၁၉၉၆ ခုနှစ် “ဘုရားရေးရာ ငြိမ်သက်ခြင်း၏တမန်များ” ခရိုင်စည်းဝေးကြီး

^၁ ဤနှစ် ခရိုင်စည်းဝေးကြီးအစီအစဉ်သည် ကျွန်ုပ်တို့၏ဘုရားရေးရာငြိမ်သက်မှုကို ဆက်၍တည်မြဲစေရန် ကျိန်းသေထောက်ကူလိမ့်မည်ဖြစ်ပြီး အခြားသူများ အဆိုပါငြိမ်သက်မှုကို ရရှိစေရန်ကူညီပေးရေးတွင် ကျွန်ုပ်တို့၏တာဝန်ကို ယင်းက ရှင်းပြလိမ့်မည်။ ကြေညာထားသည့်အတိုင်း အဓိကခေါင်းစည်းမှာ “ဘုရားရေးရာငြိမ်သက်ခြင်း၏တမန်များ” ဖြစ်သည်။ ဤအစီအစဉ်မှ တစ်ခုခုကို လက်လွတ်မသွားရလေအောင် သင့်အစီအစဉ်များကို ဆွဲထားပြီးပြီလော။

^၂ သုံးရက်အစီအစဉ်– ဤနှစ်စည်းဝေးကြီးတွင် သင်လုံးလုံးလျားလျားပျော်ရွှင်မည်ဖြစ်ကြောင်းနှင့် အားသစ်အင်သစ်ဖြင့် အိမ်သို့ ပြန်ရမည်ဖြစ်ကြောင်း ကျွန်ုပ်တို့သိထားသည်။ (၆ ရာ. ၇:၁၀) ဤနှစ်လည်း သုံးရက်အစီအစဉ်ထပ်ဖြစ်မည်။ စည်းဝေးချိန်တစ်လျှောက်လုံး တက်ရောက်နိုင်ရန်အတွက် လောကီအလုပ်မှအားလပ်ချိန်ယူထားရန် အစီအစဉ်များကို သင်ဆွဲပြီးပြီလော။ စည်းဝေးကြီးအချို့ကို ကျောင်းမပိတ်ခင် ကျင်းပပါမည်။ သင့်တွင် ကျောင်းနေအရွယ် ကလေးများရှိပါက ဘာသာရေးလေ့ကျင့်သင်ကြားပေးမှု၏ ဤအရေးကြီးသောကဏ္ဍအတွက် သောကြာနေ့တွင် ပျက်ကွက်မည်ဖြစ်ကြောင်း သူတို့၏ဆရာများကို ရိုသေလေးစားစွာ အသိပေးထားပြီးပြီလော။

^၃ အစီအစဉ်သည် သုံးရက်စလုံး နံနက် ၉:၃၀ နာရီတွင် စတင်မည်ဖြစ်ပြီး တနင်္ဂနွေနေ့ မွန်းလွဲ ၄:၀၀ နာရီခန့်တွင် နိဂုံးချုပ်မည်ဖြစ်သည်။ တံခါးများကို နံနက် ၈:၀၀ နာရီတွင် ဖွင့်ထားမည်။ ထိုအချိန်မတိုင်မီ ဝင်ခွင့်ပြုထားခြင်းခံရသူများမှာ အလုပ်တာဝန်ခန့်အပ်ခံရသူများသာဖြစ်ပြီး လူအားလုံးအတွက် အဆောက်အအုံ၏တံခါးကို မဖွင့်မီအထိ ထိုင်ခုံများဦးထားရန် သူတို့အား ခွင့်ပြုမည်မဟုတ်ပါ။ ပို၍ အဆင်ပြေပြီး သက်သောင့်သက်သာရှိသော နေရာများတွင် ထိုင်ခုံနေရာချန်ပေးထားခြင်းအားဖြင့် ကျွန်ုပ်တို့၏ သက်ကြီးရွယ်အို၊ မသန်မစွမ်းညီအစ်ကိုများကို ကြင်နာမှုတင်ပြကြမည်လော။ “မေတ္တာသည် . . . ကိုယ်အကျိုးကို မရှာတတ်” ကြောင်း သတိရပါ။—၁ ကော. ၁၃:၄၊ ၅; ဖိ. ၂:၄။

^၄ သင်သည် ထက်စေမည်လော– “သံကို သံဖြင့်ထက်စေသကဲ့သို့” ဟုဆိုသည့် သုတ္တံ ၂၇:၁၇ ကိုကိုးကားပြီးနောက် ၁၉၉၃ ဩဂုတ်လ ၁၅ ရက်ထုတ် ကင်းမျှော်စင် က ဤသို့သတိပြုမိသည်– “ကျွန်ုပ်တို့သည် မှန်မှန်သွေးပေးရန်လိုသော ကိရိယာတန်ဆာပလာများနှင့်တူသည်။ ယေဟောဝါကို ချစ်ကြောင်းတင်ပြခြင်းနှင့် ယုံကြည်ခြင်းကို အခြေခံသည့် ဆုံးဖြတ်ချက်များချခြင်းသည် ဤလောကနှင့်မတူ၊ ခြားနားစွာနေခြင်းကိုဆိုလိုသည့်အတွက် လူအများမှခြားနားသော သီးခြားလမ်းကို ဖောက်သည့်အလား မပြတ်ဖောက်ယူရမည်။” ကျွန်ုပ်တို့သည် ဤသြဝါဒကို မည်သို့ကျင့်သုံးနိုင်သနည်း။

^၅ ကျွန်ုပ်တို့သည် လောကနှင့် ခြားနားနေပြီး ဆက်၍ခြားနားနေရမည်။ ကျွန်ုပ်တို့သည် အလုပ်မွန်များအတွက် ဇွဲရှိသူဖြစ်ဖို့ဆိုလျှင် ယင်းကိုထိန်းသိမ်း၍ အထမြောက်စေဖို့ မနားမနေအားထုတ်ရမည်။ (တိ. ၂:၁၄) ဤအကြောင်းကြောင့် အထက်တွင်ကိုးကားထားသည့် ကင်းမျှော်စင် ဆောင်းပါးက ဤသို့ဆက်ပြောသည်– “ကျွန်ုပ်တို့သည် ယေဟောဝါကို ချစ်မြတ်နိုးသူများနှင့်အတူ ရှိသောအခါ တစ်ဦးကိုတစ်ဦး ထက်စေ—မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကို ကျင့်စေခြင်းငှာလည်းကောင်း တိုက်တွန်းနှိုးဆော်ကြသည်။” ခရိုင်စည်းဝေးကြီးသည် ဝိညာဉ်ရေးဘက် ဆက်၍ထက်သန်နေစေရန် ကျွန်ုပ်တို့ကို ထောက်ကူသည့် ယေဟောဝါထံတော်မှလာသော ပြင်ဆင်ပေးချက်များထဲမှ တစ်ခုဖြစ်သည်။ အစီအစဉ်၏မည်သည့်အပိုင်းကိုမျှ ကျွန်ုပ်တို့လက်လွတ်မခံနိုင်ပါ။

