အရေးကြီးသောတပည့်ဖြစ်စေခြင်းလုပ်ငန်းဆိုင်ရာ တိုးတက်သောအမြင်

^၁ ယေရှုသည် ကမ္ဘာမှထွက်ခွာမသွားမီ မိမိ၏နောက်လိုက်များအား ‘လူမျိုးတကာတို့ကိုတပည့်ဖြစ်စေ’ ရန်မိန့်မှာခဲ့၏။ သို့ပြုရန် သူတို့သည် ဟောပြောခြင်းနှင့်သွန်သင်ခြင်းကင်ပိန်းကို အားသွန်ခွန်စိုက်လုပ်ဆောင်ရန်နှင့် လူနေရာမြေတစ်ပြင်လုံးအနှံ့ သူတို့၏လုပ်ငန်းကိုတိုးချဲ့ရန်လိုသည်။ (မ. ၂၈:၁၉၊ ၂၀; တ. ၁:၈) ဤတာဝန်ကို ထမ်းဆောင်ရန်အလွန်ခက်သည့် ဝန်ထုပ်တစ်ခုအဖြစ် သူတို့ယူမှတ်ခဲ့ပါသလော။ တမန်တော်ယောဟန်၏အဆိုအရ ထိုသို့မယူမှတ်ခဲ့ကြပါ။ တပည့်ဖြစ်စေသူတစ်ဦးအနေနှင့် ၆၅ နှစ်ကိုအသုံးပြုပြီးနောက် သူ ဤသို့ရေးသည်– “ပညတ်တော်များကိုစောင့်ရှောက်ခြင်းသည် ဘုရားသခင်ကိုချစ်ရာရောက်၏။ ပညတ်တော်များသည်လည်း ဝန်လေးကြသည်မဟုတ်။”—၁ ယော. ၅:၃၊ သမ္မာ။

^၂ ကနဦးခရစ်ယာန်များ၏လုပ်ငန်းဆိုင်ရာ ကျမ်းစာမှတ်တမ်းက သူတို့သည် ယေရှုခရစ်၏တပည့်များဖြစ်စေရန်ဟူသည့် မိမိတို့၏တာဝန်ကို အရေးတကြီးလုပ်ဆောင်ခဲ့ကြောင်း ဖော်ပြသည်။ (၂ တိ. ၄:၁၊ ၂) ယင်းကို သူတို့လုပ်ဆောင်ခြင်းသည် တာဝန်ရှိ၍သာမဟုတ်ဘဲ ဘုရားသခင်ကိုချီးမွမ်းရန်နှင့် အခြားသူများထံ ကယ်တင်ခြင်းမျှော်လင့်ချက်ကိုယူဆောင်ရန် မိမိတို့၏မေတ္တာပြည့်ဝသောဆန္ဒကြောင့်ဖြစ်သည်။ (တ. ၁၃:၄၇-၄၉) ထို့နောက်တွင် တပည့်ဖြစ်လာသူအားလုံးသည် သူတို့ကိုယ်တိုင် တပည့်ဖြစ်စေသူများဖြစ်လာသောကြောင့် ပထမရာစုတွင် ခရစ်ယာန်အသင်းတော်သည် တစ်မုဟုတ်ချင်းတိုးတက်ခဲ့သည်။—တ. ၅:၁၄; ၆:၇; ၁၆:၅။

^၃ တပည့်ဖြစ်စေခြင်းလုပ်ငန်းအရှိန်အဟုန်မြှင့်– ခေတ်ကာလတစ်လျှောက် အကြီးမားဆုံးသော တပည့်ဖြစ်စေခြင်းလုပ်ငန်းသည် ဤ ၂၀ ရာစုတွင် ပြီးမြောက်လျက်ရှိ၏! ယခုအချိန်ထိ သန်းနှင့်ချီသောလူတို့သည့် သတင်းကောင်းကိုလက်ခံပြီး ယင်းနှင့်အညီပြုမူခဲ့ကြပြီ။ (လု. ၈:၁၅) အချိန်သည် လက်ရှိအစီအစဉ်စနစ်အတွက် ကုန်လုပြီဖြစ်ရာ “သစ္စာနှင့်သတိပညာရှိကျေးကျွန်” သည်နှလုံးရိုးဖြောင့်သူများအတွက် သမ္မာတရားကို မြန်မြန်ဆန်ဆန်သင်ယူနိုင်စေရန် လက်နက်ကိရိယာများကို စီမံပေးထားပါသည်။—မ. ၂၄:၄၅၊ ကဘ။

