိုဆန့်၍ ထိုပြည်မှ သင့်ကို နုတ်ဆောင်တော်မူကြောင်းကိုလည်းကောင်း အောက်မေ့လော့။ ထိုအကြောင်းကြောင့် သင်သည် ဥပုသ်နေ့ကိုစောင့်ရမည်ဟု သင်၏ဘုရားသခင်ထာဝရဘုရား မှာထားတော်မူ၏။” (ယေဟောဝါက ဣသရေလလူတို့အား ကျွန်ဘဝမှကယ်လွှတ်ခြင်းနှင့်ဆက်စပ်လျက် ဥပုသ်ပညတ်ကို မိမိပေးခြင်းဖြစ်ကြောင်း မိန့်တော်မူ၏။ ဧဒင်အဖြစ်အပျက်နှင့်စပ်လျဉ်း၍ ပေးသည်ဟုမဆိုပါ။)

ထွ. ၁၆:၁၊ ၂၃-၂၉– “ဣသရေလအမျိုးသားပရိသတ်အပေါင်းတို့သည် . . . အဲဂုတ္တုပြည်မှထွက်သွားသောနောက်၊ ဒုတိယလ ဆယ်ငါးရက်နေ့တွင် . . . သိန်တောသို့ရောက်ကြ၏။ [မောရှေ] ကလည်း နက်ဖြန်နေ့သည် ထာဝရဘုရားရှေ့ ၌ သန့်ရှင်းသောဥပုသ်နေ့၊ . . . ဖြစ်၏ . . . ဟု ထာဝရဘုရားမိန့်တော်မူကြောင်းကို ပြန်ပြောလေ၏။ . . . ခြောက်ရက်ပတ်လုံး [မန္နမုန့်ကို] သိမ်းယူရကြ၏။ ဥပုသ်နေ့တည်းဟူသောခုနစ်ရက်မြောက်သောနေ့တွင် မရှိမတွေ့ရဟု ဆိုလေ၏။ ထာဝရဘုရားကလည်း . . . ဥပုသ်နေ့ကို သင်တို့အား ပေးတော်မူပြီ . . . ဟု မောရှေအား မိန့်တော်မူ၏။” (ယခင်အချိန်၌ ရက်သတ္တပတ်ဟူသောသတ်မှတ်ချက်ရှိခဲ့သော်လည်း ဥပုသ်စောင့်ခြင်းကို ယခုပထမအကြိမ်တင်ပြခြင်းဖြစ်၏။)

ဧပြီ ၁ (ကက စ. ၃၄၇ အပိုဒ် ၃–စ. ၃၄၈ အပိုဒ် ၁)

မောရှေပညတ်ကို “အခမ်းအနား” ကဏ္ဍနှင့် “သီလ” ကဏ္ဍ ဟူ၍ နှစ်မျိုးခွဲထားပြီး ခရစ်ယာန်များသည် “သီလပညတ်” (ပညတ်တော်ဆယ်ပါး) အောက်၌ ရှိသလော