^၆ ပညာရှိသောသူသည် နားထောင်လိမ့်မည်– နားထောင်ခြင်းသည် တိုးပွားလာစေရမည့် အတတ်ပညာတစ်ခုဖြစ်သည်။ မိမိမည်မျှပင် ဂရုတစိုက်နားထောင်သည်ဟု ယူမှတ်စေကာမူ ပျမ်းမျှအားဖြင့် လူများသည် မိမိကြားခဲ့ရသည့်အရာ၏ တစ်ဝက်ကိုသာ မှတ်မိကြကြောင်း ဆိုထားသည်။ ကျွန်ုပ်တို့သည် အာရုံပျံ့လွင့်သောခေတ်တွင် အသက်ရှင်နေကြသောကြောင့် ရံဖန်ရံခါ ကြာကြာအာရုံစိုက်ဖို့ ခက်သည့်​ပြဿ​နာကို တွေ့ကြုံရပေမည်။ အထူးသဖြင့် တစ်ယောက်ယောက်ဟောပြောနေသည်ကို နားထောင်နေသည့် ကြီးမားလှသည့်ပရိသတ်ထဲတွင် ကျွန်ုပ်တို့ထိုင်နေချိန်ဝယ် အာရုံစူးစိုက်နိုင်သည့်အတိုင်းအတာကို သာ၍ကြာရှည်လာရန် ကျွန်ုပ်တို့ကြိုးစားနိုင်သလော။ စည်းဝေးကြီးမှ အိမ်ပြန်ရောက်ပြီးနောက် တစ်နေ့စီ၏အစီအစဉ်အတိုချုပ်ကို ပြောပြပါဟု သင့်အား ဆိုလှာပါက ပြန်ပြောနိုင်မည်လော။ ကျွန်ုပ်တို့အားလုံး နားထောင်နိုင်သည့်စွမ်းရည်ကို တိုးတက်စေရန်နှင့် စည်းဝေးကြီးအစီအစဉ်တွင် တင်ဆက်သည့်ကဏ္ဍတစ်ခုစီကို ဂရုတစိုက်အာရုံစိုက်ရန် မည်သို့လုပ်ဆောင်နိုင်သနည်း။

^၇ ဘုရားပေးလက်ဆောင်ဖြစ်သောမှတ်ဉာဏ်သည် ထက်ထက်သန်သန်စိတ်ဝင်စားမှုမရှိလျှင် ယင်းနှင့်ပတ်သက်၍ ကောင်းစွာမလုပ်ဆောင်နိုင်သောကြောင့် ယင်းသည် အရေးကြီးသည်။ ဥပမာ၊ လူတစ်ဦးသည် အကြောင်းအရာတစ်ခုကို ပို၍စိတ်ဝင်စားလေလေ ဟောပြောချက်တစ်ခုမှ သို့မဟုတ် အစီအစဉ်အပိုင်းမှ အဓိကအချက်များကို မှတ်မိဖို့ သာ၍လွယ်ကူလေဖြစ်သည်။ သို့တိုင် ခရိုင်စည်းဝေးကြီးများတွင် ကျွန်ုပ်တို့ကြားနာသည့်အရာများအပေါ် သာမန်အာရုံစိုက်မှုထက် မည်မျှပို၍အာရုံစိုက်သည်ဟူသည့်ပေါ်တွင် များစွာမူတည်သည်။ စည်းဝေးကြီးအစီအစဉ်၏အပိုင်းတစ်ခုစီကို ထက်ထက်သန်သန်စိတ်ဝင်စားပြီး အာရုံစိုက်ခြင်းသည် ကျွန်ုပ်တို့၏လက်ရှိဝိညာဉ်ရေးအခြေအနေနှင့်သာမက ကျွန်ုပ်တို့၏အနာဂတ်အလားအလာများနှင့်ပါ သက်ဆိုင်မှုရှိသည်။ စည်းဝေးကြီးများတွင် ယေဟောဝါ၏နည်းလမ်းတော်များကို ကျွန်ုပ်တို့သွန်သင်ခံရပြီး အသက်ကယ်ဆယ်ရေးလုပ်ငန်း ပြီးမြောက်စေရေးအတွက် ညွှန်ကြားချက်များကို ကျွန်ုပ်တို့အား ပေးထားသည်။ (၁ တိ. ၄:၁၆) လေမုန်တိုင်းတိုက်နေသည့် ပင်လယ်တွင်းရှိ သင်္ဘောတစ်စင်းအဖြစ် သင့်ကိုယ်ကို ယူဆလိုက်ပါ။ ယေဟောဝါ၏ ကတိတော်များသည် ခိုင်မာသော မျှော်လင့်ချက်ကျောက်ဆူးဖြစ်သည်။ လူတစ်ဦးသည် ခရစ်ယာန်အစီအစဉ်များ၌ အာရုံမစိုက်၊ မိမိစိတ်ကို လေလွင့်ခွင့်ပြုပါက ဝိညာဏသင်္ဘောပျက်ခြင်းမှ သူ့အားအကာအကွယ်ပေးနိုင်သည့် သွန်သင်ညွှန်ကြားချက်မှ အရေးကြီးသောအချက်များကို သူလွတ်သွားနိုင်သည်။—ဟေဗြဲ ၂:၁; ၆:၁၉။

^၈ ကမ္ဘာ့ဒေသများစွာတွင် ကျွန်ုပ်တို့၏ညီအစ်ကိုများသည် အစည်းအဝေးများတက်ရောက်ဖို့ အကြီးအကျယ်အားသွန်ခွန်စိုက်ကြိုးစားကြရသည်။ စည်းဝေးကြီးများတွင် အာရုံစူးစိုက်နစ်မျောနေသည်ကို တွေ့ရခြင်းသည် အလွန်ကောင်းပါသည်။ သို့သော် အချို့ဒေသများတွင် လူများသည် အစီအစဉ်များကျင်းပစဉ်အတွင်း စည်းဝေးကြီးကျင်းပရာနေရာများတွင် ရစ်ဝဲရစ်ဝဲလုပ်နေခြင်းကြောင့် တခြားသူများ အာရုံပျံ့လွင့်ခဲ့ကြသည်။ အခြားသူများမူ နောက်ကျရောက်လာကြသည်။ လွန်ခဲ့သည့်ခရိုင်စည်းဝေးကြီးတချို့တွင် လူများစွာသည် စင်္ကြံများနှင့် ထိုင်ခုံအနောက်ဘက်နေရာများတွင် လှည့်ပတ်သွားလာနေခြင်းကြောင့် အစီအစဉ်မှ ဦးဆုံးမိနစ်အနည်းငယ်ကို ကြားရဖို့အခက်တွေ့ခဲ့ကြသည်။ ဤသူတို့မှာ များသောအားဖြင့် အလုပ်တာဝန်များရထားသည့် ညီအစ်ကိုများ သို့မဟုတ် ကလေးငယ်များကို ဂရုစိုက်ရန်လိုအပ်သည့် မိခင်များ မဟုတ်ကြပါ။ အနှောင့်အယှက်အများစုမှာ အာလာပသလ္လာပပြောဖို့သာလာသည့် သူများထံမှဖြစ်သည်။ ဤနှစ်ဧည့်ကြိုဌာနသည် ထိုပြဿနာကို ပို၍ဂရုစိုက်ပေးမည်ဖြစ်ပြီး သဘာပတိက ထိုင်ကြဖို့ဖိတ်ခေါ်ချိန်တွင် အားလုံး လိုက်နာကြမည်ဟု မျှော်လင့်ပါသည်။ ဤကိစ္စနှင့်ပတ်သက်၍ သင်၏ပူးပေါင်းလုပ်ဆောင်မှုကို အလွန်ကျေးဇူးတင်ပါမည်။