^၄ ကျွန်ုပ်တို့သည် ၁၉၉၅ တွင် ထာဝရအသက်ရစေသောအသိပညာစာအုပ်ကိုရရှိကာ ၁၉၉၆ တွင် ကျွန်ုပ်တို့ထံမှဘုရားသခင်အဘယ်အရာတောင်းဆိုတော်မူသနည်းဘရိုရှာကို ဆက်လက်ရရှိခဲ့ကြသည်။ အသိပညာစာအုပ်နှင့်စပ်လျဉ်း၍ ၁၉၉၆၊ ဇန်နဝါရီ ၁၅ ရက်ထုတ် ကင်းမျှော်စင်၊ စာမျက်နှာ ၁၄ ကဤသို့ဖော်ပြသည်– “၁၉၂-မျက်နှာရှိသောဤစာအုပ်ကို အတန်အရာတိုတောင်းသည့်အချိန်အတွင်း သင်ကြားပေးနိုင်ပြီး “ထာဝရအသက်ကို တလိုတလားရှိသူ” များသည် ယေဟောဝါထံဆက်ကပ်အပ်နှံကာ နှစ်ခြင်းခံစေသည်အထိ လေ့လာမှုမှအလုံအလောက်သင်ယူရရှိနိုင်စေသင့်သည်။”—တ. ၁၃:၄၈၊ ကဘ။

^၅ ဇွန် ၁၉၉၆ ကျွန်ုပ်တို့၏နိုင်ငံတော်ဓမ္မအမှုကြားညှပ်ပါ၊ “အသိပညာစာအုပ်ဖြင့်တပည့်ဖြစ်ရန်ပြုလုပ်ပုံ” ကကျွန်ုပ်တို့အား ဤပန်းတိုင်ကိုပေးခဲ့ပါသည်– “သင်သား၏အခြေအနေနှင့် ပါရမီပေါ်မူတည်ပြီး သင်သည် လေ့လာနေစဉ်တစ်လျှောက် အလောတကြီးမဟုတ်ဘဲ တစ်နာရီ သို့မဟုတ် ထိုအချိန်လောက်တွင် အများအားဖြင့် တစ်ခန်းပြီးကောင်းပြီးနိုင်ပေမည်။ သင်ပေးသူကောသင်သားပါ ပတ်စဉ်သင်အံမှုအတွက် ချိန်းဆိုသတ်မှတ်ချိန်များကို မှန်မှန်စောင့်ထိန်းလာသည့်အခါ သင်သားအတွက် ပို၍တိုးတက်မှုကိုဖြစ်စေမည်။” ဆောင်းပါးကဤသို့ဆက်၍ဆို၏– “လူတစ်ဦးသည် အသိပညာစာအုပ်ကိုလေ့လာပြီးဆုံးသွားသည့်အခါ ဘုရားသခင်အားဝတ်ပြုရာတွင် သူ၏စိတ်ရင်းမှန်မှုနှင့် နက်ရှိုင်းသည့်စိတ်ဝင်စားမှုတို့သည် သိသိသာသာပေါ်လွင်လာရန် မျှော်လင့်သင့်သည်။” အောက်တိုဘာ ၁၉၉၆ ကျွန်ုပ်တို့၏နိုင်ငံတော်ဓမ္မအမှုမှ မေးခွန်းသေတ္တာက ဤသို့ရှင်းပြသည်– “အချိန်တိုအတွင်း ထိရောက်မှုရှိသောသွန်သင်ပေးသူသည် စိတ်ရင်းမှန်ရှိ သာမန်သင်သားတစ်ဦးအား ယေဟောဝါကိုဝတ်ပြုရန် အသိဉာဏ်ရှိသည့်ဆုံးဖြတ်ချက်ချနိုင်ဖို့ လုံလောက်သောအသိပညာရရှိရန် ကူညီပေးနိုင်မည်ဟုမျှော်လင့်သည်။”