ပညတ်တရားကို နှစ်ကဏ္ဍအဖြစ် ခွဲခြားထားသည်ဟူသောသဘောဖြင့် ယေရှုညွှန်းဆိုသလော

မ. ၅:၁၇၊ ၂၁၊ ၂၃၊ ၂၇၊ ၃၁၊ ၃၈– “ပညတ္တိကျမ်း၊ အနာဂတ္တိကျမ်းများကို ဖျက်ပယ်ခြင်းငှာ ငါလာသည်ဟု မထင်ကြနှင့်။ ဖျက်ပယ်ခြင်းငှာ ငါလာသည်မဟုတ်။ ပြည့်စုံစေခြင်းငှာ ငါလာသတည်း။” ဤပညတ္တိကျမ်း၌ အဘယ်အချက်များကို ယေရှုစာရင်းသွင်းတော်မူကြောင်း ရှေ့ဆက်သတိပြုပါ။ “လူအသက်ကိုမသတ်ရ . . . ဟူသောရှေးပညတ်စကား [ထွ. ၂၀:၁၃; ဆဋ္ဌမပညတ်] ကို သင်တို့ကြားရပြီ။ သင်သည် ပူဇော်သကာကို ယဇ်ပလ္လင်သို့ဆောင်ယူခဲ့လျက် [တရား. ၁၆:၁၆၊ ၁၇; ပညတ်တော်ဆယ်ပါးအဝင်မဟုတ်။] . . . သူ့မယားကိုမပြစ်မှားရ ဟူသောရှေးပညတ်စကား [ထွ. ၂၀:၁၄; သတ္တမပညတ်] ကိုသင်တို့ကြားရပြီ။ တစ်ဖန်တုံ မယားနှင့်ကွာလိုလျှင် ဖြတ်စာကိုအပ်ပေးစေဟူသောပညတ်စကား [တရား. ၂၄:၁; ပညတ်တော်ဆယ်ပါးအဝင်မဟုတ်။] ရှိပြီ။ သူ့မျက်စိကိုဖျက်လျှင် ကိုယ်မျက်စိဖျက်ခြင်းကိုခံစေ။ သူ့သွားကိုချိုးလျှင် ကိုယ်သွားချိုးခြင်းကိုခံစေဟူသောပညတ်စကား [ထွ. ၂၁:၂၃-၂၅; ပညတ်တော်ဆယ်ပါးအဝင်မဟုတ်။] ကို သင်တို့ကြားရပြီ။” (ထို့ကြောင့် ယေရှုသည် ပညတ်တော်ဆယ်ပါးကို ပညတ္တိကျမ်း၏အခြားအစိတ်အပိုင်းများနှင့် မခွဲခြားဘဲ တပေါင်းတစည်းတည်း ညွှန်းဆိုတော်မူ၏။ ကျွန်ုပ်တို့အနေနှင့် ၎င်းတို့ကို ခွဲခြားသင့်သလော။)

“ဆရာတော်၊ ပညတ်ကျမ်းမှာ အဘယ်ပညတ်သည် အကြီးမြတ်ဆုံးဖြစ်ပါသနည်း” ဟု ယေရှုအမေးခံရစဉ် ပညတ်တော်ဆယ်ပါးကို ဘေးဖယ်၍ ဖြေဆိုတော်မူသလော။ ထိုသို့ဖြေမည့်အစား၊ “သင်၏ဘုရားသခင်ထာဝရဘုရားကို စိတ်စွမ်းရှိသမျှ၊ ကိုယ်စွမ်းရှိသမျှ၊ ဉာဏ်စွမ်းရှိသမျှနှင့်ချစ်ရမည် ဟူသောပညတ်သည် ပထမအကြီးမြတ်ဆုံးပညတ်ဖြစ်၏။ ဒုတိယအကြီးမြတ်ဆုံးပညတ်ကား၊ အိမ်နီးချင်းကို ကိုယ်နှင့်အမျှချစ်ရမည် ဟူသောပညတ်ဖြစ်၏။ ဤပညတ်နှစ်ပါးတို့သည် မောရှေ၏ပညတ်ကျမ်းတစ်စောင်လုံးနှင့် ပရောဖက်ကျမ်းများ၏အချုပ်အခြာပင်ဖြစ်သတည်း” ဟု ဖြေကြားလိုက်၏။ (မ. ၂၂:၃၅-၄၀၊ သက) အကယ်၍ လူအချို့က ပညတ်တော်ဆယ်ပါး (တရား. ၅:၆-၂၁) ကိုစွဲကိုင်ပြီး ခရစ်ယာန်များ ၎င်းကိုစောင့်ထိန်းရမည်၊ အခြားပညတ်များကို စောင့်ထိန်းရန်မလို ဟုဆိုလျှင် မည်သည့်ပညတ်များ အကြီးဆုံးဖြစ်သည်ဆိုသော (တရား. ၆:၅; ဝတ်. ၁၉:၁၈ တို့ကိုကိုးကားသော) ယေရှု၏အဆိုကို ငြင်းပယ်ရာမရောက်ပေလော။

ဧပြီ ၈ (ကက စ. ၃၄၈ အပိုဒ် ၂၊ ၃)

မောရှေပညတ်ကွယ်ပျောက်ခြင်းအကြောင်းပြောရာတွင် ပညတ်တော်ဆယ်ပါးပါ အဆုံးတိုင်ပြီဟု ကျမ်းစာက တိုက်ရိုက်ဆိုသလော