^၉ အဘယ်လက်တွေ့ကျသော အကြံပြုချက်များသည် စည်းဝေးကြီးအစီအစဉ်ကို ပို၍အာရုံစိုက်စေရန်နှင့် တင်ဆက်သည့်အရာများကို ပို၍စွဲမှတ်နိုင်ရန် ကျွန်ုပ်တို့ကို ကူညီပေးမည်နည်း။ လွန်ခဲ့သည့်နှစ်တွင် ပြောခဲ့သည့်အရာများကို ထပ်မံပြောလိုပါသည်– (က) စည်းဝေးကြီးကျင်းပရာမြို့သို့သွားရခြင်းအတွက် အဓိကအကြောင်းကို အာရုံစိုက်ပါ။ ပျော်ပွဲရွှင်ပွဲသွားခြင်းမဟုတ်ဘဲ နားထောင်ပြီး သင်ယူရန်ဖြစ်သည်။ (တရား. ၃၁:၁၂) ညတိုင်း အိပ်ရေးဝဝအိပ်ပါ။ သင်သည် စည်းဝေးကြီးသို့မောမောပန်းပန်းနှင့်လာပါက အာရုံစူးစိုက်ဖို့ခက်မည်။ (ခ) သင့်ကား ထားဖို့ အချိန်အလုံအလောက်ထားပြီး အစီအစဉ်မစမီ ထိုင်ထားပါ။ စတင်ခါနီးကျမှ လောလောနှင့်ဝင်ထိုင်ခြင်းသည် အဖွင့်အပိုင်းမှ အချို့ကို သင်လွတ်သွားလေ့ရှိသည်။ (ဂ) အဓိကသော့ချက်များကို အတိုကောက် မှတ်ချက်ယူပါ။ ၏၊ သည်မရွေးမှတ်ချက်ယူနေခြင်းသည် ကောင်းကောင်းနားထောင်ဖို့ အဟန့်အတားဖြစ်နိုင်သည်။ ရေးသားနေစဉ် သင်၏မှတ်ချက်များကို ဂရုစိုက်နေသောကြောင့် အခြားအချက်များကို သင်လွတ်မသွားရန် သေချာစေပါ။ (ဃ) စည်းဝေးကြီးအပိုင်းတစ်ခု စတင်သောအခါ ထက်သန်သောမျှော်လင့်စောင့်စားသည့်သဘော ထားရှိပါလေ။ ‘ကျွန်ုပ်၏တန်ဖိုးထားမှုနှင့် ယေဟောဝါကိုချစ်သည့်မေတ္တာ တိုးပွားစေမည့် ဤအပိုင်းမှ အဘယ်အရာကို သင်ယူနိုင်သနည်း။ ဥပဓိရုပ်သစ်ကို ပို၍ပြည့်ဝစွာတင်ပြဖို့ ဤအချက်အလက်များက ကျွန်ုပ်ကို မည်သို့ထောက်ကူနိုင်သနည်း။ ကျွန်ုပ်၏ဓမ္မအမှုတွင် တိုးတက်ဖို့ ယင်းက မည်သို့ကူညီမည်နည်း’ ဟု သင့်ကိုသင်မေးပါ။

^၁၀ ကျွန်ုပ်တို့၏ဓမ္မအမှုကို တန်ဆာဆင်သည့် ပြုမူကျင့်ကြံမှု– “ကောင်းသောအကျင့်တို့၏ပုံသက်သေ” ကို ကိုယ်တိုင်ပြရန် ပေါလုက တိတုအား တိုက်တွန်းခဲ့သည်။ သူ၏သွန်သင်ချက်တွင် မှားယွင်းဖောက်ပြန်မှုများကင်းကြောင်း ပြသခြင်းအားဖြင့် တိတုသည် အခြားသူများအား “ငါတို့ကိုကယ်တင်တော်မူသောအရှင် ဘုရားသခင်၏သြဝါဒကို အရာရာ၌ တန်ဆာဆင်” ရန် ကူညီပေးမည်။ (တိ. ၂:၇၊ ၉) ကျွန်ုပ်တို့သည် စည်းဝေးကြီးသို့ အသွားအပြန်ခရီးစဉ်အပြင် ဟိုတယ်များ၊ စားသောက်ဆိုင်များနှင့် စည်းဝေးကြီးကျင်းပရာနေရာတို့တွင်ရှိနေသောအခါ ဘုရားရေးရာအကျင့်အကြံသည် မည်မျှအရေးကြီးကြောင်း နှစ်စဉ်နှစ်တိုင်း ကြင်နာသောသတိပေးချက်များကို ရရှိကြသည်။ ကျွန်ုပ်တို့သည် သင့်အားဝေမျှလိုသည့် လွန်ခဲ့သည့်နှစ်က နှလုံးလှိုက်လှဲသော ဖွင့်ဟပြောဆိုချက်များကို တစ်ဖန်ကြားခဲ့ရပြန်ပါသည်။

^၁၁ ဟိုတယ်တစ်ခုမှ မန်နေဂျာတစ်ဦးက ဤသို့ဆိုခဲ့သည်– “သက်သေခံများသည် စိတ်ရှည်ကြသည်၊ ပူးပေါင်းလုပ်ဆောင်ကြပြီး သူတို့၏ကလေးများကို ကြပ်ကြပ်မတ်မတ်မပြတ်ဂရုစိုက်ကြသောကြောင့် သူတို့ကို နေရာထိုင်ခင်းပြင်ဆင်ပေးရခြင်းသည် အမြဲပင်စိတ်ချမ်းသာရသည်။” ဟိုတယ်စားပွဲထိုင်စာရေးတစ်ယောက်က “သက်သေခံတွေဟာ တန်းစီစောင့်နေရပေမဲ့ အမြဲတမ်း ယဉ်ကျေးတယ်၊ စိတ်ရှည်ပြီး နားလည်မှုရှိတဲ့သူဖြစ်တဲ့အတွက်ကြောင့် ဟိုတယ်အဝင်အထွက် စာရင်းပြုစုတဲ့အခါမှာ” သူ၏အလုပ်ကို “အလွန့်အလွန်ပို၍လွယ်ကူစေကြောင်း” ဆိုခဲ့သည်။ နယူးအင်္ဂလန်ရှိ အမျိုးသမီးတစ်ဦးသည် မိုတယ်တစ်ခုတွင် အတူတည်းနေသည့် သက်သေခံလူငယ်များ၏ကျင့်ကြံပြုမူမှုကြောင့် အထင်ကြီးလေးစားသွားပြီး ကျွန်ုပ်တို့အဖွဲ့အစည်းနှင့်ပတ်သက်သည့် စာပေတချို့ကို တောင်းယူသည့်အထိပင်ဖြစ်ခဲ့သည်။

