အသင်းတော်စာအုပ်ကြီးသင်တန်းအစီအစဉ်ကကျွန်ုပ်တို့ကိုကူညီပေးပုံ

၁။ ပတ်စဉ်အစည်းအဝေးငါးခုသည် ကျွန်ုပ်တို့ကို မည်သို့ကူညီပေးသနည်း။

^၁ ပတ်စဉ်အစည်းအဝေးငါးခုသည် ကျင်းပသည့်ပုံစံနှင့် ရည်ရွယ်ချက်ကွဲပြား၏။ သို့သော် ယင်းတို့အားလုံးသည် “မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကို ကျင့်စေခြင်းငှာလည်းကောင်း တိုက်တွန်းနှိုးဆော်ရသောအခွင့်ကိုရှာ၍ အချင်းချင်းတစ်ယောက်ကိုတစ်ယောက် ထောက်စာကြည့်ရှု” နိုင်ရန် ကူညီပေးရာတွင် အရေးပါသည်။ (ဟေဗြဲ ၁၀:၂၄၊ ၂၅) အသင်းတော်စာအုပ်ကြီးသင်တန်းအစီအစဉ်၏ ထူးခြားပြီးအကျိုးပြုသောကဏ္ဍအချို့ကား အဘယ်နည်း။

၂။ အုပ်စုငယ်အဖြစ်စည်းဝေးသည့် စာအုပ်ကြီးသင်တန်းမှ အဘယ်အကျိုးကျေးဇူးများရရှိသနည်း။

^၂ ဝိညာဉ်ရေးတိုးတက်ရန် ကူညီပေး– စာအုပ်ကြီးသင်တန်းတက်ရောက်သူဦးရေသည် အခြားအသင်းတော်အစည်းအဝေးများ တက်ရောက်သူဦးရေထက် အလွန်နည်းလေ့ရှိသည်။ ထို့ကြောင့် ဝိညာဉ်ရေးကိုထောက်မပေးနိုင်သော ပေါင်းသင်းမှုပြုရန် ပိုလွယ်ကူစေသည်။ (သု. ၁၈:၂၄) သင့်စာအုပ်ကြီးသင်တန်းအုပ်စုရှိသူတိုင်းနှင့် ရင်းနှီးရန် ကြိုးစားနေပါသလော၊ ဓမ္မအမှုတွင် သင်နှင့်အတူပါဝင်ရန် သူတို့တစ်ဦးစီကို ဖိတ်ခေါ်နိုင်သလော။ ထို့ပြင် စာအုပ်ကြီးသင်တန်းအစီအစဉ်ကြောင့် သင်တန်းကြီးကြပ်မှူးသည် အုပ်စုရှိသူတိုင်း၏အခြေအနေများကို သိနိုင်ပြီး အားပေးနိုင်သည်။—သု. ၂၇:၂၃။

၃။ စာအုပ်ကြီးသင်တန်းအစီအစဉ်သည် မှတ်ချက်ပေးရန်နှင့် ကျမ်းစာသင်သားများ တက်ရောက်ရန် မည်သို့အားပေးမှုဖြစ်စေသနည်း။

^၃ သင့်ကျမ်းစာသင်သားများကို စာအုပ်ကြီးသင်တန်းတက်ရောက်ရန် ဖိတ်ခေါ်ပါသလော။ လူပိုများသောအစည်းအဝေးများကို တက်ရောက်ရန် တွန့်ဆုတ်သော စိတ်ဝင်စားသူများသည် အထူးသဖြင့် နေအိမ်တွင်ကျင်းပသည့် လူနည်းသောအစည်းအဝေးကို တက်ရောက်လိုပေမည်။ ရင်းနှီးနွေးထွေးသောဝန်းကျင်က ကလေးများနှင့်လူသစ်များအတွက် မှတ်ချက်ပေးရန် လွယ်ကူစေသည်။ အုပ်စုငယ်ဖြစ်သောကြောင့် မှတ်ချက်ပေးရန်နှင့် ယေဟောဝါကိုချီးမွမ်းရန် အခွင့်အရေးပိုရရှိသည်။—ဆာ. ၁၁၁:၁။