ရော. ၇:၆၊ ၇– “ယခုမူကား၊ . . . ငါတို့သည် သေသဖြင့် အုပ်ချုပ်သောပညတ်တရား၏လက်မှ လွတ်ခြင်းသို့ရောက်ကြပြီ။ သို့ ဖြစ်၍ အဘယ်သို့ပြောရမည်နည်း။ ပညတ်တရား၌ အပြစ်ရှိသလော။ အပြစ်မရှိနိုင်ရာ။ သို့ရာတွင်ပညတ်တရားအားဖြင့်သာ အပြစ်သဘောကို ငါသိရ၏။ အဘယ်သို့နည်းဟူမူကား၊ လောဘစိတ် [“တပ်မက်သောစိတ်၊” သမ] မရှိစေနှင့် ဟု ပညတ်တရားမဆိုလျှင် လောဘသဘောကိုငါမသိ။” (ဂျူးခရစ်ယာန်များ “ပညတ်တရား၏လက်မှ လွတ်မြောက်” ပြီဟု ဆိုပြီးသည်နှင့်တစ်ပြိုင်နက် ပညတ္တိကျမ်းမှ အဘယ်အချက်ကို ဥပမာအဖြစ် ပေါလုကိုးကားသနည်း။ ဒသမပညတ်ဖြစ်၏။ ထို့ကြောင့် သူတို့အပေါ်ချုပ်ကိုင်ခြင်းမရှိတော့သော ပညတ္တိကျမ်း၌ ဒသမပညတ်လည်းပါဝင်ကြောင်း သိသာစေသည်။)

၂ ကော. ၃:၇-၁၁– “ထိုမှတစ်ပါး ပျောက်တတ်သောရောင်ခြည်တည်းဟူသော မောရှေ၏မျက်နှာမှ ထွက်သောရောင်ခြည်ကြောင့် ဣသရေလအမျိုးသားတို့သည် သူ၏မျက်နှာကို စေ့စေ့မကြည့်ရှုနိုင်သည်တိုင်အောင် ကျောက်ပြားပေါ်၌အက္ခရာတင်၍ရေးထားသော သေခြင်း၏တရားသည် ဘုန်းအာနုဘော်နှင့်ပြည့်စုံသည်မှန်လျှင် ထိုမျှမက ဝိညာဉ်တော်တရားသည် ဘုန်းအာနုဘော်နှင့် အလွန်ပြည့်စုံရလိမ့်မည်မဟုတ်လော။ . . . ပယ်ရှင်းရသော အရာသည် ဘုန်းရှိလျှင် တည်နေသောအရာသည် သာ၍ဘုန်းရှိလိမ့်မည်။” (ဤတွင် “ကျောက်ပြားပေါ်၌ အက္ခရာတင်၍ ရေးထားသော” တရားအကြောင်းကိုရည်ညွှန်းထားသည်။ ထို့ ပြင် ၎င်းကို ဣသရေလအမျိုးသားတို့အား မောရှေပေးသောအခါ သူတို့သည် “သူ၏မျက်နှာကို စေ့စေ့မကြည့်ရှုနိုင်” ကြောင်းတင်ပြထားသည်။ ဘာကိုပြောနေသနည်း။ ထွက်မြောက်ရာ ၃၄:၁၊ ၂၈-၃၀ က ပညတ်တော်ဆယ်ပါး ပေးခြင်းဖြစ်ကြောင်းပြ၏။ ၎င်းတို့ကို ကျောက်ပြားပေါ်၌အက္ခရာတင်ထား၏။ သို့ ဖြစ်၍ ၎င်းပညတ်များသည် အထက်ကျမ်းချက်၌ဆိုသော “ပယ်ရှင်းရသောအရာ” ထဲတွင် ပါဝင်ကြောင်းသိသာ၏။)

ဧပြီ ၁၅ (ကက စ. ၃၄၉ အပိုဒ် ၁၊ ၂)

ပညတ်တော်ဆယ်ပါးပါဝင်သော မောရှေပညတ်ကိုပယ်ရှားခြင်းက သီလဆိုင်ရာအချုပ်အချယ်ရှိသမျှ ပယ်ဖျက်လိုက်သည်ဟူသောသဘော သက်ရောက်သလော