^၁၂ တစ်ဖက်တွင်မူ အချို့သောနေရာများ၌ တိုးတက်စရာရှိသေးသည်။ အဖွဲ့အစည်းသို့ပေးပို့ခဲ့သည့် အချို့သူများ၏ တွေ့မြင်ချက်များကို ကျွန်ုပ်တို့ဝေမျှပေးလိုပါသည်။ ယေဟောဝါသက်သေများ၏ ကလေးများသည် ဟိုတယ်များတွင် သာ၍ကြပ်မတ်ပေးရန်လိုကြောင်း နယ်လှည့်ကြီးကြပ်မှူးတစ်ဦး သတင်းပို့သည်။ အချို့သည် စင်္ကြံတွင် ပြေးလွှားနေခြင်း၊ ဓာတ်လှေကားများနှင့် တက်လိုက်ဆင်းလိုက်လုပ်နေခြင်း၊ ရေကူးကန်ဝန်းကျင်တွင် အကြီးအကျယ်ဆူညံအောင်လုပ်နေခြင်း၊ ရေကန်တွင် အသိပေးထားသည့် ပိတ်ချိန်ကို အတော်လေးကျော်လွန်သည့်အထိ နေကြခြင်းကို တွေ့မြင်ရပြီး အခြားဧည့်သည်များကို အိပ်ရေးပျက်စေကြောင်းတွေ့ရှိရသည်။ ခရစ်ယာန်ကျင့်ကြံပြုမူမှုသည် အချို့အချိန်လောက်တွင်သာရှိဖို့ ကန့်သတ်မထားကြောင်း နားလည်စေရန် ကျွန်ုပ်တို့ကလေးများကို လေ့ကျင့်ပေးဖို့လိုသည်။ စည်းဝေးကြီးအဆောက်အအုံမှ ထွက်လမ်းလျှောက်သည့်အခါတွင် ယင်းသည် အဆုံးမသတ်သွားပါ။ ယင်းသည် တစ်ရက်လျှင် ၂၄ နာရီဖြစ်ရမည်။ ဟိုတယ်တွင်၊ စားသောက်ဆိုင်များတွင်နှင့် လမ်းများပေါ်တွင် ကျွန်ုပ်တို့၏ကျင့်ကြံပြုမူမှုသည် ကျွန်ုပ်တို့ညီအစ်ကိုများနှင့်အတူထိုင်ကာ အစီအစဉ်များအတွင်း ယေဟောဝါ၏သွန်သင်မှုခံယူနေချိန်ကကဲ့သို့ပင် အသရေရှိသင့်သည်။—ဟေရှာ. ၅၄:၁၃; ၁ ပေ. ၂:၁၂။

^၁၃ သဒ္ဓါကြေးပေးခြင်းနှင့်ပတ်သက်၍လည်း ကြင်နာသောသတိပေးချက်တစ်ခုကို ကျွန်ုပ်တို့ဝေမျှပေးလိုပါသည်။ စားပွဲထိုး အမျိုးသား၊ အမျိုးသမီးများ၊ ဟိုတယ်အလုပ်သမများ၊ ခေါင်းလောင်းထိုးပေးသူများနှင့် အလားတူအလုပ်လုပ်ကိုင်သော အခြားသူများသည် အသက်မွေးမှုအတွက် သဒ္ဓါကြေးများပေါ်တွင် မှီခိုအားထားနေရသည်။ နိုးလော့! ၁၉၈၆၊ ဇွန် ၂၂၊ စာမျက်နှာ ၂၄-၇ [လိပ်] ရှု။

^၁၄ ကျွန်ုပ်တို့၏စည်းဝေးကြီးများ၌ အစားအသောက်အစီအစဉ်မရှိတော့သော်လည်း အဆောက်အအုံ ငှားရမ်းခြင်း၊ ကားထားဖို့ အစီအစဉ်ပြုလုပ်ခြင်း၊ အထွေထွေကိစ္စများအတွက် ဆောင်ရွက်ခြင်းတို့တွင် အတော်အတန်ကုန်ကျနေဆဲပင်ဖြစ်သည်။ ယင်းကုန်ကျမှုအတွက် စေတနာအလျောက်ထည့်ဝင်သည့် အလှူငွေများက ထောက်ပံ့သည်။ ဆယ်ကျော်သက်သားသမီးများရှိသော ညီအစ်မတစ်ဦးသည် ငွေကြေးအနည်းအကျဉ်းနှင့် စည်းဝေးကြီးသို့ လာခဲ့သည်။ သို့သော် သူမနှင့် ကလေးများသည် အလှူငွေအနည်းငယ်ကိုထည့်လှူခဲ့ကြသည်။ ဤကိစ္စနှင့်ပတ်သက်၍ လုပ်ဆောင်ဖို့ တစ်ဦးတစ်ယောက်ဆုံးဖြတ်ခြင်းသည် ကိုယ်ရေးကိုယ်တာကိစ္စဖြစ်ပါသည်၊ သို့သော် ဤကဲ့သို့သောနှိုးဆော်ချက်များကို သင်တန်ဖိုးထားကြောင်း ကျွန်ုပ်တို့သိပါသည်။—တ. ၂၀:၃၅; ၂ ကော. ၉:၇။

^၁၅ ကျွန်ုပ်တို့၏ဝတ်ဆင်ပုံအားဖြင့် အသိအမှတ်ပြုခံရ– ကျွန်ုပ်တို့၏ဆင်ယင်ပုံသည် ကျွန်ုပ်တို့အကြောင်းနှင့် အခြားသူများအပေါ် ကျွန်ုပ်တို့၏သဘောထားများကို များစွာဖော်ပြသည်။ ဆယ်ကျော်သက်အများစုနှင့် အရွယ်ရောက်သူများစွာတို့သည် ကျောင်းတွင် သို့မဟုတ် သူတို့၏အလုပ်ဌာနတွင် ဝတ်ဆင်ကြသည့် ခေတ်ပေါ်ပုံဆန်း ဖြစ်ကတတ်ဆန်းစတိုင်များ၏ လွှမ်းမိုးမှုခံရကြသည်။ နှစ်စဉ်ပင် အဝတ်အစားစတိုင်များသည် ပို၍လွန်ကဲလာပြီး ထိတ်လန့်တုန်လှုပ်ဖွယ်ဖြစ်သည့်အထိပင်။ ကျွန်ုပ်တို့ဂရုမစိုက်ပါက သူတို့ဝတ်ဆင်သလို ဝတ်ဆင်ရန် လောကီရွယ်တူတန်းများ၏ ဩဇာညောင်းမှုကို အလွယ်တကူခံရနိုင်သည်။ စတိုင်များစွာသည် ဝတ်ပြုစည်းဝေးများတွင် ဝတ်ဆင်ရန် မသင့်တော်ပါ။ လွန်ခဲ့သည့်နှစ် စည်းဝေးကြီးတစ်ခုအပြီး လက်ခံရရှိခဲ့သော မှတ်ချက်တိုလေးက အစီအစဉ်အတွက် ကျေးဇူးအထူးတင်ကြောင်း ဖော်ပြပြီး ဤသို့ဆက်ဆိုသည်– “အဲ့ဒီလောက်တိုနှံ့နှံ့အဝတ်အစားတွေ၊ လယ်ဟိုက်အင်္ကျီတွေနဲ့ မြင့်မြင့်ခွဲထားတဲ့စကတ်တွေဝတ်ထားတဲ့ မိန်းမငယ်လေးတွေ ဒီလောက်များများ ဒီမှာဘာကြောင့်ရှိနေရတာတုန်းလို့ ကျွန်ုပ်စဉ်းစားနေမိတယ်။” ကျွန်ုပ်တို့အားလုံးသည် စည်းဝေးကြီးတက်ချိန်ကော အစီအစဉ်ပြီးနောက် လူမှုရေးပေါင်းသင်းဆက်ဆံမှုပြုနေစဉ်တွင်ပါ ခရစ်ယာန်ဓမ္မအမှုဆောင်များနှင့် အံဝင်သည့် နည်းဖြင့် ဆင်ယင်လိုကြသည်မှာ သေချာသည်။ ကျွန်ုပ်တို့သည် “ရှက်ကြောက်ခြင်း၊ ဣန္ဒြေစောင့်ခြင်းအားဖြင့် လျောက်ပတ်သောအဝတ်နှင့်” တန်ဆာဆင်ပါဟူသည့် ခရစ်ယာန်များအတွက်ပေးသော တမန်တော်ပေါလု၏ ဩဝါဒကိုလိုက်နာခြင်းသည် အမြဲပင်အကျိုးရှိပါသည်။—၁ တိ. ၂:၉။

