ဖော်ရွေပျူငှာမှုဖြင့် ပြောဆိုသည့်စကားများသည် နှလုံးကိုထိမိနိုင်

^၁ စကားပြောဆိုခြင်းကို “နှုတ်ဖြင့်သဘောထားဖလှယ်ခြင်း” အဖြစ်အဓိပ္ပာယ်ဖွင့်ဆိုနိုင်သည်။ အခြားသူများနှင့်ပတ်သက်နေသည့် အကြောင်းတစ်ခုကို ဖော်ရွေပျူငှာမှုဖြင့်စတင် ပြောဆိုခြင်းသည် သူတို့၏အာရုံကိုဖမ်းယူနိုင်ပြီး နိုင်ငံတော်သတင်းဖြင့် နှလုံးကိုထိမိနိုင်ရန် ကူညီပေးနိုင်သည်။ ဖော်ရွေပျူငှာပြီး အေးဆေးစွာစကားပြောခြင်းဖြင့် လူတို့ကိုဆက်သွယ်ခြင်းသည် ဟောပြောချက်တစ်ခုပေးခြင်းထက် ပို၍ထိရောက်မှုရှိကြောင်း အတွေ့အကြုံများက တင်ပြနေပါသည်။

^၂ ဖော်ရွေပျူငှာစွာ စတင်စကားပြောဆိုနိုင်ပုံ– အခြားသူများနှင့်စကားပြောဆိုနိုင်ခြင်းသည် စီစဉ်ထားသည့်မှတ်သားဖွယ်အကြောင်းအရာနှင့် ကျမ်းချက်များကိုတင်ပြရမည် ဟူ၍မဆိုလိုပါ။ အခြားသူအား ကျွန်ုပ်တို့နှင့် စကားပြောဆိုလာစေခြင်းသာဖြစ်သည်။ ဥပမာ၊ ကျွန်ုပ်တို့၏အိမ်နီးချင်းနှင့် ဖော်ရွေပျူငှာစွာပြောဆိုသည့်အခါ မပြောင်းသာမလွှဲသာပုံစံဖြင့်မဟုတ်ဘဲ အေးဆေးစွာပြောဆိုသည်။ ကျွန်ုပ်တို့သည် နောက်ပြောဆိုမည့်စကားကို စဉ်းစားနေမည်မဟုတ်ဘဲ သူပြောသည့်စကားကို စိတ်ထဲရှိသည့်အတိုင်း အလိုအလျောက်တုံ့ပြန်ပြောဆိုသည်။ သူပြောသည့်စကားကို အမှန်တကယ်စိတ်ဝင်စားကြောင်း တင်ပြခြင်းသည် ကျွန်ုပ်တို့နှင့်ဆက်စကားပြောဆိုရန် သူ့ကိုအားပေးမှုဖြစ်စေနိုင်သည်။ အခြားသူများကို သက်သေခံရာတွင်လည်း ထပ်တူဖြစ်သင့်သည်။

^၃  ရာဇဝတ်မှု၊ လူငယ့်ပြဿနာများ၊ ဒေသဆိုင်ရာပြဿနာများ၊ ကမ္ဘာ့အခြေအနေများ၊ ရာသီဥတုစသည့်အကြောင်းကိုပင် အသုံးပြုပြီး ဖော်ရွေစွာစတင်စကားပြောဆို နိုင်ပါသည်။ လူတို့၏အသက်တာကို တိုက်ရိုက်အကျိုးသက်ရောက်နိုင်သည့် အကြောင်းအရာသည် သူတို့၏စိတ်ဝင်စားမှုကိုနှိုးဆွပေးရာတွင် အလွန်ထိရောက်မှုရှိသည်။ စကားကိုအစပြုပြောဆိုပြီးနောက် နိုင်ငံတော်သတင်းတရားဘက်သို့ မသိမသာလမ်းကြောင်းပြောင်းပေးနိုင်ပါသည်။