^၆ အသိပညာစာအုပ်က အကျိုးရလဒ်ပေါ်ထွက်စေ– အမျိုးသမီးငယ်တစ်ဦးသည် နှစ်ခြင်းခံချိန်တွင် အသိပညာစာအုပ်ကိုလေ့လာခြင်းနှင့်ပတ်သက်၍ သူမ မည်သို့ခံစားခဲ့ရကြောင်း ပြန်ပြောပြသည်။ သူမသည် ထာဝစဉ်အသက်ရှင်စာအုပ်ကို အချိန်အတန်ကြာလေ့လာပြီးဖြစ်၏။ အသိပညာစာအုပ်ထွက်လာသည့်အခါ သူမကိုကျမ်းစာသင်ပေးသောညီအမသည် စာအုပ်အသစ်ဖြင့်ပြောင်း၍သင်သည်။ မကြာမီပင် မိမိဘက်မှ ဆုံးဖြတ်ချက်ချဖို့လိုသည်ကို သင်သားသိမြင်လာနိုင်ပြီး ထိုအချိန်မှစ၍ အလျင်အမြန်တိုးတက်ရန် သူမလှုံ့ဆော်ခံခဲ့ရသည်။ ယခု ကျွန်ုပ်တို့၏ညီအမဖြစ်နေပြီဖြစ်သော အမျိုးသမီးငယ်က ဤသို့ဆို၏– “ထာဝစဉ်အသက်ရှင်စာအုပ်က ယေဟောဝါကိုချစ်ဖို့ ကျွန်မကိုကူညီပေးတယ်၊ ဒါပေမဲ့ အသိပညာစာအုပ်ကတော့ ကိုယ်တော်ရဲ့အမှုတော်ဆောင်ဖို့ ဆုံးဖြတ်ချက်ချနိုင်အောင် ကူညီပေးပါတယ်။”

^၇ နောက်အမျိုးသမီးတစ်ဦးသည် မည်သို့မြန်ဆန်စွာသမ္မာတရားရခဲ့ကြောင်း သုံးသပ်ကြည့်ပါ။ သူမသည် ဒုတိယအကြိမ်သင်အံမှုပြုပြီးနောက် တိုက်နယ်ကြီးကြပ်မှူးလည်ပတ်ချိန်အတွင်း နိုင်ငံတော်ခန်းမတွင် စည်းဝေးတက်ခဲ့သည်။ ထိုအပတ်တွင် တတိယအကြိမ်သင်အံမှုပြုသောအခါ သူမသည် ယေဟောဝါထံဆက်ကပ်အပ်နှံထားပြီဖြစ်ရာ နှစ်ခြင်းမခံရသေးသောကြေညာသူတစ်ဦးဖြစ်လိုကြောင်း ပြော၏။ သူမအား ကြေညာသူတစ်ဦးအဖြစ်အတည်ပြုပေးမည့် အကြီးအကဲများနှင့်တွေ့ဆုံပြီး နောက်အပတ်တွင် လယ်ကွင်းလုပ်ငန်း၌ စတင်ပါဝင်ခဲ့သည်။ သူမသည် ကျမ်းစာသင်အံမှုတွင် အတော်ပင်အချိန်ပေးရာ သူမ၏အလုပ်မှခွင့်ရက်ယူခဲ့ရသည်၊ အကြောင်းမှာ တစ်ပတ်လျှင် နှစ်ကြိမ်သုံးကြိမ်သင်နိုင်ရန်နှင့် ဓမ္မအမှုတွင် အချိန်ပို၍သုံးနိုင်ရန်ဖြစ်သည်။ တစ်ခါတစ်ရံ သူတို့သည် တစ်ကြိမ်လျှင် နှစ်ခန်းသုံးခန်းကို သုံးသပ်ခဲ့ကြသည်။ သူမသည် ဘဝကဏ္ဍအသီးသီးတွင် သူမသင်ယူသိရှိခဲ့သမျှကို လက်တွေ့ကျင့်သုံးသည်။ လေးပတ်အတွင်း အသိပညာစာအုပ်ကို လေ့လာ၍ပြီးကာ နှစ်ခြင်းခံသည့်အထိတိုးတက်ခဲ့သည်!