^၁၆ ဣန္ဒြေစောင့်သော၊ “လျောက်ပတ်သော” ဆင်ယင်မှုသည် အဘယ်အရာဖြစ်သည်ကို မည်သူဆုံးဖြတ်ရမည်နည်း။ ဣန္ဒြေစောင့်ခြင်းဟူသည် “ပလွှားမှုမရှိ၊ ကိုယ်ကျိုးအတွက် မရမကရှာခြင်းမရှိ” ဟု အဓိပ္ပာယ်ရှိသည်။ အဘိဓာန်က ဣန္ဒြေစောင့်သောကို “ဟန်ဆောင်မှုမရှိသော” ဟူ၍လည်း အနက်ဖွင့်သည်။ အဖွဲ့အစည်းသော်လည်းကောင်း၊ အကြီးအကဲများသော်လည်းကောင်း ဆင်ယင်ထုံးဖွဲ့မှုနှင့်ပတ်သက်၍ စည်းမျဉ်းမထုတ်ပါ။ မည်သည့်အဝတ်အစားစတိုင်သည် လုံးဝဣန္ဒြေမရှိ သို့မဟုတ် လုံးလုံးမလျောက်ပတ်ကြောင်းကို ခရစ်ယာန်တစ်ဦး သဲသဲကွဲကွဲသိထားသင့်သည်မဟုတ်လော။ (ဖိလိပ္ပိ ၁:၁၀ နှိုင်းယှဉ်။) ကျွန်ုပ်တို့၏ဆင်ယင်ထုံးဖွဲ့မှုနှင့် အဝတ်အစားသည် မသင့်လျော်သည့်အာရုံစိုက်မှုကို မဆွဲဆောင်သင့်ပါ။ ကျွန်ုပ်တို့သည် အသွင်အပြင်အားဖြင့် လောကီဆန်ခြင်း သို့မဟုတ် မနှစ်မြို့ဖွယ်ဖြစ်ခြင်း မဟုတ်ဘဲ နှစ်လိုဖွယ်ဖြစ်ရမည်။ ခရိုင်စည်းဝေးကြီးတွင် ကျွန်ုပ်တို့ရှိနေချိန်အတွင်း သတင်းကောင်း၏ ဓမ္မအမှုဆောင်များအနေနှင့် ကျွန်ုပ်တို့၏ သင့်လျော်သောဆင်ယင်ထုံးဖွဲ့မှုသည် ယေဟောဝါကို ဂုဏ်တက်စေပြီး အဖွဲ့အစည်းအပေါ်တွင် ကောင်းကျိုးသက်ရောက်သည်။ ထို့ကြောင့် မိဘတို့သည် စံနမူနာပြမည်ဖြစ်ပြီး ဤအချိန်အခါအတွက် မိမိတို့၏သားသမီးများ သင့်လျော်စွာဆင်ယင်ဖို့ အသေအချာစီစဉ်ပါ။ အကြီးအကဲများသည် စံနမူနာကောင်းတင်ပြလိုကြမည်ဖြစ်ပြီး လိုအပ်မည်ဆိုလျှင် ကြင်နာသောသွန်သင်မှုကို ပေးရန်အသင့်ရှိကြမည်။

^၁၇ ဟိုတယ်များ– အထက်တွင် ကျွန်ုပ်တို့ကိုးကားခဲ့သည့် ဟိုတယ်ဝန်ထမ်းများက ထိုညီအစ်ကိုများ စိတ်ရှည်ကြ၊ ယဉ်ကျေးပြီး ပူးပေါင်းလုပ်ဆောင်ကြသောကြောင့် မိမိတို့စွဲမှတ်သွားရပါကြောင်း ပြောကြားကြသည်။ ကျွန်ုပ်တို့သည် စာရင်းရေးသွင်းဖို့ တန်းစီပြီးစောင့်ရပါက အဆိုပါခရစ်ယာန်အရည်အသွေးများကို ဆက်၍ပြလိုကြသည်။ အခကြေးငွေဖြင့် အခန်းများကို စီစဉ်ရာတွင် အဖွဲ့အစည်းနှင့်အတူ ပူးပေါင်းလုပ်ဆောင်ခဲ့သည့် ဟိုတယ်များကို ကျွန်ုပ်တို့အထူးကျေးဇူးတင်ပါသည်။ ကျွန်ုပ်တို့သည် ခရီးစဉ်ကြောင့် မောပန်းနွမ်းနယ်နေမည်ဖြစ်သော်လည်း ဟိုတယ်အလုပ်သမားများကို ကြင်နာမှုရှိရှိ ဆက်ဆံဖို့ သတိရပါ။ ဤသို့ကျွန်ုပ်တို့လုပ်ဆောင်မှုသည် အချို့သူများအား သမ္မာတရားကို ပို၍အလေးအနက်ထား စဉ်းစားလာစေနိုင်သည်။ ထို့အပြင် ချက်ပြုတ်ဖို့အတွက် မီးဖိုချောင်တစ်ခုမထားပေး၍ ဟိုတယ်ခန်းများတွင် မချက်ပြုတ်ရပါ။

^၁၈ ကင်မရာများ၊ ဗီဒီယိုကင်မရာအသေးစားနှင့် အသံသွင်းစက်များ– ကျွန်ုပ်တို့သည် တက်ရောက်လာသည့် အခြားသူများကို ထောက်ထားစာနာမှုတင်ပြမည်ဆိုလျှင် ကင်မရာများနှင့် အခြားအသံသွင်းစက်များကို အသုံးပြုခွင့်ပေးသည်။ ကျွန်ုပ်တို့သည် အစီအစဉ်တင်ဆက်စဉ်အတွင်း လှည့်ပတ်ဓာတ်ပုံရိုက်နေပါက ကြိုးစားနားထောင်နေသည့် အခြားသူများကို အာရုံလွင့်ပါးသွားစေမည်သာမက ကျွန်ုပ်တို့ကိုယ်တိုင်လည်း အစီအစဉ်မှအချို့ကို လွတ်သွားမည်။ ကျွန်ုပ်တို့သည် စည်းဝေးကြီး၌ ဟောပြောသူများကို အသေအချာဂရုစိုက်ခြင်းနှင့် အတော်အသင့်မှတ်ချက်များယူခြင်းတို့မှ ပို၍အကျိုးရှိလေ့ရှိသည်။ မလာနိုင်သည့် ညီအစ်ကိုညီအစ်မတစ်ဦးအတွက် ကျွန်ုပ်တို့အသံသွင်းပေမည်; သို့သော် ကိုယ်ပိုင်သုံးဖို့အတွက်မူ အစီအစဉ်မှ နာရီပေါင်းများစွာကို ရိုက်ကူးပြီးနောက် အိမ်ပြန်သွားသောအခါတွင် ကျွန်ုပ်တို့သွင်းယူခဲ့သည့်အရာများစွာကို ပြန်ကြည့်ရန် အချိန်ရှိမည်မဟုတ်ကြောင်း တွေ့ရပေသည်။ မည်သည့်အသံသွင်းကိရိယာမျိုးမှ လျှပ်စစ် သို့မဟုတ် အသံချဲ့စက်များနှင့် မဆက်သွယ်ရပါ၊ မည်သည့်ကိရိယာမှ လမ်းများ၊ စင်္ကြံများကို ပိတ်ဆို့မထားသင့် သို့မဟုတ် အခြားသူများ၏မြင်ကွင်းကို ကွယ်မထားသင့်ပါ။