^၄ အေးဆေးစွာပြောဆိုရမည်ဟုဆိုရာတွင် ကြိုတင်ပြင်ဆင်မှု ပြုလုပ်ရန်မလိုသည့် သဘောမျိုးမဆိုလိုပါ။ လိုအပ်ပါသည်။ သို့သော်လည်း ပုံသေတစ်သမတ်တည်းအောက်လိုင်းထားရန် သို့မဟုတ် ဟောပြောချက်ကို အလွတ်ကျက်မှတ်ထားရန်မလိုပါ။ ယင်းသို့လုပ်ခြင်းသည် ပေါ်ပေါက်လာသည့် အခြေအနေအမျိုးမျိုးနှင့်အညီ ပြောင်းသာလွှဲသာလုပ်၍မရသည့် စကားပြောဆိုခြင်းအဖြစ်မျိုး ရောက်ရှိသွားနိုင်ပါသည်။ (၁ ကောရိန္သု ၉:၂၀-၂၃ နှိုင်းယှဉ်။) အကောင်းဆုံးပြင်ဆင်နည်းမှာ အခြေခံပြီးစကားပြောရန် သဘောမျိုးဖြင့် ကျမ်းစာမှအကြောင်းအရာတစ်ခု၊ နှစ်ခုကိုရွေးပါ။ ကျိုးကြောင်းဆင်ခြင် စာအုပ်ပါအကြောင်းအရာများကို ပြန်သုံးသပ်ခြင်းသည် ယင်းအတွက်အကူအညီဖြစ်စေမည်။

^၅ ဖော်ရွေပျူငှာမှုဖြင့်ပြောဆိုရန်အတွက် အရေးကြီးသည့်အရည်အချင်းများ– ကျွန်ုပ်တို့သည် အခြားသူများနှင့်စကားပြောဆိုသည့်အခါ လှိုက်လှိုက်လှဲလှဲနှင့် ရိုးသားပွင့်လင်းမှုရှိသင့်သည်။ အပြုံးကလေးတစ်ချက်နှင့် ရွှင်ပျသည့်အသွင်က ဤအရည်အချင်းများကို ထင်ဟပ်နေရန်ကူညီပေးသည်။ ကမ္ဘာပေါ်၌အကောင်းဆုံးသတင်းတရားကို ကျွန်ုပ်တို့ရရှိထားသည်; ယင်းသည်နှလုံးရိုးဖြောင့်သူများအတွက် ဆွဲဆောင်မှုအရှိဆုံးဖြစ်သည်။ သတင်းကောင်းကိုမျှဝေလိုသည့် အရင်းခံစိတ်ဆန္ဒ၏လှုံ့ဆော်မှုကြောင့် ကျွန်ုပ်တို့သည် သူတို့အား စိတ်ဝင်စားခြင်းကို သူတို့ခံစားရပါက သူတို့နားထောင်လိုစိတ် ရှိလာနိုင်ပါသည်။—၂ ကော. ၂:၁၇။

^၆ စကားပြောဆိုခြင်းသည် အားရရွှင်လန်းဖွယ် တွေ့ကြုံမှုများဖြစ်သင့်သည်။ ထို့ကြောင့် နိုင်ငံတော်သတင်းတရားကိုတင်ပြရာတွင် ကြင်နာမှုနှင့်လိမ္မာပါးနပ်မှုရှိသင့်သည်။ (ဂလ. ၅:၂၂; ကော. ၄:၆) အခြားသူများကို သဘောကျစွဲမှတ်သွားစေရန်ကြိုး စားပါ။ ဤနည်းဖြင့် ကျွန်ုပ်တို့သည် နှလုံးကိုထိမိရန် အစပိုင်း၌မအောင်မြင်ခဲ့သော်လည်း သူ့အား နောက်တစ်ကြိမ် သက်သေခံတစ်ဦးစကားပြောဆိုသောအခါ ပို၍လက်ခံဖွယ်ဖြစ်စေနိုင်သည်။

^၇ ဖော်ရွေပျူငှာမှုဖြင့် စတင်ပြောဆိုခြင်းသည် ရှုပ်ထွေးခက်ခဲသည့် ဟောပြောချက်တစ်ခုကို ပိုင်နိုင်စွာဟောပြောခြင်းမှမဖြစ်စေပါ။ ယင်းသည် လူတစ်ဦး စိတ်ဝင်စားသည့်အကြောင်းကို နှိုးဆွပေးခြင်းမျှသာဖြစ်သည်။ ကျွန်ုပ်တို့ကြိုတင်ပြင်ဆင် ထားလျှင် လူတို့ကို ဖော်ရွေပျူငှာစွာပြောဆိုရန် အဆင်သင့်ရှိစေသည်။ ထာဝရနိုင်ငံတော်ကောင်းချီးများဖြစ်သည့် အကောင်းဆုံးသတင်းကိုကြေညာခြင်းဖြင့် ကျွန်ုပ်တို့နှင့်တွေ့ ကြုံရသည့် လူတို့၏နှလုံးကိုထိမိရန် ကြိုးစားအားထုတ်ကြစို့။—၂ ပေ. ၃:၁၃။