လုံးဝမသက်ရောက်။ ပညတ်တော်ဆယ်ပါးမှသီလစံများစွာတို့ကို ခရစ်ယာန်ဂရိကျမ်းများပါ မှုတ်သွင်းခံစာစောင်များ၌ ပြန်လည်ထည့်သွင်းထားပေသည်။ (သို့သော် ဥပုသ်ပညတ်မပါပါ။) သို့ရာတွင် ပညတ်တစ်ပါး မည်မျှပင်ကောင်းစေကာမူ၊ အပြစ်ပြုလိုသောဉာဉ်က လူ့ဆန္ဒပေါ် စိုးမိုးနေသမျှကာလပတ်လုံး မတရားမှုရှိဦးမည်။ သို့တစေ၊ ပညတ်ပဋိညာဉ်ကိုအစားထိုးလိုက်သော ပဋိညာဉ်သစ်နှင့်စပ်လျဉ်း၍ ဟေဗြဲ ၈:၁၀ က ဤသို့ဆို၏– “နောင်ကာလအခါ ဣသရေလအမျိုးသားတို့၌ ငါပေးအံ့သောပဋိညာဉ်တရားဟူမူကား၊ ငါထာဝရဘုရားသည် ငါ့ပညတ်တို့ကို သူတို့စိတ်ဝိညာဉ်ထဲသို့သွင်းမည်။ သူတို့နှလုံးပေါ်မှာ ရေးထားမည်။ ငါသည် သူတို့၏ဘုရားဖြစ်မည်။ သူတို့သည်လည်း ငါ၏လူဖြစ်ကြလိမ့်မည်။” ဤပညတ်တို့သည် ကျောက်ပြားပေါ် ထွင်းသောပညတ်များထက် မည်မျှသာ၍ထိရောက်သည်တကား!

ရော. ၆:၁၅-၁၇– “ထိုသို့ဖြစ်လျှင် အဘယ်သို့နည်း။ ငါတို့သည် ပညတ်တရားလက်၌မရှိ၊ ကျေးဇူးတရားလက်၌ရှိသောကြောင့် ဒုစရိုက်ကိုပြုရမည်လော။ ထိုသို့မပြုရ။ အကြင်သူ၏အထံ၌ အစေခံကျွန်ဖြစ်ခြင်းငှာ သင်တို့ဝင်၍အစေခံ၏၊ ထိုသူသည် သေခြင်းနှင့်ယှဉ်သောအပြစ်တရားဖြစ်စေ၊ ဖြောင့်မတ်ရာသို့ရောက်ခြင်းနှင့်ယှဉ်သော နားထောင်ခြင်းတရားဖြစ်စေ၊ သင်တို့၏သခင်ဖြစ်သည်ကို မသိကြသလော။ သင်တို့သည် အပြစ်တရား၏ကျွန်ဖြစ်ဖူးသော်လည်း ယခုတွင် ခံခဲ့ပြီးသောသြဝါဒနည်းဥပဒေသစကားကို စေတနာစိတ်နှင့်နားထောင်ကြသည်ဖြစ်၍ ဘုရားသခင်၏ကျေးဇူးတော်ကြီးလှပေ၏။” (ဂလာတိ ၅:၁၈-၂၄ ကိုလည်းရှု။)

ဧပြီ ၂၂ (ကက စ. ၃၄၉ အပိုဒ် ၃–စ. ၃၅၁ အပိုဒ် ၂)

အပတ်စဉ်ဥပုသ်သည် ခရစ်ယာန်များအဖို့ အဘယ်အဓိပ္ပာယ်ရှိသနည်း

ခရစ်ယာန်များ နေ့စဉ်ခံစားရသော “ငြိမ်ဝပ်ခြင်းချမ်းသာ [“ဥပုသ်နားခြင်း၊” ကဘ] တစ်မျိုး” ရှိ၏