^၁၉ ထိုင်ခုံ– ထိုင်ခုံများဦးထားခြင်းကိစ္စတွင် တိုးတက်မှုရှိကြောင်း ကျွန်ုပ်တို့ဆက်၍သတိထားမိသည်။ လွန်ခဲ့သည်နှစ်က သင်တို့ထဲမှအများစုသည် ဤညွှန်ကြားချက်များကို လိုက်နာခဲ့ကြသည်– သင့်မိသားစုဝင်များနှင့် သင်နှင့်အတူကားစီးလာသူများအတွက်သာ ထိုင်ခုံဦးထားနိုင်သည်။ များစွာသောသူများသည် အဆိုပါရှင်းလင်းသောညွှန်ကြားချက်များကို လိုက်နာခဲ့ကြသောကြောင့် အခက်အခဲသိပ်မရှိကြောင်း သင်တွေ့ရဖွယ်ရှိသည်။ သာ၍အရေးပါသည်မှာ သင်၏အလိုက်သိတတ်မှုသည် ယေဟောဝါရှင်နှင့် ဝိညာဏအစာ တည်ခင်းပေးသော ‘သစ္စာရှိကျေးကျွန်’ တို့ကို နှစ်သက်စေခဲ့ခြင်းဖြစ်သည်။—မ. ၂၄:၄၅။

^၂၀ ကျန်းမာရေးအထူးဂရုစိုက်ဖို့လိုသည့် ညီအစ်ကိုများ တိုးများလျက်ရှိသည်။ အချို့ဆိုလျှင် စည်းဝေးကြီးသို့ ဘီးတပ်ကုလားထိုင်များနှင့် လာကြပြီး မိသားစုဝင်များက ဂရုစိုက်ဖို့လိုအပ်သည်။ အခြားသူများမူ နှလုံးရောဂါ သို့မဟုတ် ရုတ်တရက်ဖြစ်တတ်သည့်ရောဂါများကဲ့သို့သော နာတာရှည်ရောဂါများအတွက် ကုသမှုအမျိုးမျိုးခံယူနေရသည်။ စည်းဝေးကြီးတွင် ချစ်ဖွယ်ကောင်းသော အဆိုပါညီအစ်ကိုညီအစ်မများကို တွေ့မြင်ရခြင်းက ကျွန်ုပ်တို့၏နှလုံးကို နွေးထွေးမှုအမှန်ဖြစ်စေသည်။ မည်သည့်ဝိညာဉ်အစာကိုမျှ မလွတ်သွားဖို့ ဆုံးဖြတ်ထားပါ။ သို့သော် ရံဖန်ရံခါတွင် စည်းဝေးကြီးကျင်းပစဉ်အတွင်း အဖျားဝင်လာသည့် အချို့ပုဂ္ဂိုလ်များ၏ပြဿနာရှိခဲ့သည်။ သူတို့တွင် မိသားစုမရှိ၊ အကူအညီပေးမည့် အသင်းတော်သားမရှိပေ။ အချို့ကိစ္စများတွင် စည်းဝေးကြီးစီမံခန့်ခွဲရေးရုံးက ညီအစ်ကိုညီအစ်မတစ်ဦးကို ဆေးရုံပို့ရန် အရေးပေါ်ဆေးဘက်ဆိုင်ရာလုပ်ငန်းကို ခေါ်ယူဖို့ လိုအပ်သည်။ နာတာရှည်ဖျားနာသူများကို ကြည့်ရှုဂရုစိုက်ဖို့တာဝန်မှာ အဓိကအားဖြင့် မိသားစုဝင်များနှင့် ဆွေမျိုးနီးစပ်များပေါ်တွင် ကျရောက်သင့်သည်။ ရှေးဦးသူနာပြုဌာနသည် နာတာရှည်ဖျားနာသူများကို ကြည့်ရှုဂရုစိုက်ရန် စီစဉ်ပေးမည့် အနေအထားတွင် မရှိပါ။ သင့်မိသားစုဝင်တစ်ဦးသည် အထူးဂရုစိုက်ဖို့ လိုအပ်ပါက အရေးပေါ်အခြေအနေပေါ်ပေါက်သောအခါတွင် သူ့အား တစ်ယောက်တည်းပစ်မထားကြောင်း ကျေးဇူးပြု၍စိတ်ချပါ။ ထို့အပြင် အများထိုင်ခုံနေရာများတွင် ထိုင်၍မရသည့် သွေးမတည့်သူများကို နေရာစီစဉ်ပေးရန် အထူးအခန်းများအတွက် စည်းဝေးကြီးတွင် အစီအစဉ်ရှိမည်မဟုတ်ပါ။ အကြီးအကဲများသည် ကျန်းမာရေးအထူးဂရုစိုက်ဖို့လိုအပ်သော မိမိတို့၏အသင်းတော်သားများအတွက် နိုးနိုးကြားကြားရှိလိုကြမည်ဖြစ်ပြီး သူတို့အား ကြည့်ရှုဂရုစိုက်ဖို့အတွက် အစီအစဉ်များကို အသေအချာ ကြိုတင်ဆွဲထားပါ။

^၂၁ စည်းဝေးကြီးတွင် အစားအစာ လိုအပ်ချက်– တန်းစီမတ်တတ်ရပ်နေမည့်အစား ကိုယ့်အစားအစာကို ကိုယ်တိုင်ယူလာခြင်း၏အကျိုးကျေးဇူးများနှင့်ပတ်သက်၍ များစွာသော အပြုသဘောပါသည့် မှတ်ချက်များကို မြွက်ဟခဲ့ကြသည်။ ညီအစ်ကိုတစ်ဦးက ဤသို့ရေးသားခဲ့သည်– “အဲ့ဒီကနေ ကြီးမားတဲ့ ဝိညာဏအကျိုးအမြတ်ကို အထင်အရှားတွေ့မြင်နိုင်ပါတယ်။ အချိန်နဲ့ ခွန်အားရှိရှိသမျှကို ဝိညာဉ်ရေးကိစ္စတွေဆီ အခု ပြောင်းလဲပေးနိုင်ကြပါတယ်။ အပျက်သဘောထား တစ်ခွန်းတလေမှ မကြားခဲ့ရပါဘူး။” ညီအစ်မတစ်ဦးက ဤသို့ရေးခဲ့သည်– “အသင်ချစ်လှစွာသောညီအစ်ကိုများဟာ ပုံသက်သေအားဖြင့် ခရစ်ယာန်တစ်ဦးချင်းအနေနဲ့ မိမိတို့ကိုယ်ကိုပြန်ဆန်းစစ်ရန်နှင့် မိမိတို့အသက်တာကို ရိုးရိုးလေးနည်းနှင့်နေရန်၊ သီအိုကရက်တစ်လုပ်ငန်းကို တိုး၍လုပ်ဆောင်ရန် ကျွန်မတို့ကို အားပေးပါသည်။” ယခင်အစားအသောက် ကျွေးမွေးရေးအစီအစဉ်များအကြောင်း နယ်လှည့်ကြီးကြပ်မှူးတစ်ဦး ဤသို့ရေးသားခဲ့သည်– “အစီအစဉ်ဟောင်းသည် ညီအစ်ကိုတော်တော်များများကို အစည်းအဝေးအစီအစဉ်တစ်ခုလုံး လွတ်သွားစေခဲ့ပါတယ်။” ညီအစ်ကိုများယူလာသည့် အစားအစာများနှင့်စပ်လျဉ်း၍ အကြီးအကဲတစ်ဦး ဤသို့စာရေးခဲ့သည်– “သူတို့စားချင်တယ်ဆိုရင် ချက်ချင်းစားလို့ရတယ်၊ တန်းစီပြီးစောင့်မနေရတော့ဘူး။” နောက်ဆုံးအနေနှင့် နောက်ညီအစ်မတစ်ဦးက ဤသို့စာရေးခဲ့သည်– “အစီအစဉ်ပြီးသည့်နောက်တွင် အေးဆေးငြိမ်သက်နေပြီး အားပေးစကားများများ ပြောကြတယ်။” မှန်ပါသည်၊ တစ်ဦးစီသည် မွန်းလွဲပိုင်းအချိန်တွင် မိမိကိုယ်ကိုအားဖြည့်ရန် အလုံအလောက်ယူလာနိုင်သည်။ သူတို့သည် မိတ်ဆွေများနှင့် လည်ပတ်ဖို့အချိန်ပိုရသည်ဟူသော အချက်ပေါ်တွင် များစွာသောသူများ ထုတ်ဖော်ပြောဆိုကြသည်။