^၈ ညီအမတစ်ဦး၏ခင်ပွန်းသည်သည် မိမိကိုယ်ကို “မယုံကြည်သူအိမ်ထောင်ဖက်တစ်ဦး” အဖြစ်ဖော်ပြပြောဆိုသည်။ တစ်နေ့တွင် ညီအကိုတစ်ဦးက သူ့အား အသိပညာစာအုပ်ဖြင့် ကျမ်းစာသင်အံမှုကမ်းလှမ်းကာ ပထမအကြိမ်သင်အံမှုပြုပြီးနောက် သို့မဟုတ် ယင်းနောက်တစ်ချိန်ချိန်တွင် အချိန်မရွေးရပ်ပစ်နိုင်ကြောင်းဆိုကာ ကမ်းလှမ်းခဲ့ခြင်းဖြစ်သည်။ ခင်ပွန်းဖြစ်သူသည် ငယ်ရွယ်သည့်အချိန်က ညံ့ဖျင်းသောကျောင်းသားတစ်ဦးဖြစ်ပြီး အနှစ် ၂၀ ကျော်အတွင်း မည်သည့်ဘာသာရေးစာပေကိုမျှ မလေ့လာခဲ့သော်လည်း ယင်းကို စမ်းကြည့်ရန်သဘောတူခဲ့သည်။ အသိပညာစာအုပ်လေ့လာမှုအပေါ် သူမည်သို့တုံ့ ပြန်သနည်း။ သူ ဤသို့ဆို၏– “ဒီကျမ်းစာအထောက်အကူကို ရိုးရိုးရှင်းရှင်းနဲ့ရေးထားတာတွေ့ရတော့ ကျွန်တော်တကယ်ပဲပျော်ခဲ့ရပါတယ်။ အချက်အလက်တွေဟာ အလွန်ရှင်းပြီး ကျိုးကြောင်းဆီလျော်စွာတင်ပြထားတာကြောင့် မကြာမီမှာပဲ ကျွန်တော်ဟာ နောက်တစ်ကြိမ်သင်အံမှုလုပ်တာကို မျှော်လင့်တကြီးနဲ့စောင့်မျှော်နေခဲ့ပါတယ်။ ကျွန်တော့်ကိုသင်ပေးတဲ့သူက အသင်းမဖော်ပြထားတဲ့ တပည့်ဖြစ်စေခြင်းနည်းတွေကို ကျွမ်းကျင်စွာလိုက်နာခဲ့ပါတယ်၊ ယေဟောဝါရဲ့ဝိညာဉ်တော်အကူအညီနဲ့ နောက်လေးလကြာတဲ့အခါ ကျွန်တော်နှစ်ခြင်းခံခဲ့ပါတယ်။ တပည့်ဖြစ်စေခြင်းအတွက် ကျွန်တော်တို့ရဲ့မေတ္တာကိုတိုးပွားစေမယ်၊ လယ်ကွင်းဓမ္မအမှုမှာ နှလုံးရိုးဖြောင့်သူတွေကို ဆက်ရှာဖွေမယ်၊ အသင်းမကစီမံပေးထားတဲ့ အသိပညာစာအုပ်နဲ့ အခြားကျမ်းစာအထောက်အကူတွေကိုအသုံးပြုမယ်၊ အရေးအကြီးဆုံးကတော့ ယေဟောဝါရဲ့လမ်းပြညွှန်ကြားမှုအတွက် ဆုတောင်းမယ်ဆိုရင် တပည့်များဖြစ်စေဖို့ ကူညီပေးရတဲ့အခွင့်ထူးကို ရရှိနိုင်တယ်လို့ ကျွန်တော်မှန်ကန်စွာပြောနိုင်ပါတယ်။” အထက်ပါတွေ့ ကြုံမှုများသည် အမှန်ပင်ထူးခြားသောတွေ့ ကြုံမှုများဖြစ်၏။ ကျွန်ုပ်တို့၏သင်သားအများစုသည် ဤကဲ့သို့မြန်ဆန်စွာသမ္မာတရားမရရှိကြပါ။