ဟေဗြဲ ၄:၄-၁၁ က ဤသို့ဆို၏– “ခုနစ်ရက်မြောက်သောနေ့ကိုအကြောင်းပြု၍ ကျမ်းစာတစ်ချက် [ကမ္ဘာဦး ၂:၂] ၌လာသည်ကား၊ ဘုရားသခင်သည် မိမိအမှုအရာအလုံးစုံတို့ကို ပြီးစီး၍ ခုနစ်ရက်မြောက်သောနေ့၌ ငြိမ်ဝပ်စွာနေတော်မူ၏ဟု လာသတည်း။ ထိုကျမ်းစာ [ဆာလံ ၉၅:၁၁] ၌ တစ်ဖန်လာသည်ကား၊ သူတို့သည် ငါ၏ချမ်းသာထဲသို့မဝင်ရကြဟု လာသတည်း။ ထိုကြောင့်၊ အချို့တို့သည် ဝင်ရကြ၏။ ဝမ်းမြောက်စရာသတင်းကို ရှေ့ ဦးစွာကြားရသောသူတို့သည် မယုံကြည်သောကြောင့် မဝင်ရကြပြီ။ တစ်ဖန်တုံ၊ ယနေ့တွင် သင်တို့သည် ဗျာဒိတ်တော်အသံကိုကြားလျက်ရှိသည်ဖြစ်၍ ခိုင်မာသောစိတ်နှလုံး မရှိကြနှင့်ဟု ဆိုသည်ဖြစ်၍ ဤမျှလောက်ကာလကြာပြီးမှ ယနေ့ဟု ဒါဝိဒ်ကျမ်းစာ၌လာသောအခါ တစ်စုံတစ်ခုသောနေ့ရက်ကို သေချာစွာမှတ်သားသတည်း။ ယောရှုသည် ထိုသူတို့ကို ချမ်းသာပေးသည်မှန်လျှင် ထိုနောက် အခြားသောနေ့ရက်ကို အဘယ်ဆိုဖွယ်ရှိသနည်း။ ထို့ကြောင့် ဘုရားသခင်၏လူတို့အဖို့အလိုငှာ ငြိမ်ဝပ်ခြင်းချမ်းသာတစ်မျိုးသည် ကျန်ရစ်သေး၏။ ဘုရားသခင်သည် မိမိအမှုအရာတို့ကိုပြီးစီး၍ ငြိမ်ဝပ်စွာနေတော်မူသည်နည်းတူ၊ ထိုချမ်းသာထဲသို့ဝင်ရသောသူသည်လည်း မိမိအမှုအရာတို့ကိုပြီးစီး၍ ငြိမ်ဝပ်စွာနေရ၏။ ထိုကြောင့် ဣသရေလလူတို့သည် မယုံကြည်သောစိတ်ရှိသဖြင့် လဲသကဲ့သို့ [“ပုန်ကန်ခြင်းနမူနာအတိုင်း၊” ကဘ] ငါတို့သည်မလဲ၊ ထိုချမ်းသာထဲသို့ဝင်ရမည်အကြောင်း ကြိုးစားအားထုတ်ကြကုန်အံ့။”

ခရစ်ယာန်တို့အား အဘယ်အရာများမှ နားရန် တိုက်တွန်းနေသနည်း။ “မိမိအမှုအရာ” များမှနားရန်တည်း။ မည်သည့်အမှုများနည်း။ မိမိတို့ဖြောင့်မတ်ကြောင်းကို သက်သေထူရန် ယခင်တစ်ချိန်ကပြုလုပ်သောအမှုများပင်။ အချို့အချို့သောဥပဒေများ၊ သတ်မှတ်ချက်များကို စောင့်ထိန်းလျှင် ဘုရားသခင့်မျက်နှာသာတော်ကိုဝယ်ယူ၍ ထာဝရအသက်ကို ပိုင်ဆိုင်နိုင်မည်ဟု ခရစ်ယာန်တို့သည် မယူဆကြတော့ချေ။ အယုံအကြည်မဲ့သူဂျူးများ ထိုသို့အယူမှားကြ၏။ သူတို့သည် “ကိုယ်ဖြောင့်မတ်ခြင်းကိုတည်စေခြင်းငှာ ရှာကြံသောကြောင့် ဘုရားသခင်၏ဖြောင့်မတ်ခြင်းတရားကို ဝန်မခံကြ။” (ရော. ၁၀:၃) ခရစ်ယာန်စစ်တို့က မိမိတို့သည် အပြစ်သားများအဖြစ် မွေးလာကြကြောင်း၊ ခရစ်တော်၏ယဇ်ကိုယုံကြည်မှသာ ဘုရားသခင့်ရှေ့ ဖြောင့်မတ်သည့်အဖြစ်ကိုရနိုင်ကြောင်း သိမှတ်ကြပါသည်။ ဘုရားသခင့်သားတော်၏သွန်သင်ချက်ရှိသမျှကို နှလုံးသွင်း၍ကျင့်သုံးရန် အားထုတ်ကြပါသည်။ ဘုရားသခင့်နှုတ်ကပါဌ်တော်မှလာသော ဩဝါဒနှင့်အဆုံးအမကို နှိမ့်ချစွာလက်ခံကြသည်။ သို့ရာတွင် ဤနည်းအားဖြင့် ဘုရားသခင့်မျက်နှာတော်ကို ဝယ်ယူ နိုင်သည်ဟူ၍ကား မယူမှတ်ပါ။ မိမိတို့၏မေတ္တာနှင့်ယုံကြည်ခြင်းကို ဖော်ထုတ်သည့်သဘောသာဖြစ်သည်။ သူတို့သည် ဤသို့သောဘဝလမ်းစဉ်ကိုလိုက်သဖြင့် ဂျူးလူမျိုးတို့၏ “ပုန်ကန်ခြင်းနမူနာ” ကို ရှောင်ရှားကြပေသည်။

