“ခပ်သိမ်းသောအမှုတို့ကိုတည်ဆောက်ခြင်းအလိုငှာ စီရင်ကြလော့”

^၁ ကျွန်ုပ်တို့၏ညီအစ်ကိုများနှင့်ဆက်ဆံရာတွင် သူတို့ကိုတည်ဆောက်ပေးရန်အတွက် ကောင်းမွန်ရာကိုပြုသင့်သည်။ ယင်းက သူတို့၏ဝိညာဉ်ရေးအကျိုးစီးပွားကို ကာကွယ်ပေးခြင်းနှင့်ပတ်သက်၍ စိုးရိမ်မကင်းဖြစ်ခြင်းဟူ၍ အဓိပ္ပာယ်ရ၏။ ထုတ်ကုန်ပစ္စည်း သို့မဟုတ် ဝန်ဆောင်မှုတစ်ခုကို အားပေးမြှင့်တင်သည့် လောကီလုပ်ငန်းအမျိုးအစားအချို့တွင် ပါဝင်လုပ်ကိုင်လျှင် မိမိတို့၏လုပ်ရပ်ကြောင့် ညီအစ်ကိုများကိုထိမိ၍မလဲစေရန် သတိထားဖို့လိုသည်။—၂ ကော. ၆:၃; ဖိ. ၁:၉-၁၁။

^၂ အချို့သူတို့သည် ခရစ်ယာန်ချင်းများအား အလားအလာရှိသောဖောက်သည်များအဖြစ် ရှုမြင်ကာ စီးပွားရေးစွန့်စားလုပ်ဆောင်မှုအမျိုးမျိုးတွင် ပါဝင်ခဲ့ကြသည်။ ကုန်ပစ္စည်းရောင်းချရေးအသင်းအဖွဲ့အချို့က သူတို့၏ကိုယ်စားလှယ်များအား သူတို့ကဲ့သို့ဘာသာတူချင်းများအပါအဝင် ယောက်တိုင်းကို အလားအလာရှိသောဖောက်သည်တစ်ဦးအဖြစ် ရှုမြင်ရန်အားပေးသည်။ ညီအစ်ကိုအချို့သည် စီးပွားရေးလုပ်ငန်းတစ်ခုတွင်ပါဝင်လာရန် ၎င်းတို့ကို တိုက်တွန်းဖို့ဟူသောရည်ရွယ်ချက်ဖြင့် သက်သေခံစုဝေးမှုကြီးများကို စီစဉ်ခဲ့ကြသည်။ အခြားသူတို့မူ ယုံကြည်သူချင်းများအား အခတောင်းခံမှုမရှိသည့်ဆောင်းပါးများ၊ ဘရိုရှာများ၊ အင်တာနက်သတင်းအချက်အလက် သို့မဟုတ် တိတ်ခွေများကို ညွှန်ပြပေးခြင်းဖြင့် သူတို့၏စွန့်စားလုပ်ဆောင်မှုကို တိုးမြှင့်ကြသည်။ ခရစ်ယာန်တစ်ဦးသည် မိမိ၏ဝိညာဏညီအစ်ကိုများထံမှ အကျိုးအမြတ်ရယူရန် သီအိုကရက်တစ်အဆက်အသွယ်များကို အသုံးချခြင်းသည် သင့်လျော်ပါမည်လော။ မသင့်လျော်ပါလေ!—၁ ကော. ၁၀:၂၃၊ ၂၄၊ ၃၁-၃၃။

^၃ ညီအစ်ကိုများသတိထားသင့်– ယင်းက ခရစ်ယာန်တစ်ဦးသည် ညီအစ်ကိုတစ်ဦးနှင့်အတူ စီးပွားရေးမလုပ်ရဟု ဆိုလိုနေခြင်းမဟုတ်ပါ။ ယင်းသည် ကိုယ်ရေးကိုယ်တာကိစ္စဖြစ်၏။ သို့သော် အချို့သည် လောဘဇောကိုအားပေးသည့် စီးပွားရေးစီမံကိန်းများကို စတင်ဆောင်ရွက်ကာ ယုံကြည်သူချင်းတို့အား ရှယ်ယာဝင်များဖြစ်ဖို့၊ ရင်းနှီးမြှုပ်နှံသူများဖြစ်ဖို့ တိုက်တွန်းကြသည်။ ဤစွန့်စားမှုများစွာသည် မအောင်မြင်ခဲ့၍ ရှယ်ယာဝင်လုပ်ဆောင်သူများသည် ငွေအလုံးအရင်းလိုက် ဆုံးရှုံးခဲ့ကြရသည်။ လုပ်ငန်းတွင်ပေါင်းစပ်လုပ်ဆောင်သူများသည် အမြတ်အစွန်းမြန်မြန်ရချင်ဇောနှင့် လုပ်ခဲ့မည်ဖြစ်သော်လည်း လုပ်ငန်းမအောင်မြင်သည့်အခါ စီစဉ်သူသည် မိမိ၌တာဝန်မရှိဟု မယူမှတ်သင့်ချေ။ သူသည် စွန့်စားလုပ်ဆောင်မှုမအောင်မြင်ခဲ့လျှင် မိမိညီအစ်ကိုများ၏ဝိညာဏနှင့် ကာယကောင်းစားရေးကို မည်သို့ထိခိုက်မည်ကို ကြိုတင်၍ သေသေချာချာသုံးသပ်သင့်သည်။ သီအိုကရက်တစ်တာဝန်အနေအထားရရှိထားသူများသည် လောကီစွန့်စားလုပ်ဆောင်မှုများနှင့်ပတ်သက်၍ အထူးသတိပြုသင့်သည်၊ အကြောင်းမှာ အခြားသူတို့သည် သူတို့ကို လေးစားကာ အတော်အတန်ယုံကြည်စိတ်ချကြမည်ဖြစ်သောကြောင့်တည်း။ ထိုယုံကြည်စိတ်ချမှုကို အလွဲသုံးခြင်းသည် မှားမည်ဖြစ်၏။ ညီအစ်ကိုတစ်ဦးသည် အခြားသူများ၏လေးစားမှု ဆုံးရှုံးလျှင် မြင့်မြတ်သောလုပ်ငန်းတော်အခွင့်အရေးများကို လက်လွတ်ဆုံးရှုံးနိုင်သည်။

^၄ ကျွန်ုပ်တို့၏ပန်းတိုင်မှာ “ခပ်သိမ်းသောအမှုတို့ကို တည်ဆောက်ခြင်းအလိုငှာ စီရင်ကြ” ရန်ဖြစ်သင့်သည်။ (၁ ကော. ၁၄:၂၆) ကျွန်ုပ်တို့သည် အသင်းတော်ထဲသို့ စီးပွားရေးလုပ်ဆောင်မှုများကို အစပြုယူဆောင်လာခြင်း သို့မဟုတ် ယင်းတို့ကိုမြှင့်တင်ခြင်းဟူသမျှကို မလုပ်ကြရပါ။ ထိုသို့သောအရာများသည် ကျွန်ုပ်တို့အတူတကွစုဝေးရသည့် ကျမ်းဆိုင်ရာအကြောင်းရင်းများနှင့် လုံးဝမပတ်သက်ပါ။—ဟေဗြဲ ၁၀:၂၄၊ ၂၅။