^၉ ခြားနားသောအရှိန်နှုန်းဖြင့် သင်သားများတိုးတက်– ဘုရားသခင့်နှုတ်ကပါဌ်တော်ကို သင်ကြားပေးသူနှင့်သင်သားနှစ်ဦးစလုံးတို့၏ စွမ်းရည်များသည် အတော်အတန်ကွာခြားနိုင်ကြောင်း အသိအမှတ်ပြုရမည်ဖြစ်သည်။ ဝိညာဏကြီးထွားမှုသည် နှေးကွေးနိုင်သည် သို့မဟုတ် မြန်ဆန်နိုင်သည်။ သင်သားအချို့သည် အခြားသူများလောက်အချိန်မကြာဘဲ လအနည်းငယ်အတွင်းတွင် တိုးတက်ကြသည်။ လူတစ်ဦး၏ဝိညာဏကြီးထွားမှုနှုန်းကို သူ၏ပညာရေးနောက်ခံ၊ ဝိညာဉ်ရေးရာများအတွက် သူ၏လေးမြတ်မှုအတိုင်းအတာနှင့် ယေဟောဝါကို သူ၏ဆည်းကပ်ဝတ်ပြုမှုအတိမ်အနက်တို့က အကျိုးသက်ရောက်စေ၏။ ကျွန်ုပ်တို့နှင့်ကျမ်းစာသင်သူတိုင်းတွင် ယုံကြည်သူများဖြစ်လာသော ရှေးဗေရိမြို့သားများပြုသကဲ့သို့ ကျမ်းစာကို နေ့စဉ်လေ့လာရန် “အလွန်ကြည်ညိုသောစေတနာစိတ်” ရှိကြသည်မဟုတ်ပါ။—တ. ၁၇:၁၁၊ ၁၂။

^၁၀ ယင်းအတွက်ကြောင့် ဧပြီ ၁၉၉၈ ကျွန်ုပ်တို့၏နိုင်ငံတော်ဓမ္မအမှုကြားညှပ်၊ “အလိုရှိသည်—နောက်ထပ်ကျမ်းစာသင်အံမှုများ” ကလက်တွေ့ကျသော ဤလမ်းညွှန်မှုကိုပေးသည်– “ကျမ်းစာသင်သားအားလုံး၏ တိုးတက်မှုနှုန်းသည် မတူပါ။ အချို့သည် အခြားသူများလောက် ဝိညာဉ်ရေးကိုစိတ်မဝင်စားကြပါ၊ သင်ပေးသည့်အရာကို မြန်မြန်ဆန်ဆန်မခံယူကြပါ။ အခြားသူများမူ အလွန်အလုပ်များ၍ တစ်ပတ်လျှင် တစ်ခန်းကုန်အောင်သုံးသပ်ဖို့ လိုအပ်သည့်အချိန်ကိုမပေးနိုင်ကြပါ။ ထို့ကြောင့် အချို့အခြေအနေများတွင် အချို့သောအခန်းများကိုပြီးစီးရန် သင်အံမှုတစ်ကြိမ်ထက်မကပြုလုပ်ရန်နှင့် တစ်အုပ်လုံးပြီးရန် နောက်ထပ်လအချို့အချိန်ယူရန်လိုအပ်ပေမည်။”

