သင့်ကိုကြည့်ရှုခြင်းမှ အခြားသူများ အဘယ်အရာ သင်ယူရသနည်း

^၁ ယေရှု ဤသို့ပြော၏– “ငါ့ထမ်းပိုးကိုထမ်း၍ ငါ့ထံမှသင်ယူကြလော့။” (မ. ၁၁:၂၉) ကိုယ်တော်သည် အပြောအားဖြင့်သာမဟုတ်ဘဲ ပုံသက်သေကောင်းပြခြင်းဖြင့် အခြားသူတို့ကို သင်ပေးခဲ့သည်။ တပည့်များ ယေရှုထံမှ အဘယ်အရာသင်ယူခဲ့သည်ကို စဉ်းစားကြည့်ပါ။ ကိုယ်တော်သည် နူးညံ့သိမ်မွေ့ပြီး ကြင်နာတတ်ကာ မေတ္တာရှိ၏။ (မ. ၈:၁-၃; မာ. ၆:၃၀-၃၄) ကိုယ်တော်သည် အမှန်ပင် နှိမ့်ချမှုရှိ၏။ (ယော. ၁၃:၂-၅) သူတို့သည် ဓမ္မအမှုတွင် ယေရှုနှင့်အတူ လုပ်ဆောင်သောအခါ ကိုယ်တော်သည် အခြားသူများအားအမှန်တရားကိုထိရောက်စွာသွန်သင်သော မမောနိုင်သည့် လုပ်သားတစ်ဦးဖြစ်ကြောင်းတွေ့ရှိခဲ့သည်။ (လု. ၈:၁; ၂၁:၃၇၊ ၃၈) ဓမ္မအမှုတွင် ကျွန်ုပ်တို့ကို အခြားသူများ ဂရုတစိုက်ကြည့်ရှုခြင်းမှ အဘယ်သက်ရောက်မှုရှိသနည်း။

^၂ အိမ်ရှင်များ– ကျွန်ုပ်တို့၏ ဣန္ဒြေရှိသောအဝတ်အစား၊ အမူအကျင့်ကောင်းနှင့် လူတို့ကိုစိတ်ရင်းမှန်ဖြင့်ပုဂ္ဂိုလ်ရေးစိတ်ဝင်စားမှုပြခြင်းတို့က အိမ်ရှင်များအပေါ် များစွာသက်ရောက်မှုရှိနိုင်သည်။ (၂ ကော. ၆:၃; ဖိ. ၁:၂၇) သမ္မာကျမ်းစာကို ကျွန်ုပ်တို့ မကြာခဏအသုံးပြုသည်ကို သူတို့သတိပြုမိကြသည်။ ကျွန်ုပ်တို့သည် အခြားသူတို့စကားပြောချိန်တွင် လေးစားစွာနားထောင်ခြင်းက သူတို့ကို စိတ်စွဲမှတ်စေသည်။ ဤကဏ္ဍတွင် ပုံသက်သေကောင်းပြခြင်းက လူတို့အား နိုင်ငံတော်သတင်းတရားကို နှစ်သက်စေနိုင်ပုံကို မည်သည့်အခါမျှလျှော့မတွက်ပါနှင့်။

^၃ ကျွန်ုပ်တို့၏ ညီအစ်ကိုများ–  ကျွန်ုပ်တို့သည် ညီအစ်ကိုများအပေါ် အပြုသဘောသက်ရောက်မှုရှိနိုင်ပုံကိုလည်း စဉ်းစားကြည့်ပါ။ ဓမ္မအမှုတွင် ကျွန်ုပ်တို့စိတ်ထက်သန်မှုသည် အခြားသူတို့ကိုလည်း ကူးစက်စေနိုင်သည်။ သံကိုသံခြင်းထက်စေသကဲ့သို့ ကျွန်ုပ်တို့၏ကောင်းစွာပြင်ဆင်ထားသောတင်ဆက်မှုက အခြားသူများ၏ ဟောပြောခြင်းစွမ်းရည်ကို သွေးပေးရာရောက်သည်။ (သု. ၂၇:၁၇) စိတ်ဝင်စားသူများနှင့်ပတ်သက်သည့် တိကျသောမှတ်တမ်းထားပြီး သူတို့ထံချက်ချင်းပြန်လည်ပတ်ရာတွင် ကျွန်ုပ်တို့၏လုံ့လစိုက်ထုတ်မှုက အခြားသူများကို ယင်းအတိုင်းလုပ်ဆောင်ရန် လှုံ့ဆော်ပေးသည်။ ကျွန်ုပ်တို့၏ဓမ္မအမှုကို အပြည့်အ၀ပြီးမြောက်စေခြင်းက လုပ်ဖော်ဆောင်ဖက်များအပေါ် ကောင်းသောသြဇာ လွှမ်းမိုးပါလိမ့်မည်။—၂ တိ. ၄:၅။

^၄ သင့်ပြုမူပြောဆိုပုံနှင့် ပုံသက်သေက အခြားသူများအပေါ် မည်သို့သက်ရောက်မှုရှိပုံကို အခါအားလျော်စွာ ဆန်းစစ်ပါလေ။ ကျွန်ုပ်တို့၏ပုံသက်သေကောင်းက ယေဟောဝါကို ရွှင်လန်းစေမည်ဖြစ်ပြီး တမန်တော်ပေါလု ဤစကားများပြောချိန်တွင် ခံစားရသကဲ့သို့ ကျွန်ုပ်တို့လည်း ခံစားရမည်– “ငါသည် ခရစ်တော်ကို အတုယူသကဲ့သို့ သင်တို့လည်း ငါ့ကို အတုယူကြလော့။”—၁ ကော. ၁၁:၁။

[လေ့လာရန်မေးခွန်းများ]

၁။ ယေရှုကို ကြည့်ရှုခြင်းမှ တပည့်များ အဘယ်အရာသင်ယူခဲ့ရသနည်း။

၂။ ဓမ္မအမှုတွင် ကျွန်ုပ်တို့၏ကောင်းသောအသွင်အပြင်နှင့် အပြုအမူက အိမ်ရှင်များအား မည်သို့စိတ်စွဲမှတ်စေသနည်း။

၃။ ကျွန်ုပ်တို့သည် ညီအစ်ကိုများအပေါ် အဘယ်အပြုသဘောသက်ရောက်မှု ရှိနိုင်သနည်း။

၄။ ကျွန်ုပ်တို့၏ပုံသက်သေကို အခါအားလျော်စွာ အဘယ်ကြောင့်ဆန်းစစ်သင့်သနည်း။