ကမ္ဘာဦး ၂:၂ ပါ “သတ္တမနေ့” သည် ၂၄-နာရီနေ့ရက်မဟုတ်။ (“ဖန်ဆင်းခြင်း” ခေါင်းစဉ်အောက် စာမျက်နှာ ၈၈ ကိုရှု။) ထို့နည်းတူ၊ ခရစ်ယာန်စစ်များ ပါဝင်ခံစားသော “ဥပုသ်နားခြင်း” သည်လည်း ၂၄-နာရီနေ့ရက်သာမဟုတ်။ သူတို့သည် ကျမ်းစာသြဝါဒကိုယုံကြည်နာခံခြင်းဖြင့် ၎င်းကိုနေ့စဉ်ခံစားနိုင်ပေသည်။ အထူးသဖြင့် ဘုရားသခင့်စနစ်သစ်အတွင်း ခံစားကြရမည်။

လူသားတို့ရှေ့မှောက်၌ အနှစ်တစ်ထောင် “ဥပုသ်” ရှိ၏

မာ. ၂:၂၇၊ ၂၈– “ထိုမှတစ်ပါး ဥပုသ်နေ့သည် လူအဖို့ဖြစ်၏။ လူသည် ဥပုသ်နေ့အဖို့ဖြစ်သည်မဟုတ်။ သို့ ဖြစ်၍ လူသားသည် ဥပုသ်နေ့ကိုပင်အစိုးရသည်ဟု [ယေရှု] မိန့်တော်မူ၏။”

ဥပုသ်ကို မိမိနှင့်ဣသရေလလူတို့စပ်ကြား လက္ခဏာတစ်ရပ်အဖြစ် ယေဟောဝါသတ်မှတ်ကြောင်း၊ ဣသရေလလူတို့အား အလုပ်မှနားခွင့်ရစေရန်ရည်ရွယ်တော်မူကြောင်း ယေရှုသိတော်မူ၏။ မိမိ၏သေခြင်းကိုအခြေပြု၍ မောရှေပညတ်ကိုပြည့်စုံစေပြီး ၎င်းကိုပယ်ဖျက်တော်မူမည်ဖြစ်ကြောင်းကိုလည်း ယေရှုသိ၏။ ပညတ်တရားသည် ဥပုသ်ပညတ်နှင့်အတူ “နောက်ဖြစ်လတ္တံ့သောမင်္ဂလာအကျိုးတို့၏ . . . အရိပ်” ကိုပေးကြောင်း ကိုယ်တော်သဘောပေါက်၏။ (ဟေဗြဲ ၁၀:၁; ကော. ၂:၁၆၊ ၁၇) ထို “မင်္ဂလာအကျိုးတို့” နှင့်စပ်လျဉ်း၍ “ဥပုသ်နေ့” တစ်နေ့ရှိ၍ ကိုယ်တော်သည် ထိုဥပုသ်၏အရှင်ဖြစ်တော်မူ၏။

ခရစ်တော်သည် သခင်တို့၏သခင်အနေနှင့် ကမ္ဘာတစ်ခုလုံးကို အနှစ်တစ်ထောင် အုပ်စိုးတော်မူမည်။ (ဗျာ. ၁၉:၁၆; ၂၀:၆; ဆာ. ၂:၆-၈) ယေရှုကမ္ဘာပေါ်ရှိစဉ် ကရုဏာကြောင့် ဥပုသ်နေ့၌ အံ့ဖွယ်အကောင်းဆုံးသောကုသမှု ပြုတော်မူ၏။ သို့ ပြုခြင်းဖြင့် မိမိ၏အနှစ်တစ်ထောင်အုပ်စိုးရာကာလအတွင်း လူမျိုးအပေါင်းတို့အား မည်သို့ချမ်းသာပေးတော်မူမည်ကို သာဓကပြတော်မူပေသည်။ (လု. ၁၃:၁၀-၁၃; ယော. ၅:၅-၉; ၉:၁-၁၄) ဥပုသ်၏အဓိပ္ပာယ်မှန်ကိုနားလည်လေးမြတ်သူတို့သည် ထို “ဥပုသ်” နားခြင်းမှအကျိုးခံစားခွင့်ကိုလည်း ရကြပေမည်။