^၁၁ တပည့်ဖြစ်စေသူများသည် မျှတသည့်အမြင်ကို ထိန်းသိမ်းထား– သင်သား၏အခြေအနေနှင့်ပါရမီအရ သင်သား၏တိုးတက်မှုနှုန်းကို အကဲဖြတ်ရန်လို၏။ သင်အံမှုများကို တောင်းဆိုဘရိုရှာဖြင့်စရန် အားပေးထားသောကြောင့် အသိပညာစာအုပ်ဖြင့်မသင်မီ ယင်းဘရိုရှာကိုပြီးရန် နှစ်လမှ သုံးလအထိကြာပေမည်။ ဇွန် ၁၉၉၆ ကျွန်ုပ်တို့၏နိုင်ငံတော်ဓမ္မအမှုကြားညှပ်တွင်ဖော်ပြထားသည့် အကြံပြုချက်အားလုံးကို အသုံးချမည်ဆိုလျှင် အသိပညာစာအုပ်ကိုပြီးရန် နောက်ထပ်ခြောက်လမှ ကိုးလအထိကြာပေမည်။ အသိပညာစာအုပ်ဖြင့် သင်အံမှုကို စရုံသာရှိသေးသူအချို့သည် သင်သားအား အခြေခံကျမ်းစာသမ္မာတရားကို ပို၍မြန်ဆန်စွာသိရှိစေရန် ကူညီပေးဖို့ တောင်းဆိုဘရိုရှာကို ပြောင်း၍သင်ခဲ့ကြသည်။ ထို့နောက် အသိပညာစာအုပ်ဖြင့် သင်အံမှုကိုပြန်စသည်။ သင်အံမှုကို အသိပညာစာအုပ်ဖြင့်စခဲ့ပြီး ကောင်းစွာတိုးတက်ပါက တစ်အုပ်လုံးပြီးသည့်နောက် တောင်းဆိုဘရိုရှာကိုလေ့လာလျှင် အကျိုးရှိပေမည်၊ ဤသို့ဖြင့် ဘုရားသခင့်နှုတ်ကပါဌ်တော်၏ အခြေခံသမ္မာတရားများကို ပြန်၍မြန်မြန်ဆန်ဆန်သုံးသပ်ရာရောက်၏။ မည်သည့်အခြေအနေတွင်ဖြစ်စေ ကျွန်ုပ်တို့သည် မြန်မြန်ဆန်ဆန်ပြီးဖို့အတွက် သင်သား၏ ရှင်းလင်းစွာနားလည်သဘောပေါက်မှုကို အဟန့်အတားမဖြစ်စေလိုကြပါ။ သင်သားတိုင်းသည် ဘုရားသခင့်နှုတ်ကပါဌ်တော်ပါ အသစ်တွေ့ရသောယုံကြည်ခြင်းအတွက် အခြေခံခိုင်ဖို့လိုသည်။

^၁၂ ခေတ်ရေစီးကြောင်းတွင် ကျွန်ုပ်တို့ရောက်ရှိနေသည့်အချိန်ကို ထောက်ရှုမည်ဆိုလျှင် အခြားသူများကို သမ္မာတရားသိရှိရန်ကူညီပေးခြင်းသည် ယခင်ကထက် ပို၍အရေးတကြီးဖြစ်နေပါသည်။ ကျမ်းစာသင်အံမှုအသစ်များစရန် မခြားမလပ်ဆုတောင်းခြင်းအပြင် ကျွန်ုပ်တို့နှင့်ကျမ်းစာသင်လျက်ရှိသောသူများအတွက်လည်း ဆုတောင်းကြစို့။ ဤသို့ဖြင့် “ကပ်ကမ္ဘာကုန်သည်တိုင်အောင်” နောက်ထပ်သောတပည့်များနှစ်ခြင်းခံနေခြင်းက ကျွန်ုပ်တို့အားရွှင်လန်းစေမည်ဖြစ်သည်။—မ. ၂၈:၂၀။