အမှုဆောင်လုပ်ငန်းမှာ တိုးတက်အောင် လုပ်ဆောင်ခြင်း—အလွတ်သဘော သက်သေခံနိုင်ဖို့ အစပြုစကားပြောဆိုပါ

ဘာကြောင့် အရေးကြီး– တစ်အိမ်တက်ဆင်း အမှုဆောင်သွားတဲ့အခါ အိမ်မှာ မတွေ့နိုင်သူတွေ အများကြီး ရှိပါတယ်။ ဒါပေမဲ့ ကား၊ ရထားစီးတဲ့အခါ၊ ဆေးခန်းမှာ ထိုင်စောင့်တဲ့အခါ၊ အလုပ်နားချိန်၊ ကျောင်းနားချိန်ရောက်တဲ့အခါ သူတို့နဲ့တွေ့ပြီး စကားပြောလို့ရနိုင်တယ်။ ယေဟောဝါဘုရားရဲ့ အလိုတော်က လူတိုင်း နိုင်ငံတော်သတင်းတရား ကြားဖို့ဖြစ်တယ်။ (၁ တိ. ၂:၃၊ ၄) သူတို့ကို သက်သေခံနိုင်ဖို့ တစ်ခါတလေ ကိုယ့်ဘက်ကစပြီး စကားပြောဖို့လိုပါတယ်။

လုပ်ဆောင်နိုင်ပုံ–

သင်စကားပြောမယ့်သူကို ရွေးချယ်ပါ။ ဒီလူက ဖော်ရွေပြီး စကားပြောချင်ပုံရသလား။ အေးအေးဆေးဆေး စကားပြောလို့ရမယ့် အခြေအနေမျိုးမှာ ရှိသလား။ ကြေညာသူတချို့က အဲဒီလူနဲ့ ဦးဆုံး မျက်လုံးချင်းဆုံအောင်လုပ်ပြီး ပြုံးပြလိုက်တယ်။ သူက ပြန်ပြုံးပြရင် စကားစပြောဖို့ ကြိုးစားကြတယ်။
စကားပြောဖို့ မဝံ့မရဲဖြစ်နေရင် အတိုချုပ် အသံတိတ် ဆုတောင်းလိုက်ပါ။—နေ. ၂:၄; တ. ၄:၂၉။
သာမန်အကြောင်းအရာနဲ့ အစပြုပါ။ ဥပမာ၊ ကိုယ့်ဘက်က နှုတ်ဆက်စကား စပြောနိုင်တယ်။ ရှမာရိအမျိုးသမီးနဲ့ ယေရှု စကားပြောတဲ့အခါ နိုင်ငံတော်သတင်းတရားအကြောင်းကို ဦးဆုံးမပြောခဲ့ပါဘူး။ (ယော. ၄:၇) တစ်ခါတလေ၊ ချီးမွမ်းစကားနဲ့ အစပြုပြောနိုင်ပါတယ်။ ဥပမာ၊ “မိတ်ဆွေရဲ့ ကလေးတွေက သိပ်လိမ္မာတာပဲ” ဆိုပြီး ပြောနိုင်တယ်။ မေးခွန်းမေးပြီးတော့လည်း အစပြု ပြောနိုင်တယ်။ ဥပမာ၊ “မနေ့ညက သတင်းကြည့်ဖြစ်သေးလား” ဆိုပြီး စကားစနိုင်တယ်။
စကားစမြည် ပြောနိုင်ပြီဆိုတာနဲ့ သတင်းကောင်းဟောဖို့ အခွင့်အရေးရှာပါ။ ဒါပေမဲ့ မလောပါနဲ့။ စကားလက်ဆုံကျလာအောင် ကြိုးစားပါ။ သူတို့ သိချင်လာအောင်၊ မေးခွန်းမေးလာအောင် စိတ်ဝင်စားစရာ အကြောင်းအရာကို ပြောနိုင်ပါတယ်။ ဥပမာ၊ မိသားစုရေးရာတွေ ပြောလာပြီဆိုရင် “ကလေးတွေကို ပြုစုပျိုးထောင်ပေးနိုင်ဖို့ ယုံကြည်စိတ်ချရတဲ့ အကြံပြုချက်တွေကို ကျွန်တော်/ကျွန်မ တွေ့ထားတယ်” လို့ပြောပြနိုင်တယ်။ ကမ္ဘာ့သတင်းအကြောင်း ပြောနေတယ်ဆိုရင် “အပြောင်းအလဲဖြစ်မယ်ဆိုတဲ့ သတင်းကောင်းကို မကြာခင်က ဖတ်လိုက်ရတယ်” လို့ ပြောနိုင်တယ်။ သက်သေခံခွင့် မရလိုက်ဘဲ စကားစပြတ်သွားရင်လည်း စိတ်မပျက်ပါနဲ့။
စိတ်ဝင်စားတဲ့သူကို ပေးနိုင်ဖို့ ဝေစာတွေ၊ မဂ္ဂဇင်းတွေ ယူသွားပါ။

ဒီလအတွင်း ကြိုးစားကြည့်ပါ–

အလွတ်သဘော သက်သေခံဖို့ ပန်းတိုင်ထားပြီး တစ်ပတ်မှာ တစ်ခါလောက် အစပြုစကားပြောနိုင်အောင် ကြိုးစားကြည့်ပါ။