^၂၂ ဤနှစ်တွင်လည်း အစားအသောက်အစီအစဉ် ရှိမည်မဟုတ်ပါ။ စည်းဝေးကြီးသို့ယူလာနိုင်သည့် အာဟာရဖြစ်စေသော အစားအစာမျိုးနှင့်ပတ်သက်၍ လက်တွေ့ကျသော အကြံပြုချက်များအတွက် ၁၉၉၅ မေလ ကျွန်ုပ်တို့၏နိုင်ငံတော်ဓမ္မအမှု ကြားညှပ်စာရွက် စာပိုဒ် ၂၆ ကို မိနစ်အနည်းငယ် အချိန်ယူပြီးသင်ပြန်ကြည့်နိုင်သည်။ ဖန်ထည် ထည့်စရာများ သို့မဟုတ် အရက်ယမကာများကို စည်းဝေးကြီးအဆောက်အအုံသို့ မယူလာရကြောင်းကို ကျေးဇူးပြု၍ သတိရပါ။ အအေးခံသည့်ခွက်ငယ်များ လိုအပ်ပါက ၎င်းတို့သည် သင့်ထိုင်ခုံအောက်တွင် ဝင်ဆံ့ရမည်။ သင်ယူလာသည့်အရာများကို မွန်းလွဲပိုင်း ရပ်နားချိန်အတွင်း စားသောက်ဖို့ အချိန်အလုံအလောက်ရကြောင်း သတိရပါ။ ကျွန်ုပ်တို့၏နိုင်ငံတော်ခန်းမတွင် စည်းဝေးများကျင်းပနေချိန်ကဲ့သို့ စည်းဝေးကြီးအစီအစဉ်များအတွင်း စားခြင်းကို အမြဲရှောင်ကြမည်။ သို့နှင့် ကျွန်ုပ်တို့သည် ဝတ်ပြုမှုအစီအစဉ်အတွက်နှင့် ပြင်ဆင်ပေးနေသော ဝိညာဏအစားအစာအတွက် တန်ဖိုးထားမှုကို တင်ပြကြပါမည်။

^၂၃ မကြာမီအချိန်တွင် “ဘုရားရေးရာငြိမ်သက်ခြင်း၏တမန်များ” ခရိုင်စည်းဝေးကြီးစတင်ကျင်းပတော့မည်။ တက်ရောက်ဖို့ သင်အပြည့်အစုံပြင်ဆင်ထားပြီလော၊ သုံးရက်တာ ပျော်ရွှင်သောပေါင်းဖော်မှုနှင့် ဝိညာဉ်ရေးကောင်းကျိုးဖြစ်စေသောအရာများကို ခံစားရန် ယခုသင် အသင့်ဖြစ်နေသလော။ ယေဟောဝါသည် စည်းဝေးကြီးကို တက်ရောက်ဖို့ သင့်အားထုတ်လုပ်ဆောင်မှုများကို ကောင်းချီးပေးပါစေကြောင်း အမှန်ပင်ဆုမွန်ကောင်းတောင်းလိုက်ပါသည်။

[စာမျက်နှာ ၉ ပါ လေးထောင့်ကွက်]

ခရိုင်စည်းဝေးကြီး သတိပေးချက်များ

နှစ်ခြင်းခံခြင်း– စနေနေ့နံနက် စည်းဝေးကြီးအစီအစဉ်မစမီ သတ်မှတ်ထားရာထိုင်ခုံများတွင် နှစ်ခြင်းခံမည့်သူများ နေရာယူသင့်သည်။ အချို့သူများ၏ဝတ်စားဆင်ယင်မှုသည် အချိန်အခါနှင့်မတော်လျော်၊ ဣန္ဒြေမရှိကြောင်း သတိပြုမိခဲ့ပြီ။ နှစ်ခြင်းခံမည့်သူတိုင်း ဣန္ဒြေရှိသော အဝတ်အစားနှင့် မျက်နှာသုတ်ပဝါကို ယူဆောင်လာသင့်သည်။ နှစ်ခြင်းခံမည့်သူများနှင့် မိမိတို့၏ဓမ္မအမှု စာအုပ်ပါမေးခွန်းများကို ပြန်ဆွေးနွေးသည့် အသင်းတော်အကြီးအကဲများသည် ဤအချက်များကို တစ်ဦးချင်း အသေအချာနားလည်စေလိုပါမည်။ ဟောပြောသူ၏နှစ်ခြင်းဟောပြောချက်နှင့် ဆုတောင်းခြင်းပြီးနောက် အစီအစဉ်သဘာပတိက နှစ်ခြင်းယူမည့်သူများအတွက် ညွှန်ကြားချက်အနည်းငယ်ပေးပြီး သီချင်းစဆိုရန် ကြေညာမည်။ နောက်ဆုံးအပိုဒ်ပြီးသည့်အခါ ဧည့်ကြိုများက နှစ်ခြင်းခံမည့်သူများအား နှစ်ခြင်းခံမည့်နေရာသို့ ပို့ဆောင်ပေးပါလိမ့်မည်။ နှစ်ခြင်းခံခြင်းသည် နှစ်ခြင်းခံမည့်သူနှင့် ယေဟောဝါစပ်ကြား ရင်းနှီးသည့်ကိုယ်ရေးကိုယ်တာကိစ္စကို အထိမ်းအမှတ်ပြုသောကြောင့် နှစ်ခြင်းယူစဉ် လူနှစ်ဦး သို့မဟုတ် ထိုထက်မကသောသူတို့က လက်ကိုကိုင်ထားကြခြင်းဖြင့် တွဲဖက်နှစ်ခြင်းပေးခြင်းဟူ၍ အစီအစဉ်မရှိပါ။