၄။ စာအုပ်ကြီးသင်တန်းအစီအစဉ်သည် မည်သည့်နည်းများဖြင့် အဆင်ပြေနိုင်သနည်း။

^၄ စာအုပ်ကြီးသင်တန်းများကို ဒေသအတွင်း အဆင်ပြေသည့်နေရာများတွင် ကျင်းပလေ့ရှိသည်။ လူတိုင်းကို မိမိတို့နှင့်အနီးဆုံးနေရာတွင် တက်ရောက်ရန် တာဝန်ပေးနိုင်မည်မဟုတ်သော်လည်း တာဝန်ကျသောအုပ်စုတွင် တက်ရောက်ခြင်းသည် အခြားအသင်းတော်အစည်းအဝေးများ တက်ရောက်ရခြင်းထက် ပိုနီးပေမည်။ စာအုပ်ကြီးသင်တန်းကျင်းပရာ နေရာသည် လယ်ကွင်းလုပ်ငန်းစုဆုံမှုအတွက် အဆင်ပြေမည့်နေရာလည်း ဖြစ်ပေမည်။

၅။ စာအုပ်ကြီးသင်တန်းကြီးကြပ်မှူးထံမှ ဓမ္မအမှုအတွက် မည်သို့အကူအညီရနိုင်သနည်း။

^၅ ဓမ္မအမှုအတွက်ကူညီပေး– သင်တန်းကြီးကြပ်မှူးသည် အုပ်စုရှိသူများ ဓမ္မအမှုတွင် မှန်မှန်၊ အဓိပ္ပာယ်ရှိရှိ ပျော်ရွှင်စွာပါဝင်နိုင်ရန် စိတ်ဝင်တစားကူညီပေးသည်။ ထို့ကြောင့် သူသည် အုပ်စုရှိသူတိုင်းနှင့် အတူတကွလုပ်ဆောင်ပြီး ဓမ္မအမှုကဏ္ဍအသီးသီးတွင် ကူညီပေးသည်။ သင်သည် ပြန်လည်ပတ်မှုပြုလုပ်ခြင်းကဲ့သို့သော ဓမ္မအမှုကဏ္ဍတစ်ခုတွင် အခက်အခဲရှိပါက သင်တန်းကြီးကြပ်မှူးအား ပြောပြပါ။ သူသည် အုပ်စုရှိ အတွေ့အကြုံရင့်ကျက်သော ကြေညာသူနှင့်အတူ သင် အမှုဆောင်ရန် စီစဉ်ပေးနိုင်သည်။ သင်တန်းကြီးကြပ်မှူး သင်တန်းကိုင်စဉ် သူ၏သွန်သင်နည်းစနစ်ကောင်းများကို ဂရုပြုမှတ်သားခြင်းဖြင့် ကျမ်းစာသင်အံမှုများ ပြုလုပ်ရာတွင် သင်၏သွန်သင်ခြင်းစွမ်းရည် တိုးတက်လာပါလိမ့်မည်။—၁ ကော. ၄:၁၇။

၆။ စာအုပ်ကြီးသင်တန်းအစီအစဉ်မှ အကျိုးအပြည့်အဝရယူရန် အဘယ်ကြောင့် ကြိုးစားသင့်သနည်း။

^၆ အသင်းတော်စာအုပ်ကြီးသင်တန်းသည် ကောင်းချီးတစ်ရပ်ဖြစ်၏။ ယေဟောဝါထံမှ ထိုမေတ္တာပါအစီအစဉ်သည် ကျွန်ုပ်တို့အသက်ရှင်နေသည့် ခဲယဉ်းသောကာလအတွင်း ဝိညာဉ်ရေးခိုင်မြဲနေစေရန် ကူညီပေးသည်။—ဆာ. ၂၆:၁၂။