ရင်ထိုးကတ်ပြားများ– စည်းဝေးကြီးတွင်နှင့် စည်းဝေးကြီးသို့အလာ၊ ယင်းမှ အထွက်တို့တွင် ၁၉၉၆ ရင်ထိုးကတ်ပြားများကို ကျေးဇူးပြု၍ တပ်ဆင်ထားပါ။ ဤသို့ပြုခြင်းက ခရီးသွားလာစဉ် သက်သေခံရန်အခွင့်ကောင်း ရရှိစေတတ်သည်။ ရင်ထိုးကတ်ပြားများနှင့် ကတ်ပြားအိမ်များကို စည်းဝေးကြီးတွင် မရနိုင်သည့်အခါ သင့်အသင်းတော်မှတစ်ဆင့် ရယူသင့်သည်။ သင်နှင့် သင့်မိသားစုအတွက် ကတ်ပြားများကို တောင်းဆိုဖို့အတွက် စည်းဝေးကြီးမတိုင်မီရက်အနည်းငယ်အထိ စောင့်မနေပါနှင့်။ သင်၏လက်ရှိ ကြိုတင်ဆေးဘက်ဆိုင်ရာညွှန်ကြားချက်/လွတ်ငြိမ်းခွင့်ကတ်ပြားများကို ဆောင်ထားရန် သတိရပါ။

တည်းခိုခြင်း– စည်းဝေးကြီးက စီစဉ်ပေးသည့် စာရင်းပါနေရာထိုင်ခင်းများတွင်သာ အသုံးပြုခြင်းဖြင့် ယောက်တိုင်းပူးပေါင်းလုပ်ဆောင်ကြဖို့ ကျွန်ုပ်တို့တောင်းဆိုပါသည်။

ကလေးလက်တွန်းလှည်းများနှင့် ခေါက်ကုလားထိုင်များ– ဒေသအများစုတွင် ကလေးလက်တွန်းလှည်းများကို လူထုစည်းဝေးကျင်းပရာနေရာ၌ အသုံးမပြုနိုင်ကြပါ။ မီးဥပဒေများက ယင်းတို့ကို စင်္ကြံများနှင့် မင်းလမ်းများ သို့မဟုတ် ခုံတန်းများကြားတွင် ထားခွင့်မပြုပါ။ လူအုပ်ကြီးများသည် စုပြုံတိုးခွေ့သောအခြေအနေများ ဖြစ်ပေါ်နိုင်သောကြောင့် ကလေးလက်တွန်းလှည်းများသည် ကလေးများအတွက်သာမက ယင်းအပေါ် ခလုတ်တိုက်လဲသူများအတွက်ပါ အန္တရာယ်ဖြစ်နိုင်သည်။ သို့ဖြစ်၍ ယင်းတို့ကို စည်းဝေးကြီးကျင်းပရာ နေရာသို့ ကျေးဇူးပြု၍ ယူမလာပါနှင့်။ သို့သော် ဘီးတပ်ကလေးထိုင်ခုံများမူ မိဘများနှင့်အနီးဆုံးထိုင်ခုံများဘေးတွင် ကပ်ထားနိုင်သောကြောင့် ယင်းတို့ကို ယူလာခွင့်ပြုသည်။ ထို့အပြင် ခေါက်ကုလားထိုင်များကို ယူမလာပါနှင့်။ ယင်းတို့သည် အန္တရာယ်ရှိပြီး ကြီးမာသည့်လူထုအဆောက်အအုံများတွင် ခွင့်မပြုပါ။ အဆိုပါကိစ္စများတွင် သင်၏ပူးပေါင်းလုပ်ဆောင်မှုကို ကျေးဇူးအထူးတင်ပါသည်။

စေတနာ့ဝန်ထမ်းဌာန– အစားအသောက်အစီအစဉ် မရှိတော့သောကြောင့် ယခင်ကထိုဌာနတွင် လုပ်ဆောင်ခဲ့သူများသည် ယခုဆိုလျှင် မည်သည့်နေရာတွင်မဆို စေတနာ့ဝန်ထမ်းလုပ်နိုင်ကြောင်း တွေ့ရပေမည်။ ထိုဌာနများထဲမှတစ်ခုတွင် ပါဝင်ကူညီရန် စည်းဝေးကြီးတွင် အချိန်အချို့ကို သင်ဖယ်ထားနိုင်သလော။ နာရီအနည်းငယ်မျှ ကျွန်ုပ်တို့၏ညီအစ်ကိုများအတွက် အမှုဆောင်ပေးဦးတော့ အလွန်အကူအညီဖြစ်နိုင်ပြီး အတော်အတန်ဖြည့်ဆည်းပေးပါသည်။ သင်ပါဝင်ကူညီနိုင်မည်ဆိုလျှင် စည်းဝေးကြီးရှိ စေတနာ့ဝန်ထမ်းဌာနသို့ ကျေးဇူးပြု၍ သတင်းပို့ပါ။ အသက် ၁၆ နှစ်အောက် ကလေးများလည်း မိဘတစ်ဦး သို့မဟုတ် အခြားတာဝန်ရှိသော လူကြီး၏ညွှန်ကြားမှုအောက်တွင် လုပ်ဆောင်ခြင်းအားဖြင့် မွန်မြတ်သောအလှူပေးနိုင်ကြသည်။

သတိပေးစကားများ– မလိုအပ်သောအခက်အခဲကို ရှောင်ရှားနိုင်ရန်အလို့ငှာ ဖြစ်လာနိုင်သောပြဿနာများကို မပြတ်သတိပြုပါ။ သူခိုးများနှင့် အခြားမသမာသူတို့သည် မိမိတို့နေအိမ်မှ အဝေးသို့ရောက်နေသူများအား ချောင်းမြောင်းနေတတ်သည်။ သင့်ကားကို အချိန်အခါမရွေး သော့ခတ်ထားရန်နှင့် သူတစ်ပါးချိုးဖောက်ယူလိုစိတ်ပေါ်စေရန် မြင်နိုင်သည့်နေရာတွင် အဘယ်အရာကိုမျှ မထားခဲ့ပါနှင့်။ သူခိုးများနှင့် ခါးပိုက်နှိုက်တို့သည် လူအုပ်စုဝေးရာနေရာများကို အာရုံစိုက်တတ်ကြသည်။ သင့်ထိုင်ခုံတွင် တန်ဖိုးရှိပစ္စည်းများ ထားရစ်ခြင်းသည် ပညာရှိရာကျမည်မဟုတ်ပါ။ သင့်ဝန်းကျင်ရှိသူတိုင်း ခရစ်ယာန်တစ်ဦးဖြစ်သည်ဟု မသေချာနိုင်ပါ။ သွေးဆောင်သည့်အခြေအနေမျိုး မဖြစ်စေပါနှင့်။ ကလေးများကို ခေါ်ဆောင်သွားရန် အပြင်လူတချို့က ကြိုးစားခဲ့ကြောင်း သတင်းရရှိသည်။ သင့်သားသမီးများကို တစ်ချိန်လုံး မျက်ခြည်မပြတ် ဂရုစိုက်ပါ။

ဟိုတယ်များစွာတွင်ကြည့်ရှုနိုင်သော ရုပ်မြင်သံကြားနှင့် ဗီဒီယိုအစီအစဉ်များသည် ညစ်ညမ်းသောရုပ်ရှင်အစီအစဉ်များကို တင်ဆက်လေ့ရှိသည်။ ဤထောင်ချောက်ကို သတိထားပါ၊ အခန်းထဲရှိရုပ်မြင်သံကြားကို ခွင့်ပြုချက်မရဘဲ ကလေးများအား ဖွင့်ကြည့်ခွင့်မပေးပါနှင့်။